Chapter 39

parameśvaropadeśo nāma sargaḥ |
ekonacatvāriṃśaḥ sargaḥ |
vasiṣṭhaḥ |
tato muhūrtena haro gaurīkamalinīsaraḥ |
madvikāsonmukhaḥ svairaṃ vikāsaṃ bahirādade || 1 ||
[Analyze grammar]

dṛktrayaṃ darśayāmāsa mukhātkālavaśoditam |
rodassamudgakādarkaratnarāśimivoditam || 2 ||
[Analyze grammar]

akāladvādaśādityadinatejaḥ sa saṃharan |
niśāmanāśayaṃśceṣadīśo māmāha mānitam || 3 ||
[Analyze grammar]

mune mananamāhūya svasattaivāśu mīyatām |
tvamarthamāharāhāryaṃ pavanaḥ spandatāmiva || 4 ||
[Analyze grammar]

draṣṭavyamiha yatkiñcittaddṛṣṭaṃ kiṃ śamabhramaiḥ |
na hi heyamupādeyaṃ veha paśyāmi tadvidaḥ || 5 ||
[Analyze grammar]

śāntyaśāntimayānetānvikalpān galitānasi |
vibuddhavānyathāsthityā tvaṃ tvameva bhavātmadṛk || 6 ||
[Analyze grammar]

imāṃ dṛśyadaśāmāśu bālabodhāya vā punaḥ |
samāśritya maduktaṃ tvaṃ śṛṇu tūṣṇīṃsthitena kim || 7 ||
[Analyze grammar]

ityuktvā bāhyabodhasthaṃ māmavekṣya triśūladhṛt |
kurvanprāharadajyotsnāsarasīnduṃ sitotpalam || 8 ||
[Analyze grammar]

īśvaraḥ |
audāsīnyena dehānāṃ citsvaspandeṣu kāraṇam |
tadātmanāmatattvānāṃ śūnyaṃ khamiva bhūruhām || 9 ||
[Analyze grammar]

citā sañcetyate deho na tu sañcālyate kvacit |
prabhurdraṣṭaiva bhavati kartā bhavati karmakṛt || 10 ||
[Analyze grammar]

prāṇenedaṃ dehagehaṃ parisphurati yantravat |
prāṇahīnaṃ parispandaṃ tyaktvā tiṣṭhati mūkavat || 11 ||
[Analyze grammar]

cālanī pāvanī śaktiśśaktiḥ saṃvedanī citeḥ |
sāmūrtā khādapi svacchā svasattaivātra kāraṇam || 12 ||
[Analyze grammar]

vinaśyataḥ prāṇadehau viyogātmaka eva ca |
cidātmā khādapi svaccho na vinaśyati kiṃ bhramaiḥ || 13 ||
[Analyze grammar]

manaḥprāṇamaye dehe cittattvaṃ parirājate |
makure cāmalābhāse pratibimbaṃ pravartate || 14 ||
[Analyze grammar]

sadapyagragataṃ vastu pratibimbakriyāṃ prati |
yathā nāsti malopete makure munināyaka || 15 ||
[Analyze grammar]

tathā nāsti gataprāṇe vidyamāne'pi dehake |
sarvagāpi cidanyūnā bodhaspandādikaṃ prati || 16 ||
[Analyze grammar]

bodhātkalaṅkavikalā cideva paramā śivam |
vidurdevaṃ tadabhyāsaṃ sarvasattārthadaṃ tathā || 17 ||
[Analyze grammar]

sa hariḥ sa śivaḥ so'jaḥ sa brahmā sa sureśvaraḥ |
anilānalacandrārkavapuḥ sa parameśvaraḥ || 18 ||
[Analyze grammar]

sa eva sarvagātmātmā citsaṃviccetanaḥ smṛtaḥ |
deveśo dehabhṛddhātā devadevo divaspatiḥ || 19 ||
[Analyze grammar]

mahācitaḥ samullāsātsamudyantīva kecana |
ye nāma te jagatyete brahmaviṣṇuharādayaḥ |
kaṇāstaptāyasa iva vāridheriva bindavaḥ || 20 ||
[Analyze grammar]

teṣvīṣadbhramabhūteṣu jāteṣviva parātpadāt |
sthiteṣu bhramabījeṣu kalpanājālakartṛṣu || 21 ||
[Analyze grammar]

sahasraśataśākheyamavidyodeti pīvarī |
vedavedārthadevādijīvajālajaṭāvatī || 22 ||
[Analyze grammar]

tatastvasyā anantāyāḥ prasṛtāyāḥ punaḥ punaḥ |
sampannadeśakālāyāḥ kṣamaḥ syādvarṇanāsu kaḥ || 23 ||
[Analyze grammar]

brahmaviṣṇuharādīnāṃ mato yaḥ paramaḥ pitā |
mūlabījaṃ mahādevaḥ pallavānāmiva drumaḥ || 24 ||
[Analyze grammar]

sa brahmatattvādyabhidhaḥ sarvasaṃvedanaikakṛt |
sarvasattāprado bhāsvānvandyo'bhyarcyaśca tadvidām || 25 ||
[Analyze grammar]

pratyakṣavastuviṣayaḥ sarvatraiva sadoditaḥ |
saṃvedanātmakatayā gatayā sarvagocaram || 26 ||
[Analyze grammar]

na tasyāhvānamantrādi kiñcidevopayujyate |
nityāhūtaḥ sa sarvastho labhyate sarvataḥ svacit || 27 ||
[Analyze grammar]

yāṃ yāṃ vastudaśāṃ yāsi tata eva mune śivam |
svarūpaṃ samavāpnoṣi rūpālokamanodṛśā || 28 ||
[Analyze grammar]

ādyaṃ pūjyaṃ namaskāryaṃ stutyamarghyaṃ sureśvaram |
enaṃ taṃ viddhi vedyānāṃ sīmāntaṃ mahatāmapi || 29 ||
[Analyze grammar]

evamātmānamālokya jarāśokabhayāpaham |
sambhṛṣṭabījavajjanturna bhūyaḥ parirohati || 30 ||
[Analyze grammar]

sakalajantuṣu jantupadapradaṃ viditamādyamupāsya yatavrata |
tvamajamātmamayaṃ paramaṃ padaṃ bhavasi kiṃ parimajjasi dṛṣṭiṣu || 31 ||
[Analyze grammar]