Chapter 70

bodhāntaravismayavarṇanaṃ nāma sargaḥ |
saptatitamaḥ sargaḥ |
vālmīkiḥ |
vasiṣṭhamunisaṃyuktā viśvāmitrādisaṃyutā |
sthitakhecarasiddhaughā viśrāntanṛpanāyakā || 1 ||
[Analyze grammar]

sarāmalakṣmaṇā saiva tathaivātha sabhā babhau |
somyā samasamābhogā śāntavātyeva padminī || 2 ||
[Analyze grammar]

anapekṣyaiva ca praśnamuvācātha munīśvaraḥ |
bodhayanti balādeva sānukampā hi sādhavaḥ || 3 ||
[Analyze grammar]

vasiṣṭhaḥ |
rājan raghukulākāśaśaśāṅka raghunandana |
hyo mayā dhyānanetreṇa sa bhikṣuḥ prekṣitaściram || 4 ||
[Analyze grammar]

dhyānenāhaṃ ciraṃ bhrāntastādṛgbhikṣudidṛkṣayā |
dvīpāni sapta vipulāṃstathaiva kulaparvatān || 5 ||
[Analyze grammar]

yāvatkutaścidapyeva bhikṣurlabdho na tādṛśaḥ |
kathaṃ kila manorājyaṃ bahirapyupalabhyate || 6 ||
[Analyze grammar]

tatastribhāgaśeṣāyāṃ rātrau punarahaṃ dhiyā |
uttarāśāntaraṃ yāto velāvāta ivārṇavam || 7 ||
[Analyze grammar]

cīnanāmātha tatrāsti śrīmāñjanapado mahān |
valmīkopari tatrāsti vihāro jinasaṃśrayaḥ || 8 ||
[Analyze grammar]

tasminvihāre svakuṭīkośe kapilamūrdhajaḥ |
bhikṣurdīrghaśayā nāma sthita evaṃparodayaḥ || 9 ||
[Analyze grammar]

ekaviṃśatirātraṃ ca tasyaivaṃsthitiśālinaḥ |
dṛḍhārgaḍaṃ gṛhaṃ dhyānabhaṅgabhītā viśanti no || 10 ||
[Analyze grammar]

bhṛtyāḥ prāyaḥ kila tathā sa tiṣṭhati subhikṣukaḥ |
adyaivaṃ tasya sampannaṃ niyaterīdṛśī sthitiḥ || 11 ||
[Analyze grammar]

rātrayo dhyānaniṣṭhasya gatāstasyaikaviṃśatiḥ |
sa tu varṣasahasrāṇi tathā citte'nubhūtavān || 12 ||
[Analyze grammar]

kasmiṃścitprāktane kalpe bhikṣurevaṃ purābhavat |
adya tviha dvitīyo'sti tṛtīyo nopalabhyate || 13 ||
[Analyze grammar]

mayā tu punaranviṣṭaścetasā caturātmanā |
tādṛgbhikṣustṛtīyo'nyo jagatpadmodarālinā || 14 ||
[Analyze grammar]

asmātsargāttu no labdhastṛtīyastādṛgāśayaḥ |
athānye līlayā sargā mayā samprekṣitāstataḥ || 15 ||
[Analyze grammar]

yāvatkasmiṃścidākāśakośaśāyini sargake |
tṛtīyo vidyate bhikṣurbrāhmaṇaścedṛśakramaḥ || 16 ||
[Analyze grammar]

evaṃ tenaiva tenaiva sanniveśena bhūriśaḥ |
bhaviṣyantyabhavan santi padārthāḥ sargasantatau || 17 ||
[Analyze grammar]

asyāṃ sabhāyāmapi ye munayo brāhmaṇā nṛpāḥ |
bhāvyamevaṃsamācāraistairanyairapyanekaśaḥ || 18 ||
[Analyze grammar]

nāradenāmunā bhāvyaṃ punaranyena cānagha |
evamevātriṇā bhāvyaṃ punaranyena cādhunā || 19 ||
[Analyze grammar]

evaṃ kalatrakarmabhyāṃ yuktenānena bhūriśaḥ |
evaṃjanmādinā bhāvyaṃ vyāsena ca śukena ca || 20 ||
[Analyze grammar]

janakena punarbhāvyaṃ kratunā pulahena ca |
agastyena pulastyena bhṛguṇāṅgirasāpi ca || 21 ||
[Analyze grammar]

eta eva tathānye ca evaṃrūpakriyāspadam |
cirāccirādbhaviṣyanti māyeyaṃ vitatā yataḥ || 22 ||
[Analyze grammar]

sadṛśācārajanmānasta evānye ca bhūriśaḥ |
bhūyo bhūyo vivartante sargeṣvapsviva vīcayaḥ || 23 ||
[Analyze grammar]

atyantasadṛśāḥ kecitkecidardhasamakramāḥ |
kecidīṣatsamāḥ kecinna kadācitpunastathā || 24 ||
[Analyze grammar]

evameṣātivitatā māyā manasi mohinī |
kṣaṇo nehāsti no kalpaḥ pratipattirhi jṛmbhate || 25 ||
[Analyze grammar]

kvaikaviṃśatyahorātrā anantāḥ kva kuyonayaḥ |
kva tāsāmupalambho'lamaho bhīmā manogatiḥ || 26 ||
[Analyze grammar]

pratibhāmātramevedamitthaṃ vikasitaṃ sitam |
nānākalahakallolacalaṃ prātarivāmbujam || 27 ||
[Analyze grammar]

jātaṃ saṃvedanādeva śuddhādidamaśuddhavat |
saṃsārajālamakhilaṃ vahnirvahnikaṇādiva || 28 ||
[Analyze grammar]

pratyekamevamuditaḥ pratibhāsaṣaṇḍaṣṣaṇḍāntareṣvapi ca tatra vicitraṣaṇḍāḥ |
sarve svayaṃ nanu ca te ca mitho na mithyā sarvātmani sphurati kāraṇakāraṇe'smin || 29 ||
[Analyze grammar]