Chapter 57

nārāyaṇāvatāro nāma sargaḥ |
saptapañcāśaḥ sargaḥ |
bhagavān |
ya enaṃ vetti hantāraṃ yaścainaṃ manyate hatam |
ubhau tau na vijānīto nāyaṃ hanti na hanyate || 1 ||
[Analyze grammar]

anantasyaikarūpasya sataḥ sūkṣmasya khādapi |
ātmanaḥ parameśasya kiṃ kathaṃ kena hanyate || 2 ||
[Analyze grammar]

nārjunastvaṃ na hantā tvamabhimānamalaṃ tyaja |
jarāmaraṇanirmuktaḥ svayamātmāsi śāśvataḥ || 3 ||
[Analyze grammar]

yasya nāhaṅkṛto bhāvo yasya buddhirna lipyate |
hatvāpi sa imāṃl lokānna hanti na nibadhyate || 4 ||
[Analyze grammar]

yaiva sañjāyate saṃvidantaḥ saivānubhūyate |
ayaṃ so'hamidaṃ tanme ityataḥ saṃvidaṃ tyaja || 5 ||
[Analyze grammar]

anayaiva ca yukto'smi naṣṭo'smīti ca bhārata |
abhitaḥ sukhaduḥkhābhyāmavaśaḥ parikṛṣyase || 6 ||
[Analyze grammar]

svātmāṃśaiḥ kriyamāṇāni guṇaiḥ karmāṇi bhāgaśaḥ |
ahaṅkāravimūḍhātmā kartāhamiti manyate || 7 ||
[Analyze grammar]

cakṣuḥ paśyatu karṇaśca śṛṇotu tvakspṛśatviyam |
rasanā ca rasaṃ yātu ko'traiko'hamiti sthitaḥ || 8 ||
[Analyze grammar]

kalanākarmanirate manasyapi mahāmate |
na kaścidatrāhamiti kleśabhāgī ka eva te || 9 ||
[Analyze grammar]

bahubhiḥ samavāyena yatkṛtaṃ tatra bhārata |
eko'bhimānaduḥkhena hāsāyaiva hi gṛhyate || 10 ||
[Analyze grammar]

kāyena manasā buddhyā kevalairindriyairapi |
yoginaḥ karma kurvanti saṅgaṃ tyaktvātmasiddhaye || 11 ||
[Analyze grammar]

ahantvaviṣacūrṇena yeṣāṃ kāyo na bhāvitaḥ |
kurvanto'pi haranto'pi ta ete nirviṣūcikāḥ || 12 ||
[Analyze grammar]

na kvacid rājate kāyo mamatvāmedhyadūṣitaḥ |
prājño'pyatibahujño'pi duśśīla iva mānavaḥ || 13 ||
[Analyze grammar]

nirmamo nirahaṅkāraḥ samaduḥkhasukhaḥ kṣamī |
yaḥ sa kāryamakāryaṃ vā kurvannapi na lipyate || 14 ||
[Analyze grammar]

idaṃ ca te pāṇḍusuta svakarma kṣātramuttamam |
atikrūramapi śreyaḥ sukhāyaivodayāya ca || 15 ||
[Analyze grammar]

api kutsitamapyantyamapyadharmamayaṃ kṛśam |
śreyase svaṃ yathā karma na tathehāmṛtāsavaḥ || 16 ||
[Analyze grammar]

mūrkhasyāpi svakarmaiva śreyase kimu sanmateḥ |
matirgaladahaṅkārā patitāpi na lipyate || 17 ||
[Analyze grammar]

yogasthaḥ kuru karmāṇi saṅgaṃ tyaktvā dhanañjaya |
nissaṅgastvaṃ yathāprāptakarmāsi cenna badhyase || 18 ||
[Analyze grammar]

śāntabrahmavapurbhūtvā karma brahmamayaṃ kuru |
brahmārpitasamācāro brahmaiva bhavasi kṣaṇāt || 19 ||
[Analyze grammar]

īśvarārpitasarvārtha īśvarātmā nirāmayaḥ |
īśvaraḥ sarvabhūtātmā bhava bhūṣitabhūtalaḥ || 20 ||
[Analyze grammar]

sannyastasarvasaṅkalpaḥ samaśśāntamanā muniḥ |
sannyāsayogayuktātmā kurvanmuktamatirbhava || 21 ||
[Analyze grammar]

arjunaḥ |
saṅgatyāgasya bhagavaṃstathā brahmārpaṇasya ca |
īśvarārpaṇarūpasya sannyāsasya ca sarvaga || 22 ||
[Analyze grammar]

tathā jñānasya yogasya vibhāgaḥ kīdṛśaḥ prabho |
krameṇa kathayaitanme mahāmohanivṛttidam || 23 ||
[Analyze grammar]

bhagavān |
sarvasaṅkalpasaṃśāntāvekāntaghanavedanam |
nakiñcidbhāvanākāraṃ yattadbrahma paraṃ viduḥ || 24 ||
[Analyze grammar]

tadudyogaṃ vidurjñānaṃ yogaṃ ca kṛtabuddhayaḥ |
brahma sarvaṃ jagadahaṃ ceti brahmārpaṇaṃ viduḥ || 25 ||
[Analyze grammar]

antaśśūnyaṃ bahiśśūnyaṃ pāṣāṇahṛdayopamam |
śāntamākāśakośācchaṃ na śūnyaṃ na dṛṣatparam || 26 ||
[Analyze grammar]

tata īṣad yadutthānamīṣadanyatayodaye |
sa jagatpratibhāso'yamākāśa iva śūnyatā || 27 ||
[Analyze grammar]

bhāgo'hamiti ko'pyeṣa pratyekamuditaściteḥ |
koṭikoṭyaṃśakalitaḥ ka ivainaṃ prati grahaḥ || 28 ||
[Analyze grammar]

vikalpabhede sphurite saṃvitsāramayātmani |
vaicitryeṇāvicitre'pi kimekatrāpi vo grahaḥ || 29 ||
[Analyze grammar]

apṛthagbhūta evaiṣa pṛthagbhūta iva sthitaḥ |
pṛthagabdhiraparyanto nāhamityavagacchati || 30 ||
[Analyze grammar]

yathehāhaṃ tathehāsi ghaṭādīhāsti markaṭaḥ |
khamihaivaṃ tathāmbvādi kimahantāṃ prati grahaḥ || 31 ||
[Analyze grammar]

iti jñānādvibhāgasya yo dvaitasya parikṣayaḥ |
tyāgaḥ saṅkalpajālānāmasaṃsaṅgaḥ sa kathyate || 32 ||
[Analyze grammar]

samastakalpanājālasyeśvaraikatvabhāvanam |
galitadvaitanirbhāsametadeveśvarārpaṇam || 33 ||
[Analyze grammar]

abhedavaśato bhedo nāmnaivaiṣāṃ cidātmani |
bodhātmākhilaśabdārthaṃ jagadekaṃ na saṃśayaḥ || 34 ||
[Analyze grammar]

ahamāśā jagadahaṃ khamahaṃ karma cāpyaham |
kālo'hamahamadvaitaṃ dvaitaṃ cāhamahaṃ jagat || 35 ||
[Analyze grammar]

manmanā bhava madbhakto madyājī māṃ namaskuru |
māmevaiṣyasi matvaivamātmānaṃ matparāyaṇaḥ || 36 ||
[Analyze grammar]

arjunaḥ |
dve rūpe tava deveśa paraṃ cāparameva ca |
kīdṛśaṃ tatkadā rūpaṃ tiṣṭhāmyāśritya siddhaye || 37 ||
[Analyze grammar]

bhagavān |
sāmānyaṃ paramaṃ caiva dve rūpe viddhi me'nagha |
pāṇyādiyuktaṃ sāmānyaṃ śaṅkhacakragadādharam || 38 ||
[Analyze grammar]

paraṃ rūpamanādyantaṃ yanmamaikamanāmayam |
brahmātmaparamātmādiśabdairetadudīryate || 39 ||
[Analyze grammar]

yāvadapratibuddhastvamanātmajñatayā sthitaḥ |
tāvaccaturbhujākāradevapūjāparo bhava || 40 ||
[Analyze grammar]

tatkramātsamprabuddhastvaṃ tato jñāsyasi tatparam |
mama rūpamanādyantaṃ yena bhūyo na jāyase || 41 ||
[Analyze grammar]

yadi vā vedyavijñāto bhavāṃstadarimardana |
taṃ mamātmānamātmānamātmanaścāśu saṃśraya || 42 ||
[Analyze grammar]

idaṃ cāhamidaṃ cāhamiti yatpravadāmyaham |
tadetadātmatattvaṃ tanmuhurvyapadiśāmyalam || 43 ||
[Analyze grammar]

manye sādho prabuddho'si pade viśrāntavānasi |
saṅkalpairavamukto'si satyaikātmamayo bhava || 44 ||
[Analyze grammar]

sarvabhūtasthamātmānaṃ sarvabhūtāni cātmani |
paśya tvaṃ yogayuktātmā sarvatra samadarśanaḥ || 45 ||
[Analyze grammar]

sarvabhūtasthamātmānaṃ yo bhajatyaikyamāsthitaḥ |
sarvathā vartamāno'pi na sa bhūyo'bhijāyate || 46 ||
[Analyze grammar]

ekatvaṃ sarvaśabdārtha ekaśabdārtha ātmatā |
ātmāpi ca na sannāsadgato yasyāśu tatsa sat || 47 ||
[Analyze grammar]

trailokyacetasāmantarāloko yaḥ prakāśajaḥ |
anubhūtimupārūḍhaḥ so'yamātmeti niścayaḥ || 48 ||
[Analyze grammar]

trailokyapayasāmantaryo rasānubhavaḥ sthitaḥ |
gavyānāmabdhijānāṃ ca so'yamātmāsmi bhārata || 49 ||
[Analyze grammar]

antaḥ sarvaśarīrāṇāṃ yaḥ sūkṣmo'nubhavaḥ sa ca |
mukto'nubhavanīyena so'yamātmāsmi sarvagaḥ || 50 ||
[Analyze grammar]

samagrapayasāmantaryathā ghṛtamavasthitam |
tathā sarvapadārthānāṃ dehānāṃ ca sthitaḥ paraḥ || 51 ||
[Analyze grammar]

sarvāmbhonidhiratnānāṃ sabāhyābhyantare yathā |
tejastathāsmi dehānāmasaṃsthita iva sthitaḥ || 52 ||
[Analyze grammar]

yathā kumbhasahasrāṇāṃ sabāhyābhyantare nabhaḥ |
jagattrayaśarīrāṇāṃ tathātmāhamavasthitaḥ || 53 ||
[Analyze grammar]

muktāphalaśataughānāṃ tantuḥ protavapuryathā |
tathāhaṃ dehalakṣāṇāṃ sthita ātmāsmyalakṣitaḥ || 54 ||
[Analyze grammar]

brahmādau tṛṇaparyante padārthanikurumbake |
sattāsāmānyametad yattamātmānamajaṃ viduḥ || 55 ||
[Analyze grammar]

tadīṣatsphuritākāraṃ brahma brahmaiva tiṣṭhati |
ahantādi jagattādi krameṇa bhramakāriṇā || 56 ||
[Analyze grammar]

ātmaivedaṃ jagadrūpaṃ hanyate hanti cātra kim |
śubhāśubhairjagadduḥkhaiḥ kimasyārjuna lipyate || 57 ||
[Analyze grammar]

pratibimbeṣvivādarśaṃ samaṃ sākṣivadāsthitam |
naśyatsu na vinaśyantaṃ yaḥ paśyati sa paśyati || 58 ||
[Analyze grammar]

idaṃ cāhamidaṃ cāhamitīdaṃ kathyate mayā |
evamātmāsi sarvātmā māmevaṃ viddhi pāṇḍava || 59 ||
[Analyze grammar]

imāḥ sarvāḥ pravartante sargapralayavikriyāḥ |
ātmatantościto'ntassthāḥ payasspandā ivāmbudhau || 60 ||
[Analyze grammar]

yathopalatvaṃ śailānāṃ dārutvaṃ ca mahīruhām |
taraṅgāṇāṃ jalatvaṃ ca padārthānāṃ tathātmatā || 61 ||
[Analyze grammar]

sarvabhūtasthamātmānaṃ sarvabhūtāni cātmani |
yaḥ paśyati tathātmānamakartāraṃ sa paśyati || 62 ||
[Analyze grammar]

nānākāravikāreṣu taraṅgeṣu yathā payaḥ |
kaṭakādiṣu vā hema bhūteṣvātmā tathārjuna || 63 ||
[Analyze grammar]

nānātaraṅgavṛndāni yathā lolāni vāriṇi |
kaṭakādīni vā hemni tathā bhūtāni cātmani || 64 ||
[Analyze grammar]

padārthajātaṃ bhūtādi bṛhadbrahma ca bhārata |
ekamevākhilaṃ viddhi pṛthaksthaṃ na manāgapi || 65 ||
[Analyze grammar]

kiṃ tadbhāvavikārāṇāṃ gamyamasti jagattraye |
kva te vāpi jagatkiṃ vā kiṃ mudhā parimuhyasi || 66 ||
[Analyze grammar]

iti śrutvāvagamyāntarbhāvayitvā suniścitam |
jīvanmuktāścarantīha santaḥ samarasāśayāḥ || 67 ||
[Analyze grammar]

nirmānamohā jītasaṅgadoṣā adhyātmavidyā vinivṛttakāmāḥ |
dvandvairvimuktāḥ sukhaduḥkhasañjñairgacchantyamūḍhāḥ padamavyayaṃ tat || 68 ||
[Analyze grammar]