Chapter 45

devatātvavicāro nāma sargaḥ |
pañcacatvāriṃśaḥ sargaḥ |
vasiṣṭhaḥ |
śivaḥ kimucyate deva paraṃ brahma kimucyate |
ātmā kimucyate vāpi paramātmā kimucyate || 1 ||
[Analyze grammar]

tatsatkiñcinnakiñcicca śūnyaṃ vijñānameva ca |
ityādibhedo bhagavaṃstrilokeśa kimucyate || 2 ||
[Analyze grammar]

īśvaraḥ |
anādyantamanābhāsaṃ satkiñcidiha vidyate |
indriyāṇāmanābhāsād yannakiñcidiva sthitam || 3 ||
[Analyze grammar]

vasiṣṭhaḥ |
yadindriyāṇāṃ buddhyādiyuktānāmapyadṛśyatām |
gataṃ tatkathamīśāna vada kenāvagamyate || 4 ||
[Analyze grammar]

īśvaraḥ |
yo mumukṣuravidyāṃśaḥ kevalaṃ nāma sāttvikaḥ |
sāttvikaireva so'vidyābhāgaiśśāstrādināmabhiḥ || 5 ||
[Analyze grammar]

avidyāṃ śreṣṭhayāśreṣṭhāṃ kṣālayanniha tiṣṭhati |
malaṃ malenāpaharanyuktijño rajako yathā || 6 ||
[Analyze grammar]

kākatālīyavatpaścādavidyākṣaya āgate |
prapaśyatyātmanaivātmā svabhāvasyaiṣa niścayaḥ || 7 ||
[Analyze grammar]

yathā kathañcidaṅgāraṃ nighṛṣya kṣālayañchiśuḥ |
karanairmalyamāpnoti kārṣṇyāṅgārakṣaye yathā || 8 ||
[Analyze grammar]

yathā kathañcicchāstrāḍhyairbhāgairbhāgaṃ vicārayan |
sāttvikaistāmasaṃ nāśāddvayorātmodayastathā || 9 ||
[Analyze grammar]

paśyatyātmānamātmaiva vicārayati cātmanā |
ātmaivāstīha nāvidyāvidyāvidyākṣayaṃ viduḥ || 10 ||
[Analyze grammar]

yāvatkiñcididaṃ vastu nānevātmāvagamyate |
kramā gurūpadeśādyā nātmajñānasya kāraṇam || 11 ||
[Analyze grammar]

gururhīndriyavṛndātmā brahma sarvendriyakṣayāt |
yadvastu yatkṣayaprāpyaṃ tattasmin sati nāpyate || 12 ||
[Analyze grammar]

akāraṇā api prāptā bhṛśaṃ kāraṇatāṃ dvija |
kramā gurūpadeśādyā ātmajñānasya siddhaye || 13 ||
[Analyze grammar]

krame gurūpadeśānāṃ pravṛtte śiṣyabodhataḥ |
anirdeśyo'pyadṛśyo'pi svayamātmā prasīdati || 14 ||
[Analyze grammar]

śāstrārthairbudhyate nātmā gurorvācā na cānagha |
budhyate svayamevaiṣa svabodhavaśataḥ svataḥ || 15 ||
[Analyze grammar]

gurūpadeśaśāstrārthairvinā cātmā na budhyate |
etatsaṃyogasattaiva svātmajñānaprakāśinī || 16 ||
[Analyze grammar]

guruśāstrārthaśiṣyāṇāṃ cirasaṃyogasattayā |
ahanīva janācāra ātmajñānaṃ pravartate || 17 ||
[Analyze grammar]

karmabuddhīndriyādyantasukhaduḥkhādisaṅkṣayaḥ |
śiva ātmeti kathitastatsadityādināmabhiḥ || 18 ||
[Analyze grammar]

yatredamakhilaṃ nāsti tadrūpeṇaiva cāsti vā |
tadākāśādacchataramanantaṃ sadihāsti hi || 19 ||
[Analyze grammar]

aviśrāntatayā tatra tanvavidyairmumukṣubhiḥ |
vicitraśuddhamananakalaṅkakalitātmabhiḥ || 20 ||
[Analyze grammar]

adūra eva tiṣṭhadbhirjīvanmuktapadasya taiḥ |
mokṣopāyakabodhāya śāstrārtharacanāya ca || 21 ||
[Analyze grammar]

brahmendrarudrapramukhairlokapālaiḥ sapaṇḍitaiḥ |
purāṇavedasiddhāntasiddhaye bhāvitātmabhiḥ || 22 ||
[Analyze grammar]

cidbrahma śiva ātmeśaparamātmeśvarādikāḥ |
ekasmin kalpitāḥ sañjñā nissañjñe pṛthagīśvare || 23 ||
[Analyze grammar]

evametajjagattattvaṃ svaṃ tattvaṃ śivanāmakam |
sarvathā sarvadā sarveṇārcayan sukhamāssva bhoḥ || 24 ||
[Analyze grammar]

śiva ātmā paraṃ brahmetyādiśabde'sti bhinnatā |
savāsanairviracitā jñasya bhedo na vastuni || 25 ||
[Analyze grammar]

evaṃ devārcanaṃ kurvañjño nityaṃ munināyaka |
yatrāsmadādayo bhṛtyāstatprayāti paraṃ padam || 26 ||
[Analyze grammar]

vasiṣṭhaḥ |
avidyamānamevedaṃ vidyamānamiva sthitam |
yathā tanme samāsena bhagavanvaktumarhasi || 27 ||
[Analyze grammar]

īśvaraḥ |
yo'sau brahmādiśabdārthaḥ saṃvidaṃ viddhi kevalam |
svacchamākāśamapyasyāḥ sthūlaṃ meruraṇoriva || 28 ||
[Analyze grammar]

sā vedyamavagacchantī yāti cinnāmayogyatām |
apyavedyavatī nūnamunmanāntapadasthitā || 29 ||
[Analyze grammar]

kṣaṇādbhāvitavedyatvādahantāmanugacchati |
puruṣatvātpumān svapne navavāraṇatāmiva || 30 ||
[Analyze grammar]

asyā ahantāṃ yātāyā deśatākālatākhatāḥ |
sampadyante svayaṃ śūnyarūpiṇyaḥ sakhya eva tāḥ || 31 ||
[Analyze grammar]

tābhiḥ saṃvalitā sātha sattā jīvābhidhānakā |
bhavati spandavijñātā pavanasyeva lekhikā || 32 ||
[Analyze grammar]

jīvaśaktistathābhūtā niścayaikavilāsinī |
buddhitāmanuyātā sā bhavatyajñapadāsthitā || 33 ||
[Analyze grammar]

śabdaśaktyā kriyāśaktyā jñānaśaktyānugamyate |
pratyekaṃ prasphuratyantarapradarśitarūpayā || 34 ||
[Analyze grammar]

militvaiṣa gaṇaḥ kṣipraṃ śrutiṃ samanukalpayan |
mano bhavati śūnyātmabījaṃ saṅkalpaśākhinaḥ || 35 ||
[Analyze grammar]

ātivāhikadehoktibhājanaṃ tadvidurbudhāḥ |
antassthayā brahmaśaktyā jñarūpaṃ svātmanātmadṛk || 36 ||
[Analyze grammar]

sampadyamāna evāsmiṃścetasīmā hi śaktayaḥ |
paścādiva sahaivāsya prodyantyanuditā api || 37 ||
[Analyze grammar]

vātasattā spandasattā sparśasattā tathaiva ca |
tvaksattā taijasī sattā tathā sattā prakāśinī || 38 ||
[Analyze grammar]

dṛksattā jalasattā ca svādasattā tathāpi ca |
tathaiva rasasattā ca gandhasattā tathaiva ca || 39 ||
[Analyze grammar]

bhūsattā dehasattā ca piṇḍasattā ca pīvarī |
deśasattā kālasattā sarvāstvākāravarjitāḥ || 40 ||
[Analyze grammar]

evaṃ sattāgaṇaṃ cetaḥ kroḍīkṛtya kharūpadhṛt |
sphuratyāśritapattrādi bījavajjīvatāṃ gatam || 41 ||
[Analyze grammar]

etatpuryaṣṭakaṃ viddhi deho'yaṃ cātivāhikaḥ |
aparābodhametattatsphuratyaṃśavibhāgavat || 42 ||
[Analyze grammar]

etad yadaṅgasampannaṃ sampannaṃ tanna kiñcana |
na jātaṃ na ca sadrūpaṃ na cidādi na cetarat || 43 ||
[Analyze grammar]

pare paraṃ prasphurati kevalaṃ kevalātma sat |
jalapīṭhasya jaṭhare jaladravavilāsavat || 44 ||
[Analyze grammar]

saṃvitsaṃvedanaikātma pṛthagetadacetitam |
sampadyate parijñātaṃ saṅkalpanagaropamam || 45 ||
[Analyze grammar]

saṃvedanaparijñānācchivatāmeva gacchati |
ajātameva vā yattatkathaṃ gacchati vastutām || 46 ||
[Analyze grammar]

athaitadvindate svāntaṃ saṅkalpādaṇutāṃ svataḥ |
tanmātrasattāstasyāṇoretāḥ paśyanti dehakam || 47 ||
[Analyze grammar]

aṇusthūlatvamāpannaṃ tadevāśu prapaśyati |
tasya tanmātrarandhrāṇi yathādeśaṃ ca paśyati || 48 ||
[Analyze grammar]

tataḥ puruṣarūpaikabhāvanātpuruṣākṛtim |
kākatālīyavaddṛṣṭvā tuṣṭaṃ puṣṭaṃ bhavatyalam || 49 ||
[Analyze grammar]

jīva etadavastho'tha sthitaṃ paśyati dehakam |
asantameva gandharvapuraṃ svapnapuraṃ yathā || 50 ||
[Analyze grammar]

vasiṣṭhaḥ |
gandharvanagarākāramapi svapnapuropamam |
jagadduḥkhāya duḥkhasya kātra yuktiḥ parikṣaye || 51 ||
[Analyze grammar]

īśvaraḥ |
vāsanāvaśato duḥkhaṃ vidyamāne ca sā bhavet |
avidyamānaṃ ca jaganmṛgatṛṣṇāmbubhaṅgavat || 52 ||
[Analyze grammar]

ataḥ kiṃ vāsyate kena kasya vā vāsanā kutaḥ |
kathaṃ svapnanareṇāṅga mṛgatṛṣṇāmbu pīyate || 53 ||
[Analyze grammar]

sasraṣṭari tu sāhante samanomananādike |
avidyamāne jagati yatsattatpariśiṣyate || 54 ||
[Analyze grammar]

yatra no vāsanā naiva vāsakaṃ na ca vāsyatā |
kevalaṃ kevalībhāvaḥ saṃśāntasakalabhramaḥ || 55 ||
[Analyze grammar]

yasya satyo'pyasatyo vā śūnya eva hi yakṣakaḥ |
vilīnastasya kaivalyātkimanyadavaśiṣyate || 56 ||
[Analyze grammar]

śūnya eva hi vetāla ivetthaṃ cittavāsanā |
uditeyaṃ jagannāmnī tacchāntau śāntirakṣatā || 57 ||
[Analyze grammar]

ahantāyāṃ jagati ca mṛgatṛṣṇājale ca yaḥ |
sāsthastaṃ cidghanataraṃ nopadeśyastvasāviti || 58 ||
[Analyze grammar]

jīvaṃ vivekinamihopadiśanti tajjñā no bālamudbhramamasanmayamāryamuktam |
ajñānpraśāsti kila yaḥ kanakāvadātāṃ sa svapnadṛṣṭapuruṣāya sutāṃ dadāti || 59 ||
[Analyze grammar]