Chapter 56

indriyārthopalambhavicāro nāma sargaḥ |
ṣaṭpañcāśaḥ sargaḥ |
vasiṣṭhaḥ |
yo jīvasyoditaḥ svapno nānākalanakomalaḥ |
tamimaṃ viddhi saṃsāraṃ na satyaṃ nāpyasanmayam || 1 ||
[Analyze grammar]

na puṃsa iva jīvasya svapnaḥ sambhavati kvacit |
tenaite jāgatā bhāvā jāgratsvapnaikatātra hi || 2 ||
[Analyze grammar]

jīvasvapnamidaṃ dīrghaṃ kṣipraṃ ca pratibhāsate |
asatyamapyavastutvādviddhi vedyavidāṃ vara || 3 ||
[Analyze grammar]

svapnātsvapnāntaramiva gacchanto jīvajīvakāḥ |
asatyameva paśyanti ghanasatyatayā ciram || 4 ||
[Analyze grammar]

ajaḍā jaḍatāṃ yātā jāḍye cājāḍyatoditā |
asatye satyatā jātā jīvānubhavamohataḥ || 5 ||
[Analyze grammar]

sthāṇorapyantarakhilaṃ paśyantastrijagadbhramam |
bhramanti svapnasambhrāntā iha jīvāhirāśayaḥ || 6 ||
[Analyze grammar]

sarvagatvādanantasya svasya jīvasya vai citeḥ |
yadbhāvayanti cetanti tadevāśveti satyatām || 7 ||
[Analyze grammar]

puṇḍarīkākṣagaditāmasaṃsaṅgagatiṃ śubhām |
yāmāliṅgya mahābāho jīvanmukto mahāmuniḥ || 8 ||
[Analyze grammar]

pāṇḍoḥ putro'rjuno nāma sukhaṃ jīvitamātmanaḥ |
kṣapayiṣyati nirduḥkhaṃ tathā kṣapaya jīvitam || 9 ||
[Analyze grammar]

rāmaḥ |
bhaviṣyati kadā brahmannarjunaḥ pāṇḍunandanaḥ |
kīdṛśīṃ ca haristasya kathayiṣyatyasaktatām || 10 ||
[Analyze grammar]

vasiṣṭhaḥ |
asti sanmātramātmeti parikalpitanāmakam |
sthitamātmanyanādyante nabhasīva mahānabhaḥ || 11 ||
[Analyze grammar]

dṛśyate vimale tasminnayaṃ saṃsāravibhramaḥ |
kaṭakādi yathā hemni taraṅgādi yathāmbhasi || 12 ||
[Analyze grammar]

caturdaśavidhā bhūtajātayaḥ prasphurantyalam |
tasmin saṃsārajāle'smiñjāle śakunayo yathā || 13 ||
[Analyze grammar]

tatra te yamacandrārkaśakrādyāḥ saṃsṛtikramāḥ |
bhūtapañcakasaṃsthānā lokapālatvamāgatāḥ || 14 ||
[Analyze grammar]

idaṃ puṇyamupādeyaṃ heyaṃ pāpamidaṃ tviti |
taiḥ svasaṅkalpaghaṭitā vedena sthāpitā sthitiḥ || 15 ||
[Analyze grammar]

evaṃ prauḍhiṃ prayātāyāṃ vahantyāṃ ca ciraṃ ciram |
acchinnāyāṃ vināśinyāṃ nadyāmiva jagatsthitau || 16 ||
[Analyze grammar]

vaivasvato yamo nāma lokapālaḥ pratāpavān |
maraṇāṅkitasattākaprajāsaṃyamane sthitaḥ || 17 ||
[Analyze grammar]

tasyādya yāvadanagha pravāhāpatite nije |
karmaṇyacalasaṅkāśaṃ sthiraṃ cittamavasthitam || 18 ||
[Analyze grammar]

bhagavān sa yamaḥ kiñcidvrataṃ praticaturyugam |
tathāpi kurute bhūtadalanotthāghaśaṅkayā || 19 ||
[Analyze grammar]

kadācidaṣṭau varṣāṇi daśa dvādaśa vāpi ca |
kadācitpañca saptāpi kadācit ṣoḍaśāpi vā || 20 ||
[Analyze grammar]

udāsīnavadāsīne tasminniyamamāsthite |
na hinasti jagajjāle mṛtyurbhūtāni kānicit || 21 ||
[Analyze grammar]

tena nīrandhrabhūtaughaṃ nissañcāraṃ mahītalam |
bhavati prāvṛṣi svedī kuñjako maṣakairiva || 22 ||
[Analyze grammar]

atha tāni vicitrāṇi bhūtāni bahuyuktibhiḥ |
kṣapayanti surā rāma bhuvo bhāranivṛttaye || 23 ||
[Analyze grammar]

evaṃ yamasahasrāṇi vyavahāraśatāni ca |
samatītānyanantāni bhūtāni ca jaganti ca || 24 ||
[Analyze grammar]

vaivasvato'dya tu yamo ya eva pitṛnāyakaḥ |
anena tvadhunā sādho parikṣīṇeṣu keṣucit || 25 ||
[Analyze grammar]

yugeṣvaghavighātāya varṣāṇi dvādaśātmanā |
vratacaryeha kartavyā dūrāstakrūrakarmaṇā || 26 ||
[Analyze grammar]

teneyamurvī nīrandhrā bhūtairmartairamṛtyubhiḥ |
dīnā praghanagulmeva bhārabhūtairbhaviṣyati || 27 ||
[Analyze grammar]

bhūrbhāraparibhūtāṅgī hariṃ śaraṇameṣyati |
kāntā dasyuparābhūtā dīnā patimiva priyam || 28 ||
[Analyze grammar]

harirdehadvayenātha mahīmavatariṣyati |
devāṃśairakhilaiḥ sārdhaṃ naranāyakatāṃ gataiḥ || 29 ||
[Analyze grammar]

vasudevasutastveko vāsudeva iti śrutaḥ |
deho bhaviṣyati harerdvitīyaḥ pāṇḍavo'rjunaḥ || 30 ||
[Analyze grammar]

yudhiṣṭhira iti khyāto dharmaputro bhaviṣyati |
ambhodhimekhalābhūpaḥ pāṇḍoḥ putraḥ sa dharmavit || 31 ||
[Analyze grammar]

duryodhana iti khyātastasya bhrātā pitṛvyajaḥ |
bhaviṣyati dṛḍhadvandvo bhīmo babhruraheriva || 32 ||
[Analyze grammar]

anyo'nyaṃ haratorurvīṃ tayoḥ saṅgrāmalālasāḥ |
aṣṭādaśākṣauhiṇyo hi ghaṭiṣyantyatra bhīṣaṇāḥ || 33 ||
[Analyze grammar]

tatkṣayeṇa vibhāratvaṃ bhuvo viṣṇuḥ kariṣyati |
rāghavārjunadehena bṛhadgāṇḍīvadhanvanā || 34 ||
[Analyze grammar]

viṣṇorarjunanāmāsau prākṛtaṃ bhāvamāsthitaḥ |
harṣāmarṣānvito deho naradharmā bhaviṣyati || 35 ||
[Analyze grammar]

senādvayagatāndṛṣṭvā svajanānmaraṇonmukhān |
viṣādameṣyatyudyogaṃ yuddhāya na kariṣyati || 36 ||
[Analyze grammar]

tamarjunābhidhaṃ dehaṃ prāptakāryaikasiddhaye |
harirbuddhena dehena bodhayiṣyati rāghava || 37 ||
[Analyze grammar]

bhagavān |
tvaṃ mānuṣeṇopahatāntarātmā viṣādamohābhibhavādvisañjñaḥ |
naṣṭaḥ svamutsṛjya paraṃ prakāśaṃ tadātmatattvaṃ nanu rājasiṃha || 38 ||
[Analyze grammar]

anantamavyaktamanādimadhyamātmānamālokaya saṃvidātman |
saṃvidvapuḥ sphāramalagnadoṣamajo'si nityo'si nirāmayo'si || 39 ||
[Analyze grammar]

na jāyate mriyate vā kadācinnāyaṃ bhūtvā bhavitā vā na bhūyaḥ |
ajo nityaśśāśvato'yaṃ purāṇo na hanyate hanyamāne śarīre || 40 ||
[Analyze grammar]