Chapter 78

vetālopākhyānaṃ nāma sargaḥ |
vetālopākhyānaṃ samāptaṃ nāma sargaḥ |
aṣṭasaptatitamaḥ sargaḥ |
rāmaḥ |
yathā cittacamatkṛtyā rājño gaṅgāvatāraṇam |
bhagīrathasya sampannaṃ tanme kathaya bhoḥ prabho || 1 ||
[Analyze grammar]

vasiṣṭhaḥ |
āsīdbhagīratho nāma rājā paramadhārmikaḥ |
bhuvaḥ samudradvīpāyā maṇḍanātilakopamaḥ || 2 ||
[Analyze grammar]

saṅkalpānantaraṃ prāpuryathābhimatamarthinaḥ |
candraprasannavadanād yasmāccintāmaṇeriva || 3 ||
[Analyze grammar]

sādhūnāṃ yo vyavasthārthaṃ dhanānyavirataṃ dadau |
tṛṇamātramupādatte karaṃ tṛṇamaṇiryathā || 4 ||
[Analyze grammar]

vajrasāramapi protamajvalanneva yo'bhinat |
ayomaṇirayoyantramiva durjanaceṣṭitam || 5 ||
[Analyze grammar]

adhūmo hyadahañchīto vitaikṣṇyo hārdamapyalam |
tamo'harannṛṇāṃ naiśaṃ yo maṇirveśmanāmiva || 6 ||
[Analyze grammar]

kirannagnikaṇāsāramabhitaḥ svapratāpajam |
madhyāhnasūryakāntāgniriva jvalati yo'riṣu || 7 ||
[Analyze grammar]

mṛduśītasukhasparśo yaḥ samāhlādayanmahīm |
sve jane dravati snigdhaḥ sendurindumaṇiryathā || 8 ||
[Analyze grammar]

jagadyajñopavītasya svargapātālavāhinaḥ |
gaṅgāvāhasya yenorvyāṃ tṛtīyaḥ pūrito guṇaḥ || 9 ||
[Analyze grammar]

agastyaśoṣito'mbhodhirgaṅgāpūreṇa pūritaḥ |
yena duṣpūrarūpo'pi mahāsārtho'rthināmiva || 10 ||
[Analyze grammar]

gaṅgāsopānapaddhatyā yena pātālavāsinaḥ |
yojitā brahmaṇo loke bāndhavā lokabandhunā || 11 ||
[Analyze grammar]

brahmāṇaṃ śaṅkaraṃ jahnuṃ tapasārādhayaṃśca yaḥ |
bhūyo bhūyo yayau khedaṃ na mūrtavyavasāyavat || 12 ||
[Analyze grammar]

yauvane vartamānasya tasya bhūmipateratha |
pravicārayato lokayātrāṃ paryākulāmimām || 13 ||
[Analyze grammar]

svavirāgacamatkāravicārakaṇikodabhūt |
cetasyapi sutāruṇye daivādvallī marāviva || 14 ||
[Analyze grammar]

ekānte cintayāmāsa mahīpatirasāvatha |
jagadyātrāmimāṃ nityamasamañjasasaṅkulām || 15 ||
[Analyze grammar]

punardinaṃ punaśśyāmā dānādānāśanaṃ punaḥ |
tadeva śuktavirasaṃ lajjyate karma kurvatā || 16 ||
[Analyze grammar]

yena prāptena loke'sminnāprāptamavaśiṣyate |
tatkṛtaṃ sukṛtaṃ manye śeṣaṃ karmaviṣūcikā || 17 ||
[Analyze grammar]

punaḥ punaḥ paryuṣitaṃ karma kurvanna lajjate |
mūḍhabuddhiramūḍhastu kaḥ kuryātkila bālavat || 18 ||
[Analyze grammar]

athaikadodvignamanāḥ kadācittryuttulaṃ gurum |
ekānte saṃsṛterbhītaḥ samapṛcchadbhagīrathaḥ || 19 ||
[Analyze grammar]

bhagīrathaḥ |
antaśśūnyāsu suciraṃ bhraman saṃsāravṛttiṣu |
araṇyānīṣvivaitāsu bhṛśaṃ khinnā vayaṃ vibho || 20 ||
[Analyze grammar]

jarāmaraṇamohādirūpāṇāṃ bhavakāriṇām |
bhagavan sarvaduḥkhānāṃ kathamantaḥ prajāyate || 21 ||
[Analyze grammar]

tryuttulaḥ |
cirasāmyātmanācchena nirvibhāgavilāsinā |
rājañjñeyāvabodhena pūrṇena bharitātmanā || 22 ||
[Analyze grammar]

kṣīyante sarvaduḥkhāni truṭyanti granthayo'bhitaḥ |
saṃśayāśśamamāyānti sarvakarmāṇi cānagha || 23 ||
[Analyze grammar]

jñeyaṃ tu vidurātmānaṃ saṃśuddhajñaptirūpiṇam |
sa ca sarvagato nityaṃ nāstameti na codayam || 24 ||
[Analyze grammar]

bhagīrathaḥ |
cinmātraṃ sarvagaṃ śāntamasti nirmalamacyutam |
dehādi netaratkiñciditi vedmi munīśvara || 25 ||
[Analyze grammar]

kiṃ tvatra pratipattirme sphuṭatāmeti notarām |
etāvanmātrasaṃvittiḥ syāmahaṃ bhagavan katham || 26 ||
[Analyze grammar]

tryuttulaḥ |
jñānena jñeyaniṣṭhatvameti ceto hṛdantare |
tataḥ sarvavapurbhūtvā bhūyo jīvo na jāyate || 27 ||
[Analyze grammar]

asaktiranabhiṣvaṅgaḥ putradāragṛhādiṣu |
nityaṃ ca samacittatvamiṣṭāniṣṭopapattiṣu || 28 ||
[Analyze grammar]

ātmano'nanyayogena sadbhāvanamanāratam |
viviktadeśasevitvamaratirjanasaṃsadi || 29 ||
[Analyze grammar]

adhyātmajñānaniṣṭhatvaṃ tattvajñānārthadarśanam |
etajjñānamiti proktamajñānaṃ yadato'nyathā || 30 ||
[Analyze grammar]

rāgadveṣakṣayākārātsaṃsāravyādhibheṣajāt |
ahambhāvopaśāntau tu rājañjñānamavāpyate || 31 ||
[Analyze grammar]

bhagīrathaḥ |
śarīre'smiṃściraṃ rūḍho girau tarurivoccakaiḥ |
ahambhāvo mahābhogo vada me tyajyate katham || 32 ||
[Analyze grammar]

tryuttulaḥ |
pauruṣeṇa prayatnena tyaktvā bhogaughabhāvanam |
gatvānviṣya citā tattvamahaṅkāro vilīyate || 33 ||
[Analyze grammar]

yantrāṇāṃ pañjaraṃ yāvadbhagnaṃ lajjādi nākhilam |
akiñcanatvaśeṣeṇa sphuṭā tāvadahaṅkṛtiḥ || 34 ||
[Analyze grammar]

sarvameva dhiyastyaktvā yadi tiṣṭhasi niścalaḥ |
tadahaṅkāravilayī tvameva paramaṃ padam || 35 ||
[Analyze grammar]

śāntāśeṣaviśeṣaṇo vigatabhīḥ santyaktasarvaiṣaṇo gatvā nūnamakiñcanatvamariṣu tyaktvā samagrāṃ śriyam |
śāntāhaṅkṛtirastadehakalanasteṣveva bhikṣāmaṭanmāmapyujjhitavānalaṃ yadi bhavasyuccaistaduccairasi || 36 ||
[Analyze grammar]