Chapter 94

gajopākhyānaṃ nāma sargaḥ |
caturnavatitamaḥ sargaḥ |
śikhidhvajaḥ |
maṇisādhanavanyebhabandhanādyamarātmaja |
sūcitaṃ satkathājālaṃ punarme prakaṭīkuru || 1 ||
[Analyze grammar]

cūḍālā |
vākyārthadṛṣṭerniṣpattyā hṛdgṛhe cittabhittiṣu |
śṛṇuṣva satkathācitraṃ citramunmīlayāmi te || 2 ||
[Analyze grammar]

yo'sau śāstrārthakuśalastattvajñāne tvapaṇḍitaḥ |
ratnasaṃsādhane proktaḥ sa tvameva mahīpate || 3 ||
[Analyze grammar]

tajjño bhavasi śāstreṣu ravirmerutaṭeṣviva |
tattvajñāne tu viśrānto na tvaṃ dṛṣadivāmbare || 4 ||
[Analyze grammar]

viddhi cintāmaṇiṃ sādho sarvatyāgamakṛtrimam |
tamantaṃ sarvaduḥkhānāṃ saṃsādhayasi śuddhadhīḥ || 5 ||
[Analyze grammar]

sarvatyāgena śuddhena sarvamāsādyate'nagha |
sarvatyāgo hi sāmrājyaṃ kiṃ cintāmaṇinā bhavet || 6 ||
[Analyze grammar]

siddhaḥ sa sarvasantyāgaḥ sādho saṃsādhitastava |
kharvīkurvañjagadbhūtiṃ vindhyasyātmodayo yathā || 7 ||
[Analyze grammar]

santyaktaṃ bhavatā rājyaṃ sadāradhanabāndhavam |
brahmaṇeva jagatsargavyāpāraḥ svaniśāgame || 8 ||
[Analyze grammar]

svadeśasyātidūrasthamāgato'sīmamāśramam |
bhuvo'ntamiva viśrāntyai vainateyaḥ sakacchapaḥ || 9 ||
[Analyze grammar]

kevalaṃ sarvasantyāge śeṣitāhammatistvayā |
mṛṣṭākhilakalaṅkena svasattevānilena khe || 10 ||
[Analyze grammar]

manomātre hṛdastyakte yāvatte yāti pūrṇatām |
tyāgastāvadvikalpastvāṃ khamambuda ivāvṛṇot || 11 ||
[Analyze grammar]

nāyaṃ sa paramānandaḥ sarvatyāgo mahodayaḥ |
ko'pyuccairanya evāsau cirasādhyo mahāniti || 12 ||
[Analyze grammar]

cintayeti gate vṛddhiṃ saṅkalpagrahaṇe śanaiḥ |
vātyayeva vanaspande tyāgaḥ proḍḍīya te gataḥ || 13 ||
[Analyze grammar]

tyāgitā syātkutastasya cintāmapyāvṛṇoti yaḥ |
pavanaspandayuktasya nisspandatvaṃ kutastaroḥ || 14 ||
[Analyze grammar]

cintaiva cittamityāhuḥ saṅkalpetaranāmakam |
tasyāmeva sphurantyāṃ tu cittaṃ tyaktaṃ kathaṃ bhavet || 15 ||
[Analyze grammar]

citte gṛhīte trijagajjālabījakaṇe kṣaṇāt |
kathaṃ sampadyate sādho sarvatyāgo nirañjanaḥ || 16 ||
[Analyze grammar]

saṅkalpagrahaṇenāntastyāgaḥ proḍḍīya te gataḥ |
śabdasaṃśravaṇenāṅga yathā grāmavihaṅgamaḥ || 17 ||
[Analyze grammar]

niścintatvadhanaṃ sarvaṃ tyāga ādāya te gataḥ |
āmantryāpūjito yāti yaḥ sa duḥkhaṃ karoti hi || 18 ||
[Analyze grammar]

sarvatyāgamaṇāvevaṃ gate kamalalocana |
tapaḥkācamaṇirdṛṣṭastvayā saṅkalpacakṣuṣā || 19 ||
[Analyze grammar]

tvayā tasmiṃstapasyeva duḥkhe dṛṣṭibhramodite |
grāhyaikabhāvanā baddhā jalendau śiśunā yathā || 20 ||
[Analyze grammar]

avāsanamanārabhya kṛtānandā savāsanā |
ādyantamadhyaviṣamā duḥkhāyaiva tapaḥkriyā || 21 ||
[Analyze grammar]

amitānandamutsṛjya susādhaṃ yaḥ pravartate |
mite vastuni dussādhe svātmahā sa śaṭhaḥ smṛtaḥ || 22 ||
[Analyze grammar]

sarvatyāgaḥ samārabhya na viniṣpāditastvayā |
tapoduḥkhaikatajjñena baddhena vanasadmani || 23 ||
[Analyze grammar]

rājyabandhādviniṣkramya gajavadduḥkhapūrite |
vanavāsābhidhe sādho baddho'si dṛḍhabandhane || 24 ||
[Analyze grammar]

dviguṇā eva te cintāśśītavātātapādayaḥ |
bandhanādadhikaṃ manye vanavāsamajānataḥ || 25 ||
[Analyze grammar]

cintāmaṇirmayā prāpta ityalaṃ buddhavānasi |
na labdhavānbhavān sādho sphaṭikasyāpi khaṇḍikām || 26 ||
[Analyze grammar]

ityetadaṅga maṇiyatnakathāsamānaṃ samyaṅ mayā prakaṭitaṃ tava padmanetra |
udbodhya bodhamamalaṃ svayameva buddhyā yadvacmi tatpariṇatiṃ kuru cittakośe || 27 ||
[Analyze grammar]