Chapter 73

mahāmaunayogopadeśo nāma sargaḥ |
trisaptatitamaḥ sargaḥ |
rāmaḥ |
kutaśśatatvamāyātaṃ rudrāṇāṃ munināyaka |
ye gaṇāste ca kiṃ rudrā uta neti vadasva me || 1 ||
[Analyze grammar]

vasiṣṭhaḥ |
svapnānāṃ bhikṣuṇā dṛṣṭaṃ śataṃ śataśarīrakam |
sarvamuddeśato jñātamata uktaṃ na tanmayā || 2 ||
[Analyze grammar]

yadākārāśśataṃ svapne tattadgaṇaśataṃ smṛtam |
tadeva tad rudraśataṃ rudrā api gaṇābhidhāḥ || 3 ||
[Analyze grammar]

rāmaḥ |
ekasmādbhagavaṃścittātkathaṃ cittaśataṃ kṛtam |
tatsvapnaśatarudreṇa dīpāddīpaśataṃ yathā || 4 ||
[Analyze grammar]

vasiṣṭhaḥ |
nirāvaraṇasadbhāvā yad yathā kalpayanti ye |
tattathāśu bhavatyeva na sāvaraṇasaṃvidaḥ || 5 ||
[Analyze grammar]

sarvātmanaḥ sarvagatvād yad yathā yatra bhāvyate |
tathānubhūyate tatra tattattajjñena nādhiyā || 6 ||
[Analyze grammar]

rāmaḥ |
kapālamālābharaṇo bhasmasnāyī digambaraḥ |
śmaśānanilayo brahman kāmukaśca maheśvaraḥ || 7 ||
[Analyze grammar]

vasiṣṭhaḥ |
maheśvarāṇāṃ siddhānāṃ jīvanmuktaśarīriṇām |
na kriyāniyamo'stīha sa hyajñeṣveva kalpitaḥ || 8 ||
[Analyze grammar]

ajñāstvajitacittatvātkriyāniyamanaṃ vinā |
gardhānmātsyena nyāyena paraṃ duḥkhaṃ prayānti hi || 9 ||
[Analyze grammar]

tajjñāstviṣṭeṣvaniṣṭeṣu na nimajjanti vastuṣu |
jitendriyatvādbuddhatvānnirvāsanatayānayā || 10 ||
[Analyze grammar]

kākatālīyavad rūḍhāṃ kriyāṃ kurvanti te sadā |
na kurvantyapi vā kecinnaiṣāṃ kvacidapi grahaḥ || 11 ||
[Analyze grammar]

kākatālīyavadviṣṇurevaṃkarmoditaḥ parāt |
evaṃkarmā trinayana evaṃkarmāmbujodbhavaḥ || 12 ||
[Analyze grammar]

na nindyamasti nānindyaṃ nopādeyaṃ na heyakam |
na cātmīyaṃ na ca paraṃ karma jñaviṣayaṃ kvacit || 13 ||
[Analyze grammar]

agnyādīnāṃ yathauṣṇyādi sargādau rūḍhimāgatam |
harādīnāṃ tathā karma dvijātīnāṃ ca jātayaḥ || 14 ||
[Analyze grammar]

sarge prarūḍhimāyāte saṅketavaśataḥ pṛthak |
anubhūtaphalaiḥ svārthāḥ kalpanāḥ kalpitāstataḥ || 15 ||
[Analyze grammar]

videhamuktaviṣayaṃ turyaṃ maunamito mayā |
noktaṃ te pañcamaṃ maunaṃ videhasya raghūdvaha || 16 ||
[Analyze grammar]

khādapyatitarāmacchamātmākāśaṃ cidātmakam |
tatra prāptiḥ paraṃ śreyaḥ sā kathaṃ prāpyate śṛṇu || 17 ||
[Analyze grammar]

samyagjñānāvabodhena nityamekasamādhinā |
saṅkhyayaivāvabuddhā ye te sāṅkhyā yoginaḥ smṛtāḥ || 18 ||
[Analyze grammar]

prāṇādyanilasaṃśāntau yuktā ye padamāgatāḥ |
anāmayamanādyantaṃ te smṛtā yogayoginaḥ || 19 ||
[Analyze grammar]

upādeyaṃ tu sarveṣāṃ śāntaṃ padamakṛtrimam |
tatkaiścitsaṅkhyayā prāptaṃ kaiścid yogena dehataḥ || 20 ||
[Analyze grammar]

ekaṃ sāṅkhyaṃ ca yogaṃ ca yaḥ paśyati sa paśyati |
yatsāṅkhyaiḥ prāpyate sthānaṃ paraṃ yogaistadeva hi || 21 ||
[Analyze grammar]

yatra prāptā manovṛttiratyantaṃ nopalabhyate |
vāsanāvāgurākrāntā tadviddhi paramaṃ padam || 22 ||
[Analyze grammar]

vāsanāṃ cittamevāhuḥ kāraṇaṃ taddhi saṃsṛteḥ |
tadakāraṇatāmeti vilīya bhavakarmasu || 23 ||
[Analyze grammar]

manaḥ paśyati vai dehaṃ bālo vetālakaṃ yathā |
ātmānaṃ vilayaṃ nītvā na bhūyastaṃ prapaśyati || 24 ||
[Analyze grammar]

mano mudhaivābhyuditamasadevānavekṣaṇāt |
svapne svamaraṇākāraṃ prekṣyamāṇaṃ na vidyate || 25 ||
[Analyze grammar]

mano'bhāvānna saṃsāraḥ kvāmodaḥ kusumaṃ vinā |
upadeśyopadeśādi bandhamokṣau ca tatkutaḥ || 26 ||
[Analyze grammar]

ekatattvaghanābhyāsaḥ prāṇānāṃ vilayastataḥ |
manovinigrahaśceti mokṣaśabdārthakāraṇam || 27 ||
[Analyze grammar]

rāmaḥ |
yadi hi prāṇavilayo mune mokṣasya kāraṇam |
mṛtā eva hi mucyante tanmanye sarvajantavaḥ || 28 ||
[Analyze grammar]

vasiṣṭhaḥ |
triṣveteṣu prayogeṣu manaḥpraśamanaṃ varam |
sādhyaṃ viddhi tadevāśu yathā bhavati tacchivam || 29 ||
[Analyze grammar]

yadā nirvāsanaṃ prāṇāstyajantīdaṃ śarīrakam |
tadā na bhūyastanmātrairyānti vyomani saṅgamam || 30 ||
[Analyze grammar]

vāsanāṃśātmakānyeva viddhi tanmātrakāṇi vai |
tadātmakairmanovadbhiḥ prāṇāśśliṣyanti netaraiḥ || 31 ||
[Analyze grammar]

savāsanāstu yadyete prāṇā muñcanti dehakam |
tadvyomavāyusaṃśleṣaṃ yānti duḥkhāya gandhavat || 32 ||
[Analyze grammar]

manaḥ sāmburivāmbhodo na śāmyati savāsanam |
nāmanaskāḥ sambhavanti prāṇāḥ sūryā ivātviṣaḥ || 33 ||
[Analyze grammar]

na jahāti manaḥ prāṇānvinā jñānena karhicit |
tṛṇāntareṇaiva vinā tṛṇāgramiva tittiriḥ || 34 ||
[Analyze grammar]

jñānādavāsanībhāvaṃ svanāśaṃ prāpya vai manaḥ |
prāṇaspandaṃ ca nādatte tataśśāntirhi śiṣyate || 35 ||
[Analyze grammar]

jñānātsarvapadārthānāmasattvaṃ samudetyalam |
tato'ṅga vāsanānāśādviyogaḥ prāṇacetasoḥ || 36 ||
[Analyze grammar]

tato na paśyati manaḥ praśāntaṃ dehatāṃ punaḥ |
svanāśena padaṃ prāptaṃ vāsanaiva mano viduḥ || 37 ||
[Analyze grammar]

ceto hi vāsanāmātraṃ tadabhāvaḥ paraṃ padam |
tacca sampadyate jñānājjñānamāhurvicāraṇam || 38 ||
[Analyze grammar]

ityasyāḥ saṃsṛte rāma paryantaḥ sampravartate |
svayaṃ vivekamātreṇa rajjusarpabhramākṛteḥ || 39 ||
[Analyze grammar]

ekārthābhyasanaprāṇarodhacetaḥparikṣayāḥ |
ekasminneva saṃsiddhe saṃsidhyanti parasparam || 40 ||
[Analyze grammar]

tālavṛntaparispande śānte śānto yathānilaḥ |
prāṇānilaparispande śānte śāntaṃ tathā manaḥ || 41 ||
[Analyze grammar]

prāṇāśśarīravilaye prayānti vyomavāyutām |
yathāvāsitamevedaṃ manaḥ paśyanti tatra ca || 42 ||
[Analyze grammar]

yathā videhāḥ paśyanti prāṇā vyomani dehakam |
samanaskāstathācāraṃ sarvaṃ cānubhavanti te || 43 ||
[Analyze grammar]

śānte vātaparispande yathā gandhaḥ praśāmyati |
tathā śānte manasspande śāmyanti prāṇavāyavaḥ || 44 ||
[Analyze grammar]

avinābhāvinī nityaṃ jantūnāṃ prāṇacetasī |
kusumāmodavanmiśre tilataile iva sthite || 45 ||
[Analyze grammar]

manasaḥ spandanaṃ prāṇaḥ prāṇasya spandanaṃ manaḥ |
ete viharato nityamanyo'nyaṃ rathasārathī || 46 ||
[Analyze grammar]

ādhārādheyavattvete ekābhāve vinaśyataḥ |
kurutaśca svanāśena kāryaṃ mokṣākhyamuttamam || 47 ||
[Analyze grammar]

ekatattvaghanābhyāsācchāntaṃ śāmyatyalaṃ manaḥ |
tallayatvātsvabhāvasya tena prāṇo'pi śāmyati || 48 ||
[Analyze grammar]

vicārya yadanantātmatattvaṃ tanmayatāṃ nayet |
manastatastallayatastadeva bhavati sthiram || 49 ||
[Analyze grammar]

yadevātitarāṃ śreyo'nupalambhopalambhayoḥ |
dvayorapyasatostatra śeṣe vāpi sthiro bhava || 50 ||
[Analyze grammar]

ekasmin sudṛḍhe tattve tāvadbhāvaṃ vibhāvayet |
bhāvo'bhāvatvamāyāti svābhyāsād yāvadātatam || 51 ||
[Analyze grammar]

pratyāhāravaśāccetaḥ svayaṃ bhogyakṣayādiva |
vilīyate saha prāṇaiḥ paramevāvaśiṣyate || 52 ||
[Analyze grammar]

yadekatānaṃ bhavati cetastadbhavati kṣaṇāt |
śāntāśeṣaviśeṣaughaṃ cirābhyāsasvabhāvataḥ || 53 ||
[Analyze grammar]

avidyeyaṃ tu nāstīti buddhvā yuktiyutaṃ dhiyā |
jñānādeva parāvāptistadabhyāsastato varam || 54 ||
[Analyze grammar]

citte śānte śāmyatīyaṃ saṃsāramṛgatṛṣṇikā |
jarāmupagate meghe mihikā mahatī yathā || 55 ||
[Analyze grammar]

cittamātramavidyeti kuru tenaiva tatkṣayam |
tadrūpanāma cittātmānubhāvo hi paraṃ padam || 56 ||
[Analyze grammar]

muhūrtameva nirvāṇaṃ yadi cetaḥ pare pade |
tattatpariṇataṃ viddhi tatraivāsvādamāgatam || 57 ||
[Analyze grammar]

yadi sāṅkhyena viśrāntaṃ ceto yogena vā pade |
kṣaṇaṃ tatsattvatāṃ yātaṃ na bhūyaḥ parijāyate || 58 ||
[Analyze grammar]

ceto vigalitāvidyaṃ sattvaśabdena kathyate |
dagdhaṃ saṃsārabījaṃ tanna dadyādaṅkuraṃ punaḥ || 59 ||
[Analyze grammar]

jñaścidvigalitāvidyaḥ sattvasthaśśāntavāsanaḥ |
samaṃ śūnyopamaṃ śāntaṃ jyotiḥ paśyati śāmyati || 60 ||
[Analyze grammar]

vigalitājñapadaṃ vimalaṃ manaḥ subhaga sattvamitīha hi kathyate |
na punareti kalāmalinaṃ padaṃ kanakatāmiva tāmramupāgatam || 61 ||
[Analyze grammar]