Chapter 72

brahmaikatāpratipādanaṃ nāma sargaḥ |
dvisaptatitamaḥ sargaḥ |
vasiṣṭhaḥ |
suṣuptamaunavānbhūtvā dhūtvā dvitvaikarūpiṇīm |
kalanāṃ kānta cidrūpastiṣṭhāvaṣṭabhya tatpadam || 1 ||
[Analyze grammar]

rāmaḥ |
vāṅmaunamakṣamaunaṃ ca kāṣṭhamaunaṃ ca vedmyaham |
suṣuptamaunaṃ mauneśaṃ brahmanbrūhi kimucyate || 2 ||
[Analyze grammar]

vasiṣṭhaḥ |
dvividhaḥ procyate rāma munirmunivarairiha |
ekaḥ kāṣṭhatapasvī ca jīvanmuktastathetaraḥ || 3 ||
[Analyze grammar]

abhāvitātmā śuṣkāyāṃ kriyāyāṃ baddhaniścayaḥ |
haṭhājjitendriyagrāmo muniḥ syātkāṣṭhatāpasaḥ || 4 ||
[Analyze grammar]

yathābhūtamidaṃ buddhvā bhāvitātmātmani sthitaḥ |
lokopamo'pi tṛpto'ntaryaḥ sa muktamuniḥ smṛtaḥ || 5 ||
[Analyze grammar]

etayoryo bhavedbhāvaśśāntayormunināthayoḥ |
cittaniścayarūpātmā maunaśabdena sa smṛtaḥ || 6 ||
[Analyze grammar]

catuṣprakāramāhustanmaunaṃ maunavido janāḥ |
vāṅmaunamakṣamaunaṃ ca kāṣṭhaṃ sauṣuptameva ca || 7 ||
[Analyze grammar]

vāṅmaunaṃ vacasāṃ rodho balādindriyanigrahaḥ |
akṣamaunaṃ parityāgaśceṣṭānāṃ kāṣṭhasañjñakam || 8 ||
[Analyze grammar]

manomaunaṃ pañcamaṃ yattanmṛte kāṣṭhatāpase |
bhavetsuṣuptamaunākhyaṃ jīvanmukte hi jīvati || 9 ||
[Analyze grammar]

triṣu maunaviśeṣeṣu viṣayaḥ kāṣṭhatāpasaḥ |
suṣuptamaunāvasthāyāścaturthyāścaiva muktadhīḥ || 10 ||
[Analyze grammar]

vāṅmaunaṃ maunamityeva siddhaṃ tacca manaḥkalā- |
malinaṃ jīvabandhāya tatrasthāḥ kāṣṭhatāpasāḥ || 11 ||
[Analyze grammar]

haṭhādvā yogayuktyaiva yaḥ svākṣāṇāṃ vinigrahaḥ |
tadakṣamaunamityāhustatrasthāḥ kāṣṭhatāpasāḥ || 12 ||
[Analyze grammar]

asmaran saṃsmaranvāpi dṛśyaṃ vāgdvayamaspṛśan |
apaśyanneva paśyantīṃ kāṣṭhamaunī hi tiṣṭhati || 13 ||
[Analyze grammar]

prasphuraccittakalanametanmaunatrayaṃ smṛtam |
sambhavatyajñamuniṣu na tu tajjñeṣu līlayā || 14 ||
[Analyze grammar]

nātropādeyatā jñānāmetanmaunatrayaṃ kila |
līlayā helayā vāpi tajjñāḥ kurvanti vā na vā || 15 ||
[Analyze grammar]

idaṃ suṣuptamaunaṃ tu jīvanmuktamatisthitam |
apunarjanmane jantośśṛṇu śravaṇabhūṣaṇam || 16 ||
[Analyze grammar]

nātra saṃyamyate vāṇī trividhā nāpi cojjhyate |
nollāsyante na jīyante samastendriyasaṃvidaḥ || 17 ||
[Analyze grammar]

nānātākalaneyaṃ hi na valgati na śāmyati |
ceto na ceto nāceto na sannāsanna khaṃ na gauḥ || 18 ||
[Analyze grammar]

avibhāgamanāyāsaṃ yadanādyantamāsitam |
dhyāyato dhāvataścaiva sauṣuptaṃ maunamaṅga tat || 19 ||
[Analyze grammar]

yathābhūtamimaṃ buddhvā jagannānātvavibhramam |
yadāsitamasaṅgehaṃ sauṣuptaṃ maunamaṅga tat || 20 ||
[Analyze grammar]

anekasaṃvidrūpātma caikamevedamātatam |
ityāsitamanantaṃ yatsauṣuptaṃ maunamaṅga tat || 21 ||
[Analyze grammar]

ākāśaṃ naiva cākāśaṃ sarvamasmi na cāsmi ca |
iti sthitaṃ samaṃ śāntaṃ yattanmaunaṃ suṣuptavat || 22 ||
[Analyze grammar]

sarvaṃ śūnyaṃ nirālambaṃ śāntaṃ vijñaptimātrakam |
na sannāsaditi svasthamāsitaṃ maunamuttamam || 23 ||
[Analyze grammar]

bhāvābhāvadaśonmeṣaviśeṣairvitathotthitaiḥ |
saṃvido yadanāmarśastanmaunaṃ paramaṃ viduḥ || 24 ||
[Analyze grammar]

asataiva satevāntaścetasā vṛttirūpiṇā |
yadanāvartanaṃ saṃvidvṛttestanmaunamakṣayam || 25 ||
[Analyze grammar]

nāhamasmi na cānyo'sti na mano na ca mānasam |
iti saṃvidasaṃvittiravicchinnātimaunatā || 26 ||
[Analyze grammar]

ahamasmi jagaccāsti tvastiśabdārthamātrakam |
sattāsāmānyameveti sauṣuptaṃ maunamucyate || 27 ||
[Analyze grammar]

sattvātsaṃvida evānyāḥ svapnādikalanāḥ kutaḥ |
anantameva sauṣuptaṃ sarvaṃ maunamatastatam || 28 ||
[Analyze grammar]

suṣuptamaunamevedamanantatvātprabodhavat |
turyamevāmalaṃ viddhi turyātītamathāpi vā || 29 ||
[Analyze grammar]

suṣuptaikasamādhānastathā turyasamādhikaḥ |
turyātītasamādhirvā jāgratyapi bhaveta vai || 30 ||
[Analyze grammar]

turyastha eva sakalāmalaśāntavṛttirjāgratyapi vyavaharannipuṇaṃ svapitvā |
nityaṃ sadeha uta vāpi videha eva brāhmaṃ nabho bhava tadeva kilāsi sādho || 31 ||
[Analyze grammar]

omityapāstabhavavāsanamekamāssva na tvaṃ na cāhamiti kiñcidihāsti satyam |
sarvaṃ ca vidyata itīha śilāntarābhaṃ jñastiṣṭha cidgaganakośakalaikaniṣṭhaḥ || 32 ||
[Analyze grammar]