Chapter 64

pratyagātmāvabodhanaṃ nāma sargaḥ |
catuṣṣaṣṭitamaḥ sargaḥ |
vasiṣṭhaḥ |
enamāhuḥ paraṃ tattvaṃ viddhyenaṃ paramaṃ padam |
vedmyenamekamevāhameṣa evāsti netaraḥ || 1 ||
[Analyze grammar]

ya eṣa pratyagātmāntaḥ sarvasattaikadarpaṇaḥ |
etasmādidamutpannaṃ jagadbījādiva drumaḥ || 2 ||
[Analyze grammar]

buddhyahaṅkāracittādi varjayitvā jaḍātmakam |
yatrānubhavitāntaste tadviddhi paramaṃ padam || 3 ||
[Analyze grammar]

śuddhānubhavamātraṃ yanmanobuddhyādivarjitam |
mahācidabhidhaṃ puṇyaṃ tadetatparamaṃ padam || 4 ||
[Analyze grammar]

tatsthā ete mahārūpā brahmaviṣṇuharādayaḥ |
vibhūtibhiḥ sphurantyuccairjanāstuṣṭanṛpā iva || 5 ||
[Analyze grammar]

ākāśagamanādyābhiḥ krīḍābhiḥ krīḍyate ciram |
tatsthenaiva janeneha svarge svargaukasā yathā || 6 ||
[Analyze grammar]

tatprāpya nāṅga mriyate tatprāpyāṅga na śocyate |
tatprāpya kṣīyate nāṅga tatprāpyāṅga na badhyate || 7 ||
[Analyze grammar]

apāraparamākāśarūpiṇaḥ paramātmanaḥ |
sattāsāmānyarūpaṃ cenmanāgapi vibhāvyate || 8 ||
[Analyze grammar]

tattannimeṣamātreṇa janturmuktamanā muniḥ |
kurvan saṃsārakarmāṇi na bhūyaḥ paritapyate || 9 ||
[Analyze grammar]

rāmaḥ |
mano buddhirahaṅkāra iti yatra kṣayaṃ gatam |
sattāsāmānyamābhānaṃ kiṃ tatkīdṛśamucyate || 10 ||
[Analyze grammar]

vasiṣṭhaḥ |
yadbrahma sarvadehasthaṃ bhuṅkte pibati valgati |
ādatte vinihantyatti saṃvitsaṃvedyavarjitam || 11 ||
[Analyze grammar]

tatsarvagatamādyantarahitaṃ sthitamūrjitam |
sattāsāmānyamakhilaṃ vastutattvamihocyate || 12 ||
[Analyze grammar]

tatsthitaṃ khatayā vyomni śabde śabdatayā sthitam |
sparśe sthitaṃ sparśatayā tvaci tattvaktayā sthitam || 13 ||
[Analyze grammar]

rase līnaṃ rasatayā rasanāyāṃ ca tattayā |
rūpe rūpatayā dṛṣṭaṃ netre līnaṃ ca dṛktayā || 14 ||
[Analyze grammar]

ghrāṇe ghrāṇatayā dṛṣṭaṃ gandhe gandhatayoditam |
puṣṭaṃ kāyatayā kāye bhūmāvapi ca bhūtayā || 15 ||
[Analyze grammar]

payastayā ca payasi vāyau vāyutayā sthitam |
tejastayā tejasi ca buddhau buddhitayā gatam || 16 ||
[Analyze grammar]

manastayā manasyantarahaṅkṛtyāpyahaṅkṛtau |
rūḍhaṃ saṃvidi saṃvittyā citi cittvena cotthitam || 17 ||
[Analyze grammar]

vṛkṣe vṛkṣatayā lagnaṃ paṭe paṭatayā sthitam |
ghaṭe ghaṭatayā rūḍhaṃ vaṭe vaṭatayā sthitam || 18 ||
[Analyze grammar]

sthāvare sthāvaratvena jaṅgamatvena jaṅgame |
pāṣāṇatvena pāṣāṇe cetanatvena cetane || 19 ||
[Analyze grammar]

amareṣvamaratvena naratvena nareṣu ca |
tiryaktvena ca tiryakṣu krimitvena krimisthitau || 20 ||
[Analyze grammar]

kālakrame kālatayā ṛtāv ṛtutayānayā |
tuṭikṣaṇanimeṣādau saṃsthitastattayā vibhuḥ || 21 ||
[Analyze grammar]

śukle śuklatayā jātaṃ kṛṣṇe kṛṣṇatayā sthitam |
kriyāsu spandarūpeṇa niyatau niyamena ca || 22 ||
[Analyze grammar]

saṃsthitaḥ saṃsthitau sthityā nāśe nāśatayā sthitaḥ |
utpattirūpeṇotpattāvāsthitaḥ parameśvaraḥ || 23 ||
[Analyze grammar]

bālye bālyena viśrānto yauvane yauvanena ca |
jarasā ca jarārūpe maraṇe maraṇena ca || 24 ||
[Analyze grammar]

iti sarvapadārthānāmabhinnaḥ parameśvaraḥ |
kallolaśīkarormīṇāmabdhāviva payobharaḥ || 25 ||
[Analyze grammar]

nānātaiṣā tvasatyaiṣā satyenānena caiva hi |
kalpitā citsvabhāvena vetālaśśiśunā yathā || 26 ||
[Analyze grammar]

sarvatra saṃsthitimatā vigatāmayena vyāptaṃ mayedamakhilaṃ vividhairvilāsaiḥ |
cidrūpiṇaiva kalitākalitātmaneti sarvopaśāntamatirāssva sukhaṃ mahātman || 27 ||
[Analyze grammar]

vālmīkiḥ |
ityuktavatyatha munau divaso jagāma sāyantanāya vidhaye'stamino jagāma |
snātuṃ sabhā kṛtanamaskaraṇā jagāma śyāmākṣaye ravikaraiśca sahājagāma || 28 ||
[Analyze grammar]