Chapter 86

agnīṣomavicāropadeśayogo nāma sargaḥ |
ṣaḍaśītitamaḥ sargaḥ |
vasiṣṭhaḥ |
aṇutāṃ sthūlatāṃ cāyaṃ yathā gacchati yoginām |
deho rāma tathā samyagvakṣyamāṇamidaṃ śṛṇu || 1 ||
[Analyze grammar]

hṛdyabjapattrakośotthaḥ prasphuratyānalaḥ kaṇaḥ |
hemabhramaravatsāndhye vidyutkaṇa ivāmbude || 2 ||
[Analyze grammar]

sa pravardhanasaṃvittyā vātyayevāśu vardhate |
saṃvidrūpatayā nūnamarkavad yāti codayam || 3 ||
[Analyze grammar]

sandhyābhraprathamārkābho vṛddhimabhyāgataḥ kṣaṇāt |
gālayatyakhilaṃ sāṅgaṃ dehaṃ hema yathānalaḥ || 4 ||
[Analyze grammar]

jalasparśāsaho yuktyā gālayatyupalādyapi |
bāhya evānalaspanda āntarastu viśeṣataḥ || 5 ||
[Analyze grammar]

sa śarīradravaḥ paścādvidhūya kvāpi nīyate |
citkṣobhitena prāṇena nīhāro vātyayā yathā || 6 ||
[Analyze grammar]

ādhāranāḍinirhīnā vyomasthaivāvaśiṣyate |
śaktiḥ kuṇḍalinī vahnerdhūmalekheva nirgatā || 7 ||
[Analyze grammar]

kroḍīkṛtamanobuddhimayajīvādyahaṅkṛtiḥ |
antassphuraccamatkārā dhūmalekheva tāgarī || 8 ||
[Analyze grammar]

bisavālavraṇe bhittāv upale divi bhūtale |
sā yathā yojyate yatra tena niryātyalaṃ tathā || 9 ||
[Analyze grammar]

saṃvittiḥ saiva yadyaṅga rasādānād yathākramam |
rasenāpūrṇatāmeti tannīhāra ivāmbunā || 10 ||
[Analyze grammar]

rasapūrṇā yamākāraṃ bhāvayatyāśu tattathā |
dhatte citrakṛto buddhau rekhā rāma yathākṛtim || 11 ||
[Analyze grammar]

dṛḍhabhāvavaśādantarasthīnyāpnoti sā tataḥ |
mātṛgarbhaniṣaṇṇeva suṣiktevāṅkurasthitiḥ || 12 ||
[Analyze grammar]

yathābhimatamākāraṃ pramāṇaṃ ceti rāghava |
jīvaśaktiravāpnoti sumervādi tṛṇādi vā || 13 ||
[Analyze grammar]

śrutaṃ tvayā yogasādhyamaṇimādyarthasādhanam |
jñānasādhyamidānīṃ tvaṃ śṛṇu śravaṇabhūṣaṇam || 14 ||
[Analyze grammar]

ekaṃ cinmātramastīha śuddhaṃ somyamalakṣitam |
sūkṣmātsūkṣmataraṃ śāntaṃ nājaganna jagatkriyāḥ || 15 ||
[Analyze grammar]

taccinotyātmanātmānaṃ saṅkalponmukhatāṃ gatam |
yadā tadā jīva iti proktamābilatāṃ gatam || 16 ||
[Analyze grammar]

asatyameva saṅkalpabhrameṇedaṃ śarīrakam |
jīvaḥ paśyati mūḍhātmā bālo yakṣamivoddhatam || 17 ||
[Analyze grammar]

yadā tu jñānadīpena samyagāloka āgate |
saṅkalpamoho jīvasya kṣīyate śaradabhravat || 18 ||
[Analyze grammar]

śāntimāyāti deho'yaṃ sarvasaṅkalpasaṅkṣaye |
tadā rāghava niśśeṣaṃ dīpastailakṣaye yathā || 19 ||
[Analyze grammar]

nidrāvyapagame janturyathā svapnaṃ na paśyati |
jīvo hi bhāvite satye tathā dehaṃ na paśyati || 20 ||
[Analyze grammar]

atattve tattvabhāvena jīvo dehāvṛtaḥ sthitaḥ |
nirdeho bhavati śrīmān sukhī tattvaikabhāvanāt || 21 ||
[Analyze grammar]

anātmani śarīrādāvātmabhāvanamaṅga yat |
sūryādyālokadurbhedaṃ hārdaṃ taddāruṇaṃ tamaḥ || 22 ||
[Analyze grammar]

ātmanyevātmabhāvena sarvavyāpi nirañjanam |
cinmātramamalo'smīti jñānādityena paśyati || 23 ||
[Analyze grammar]

pratimanvantaraṃ rāma buddhatāmanutiṣṭhati |
kalau harirameyātmā kiñcidāśritya kāraṇam || 24 ||
[Analyze grammar]

tasya buddhābhidhānasya munināthasya rāghava |
ye bhaktimanto dhīmanto mokṣamārgābhikāṅkṣiṇaḥ || 25 ||
[Analyze grammar]

śūnyaṃ vijñānamātraṃ vā madhyaṃ vā kiñcidetayoḥ |
astīti hetūpanyāsairbrahma vyapadiśanti te || 26 ||
[Analyze grammar]

teṣāṃ madhye hi vijñānavido dvitve kṣayīkṛte |
jagadbhrāntiparāmarśamātraṃ paśyanti netarat || 27 ||
[Analyze grammar]

madhyaṃ mādhyamikāḥ prāhuḥ kṣaṇabhaṅgavidaḥ pare |
na śūnyaṃ na ca vijñānamidaṃ kiñciditi sthitāḥ || 28 ||
[Analyze grammar]

te śūnyavādinastvanye śūnyatvadṛḍhabhāvanāḥ |
vyomnaśśūnyataraṃ sarvaṃ jagadityāsthayojjhitāḥ || 29 ||
[Analyze grammar]

ekamākāśamevoccairākāśaviśadāśayāḥ |
paśyanti rāma nātmānaṃ jagadādi ca vā pṛthak || 30 ||
[Analyze grammar]

śilākuḍyena niryānti nabhasevānirodhitam |
śastrānilairna bhidyante nabhobhāgā ivācalāḥ || 31 ||
[Analyze grammar]

sumeruvipulākārā apyādityāṃśureṇuṣu |
bisatantuṣu megheṣu tiṣṭhanti paramāṇuvat || 32 ||
[Analyze grammar]

śūnyatvamiva saṃyātāśśūnyatābaddhabhāvanāḥ |
śūnyā iva nabhobhāgāśśūnye tiṣṭhanti vijvaram || 33 ||
[Analyze grammar]

śūnye ca viditātmāno bhāvayanti yathaiva yat |
tattathaivāśu paśyanti dṛḍhabhāvanayā svayā || 34 ||
[Analyze grammar]

dṛḍhabhāvānusandhānādvimūḍhā api rāghava |
viṣaṃ nayantyamṛtatāmamṛtaṃ viṣatāmapi || 35 ||
[Analyze grammar]

evaṃ yathā yathaiveha bhāvyate dṛḍhabhāvanam |
bhūyate hi tathaivāśu tadetyālokitaṃ punaḥ || 36 ||
[Analyze grammar]

satyabhāvena dṛṣṭo'yaṃ deho deho bhavatyalam |
dṛṣṭastvasatyabhāvena vyomatāṃ yāti dehakaḥ || 37 ||
[Analyze grammar]

aṇimādipadaprāptau jñānayuktiriti śrutā |
bhavataiṣādhunā rāma yuktimanyāmimāṃ śṛṇu || 38 ||
[Analyze grammar]

recakābhyāsayogena jīvaḥ kuṇḍalinīgṛhāt |
uddhṛtya yojyate vāyāvāmodaḥ kusumādiva || 39 ||
[Analyze grammar]

tyajyate vigataspando deho'yaṃ kāṣṭhaloṣṭavat |
dehe vijīve vimaṇau vaṃśe ca ka ivādaraḥ || 40 ||
[Analyze grammar]

sthāvare jaṅgame vāpi yathābhimatayecchayā |
bhoktuṃ tatsampadaṃ samyagjīvo'ntarviniveśyate || 41 ||
[Analyze grammar]

iti siddhiśriyaṃ bhuktvā sthitaṃ cettadvapuḥ punaḥ |
praviśyate svamanyadvā yad yathātrābhirocate || 42 ||
[Analyze grammar]

dehādayātayā viṣvagvyāptavatyā ca khānilam |
saṃvidā jagadāpūrya sampūrṇaṃ sthīyate'tha vā || 43 ||
[Analyze grammar]

jñātvā sadābhyuditamujjhitadoṣamīśaṃ yad yad yathā samabhivāñchati citprakāśaḥ |
prāpnoti tattadacireṇa tathaiva rāma sampatpadaṃ viduranāvaraṇatvameva || 44 ||
[Analyze grammar]