Chapter 88

kirāṭopākhyānaṃ nāma sargaḥ |
aṣṭāśītitamaḥ sargaḥ |
vasiṣṭhaḥ |
tataśśikhidhvajo rājā tattvajñānapadaṃ vinā |
ājagāma paraṃ mohaṃ yāmāndhyamiva bhūtalam || 1 ||
[Analyze grammar]

duḥkhāgnidīpitamanā manāgapi vibhūtiṣu |
tāsvapīṣṭopanītāsu na reme'gniśikhāsviva || 2 ||
[Analyze grammar]

ekānteṣu diganteṣu nirjhareṣu guhāsu ca |
ājagāma ratiṃ jantumukteṣu vyasanī yathā || 3 ||
[Analyze grammar]

rāghava tvamivāśeṣāḥ sāntvānunayacodanaiḥ |
prārthitaḥ kāryate bhṛtyairmahīpo divasakriyāḥ || 4 ||
[Analyze grammar]

nityamuddāmavairāgyaḥ parivrāḍiva śāntadhīḥ |
nindanneva mahābhogānabhoktaiva śriyāṃ sthitaḥ || 5 ||
[Analyze grammar]

dadāvatitarāṃ dānaṃ gobhūmikanakādikam |
devebhyo brāhmaṇebhyaśca svajanebhyaśca mānadaḥ || 6 ||
[Analyze grammar]

cacāra ca tapaḥ kartuṃ kṛcchracāndrāyaṇādikam |
paribabhrāma tīrthāni vanānyāyatanāni ca || 7 ||
[Analyze grammar]

sa tathāpi viśokatvaṃ manāgapi na labdhavān |
anidhānāṃ khananbhūmiṃ nidhānārthī nidhiṃ yathā || 8 ||
[Analyze grammar]

rātrindinamanantena śuṣyañchokakṛśānunā |
cintayā cintayāmāsa saṃsāravyādhibheṣajam || 9 ||
[Analyze grammar]

cintāparavaśo dīno rājyaṃ paśyanviṣopamam |
mahāvibhavamapyagre nāpaśyatkhinnayā dhiyā || 10 ||
[Analyze grammar]

athaikadaikāntagatāṃ cūḍālāmaṅkamāgatām |
idaṃ madhurayā vācā samuvāca śikhidhvajaḥ || 11 ||
[Analyze grammar]

śikhidhvajaḥ |
bhuktaṃ rājyaṃ ciraṃ kālaṃ bhuktā vibhavabhūmayaḥ |
adhunāsmi virāgeṇa yukto gacchāmi kānanam || 12 ||
[Analyze grammar]

na sukhāni na duḥkhāni nāpado na ca sampadaḥ |
kroḍīkurvanti bhūtāni muniṃ vananivāsinam || 13 ||
[Analyze grammar]

na deśabhaṅgasammoho na saṅgrāmajanakṣayaḥ |
rājyādapyadhikaṃ manye sukhaṃ vananivāsinaḥ || 14 ||
[Analyze grammar]

stabakastanadhāriṇyo raktapallavapāṇayaḥ |
mañjarījālahāsinyo lolaśubhrāmbudāṃśukāḥ || 15 ||
[Analyze grammar]

svaparāgāṅgahāriṇyaḥ kṛtakausumamaṇḍanāḥ |
susevyakāñcanaśilānitambataṭaśobhanāḥ || 16 ||
[Analyze grammar]

taraṅgamauktikaprotasarinmuktālatāvṛtāḥ |
latāvayasyāvalitā mugdhamugdhamṛgātmajāḥ || 17 ||
[Analyze grammar]

svabhāvoddāmasaugandhyā vitīrṇaphalabhojanāḥ |
ṣaṭpadaśreṇinayanāḥ puṣpāpūranatāṅgikāḥ || 18 ||
[Analyze grammar]

āśvāsāspadatāṃ yātāśśītalāmalagātrikāḥ |
ramayanti tvamiva māṃ vanavīthyo varānane || 19 ||
[Analyze grammar]

yathā viviktamekānte mano bhavati nirvṛtam |
na tathā śaśibimbeṣu na ca brahmendrasadmasu || 20 ||
[Analyze grammar]

asminmatpraṇaye tanvi na vighnaṃ kartumarhasi |
bharturvighaṭayantīcchāṃ na svapne'pi kulastriyaḥ || 21 ||
[Analyze grammar]

cūḍālā |
prāptakālaṃ kṛtaṃ kāryaṃ rājate nātha netarat |
vasante rājate puṣpaṃ phalaṃ śaradi rājate || 22 ||
[Analyze grammar]

jarājaraḍhadehānāṃ yuktaṃ vanasamāśrayaḥ |
na yūnāṃ tvādṛśāmeva tenaitanme na rocate || 23 ||
[Analyze grammar]

yauvanena mahārāja na yāvadvayamujjhitāḥ |
puṣpaugheneva taravastāvacchobhāmahe gṛhe || 24 ||
[Analyze grammar]

puṣpābhayā puṣpasitaṃ jarasā saha kānanam |
samaṃ gṛhādgamiṣyāmo haṃsā iva taroḥ saraḥ || 25 ||
[Analyze grammar]

aprāptakālaṃ nṛpateḥ prajāpālanamujjhataḥ |
rājayakṣmeva candrasya mahadeno na naśyati || 26 ||
[Analyze grammar]

aprāptakāriṇaṃ bhūpaṃ rodhayanti ca vai prajāḥ |
rodhayanti hyakāryebhyaḥ prabhubhṛtyāḥ parasparam || 27 ||
[Analyze grammar]

śikhidhvajaḥ |
alamutpalamālākṣi vighnenābhimatasya me |
viddhi māṃ gatameveto dūramekāntakānanam || 28 ||
[Analyze grammar]

bālā tvamanavadyāṅgī nāgantavyaṃ vanaṃ tvayā |
puṃsāmapi hi mṛdvaṅgi durviṣahyo vanāśrayaḥ || 29 ||
[Analyze grammar]

na samarthā vanāvāse yoṣitaḥ kaṭhinā api |
kā nāma puṣpamañjaryaḥ soḍhumarkātapaṃ kṣamāḥ || 30 ||
[Analyze grammar]

bhavatyā pālayantyeha rājyaṃ sthātavyamuttame |
kuṭumbabhārodvahanaṃ patyau yāte vrataṃ striyaḥ || 31 ||
[Analyze grammar]

ityuktvā dayitāṃ rājā tāminduvadanāṃ vaśī |
uttasthau snātumakhilaṃ dinakāryaṃ cakāra ha || 32 ||
[Analyze grammar]

athojjhitaprajāceṣṭo ravirastācalaṃ yayau |
śikhidhvajo vanamiva samastajanadurgamam || 33 ||
[Analyze grammar]

saṃhṛtya vitataṃ rūpaṃ tamevānuyayau prabhā |
nāthaṃ bhavananiṣkrāntaṃ cūḍālevānurāgiṇī || 34 ||
[Analyze grammar]

āyayau yāminī śyāmā bhuvanaṃ bhasmadhūsaram |
dhṛtavyomāpagaṃ śarvamīrṣyayeva yamasvasā || 35 ||
[Analyze grammar]

dikṣu sandhyābhrahastāsu sthitāsu kṛtakuṇḍalam |
tamolavālakāṅkāsu jyotsnāhāsodayāṅkitam || 36 ||
[Analyze grammar]

gacchatoraparaṃ pāraṃ dampatyormairavaṃ vanam |
devodyānamayaṃ rantuṃ dinaśrīdinanāthayoḥ || 37 ||
[Analyze grammar]

āgacchatorimaṃ pāraṃ hṛdyaṃ tīkṣṇakarojjhitam |
niśāniśānāthayośca dampatyormairavaṃ punaḥ || 38 ||
[Analyze grammar]

tārāgaṇo'pi dadṛśe viśīrṇo vyomakuṭṭime |
mukto maṅgalalājānāṃ digvadhūbhirivāñjaliḥ || 39 ||
[Analyze grammar]

candrānanā tamaśśyāmā śītā kumudahāsinī |
yāminī yauvanaṃ prāpa sarojamukulastanī || 40 ||
[Analyze grammar]

kṛtasandhyāsamācāraḥ saha cūḍālayeṣṭayā |
suṣvāpa śayane bhūpo maināka iva sāgare || 41 ||
[Analyze grammar]

athārdharātrasamaye deśe niśśabdatāṃ gate |
ghananidrāśilākośanilīne sakale jane || 42 ||
[Analyze grammar]

sa tasyāṃ samprasuptāyāṃ śayane komalāṃśuke |
bhṛśaṃ nidrāvimūḍhāyāṃ bhramaryāmiva paṅkaje || 43 ||
[Analyze grammar]

tatyāja dayitāṃ suptāmaṅkād rājā śikhidhvajaḥ |
svairaṃ svairaṃ mukhaṃ rāho ravicandraprabhāmiva || 44 ||
[Analyze grammar]

uttasthau śayanāl līnavadhūkāddhavalāṃśukāt |
salakṣmīkādvilolormerhariḥ kṣīrārṇavādiva || 45 ||
[Analyze grammar]

nirjagāmāṅganaṃ mattasuptabhṛtyajanaṃ gṛhāt |
vanaṃ suptamṛgavyūhaṃ kesarī kandarādiva || 46 ||
[Analyze grammar]

khaḍgamātrasahāyo'sau paṭadvayaparāvṛtaḥ |
ardhasuptadvārapālaṃ dvāradeśamavāpa ca || 47 ||
[Analyze grammar]

vīrakramārthaṃ yāmīti tatraiva dvārapavrajam |
yojayitvā jagāmāsau purānnirgatya pūrṇadhīḥ || 48 ||
[Analyze grammar]

rājyalakṣmyai namastubhyamityuktvā maṇḍalādgataḥ |
viveśogrāmaraṇyānīmeko nada ivārṇavam || 49 ||
[Analyze grammar]

ghanāndhakāragulmāḍhyā kṣudrabhūtaughakarkaśā |
sāraṇyānīniśā sā ca samaṃ tenātivāhitā || 50 ||
[Analyze grammar]

prātaśśūnyamaraṇyānīkhaṃ tīrtvā vitataṃ dinam |
samamarkeṇa kasyāñcidviśaśrāma vanāvanau || 51 ||
[Analyze grammar]

bhānāvadṛśyatāṃ yāte tatra snānādipūrvakam |
kiñcitphalādikaṃ bhuktvā tāṃ nināya tamasvatīm || 52 ||
[Analyze grammar]

punaḥ prātaḥ purāṇyuccairmaṇḍalāni girīnnadīḥ |
balādullaṅghayāmāsa rāma dvādaśaśarvarīḥ || 53 ||
[Analyze grammar]

tato mandaraśailasya taṭasthaṃ janadurgamam |
prāpa kānanamatyantadūrasthajanatāpuram || 54 ||
[Analyze grammar]

raṭatpraṇālasalilavāpīvalitapādapam |
śīrṇavedyādivijñātabhūtapūrvadvijāśramam || 55 ||
[Analyze grammar]

kṣudraprāṇivinirmuktaṃ siddhasevyalatālayam |
āpūrṇapādapalataṃ prāṇavṛttikaraiḥ phalaiḥ || 56 ||
[Analyze grammar]

tatraikasmin sthale śuddhe same salilamālite |
śītale śādvalaśyāme snigdhe saphalapādape || 57 ||
[Analyze grammar]

samañjarībhirvallībhiḥ sa cakāroṭajālayam |
prāvṛṭkālaḥ savidyudbhirnīlābhrairiva pañjaram || 58 ||
[Analyze grammar]

masṛṇaṃ vaiṇavaṃ daṇḍaṃ phalabhojanabhājanam |
arghapātraṃ puṣpabhāṇḍamakṣamālāṃ kamaṇḍalum || 59 ||
[Analyze grammar]

kanthāṃ śītāpanodāya bṛsīṃ caiva mṛgājinam |
ānīyāyojayattasminmaṭhikāmandire nṛpaḥ || 60 ||
[Analyze grammar]

yatkiñcidanyadvā vastu yogyaṃ tāpasakarmaṇi |
tattatra sthāpayāmāsa jagatīva kramaṃ vidhiḥ || 61 ||
[Analyze grammar]

sandhyāpūrvaṃ japaṃ prātaḥpraharaṃ sa tadākarot |
puṣpoccayaṃ dvitīyaṃ tu snānaṃ devārcanaṃ tataḥ || 62 ||
[Analyze grammar]

paścādvanaphalaṃ kiñcidvanakandaṃ bisādikam |
bhuktvā japyaparo bhūtvā nināyaiko niśāṃ vaśī || 63 ||
[Analyze grammar]

iti divasamakhedaṃ mandaropāntakacche viracita uṭaje'ntarmālaveśo nināya |
na ca nṛpativilāsaṃ taṃ sa sasmāra kaṃ vā sphurati hṛdi viveke rājyalakṣmyo haranti || 64 ||
[Analyze grammar]