Chapter 37

dehapātavicāro nāma sargaḥ |
saptatriṃśaḥ sargaḥ |
vasiṣṭhaḥ |
candrārdhaśekharadhara cittattvasya mahātmanaḥ |
anantasyaikarūpasya dvitvaṃ kathamivāgatam || 1 ||
[Analyze grammar]

kathaṃ ca tanmahādeva rūḍhaṃ satkālaparyayāt |
bhavedduḥkhopaghātāya prajñayā vinivāritam || 2 ||
[Analyze grammar]

īśvaraḥ |
sarvaśaktirhi cidbrahma sadekaṃ vidyate yadā |
tadā nirmūla evāyaṃ dvitvaikatvalayodayaḥ || 3 ||
[Analyze grammar]

sati dvitve kilaikaṃ syātsatyekatve dvirūpatā |
kale dve eva cidrūpaṃ cidrūpatvāttadapyasat || 4 ||
[Analyze grammar]

ekābhāvādabhāvo'tra caikatvadvitvayordvayoḥ |
ekaṃ vinā dvitīyaṃ na na dvitīyaṃ vinaikatā || 5 ||
[Analyze grammar]

kāryakāraṇayorekasāratvādekarūpatā |
phalāntasyāpi bījādervikārādi hi kalpanā || 6 ||
[Analyze grammar]

cittvaṃ cetyavikalpena svayaṃ sphurati tanmayam |
vikārādi tadevātastatsāratvānna bhidyate || 7 ||
[Analyze grammar]

vikārādivikalpo'yaṃ tata utthāya vastuṣu |
yāti sārthakatāṃ nānākāryakāraṇakādibhiḥ || 8 ||
[Analyze grammar]

taraṅgaḥ salile'toyamato'yaṃ yasya te sa naḥ |
śaśaśṛṅgasamaḥ so'pi yasya satyaṃ sa khāṅkuraḥ || 9 ||
[Analyze grammar]

vastubodhe'tra sampanne tavālaṃ vāgvikalpitaiḥ |
vyavacchedādi duśchedaṃ vaco vāktvātkila dvija || 10 ||
[Analyze grammar]

brahmaṇaḥ sarvaśaktitvaṃ tattvato na vibhidyate |
svamaṅga kaṇakallolajālādyambudhivāriṇaḥ || 11 ||
[Analyze grammar]

puṣpapallavapattrādi latāyā netarad yathā |
dvitvaikatve jagattvādi tvattāhantvaṃ tathā citeḥ || 12 ||
[Analyze grammar]

deśakālavikārādibhedaścidracitastu yat |
taccideveti te proktaṃ na praśno'tra tavocitaḥ || 13 ||
[Analyze grammar]

deśakālakriyāsattāniyatyādyāśca śaktayaḥ |
cidātmikā eva citeḥ sattvātsampatitāḥ svataḥ || 14 ||
[Analyze grammar]

cicca carcitacetyeha cidbrahmādyabhidhā smṛtā |
yathā vīcyabhidhārhatve sthitamambu taraṅgitam || 15 ||
[Analyze grammar]

ahambhāvataraṅgasya cidvilāsamahāmbudheḥ |
taraṅgitatvamiva yanna tāvaccetyatāṃ gatam || 16 ||
[Analyze grammar]

tadetatparamaṃ brahma satyeśvaraśivādibhiḥ |
śūnyaikaparamātmādināmabhiḥ parigīyate || 17 ||
[Analyze grammar]

evaṃrūpapadātītaṃ yad rūpaṃ paramātmanaḥ |
tanna nāmārhamamalaṃ viṣayo na girāṃ ca tat || 18 ||
[Analyze grammar]

yadidaṃ dṛśyate tasyāstal latāyā mahāciteḥ |
phalapallavapuṣpādi na bhinnaṃ tanmayaṃ yataḥ || 19 ||
[Analyze grammar]

mahāciccetyacayanāccidbhavatyabhidhāvatī |
sā jīvatvaṃ sa bāhyatvaṃ tadadvi dvīva paśyati || 20 ||
[Analyze grammar]

svayamanyeyamasmīti bhāvayitvā svabhāvataḥ |
anyatāmiva saṃyāti svasaṅkalpātmikāṃ svatām || 21 ||
[Analyze grammar]

akalaṅkena rūpeṇa rūpaṃ yatsvakalaṅkavat |
saṃsārapatitaṃ prāpya cetanenaiva cetitam || 22 ||
[Analyze grammar]

cidvapuḥ svayamevaitadekato yāti jīvatām |
cittattvasyāvabhāsena jīvo jīvati tanmayaḥ || 23 ||
[Analyze grammar]

ātivāhikadehā cijjīvatāṃ samupāgatā |
bhāvanātpañcakībhūtā dravyamasmīti vettyalam || 24 ||
[Analyze grammar]

taddravyaṃ prāṇinā bhuktamāśu gacchati vīryatām |
tato'haṃ prāṇavāñjāto vettītyanubhavātmakam || 25 ||
[Analyze grammar]

ahantādikrameṇāśu pañcakānubhavakramāt |
sthāvaraṃ jaṅgamaṃ yad yadvetti tattadbhavatyalam || 26 ||
[Analyze grammar]

kākatālīyayogena dṛḍhābhyāsakṣayeṇa ca |
vāsanāntarasaṃśleṣātpūrvamākāramujjhati || 27 ||
[Analyze grammar]

dvitvasvasaṃvidā dvitvamekasyaiva pravartate |
puṃso vetālasamparkādvetāla iva bhāsuraḥ || 28 ||
[Analyze grammar]

advitvavedanāddvitvamātmano vinivartate |
na karomīti saṅkalpātpuruṣasyeva kartṛtā || 29 ||
[Analyze grammar]

paramārthatayā dvitvaṃ na kilātmani vidyate |
avikārādimattvena sarvagatvena sarvadā || 30 ||
[Analyze grammar]

yatsvasaṅkalparacitamasaṅkalpakṣayaṃ hi tat |
yathā mune manorājyaṃ gandharvanagaraṃ yathā || 31 ||
[Analyze grammar]

saṅkalparacanaṃ kleśo na saṅkalpavināśanam |
saṅkalpayatno gandharvapuryāḥ sṛṣṭau na tu kṣaye || 32 ||
[Analyze grammar]

puṣṭasaṅkalpamātreṇa yadidaṃ duḥkhamāgatam |
tadasaṅkalpamātreṇa kṣayi kātra kadarthanā || 33 ||
[Analyze grammar]

yatkiñcidapi saṅkalpya naro duḥkhe nimajjati |
na kiñcidapi saṅkalpya sukhamakṣayamaśnute || 34 ||
[Analyze grammar]

saṅkalpavyālanirmuktaṃ sthitaṃ cettava cetanam |
tadānandavanodyāne tvamuccaiḥ parirājase || 35 ||
[Analyze grammar]

svavivekānilaiḥ kṛtvā saṅkalpajaladakṣayam |
parāṃ nirmalatāmehi śaradīva nabho'ntaram || 36 ||
[Analyze grammar]

saṅkalpasaritaṃ mattāṃ matiyantreṇa śoṣayan |
tatrohyamānamātmānaṃ samāśvāsya bhavāmanāḥ || 37 ||
[Analyze grammar]

saṅkalpānilanirdhūtaṃ bhrāntaṃ parṇatṛṇāṃśavat |
bhūtākāśe tvamātmānamavalambyāvalokaya || 38 ||
[Analyze grammar]

svasaṅkalpakakāluṣyaṃ vinivāryātmanātmanaḥ |
paraṃ prasādamāsādya paramānandavānbhava || 39 ||
[Analyze grammar]

sarvaśaktitayehātmā yad yathā bhāvayatyalam |
tattathā paśyati tadā svasaṅkalpavijṛmbhitam || 40 ||
[Analyze grammar]

saṅkalpamātramevedaṃ jaganmithyā samutthitam |
asaṅkalpanamātreṇa brahman kvāpi vilīyate || 41 ||
[Analyze grammar]

saṅkalpavātavalitaṃ janmajvālākadambakam |
asaṅkalpānilasparśāddīpavatpariśāmyati || 42 ||
[Analyze grammar]

tṛṣṇākarañjalatikāmimāṃ rūḍhimupāgatām |
saṅkalpamūloddharaṇātpariśoṣavatīṃ kuru || 43 ||
[Analyze grammar]

pratibhāsasamutthānaṃ pratibhāsaparikṣayam |
yathā gandharvanagaraṃ tathā saṃsṛtivibhramaḥ || 44 ||
[Analyze grammar]

prākṛto'smīti vismṛtyā tāvacchocati bhūmipaḥ |
bhūmipo'smīti sañjātā yāvannāsya hṛdi smṛtiḥ || 45 ||
[Analyze grammar]

naśyate jātayā brahmanprāksmṛtirvartamānayā |
śaradevopagatayā prāvṛḍjāḍyavikāriṇī || 46 ||
[Analyze grammar]

ghanapravāhā yaiva syāccittehā saiva vardhate |
ya evoccaiḥ svarastantryāḥ sa evākrāmati śrutim || 47 ||
[Analyze grammar]

ahameko'hamātmā tvityekāṃ bhāvaya bhāvanām |
tayā bhāvanayā yuktaḥ sa eva tvaṃ bhavasyalam || 48 ||
[Analyze grammar]

evaṃ hyasambhavadidaṃ tvavibhāgabhāsvadbrahmatvamuttamapadaṃ parameva devaḥ |
pūjāṃśapūjanasupūjakapūjyarūpaṃ kiñcinnakiñcidiva cittapanaikamūrtiḥ || 49 ||
[Analyze grammar]