Chapter 53

brahmaikatāpratipādanaṃ nāma sargaḥ |
tripañcāśaḥ sargaḥ |
rāmaḥ |
yadi nāsti vikārādi brahmanbrahmaṇi bṛṃhite |
tadidaṃ kathamābhāti bhāvābhāvamayaṃ jagat || 1 ||
[Analyze grammar]

vasiṣṭhaḥ |
apunaḥprāgavasthānaṃ yatsvarūpaviparyayaḥ |
tadvikārādi kathitaṃ yatkṣīrādiṣu vidyate || 2 ||
[Analyze grammar]

payastāṃ punarabhyeti dadhitvānna punaḥ payaḥ |
buddhamādyantamadhyeṣu brahma brahmaiva nirmalam || 3 ||
[Analyze grammar]

kṣīrāderiva tenāsti brahmaṇo na vikāritā |
anādyantāvikārasya na caivāvayavikramaḥ || 4 ||
[Analyze grammar]

samasyādyantayoryeyaṃ dṛśyate vikṛtiḥ kṣaṇam |
saṃvidastaṃ bhramaṃ viddhi nāvikāre'sti vikriyā || 5 ||
[Analyze grammar]

saṃvedye sati saṃvittistanna brahmaṇi vidyate |
tadbrahmaśabdakathitaṃ nissaṃvedyaṃ cidātma yat || 6 ||
[Analyze grammar]

yādṛgādyantayorvastu tādṛgeva taducyate |
madhye tasya yadanyatvaṃ tadabodhavijṛmbhitam || 7 ||
[Analyze grammar]

ātmā tvādyantamadhyeṣu samaḥ sarvatra sarvadā |
khamapyanyatvamāyāti nātmatattvaṃ kadācana || 8 ||
[Analyze grammar]

bhārūpatvāttadekatvānnityatvāccāyamīśvaraḥ |
vaśaṃ bhāvavikārāṇāṃ na kadācana gacchati || 9 ||
[Analyze grammar]

rāmaḥ |
vidyamāne sadaikasminbrahmaṇyekāntanirmale |
saṃvidbhramasvarūpāyā avidyāyāḥ ka āgamaḥ || 10 ||
[Analyze grammar]

vasiṣṭhaḥ |
brahmatattvamidaṃ sarvamāsīdasti bhaviṣyati |
nirvikāramanādyantaṃ nāvidyāstīti niścayaḥ || 11 ||
[Analyze grammar]

yastu brahmeti śabdena vācyavācakayoḥ kramaḥ |
tatrāpi nānyatābhāva upadeṣṭuṃ kṛto hyasau || 12 ||
[Analyze grammar]

tvamahaṃ jagadāśāśca bhūḥ khamagnyanilādi ca |
brahmamātramanādyantaṃ nāvidyāsti manāgapi || 13 ||
[Analyze grammar]

nāmaivedamavidyeti bhramamātramasadviduḥ |
na vidyate yā tasyā hi kīdṛṅ nāma bhaviṣyati || 14 ||
[Analyze grammar]

rāmaḥ |
upadeśaprakaraṇe hyaḥ kimetattvayoditam |
avidyeyaṃ tathetthaṃ ca nirdhāryata iti prabho || 15 ||
[Analyze grammar]

vasiṣṭhaḥ |
etāvantamabuddhastvamabhūḥ kālaṃ raghūdvaha |
kalpitābhiḥ kilaitābhirbodhito'si suyuktibhiḥ || 16 ||
[Analyze grammar]

avidyeyamayaṃ jīva ityādikalanākramaḥ |
aprabuddhaprabodhāya kalpito vāgvidāṃ varaiḥ || 17 ||
[Analyze grammar]

aprabuddhaṃ mano yāvattāvadeva bhramaṃ vinā |
na prabodhamupāyāti tāvadvarṣaśatairapi || 18 ||
[Analyze grammar]

yuktyaiva bodhayitvaiṣa jīva ātmani yojyate |
yad yuktyā sādhyate kāryaṃ na tad yatnaśatairapi || 19 ||
[Analyze grammar]

sarvaṃ brahmeti yo brūyādaprabuddhasya durmatiḥ |
sa karoti suhṛdbhrāntyā sthāṇau duḥkhanivedanam || 20 ||
[Analyze grammar]

yuktyā prabodhyate mūḍhaḥ prājñastattvena bodhyate |
mūḍhaḥ prājñatvamāyāti na yuktyā bodhanaṃ vinā || 21 ||
[Analyze grammar]

etāvantamabuddhastvaṃ kālaṃ yuktyā prabodhitaḥ |
idānīṃ samprabuddho'si tattvenaivāvabodhyase || 22 ||
[Analyze grammar]

brahmāhaṃ trijagadbrahma brahma tvaṃ brahma dṛśyabhūḥ |
dvitīyā kalpanā nāsti yathecchasi tathā kuru || 23 ||
[Analyze grammar]

asaṃvedyamahāsaṃvitkoṭimātraṃ jagattrayaṃ |
evaṃ pratyayavānantaḥ kurvannapi na lipyase || 24 ||
[Analyze grammar]

bhārūpaścetano vyāpī paramātmāhamityalam |
rāghavānubhavāntastvaṃ tiṣṭhan gacchan svapañchvasan || 25 ||
[Analyze grammar]

nirmamo nirahaṅkāro buddhimānasi rāma cet |
tadbrahmavedanaṃ śāntaṃ sarvabhūtasthitaṃ bhava || 26 ||
[Analyze grammar]

tadanādyantamābhāsi sattvameva paraṃ padam |
sthito'si sarvagaikātmā śuddhasaṃvinmayātmakaḥ || 27 ||
[Analyze grammar]

yadbrahmātmā vibhuryaśca yāvidyā prakṛtiśca yā |
tadabhinnaṃ sadaikātma yathā kumbhaśateṣu mṛt || 28 ||
[Analyze grammar]

nātmanaḥ prakṛtirbhinnā ghaṭānmṛṇmayatā yathā |
spandamātraṃ yathā vāyurātmaiva prakṛtistathā || 29 ||
[Analyze grammar]

āvartaḥ salilasyeva yaḥ spandaḥ svayamātmanaḥ |
proktaḥ prakṛtiśabdena tenaiveha sa eva hi || 30 ||
[Analyze grammar]

yathaikaṃ spandapavanau nāmnā bhinnau na sattayā |
tathaikamātmaprakṛtī nāmnā bhinne na sattayā || 31 ||
[Analyze grammar]

abodhādetayorbhedo bodhenaiva vilīyate |
abodho'sanmayo bhrāntī rajjvāṃ sarpabhramo yathā || 32 ||
[Analyze grammar]

cidbhūmau kalanābījaṃ yadetatpatati sphurat |
cittāṅkura udetyasmādbhāvisaṃsāraṣaṇḍakaḥ || 33 ||
[Analyze grammar]

etadevātmavijñānadagdhaṃ sadvāsanājalaiḥ |
saṃsiktamapi yatnena na bhavatyaṅkurakṣamam || 34 ||
[Analyze grammar]

no cetpatati citkṣetre kalanābījakaṃ tataḥ |
cittāṅkurā na jāyante sukhaduḥkhaphaladrumāḥ || 35 ||
[Analyze grammar]

dvitvaṃ jagatyasadupāttamabodhajātaṃ bodhakṣayaṃ jahihi bodhamupāgato'si |
ātmaikabhāvavibhavena bhavābhayātmā nāstyeva duḥkhamiti naḥ paramārthasāraḥ || 36 ||
[Analyze grammar]