Chapter 92

śikhidhvajāvabodhanaṃ nāma sargaḥ |
dvinavatitamaḥ sargaḥ |
cūḍālā |
asti kaścitpumāñchrīmān sthānaṃ nityaviruddhayoḥ |
guṇalakṣmyoraśeṣeṇa yathābdhirvaḍavāmbunoḥ || 1 ||
[Analyze grammar]

kalāvāñchāstrakuśalo vyavahāre vicakṣaṇaḥ |
sarvasaṅkalpasīmāntaṃ na tu jānātyajaṃ padam || 2 ||
[Analyze grammar]

anantayatnasaṃsādhye sa cintāmaṇisādhane |
pravṛtto vāḍavo vahnirabdhisaṃśoṣaṇe yathā || 3 ||
[Analyze grammar]

tasya yatnena mahatā kālenādhyavasāyinaḥ |
siddhaścintāmaṇiḥ kiṃ vā na sidhyatyunnatātmanām || 4 ||
[Analyze grammar]

pravṛttimudyamaṃ prajñāṃ prayuṅkte cedakhedavān |
akiñcano'pi śakratvaṃ tadavāpnotyavighnataḥ || 5 ||
[Analyze grammar]

maṇimagre sthitaṃ prāptaṃ hastaprāpyaṃ dadarśa saḥ |
merorudayaśṛṅgastho munirindumivoditam || 6 ||
[Analyze grammar]

babhūva maṇirājendre na tu niścayavānasau |
rājye jhagiti samprāpte sudīna iva pāmaraḥ || 7 ||
[Analyze grammar]

idaṃ sañcintayāmāsa manasā smayaśālinā |
samprāptopekṣayā dīrghaduḥkhasambhramabhāvinā || 8 ||
[Analyze grammar]

ayaṃ maṇirmaṇirnāyaṃ maṇiścettadbhavenna saḥ |
spṛśāmi na spṛśāmyenaṃ kadācitsparśato vrajet || 9 ||
[Analyze grammar]

naitāvataiva kālena maṇīndraḥ kila sidhyati |
yatnenājīvitāntena sidhyatītyāgamakramaḥ || 10 ||
[Analyze grammar]

kriyānikūṇitenākṣṇā lolālātatalopamam |
ratnālokaṃ prapaśyāmi dvicandratvamiva bhramāt || 11 ||
[Analyze grammar]

kuta etāvatī sphītā bhāgyasampanmamātatā |
adhunaiva yadāpnomi maṇīndraṃ sarvasiddhidam || 12 ||
[Analyze grammar]

kecideva mahāntaste mahābhāgyā bhavanti hi |
yeṣāmalpena kālena prayāntyabhimukhaṃ śriyaḥ || 13 ||
[Analyze grammar]

ahamalpatapāḥ sādhurvarāko mānuṣaḥ kila |
siddhayaḥ kathamāyānti māmabhāgyaikabhājanam || 14 ||
[Analyze grammar]

evaṃ vikalpasaṅkalpaiściramajñaḥ parāmṛśan |
na maṇigrahaṇe yatnamakaronmaurkhyamohitaḥ || 15 ||
[Analyze grammar]

na yadā yena labdhavyaṃ na tatprāpnotyasau tadā |
cintāmaṇiravāpto'pi durdhiyā helayojjhitaḥ || 16 ||
[Analyze grammar]

iti tasmin sthite yāto maṇiruḍḍīya siddhayaḥ |
tyajanti hyavamantāraṃ śarā guṇamivojjhitāḥ || 17 ||
[Analyze grammar]

hṛtvā prāksampadaḥ puṃsaḥ sa yātaḥ siddhayaḥ kila |
āgatāḥ samprayacchanti sarvaṃ yātā harantyalam || 18 ||
[Analyze grammar]

pumānbhūyaḥ kriyāyatnaṃ cakre ratnendrasādhane |
nodvijante hi kāryeṣu janā adhyavasāyinaḥ || 19 ||
[Analyze grammar]

dadarśātha kacadrūpaṃ kācakhaṇḍamapaṇḍitaḥ |
hasadbhirvañcakaiḥ siddhaiḥ purastyaktamalakṣitaiḥ || 20 ||
[Analyze grammar]

ayaṃ cintāmaṇiriti mūḍhastasmin sa vastutām |
bubudhe mohito hyajño mṛdaṃ hemeti paśyati || 21 ||
[Analyze grammar]

aṣṭau ṣaṣṭiṃ dviṣanmitraṃ rajjuṃ sarpaṃ sthalaṃ jalam |
candrau dvau kurute citte śiśormoho'mṛtaṃ viṣam || 22 ||
[Analyze grammar]

taṃ dagdhamaṇimādāya prāktanīṃ sa śriyaṃ jahau |
sarvaṃ cintāmaṇerasmātprāpyate kiṃ dhanairiti || 23 ||
[Analyze grammar]

deśo'yamasukho rūkṣo janaiḥ pāpibhirāvṛtaḥ |
kiṃ tadgehaṃ hataprāyaṃ ke nāma mama bandhavaḥ || 24 ||
[Analyze grammar]

dūraṃ gatvā yathākāmaṃ sukhaṃ tiṣṭhāmi sampadā |
ityādāya maṇiṃ mūḍhaśśūnyaṃ kānanamāyayau || 25 ||
[Analyze grammar]

tatra kācadalenāsau tena tāmāpadaṃ yayau |
kajjalādreriva niśā maurkhyasyaivāṅga yā samā || 26 ||
[Analyze grammar]

duḥkhāni maurkhyavibhavena bhavanti yāni naivāpadā na ca jarāmaraṇena tāni |
sarvāpadāṃ śirasi tiṣṭhati maurkhyamekaṃ kṛṣṇaṃ janasya vapuṣāmiva keśajālam || 27 ||
[Analyze grammar]