Chapter 87

aṇimādiyogopadeśo nāma sargaḥ |
saptāśītitamaḥ sargaḥ |
vasiṣṭhaḥ |
aṇimādiguṇaiśvaryayuktā sā nṛpamāninī |
evaṃ babhūva cūḍālā ghanābhyāsavatī satī || 1 ||
[Analyze grammar]

jagāmākāśamārgeṇa viveśāmbudhikoṭaram |
cacāra vasudhāpīṭhe gaṅgevāmalaśītalā || 2 ||
[Analyze grammar]

kṣaṇamapyagatā bharturvakṣasaścetasastathā |
sarveṣūvāsa rājyeṣu lakṣmīriva jagatsu ca || 3 ||
[Analyze grammar]

ākāśagāminī śyāmā vidyudālolabhūṣaṇā |
babhrāma meghalekheva girimālā mahītale || 4 ||
[Analyze grammar]

kāṣṭhaṃ tṛṇopalaṃ bhūmiṃ khaṃ vātamanalaṃ jalam |
nirvighnamaviśatsarvaṃ tanturmuktāphalaṃ yathā || 5 ||
[Analyze grammar]

merorupari śṛṅgāṇi lokapālapurāṇi ca |
digvyomodararandhrāṇi vijahāra yathāsukham || 6 ||
[Analyze grammar]

tiryagbhūtapiśācādyaiḥ saha nāgāmarāsuraiḥ |
vidyādharāpsarassiddhairvyavahāraṃ cakāra sā || 7 ||
[Analyze grammar]

yatnena taṃ ca bhartāramātmajñānāmṛtaṃ prati |
bahuśo bodhayāmāsa mātā bālamivātmajam || 8 ||
[Analyze grammar]

na cāsāvāpa tadbhartā rājā viśrāntimātmani |
muktāphalamasaṃśliṣṭaṃ muktāphala ivātale || 9 ||
[Analyze grammar]

etāvatāpi kālena tāmevaṃguṇaśālinīm |
bālo vidyāmiva nṛpaścūḍālāṃ na viveda saḥ || 10 ||
[Analyze grammar]

kalāvidagdhā mugdhā ca bāleyaṃ gṛhiṇī mama |
ityeva kevalaṃ rājā sa cūḍālāṃ viveda tām || 11 ||
[Analyze grammar]

sāpyalabdhātmaviśrāntestāṃ siddhiśriyamātmanaḥ |
darśayāmāsa no rājñaśśūdrasyeva makhakriyām || 12 ||
[Analyze grammar]

rāmaḥ |
mahatyāḥ siddhayoginyāstasyā api śikhidhvajaḥ |
yatnena prāpa no bodhaṃ budhyate'nyaḥ kathaṃ prabho || 13 ||
[Analyze grammar]

vasiṣṭhaḥ |
upadeśakramo nāma vyavasthāmātrapālanam |
jñaptestu kāraṇaṃ śuddhā śiṣyaprajñaiva rāghava || 14 ||
[Analyze grammar]

na śrutena na puṇyena jñāyate jñeyamātmanaḥ |
jānātyātmānamātmaiva sarpaḥ sarpapadāni va || 15 ||
[Analyze grammar]

rāmaḥ |
evaṃ sthite varamune kathametajjanaśrutau |
śrutaṃ gurūpadeśaśca svātmajñānasya kāraṇam || 16 ||
[Analyze grammar]

vasiṣṭhaḥ |
atyantaṃ kṛpaṇaḥ kaścitkirāṭo dhanadhānyavān |
āste vindhyāṭavīkacche kuṭumbī vraṇakīṭavat || 17 ||
[Analyze grammar]

tasyaikadā nipatitā gacchato vindhyajaṅgale |
ekā varāṭikā rāma tṛṇajālabusāvṛte || 18 ||
[Analyze grammar]

kārpaṇyātsa prayatnena sarvaṃ tṛṇabusādikam |
kapardikārthamabhito dudhāva divasatrayam || 19 ||
[Analyze grammar]

kapardakāddvau bhavataścatvāro'ṣṭau ca kālataḥ |
tataśśataṃ sahasraṃ ca sahasraṃ ceti cetasā || 20 ||
[Analyze grammar]

kalayañjaṅgale dīno rātrindinamatandritaḥ |
janahāsaṃ sahaṃstrīṇi dināni dhutavānbusam || 21 ||
[Analyze grammar]

tato dinatrayasyānte tena tasmātkujaṅgalāt |
pūrṇendubimbapratimo labdhaścintāmaṇirmahān || 22 ||
[Analyze grammar]

taṃ prāpya tuṣṭahṛdayaḥ samāgatya gṛhaṃ sukhī |
prāptākhilajagadbhūtiśśāntasarvabhayaḥ sthitaḥ || 23 ||
[Analyze grammar]

evaṃ yathā kirāṭena kapardānveṣaṇena tat |
ratnaṃ labdhaṃ jaganmūlyamahorātramakhidyatā || 24 ||
[Analyze grammar]

tathā śrutopadeśena svātmajñānamavāpyate |
anyadanviṣyate cānyal labhyate hi gurukramāt || 25 ||
[Analyze grammar]

brahma sarvendriyātītaṃ śrutādīndriyasaṃvidā |
tenopadeśādanagha nātmatattvamavāpyate || 26 ||
[Analyze grammar]

gurūpadeśaṃ ca vinā nātmatattvāgamo bhavet |
kena cintāmaṇirlabdhaḥ kapardānveṣaṇaṃ vinā || 27 ||
[Analyze grammar]

tattvasyāsya mahārghasya gurūpakathanaṃ gatam |
akāraṇaṃ kāraṇatāṃ maṇeriva kapardakaḥ || 28 ||
[Analyze grammar]

paśya rāghava māyeyaṃ mohanī mahatāmapi |
anyadanviṣyate yatnādanyadāsādyate phalam || 29 ||
[Analyze grammar]

anyatkaroti puruṣaḥ phalamanyadeva prāpnoti vastuniyatiśca vilokyate ca |
tasmādanantavibhavasya jagatkramasya śreyo'tivāhanamasaṅgamavajñayaiva || 30 ||
[Analyze grammar]