Chapter 90

sukhavicārayogopadeśo nāma sargaḥ |
navatitamaḥ sargaḥ |
cūḍālā |
ātmasvabhāvavaśato jātaṃ jagadidaṃ mahat |
sthitiṃ vāsanayābhyetya dharmādharmavaśe sthitam || 1 ||
[Analyze grammar]

vāsanāṃśaṃ samānīya dharmādharmairna gṛhyate |
tato na jāyate mukta iti no darśanaṃ mune || 2 ||
[Analyze grammar]

śikhidhvajaḥ |
atyudāraṃ mahārthaṃ ca vakṣi tvaṃ vadatāṃ vara |
anubhūtimupārūḍhaṃ gūḍhaṃ ca paramārthavat || 3 ||
[Analyze grammar]

tvadvākyavibhavenādya śrutenānena sundara |
pītenevendunā rāhurantaryāto'smi śītatām || 4 ||
[Analyze grammar]

tatsamāsena tāṃ tāvadātmotpattiṃ vadāśu me |
tataśśroṣyāmi yatnena jñānagarbhāṃ giraṃ tava || 5 ||
[Analyze grammar]

tena padmajaputreṇa muninā nāradena tat |
kva kṛtaṃ vīryamāryeṇa kathayārya yathāsthitam || 6 ||
[Analyze grammar]

cūḍālā |
tato nibadhnatā tena manomattamataṅgajam |
vivekavipulālāne śuddhabuddhivaratrayā || 7 ||
[Analyze grammar]

tadvīryaṃ kalpakālāgnigalitendudravopamam |
rasānāṃ pāratādīnāṃ divyānāmanujaṃ navam || 8 ||
[Analyze grammar]

muninā pārśvage kumbhe sphāṭike visaradrucau |
adrute vidrutākāraṃ candre candramivārpitam || 9 ||
[Analyze grammar]

ratnaśailairvṛtaḥ kāntaistale pārśveṣu cābhitaḥ |
gambhīrakukṣiḥ sudṛḍhaścācalāhananakṣamaḥ || 10 ||
[Analyze grammar]

saṅkalpitena kṣīreṇa sa kumbhastena pūritaḥ |
amṛtāpūrabhinnena vidhinevāmṛtārṇavaḥ || 11 ||
[Analyze grammar]

tatra māsaṃ gato vṛddhiṃ munimantrāhutikramaiḥ |
amṛtātmā śubho garbha indorindurivānujaḥ || 12 ||
[Analyze grammar]

induṃ māsa ivāpūrṇaṃ māsena suṣuve ghaṭaḥ |
garbhaṃ kamalapattrākṣaṃ prasūnamiva mādhavaḥ || 13 ||
[Analyze grammar]

paripūrṇasamastāṅgaḥ kumbhādgarbhaḥ sa niryayau |
induḥ sūkṣmādivāmbhodheraparaḥ kṣayavarjitaḥ || 14 ||
[Analyze grammar]

dinaiḥ katipayaireva vṛddhimabhyājagāma saḥ |
aprameyāṅgasaundaryaśśuklapakṣe śaśī yathā || 15 ||
[Analyze grammar]

sarvasaṃskārasampanne sa tasminnārado muniḥ |
bhāṇḍādbhāṇḍa ivāśeṣaṃ vidyādhanamayojayat || 16 ||
[Analyze grammar]

dinaiḥ katipayaireva vijñātāśeṣavāṅmayam |
cakārainaṃ munivaraḥ pratibimbamivātmanaḥ || 17 ||
[Analyze grammar]

tenārājata putreṇa muninā munināyakaḥ |
ratnādrau pratibimbena sadyodita ivoḍurāṭ || 18 ||
[Analyze grammar]

athainaṃ putramādāya brahmalokaṃ sa nāradaḥ |
jagāma tatra pitaraṃ brahmāṇaṃ cābhyavādayat || 19 ||
[Analyze grammar]

kṛtābhivādanaṃ brahmā pautramādāya taṃ tadā |
abhivāditavedādiṃ svayamaṅke nyaveśayat || 20 ||
[Analyze grammar]

athāśīrvādamātreṇa sarvajñaṃ jñānapāragam |
pautraṃ taṃ kumbhanāmānaṃ cakāra kamalodbhavaḥ || 21 ||
[Analyze grammar]

sādho so'yamahaṃ pautraḥ kumbho'haṃ padmajanmanaḥ |
putro'haṃ nāradamuneḥ kumbhanāmāsmi kumbhajaḥ || 22 ||
[Analyze grammar]

nivasāmyabjajapure pitrā saha yathāsukham |
catvāraḥ suhṛdo vedā mama līlā vilāsinī || 23 ||
[Analyze grammar]

mātṛṣvasā me gāyatrī mātā mama sarasvatī |
brahmaloke mama gṛhaṃ pautrastatrāsmi susthitaḥ || 24 ||
[Analyze grammar]

yathākāmamaśeṣāṇi jaganti viharāmyaham |
līlayā paripūrṇatvānna tu kāryeṇa kenacit || 25 ||
[Analyze grammar]

rājarṣe tena me pādau patato me na bhūtale |
rajaḥ spṛśati nāṅgāni glāniṃ nāyāti me vapuḥ || 26 ||
[Analyze grammar]

adyākāśapathā gacchandṛṣṭavāṃstvāmahaṃ puraḥ |
iha tenāgato'smyaṅga sarvaṃ kathitavāniti || 27 ||
[Analyze grammar]

eṣo'hamityakhilameva yathānubhūtaṃ te varṇitaṃ nanu mayā vanavāsatajjña |
santo hyasaṅkathanamāryasamāgameṣu nindantyalaṃ subhaga saṃvyavahāradakṣāḥ || 28 ||
[Analyze grammar]

vālmīkiḥ |
ityuktavatyatha munau divaso jagāma sāyantanāya vidhaye'stamino jagāma |
snātuṃ sabhā kṛtanamaskaraṇā jagāma śyāmākṣaye ravikaraiśca sahājagāma || 29 ||
[Analyze grammar]