Chapter 35

cetyonmukhacittattvavicāro nāma sargaḥ |
pañcatriṃśaḥ sargaḥ |
īśvaraḥ |
cinotyalīkamevaivaṃ duḥkhitāsmīti bhāvanāt |
cidvadhūḥ kṣīvasuptaiva patitāsmītyalaṃ yathā || 1 ||
[Analyze grammar]

amṛtaiva mṛtāsmīti viparyastamatirvadhūḥ |
yathā rodityanaṣṭaiva naṣṭāsmīti tathaiva cit || 2 ||
[Analyze grammar]

akāraṇaviparyastamatirbhrāntamapi sthiram |
yathā jagatpaśyatīdaṃ tathāhantābhramaṃ citiḥ || 3 ||
[Analyze grammar]

cittvaṃ hi kāraṇaṃ tasyāḥ saṃsārānubhave citeḥ |
na ca tatkāraṇaṃ kiñciccittvānyatvātyasambhavāt || 4 ||
[Analyze grammar]

evaṃ hi kāraṇābhāvāccetyasyāsambhavādapi |
nāsau cinna ca taccetyaṃ na ca taccetyate tayā || 5 ||
[Analyze grammar]

na dṛśyadarśanadraṣṭṛrūpaṃ tailamivopale |
na kartṛkarmakaraṇadṛgindāviva kṛṣṇatā || 6 ||
[Analyze grammar]

na manomeyamānāni nabhasīva navāṅkuraḥ |
na ciccetanacetyādi nandane khadiro yathā || 7 ||
[Analyze grammar]

nāhantvatvattvatattvādi parvatatvamivāmbare |
na cehatvānyadeśatve śaṅkhatvakṣviva kajjalam || 8 ||
[Analyze grammar]

nānānānā na cāpyantaraṇāviva sumeravaḥ |
na ca śabdārthaśabdaśrīrmahoṣaralatā yathā || 9 ||
[Analyze grammar]

neti neti na caivārkamaṇḍale rajanī yathā |
na vastutāvastute ca tuṣāreṣu yathoṣṇatā || 10 ||
[Analyze grammar]

na śūnyatāśūnyate ca śilākośa iva drumaḥ |
śūnyatāśūnyatā nāpi mahatī kha ivākhatā || 11 ||
[Analyze grammar]

kevalaṃ kevalībhāvaḥ svasthataivāvaśiṣyate |
na kaścitkasyaciddoṣo jñatayaitadavāpyate || 12 ||
[Analyze grammar]

nañarthābhāvanāmātreṇānarthaḥ prasṛtaściteḥ |
nañarthabhāvanāmātreṇānartha upaśāmyati || 13 ||
[Analyze grammar]

nañarthabhāvanāmātrādṛte'trāṅgopayujyate |
na tṛṇaṃ na ca trailokyamiti svāyattatātra te || 14 ||
[Analyze grammar]

svāyatta eva hyeṣo'rtho dussādho'bhāvanātsthitaḥ |
yad yanna sādhyate puṃsā tatkathaṃ kila labhyate || 15 ||
[Analyze grammar]

nirvikalpādvitīyā cid yāsau sakalagā satī |
paramaikā parā sācchā dīpikā tejasāmapi || 16 ||
[Analyze grammar]

saiṣāvabhāsanakarī sarvagā nityanirmalā |
nityoditā nirmanaskā nirvikārā nirañjanā || 17 ||
[Analyze grammar]

ghaṭe paṭe vaṭe kuḍye śakaṭe vānare sure |
asure sāgare bhūte nare nāge ca saṃsthitā || 18 ||
[Analyze grammar]

sākṣivattiṣṭhati satī spandate ca na kutracit |
dīpaḥ prakāśanāyaiva karoti na punaḥ kriyām || 19 ||
[Analyze grammar]

malināpyamalaiṣā sā vikalpāḍhyāvikalpinī |
jaḍaivājaḍatāsārā nasarvā sarvameva ca || 20 ||
[Analyze grammar]

nirvikalpā parā sūkṣmā ciccinoti svasaṃvidam |
vāta evāṅgamarmādi yathā yantrādi ceṣṭate || 21 ||
[Analyze grammar]

rūpālokamanaskāravalitā cidabodhataḥ |
bodhataḥ saiva bhavati naiṣā sadasatī yataḥ || 22 ||
[Analyze grammar]

sā paraiva cidatyacchā cintāmāyāti cetanāt |
sādhureva yathāsādhusaṃvitterdurjanaiṣaṇām || 23 ||
[Analyze grammar]

satamaḥ svarṇamāyāti tāmratāṃ malamārjanāt |
punaḥ kanakatāmeti yathā citparamā tathā || 24 ||
[Analyze grammar]

śvāsopaśāntāvādarśo yathaiti prathamāṃ sthitim |
tathā sargamihāgatya bodhātsvaṃ yāti citpadam || 25 ||
[Analyze grammar]

svabhāvāvedanādasyāḥ saṃsāraḥ sampravartate |
svabhāvavedanādeṣa tvasannevopaśāmyati || 26 ||
[Analyze grammar]

yadā cittvāccinotyantaranyatāmasatīṃ tadā |
ahantāmiva samprāpya naśyatīvāpyanāśinī || 27 ||
[Analyze grammar]

īṣatspandādadho yāti śṛṅgaprāntātalopalaḥ |
yathā tathaiva saṃvitteradhaḥpāto mahācitaḥ || 28 ||
[Analyze grammar]

rūpādīnāṃ tu sattaiṣā cetyamevāmalaiva cit |
dvitvaikatve tvabodhotthe bodhena vilayaṃ gate || 29 ||
[Analyze grammar]

sattāmātreṇa cittvasya bodhaścittendriyādiṣu |
ālokasattāmātreṇa vyavahāraḥ kriyāsviva || 30 ||
[Analyze grammar]

vātātkanīnikāspandastaddīptirdṛṣṭirucyate |
tadbāhyapātitā rūpaṃ rūpabodhastu citparā || 31 ||
[Analyze grammar]

tvaṅmārutau jaḍau tucchau tatsaṅgaḥ sparśa ucyate |
mananaṃ sparśasaṃvittistatsaṃvittistu citparā || 32 ||
[Analyze grammar]

gandhatanmātrapavanasambandho gandhasaṃvidaḥ |
āsāṃ tu manasā hīnaṃ vedanaṃ paramaiva cit || 33 ||
[Analyze grammar]

śabdatanmātraśravaṇaśakteḥ saṅgānmano vinā |
suṣuptasadṛśī saṃvitparamā cidudāhṛtā || 34 ||
[Analyze grammar]

kriyonmukhatvaṃ saṅkalpātsaṅkalpo mananakramaḥ |
mananaṃ citsvakāluṣyamātmā cinnirmalā bhavet || 35 ||
[Analyze grammar]

citprakāśātmikā nityā svātmanyeva ca saṃsthitā |
idamantarjagaddhatte sanniveśaṃ yathā śilā || 36 ||
[Analyze grammar]

advitīyaṃ dadhānedaṃ vikārādivivarjitā |
nāstameti na codeti spandate no na vardhate || 37 ||
[Analyze grammar]

saṅkalpājjīvatāmetya nissaṅkalpātmanātmanā |
cijjaḍaṃ cājaḍaṃ bhāvaṃ bhāvayantī svayaṃ sthitā || 38 ||
[Analyze grammar]

rathastvasyāḥ smṛto jīvo jīvasyāhaṅkṛtī rathaḥ |
ahaṅkṛte ratho buddhistathā buddhermano rathaḥ || 39 ||
[Analyze grammar]

manasastu rathaḥ prāṇaḥ prāṇasyākṣagaṇo rathaḥ |
akṣaughasya ratho deho dehasya spandanaṃ rathaḥ || 40 ||
[Analyze grammar]

spandanaṃ karma saṃsāro jarāmaraṇapañjaram |
evaṃ pravartitaṃ cakramidamādhivibhūtijam || 41 ||
[Analyze grammar]

pratibhāsata evātmanyasatsvapna ivātataḥ |
manāgapi na satyātma mṛgatṛṣṇāmbuvatsthitam || 42 ||
[Analyze grammar]

rathastvasyāḥ smṛtaḥ prāṇaḥ kalanāyā munīśvara |
yatra prāṇamaruttatra mananaṃ paritiṣṭhati || 43 ||
[Analyze grammar]

yatra sthitaiṣā kalanā tadeva paricopati |
yatprayāti vanaṃ vātyā tadeva parighūrṇate || 44 ||
[Analyze grammar]

manasyākāśasaṃlīne na prāṇaḥ paricopati |
tejasyasattāmāyāte na rūpamiva rājate || 45 ||
[Analyze grammar]

prāṇe praśānte manute na mano'ntarmanāgapi |
vātyāyāmupaśāntāyāṃ na rajo hi vikampate || 46 ||
[Analyze grammar]

yatra prāṇamarud yāti manastatraiva tiṣṭhati |
yatra yatrānusarati rathastatraiva sārathiḥ || 47 ||
[Analyze grammar]

prāṇasampreritaṃ cittaṃ yāti deśāntaraṃ kṣaṇāt |
kṣepaṇonmuktapāṣāṇa iva tannānyathā javi || 48 ||
[Analyze grammar]

yatra puṣpaṃ tatra gandho yatrāgnistatra coṣṇatā |
yatra prāṇo manastatra yatrendustatra tadruciḥ || 49 ||
[Analyze grammar]

saṃvittiḥ pavanaspandānnāḍīsaṃsparśataḥ svataḥ |
saṃvitteḥ sphāratā cittamatastatprāṇakoṭare || 50 ||
[Analyze grammar]

sarvatra vidyate saṃvidvyomasvacchā jaḍājaḍe |
kṣubhyatīva tu sā prāṇaspandādityanubhūyate || 51 ||
[Analyze grammar]

sattāmātrasvarūpeṇa jaḍeṣu samavasthitā |
prāṇasambodhitodeti vedanātmatayājaḍe || 52 ||
[Analyze grammar]

nānāsphārasamullāsairyaḥ pūrvaṃ parivalgitaḥ |
prāṇo'tīte tu manane sa evāśu na copati || 53 ||
[Analyze grammar]

puryaṣṭake citparamā sve mune pratibimbati |
ādarśa eva pratimā dṛśyate nopalādiṣu || 54 ||
[Analyze grammar]

manaḥ puryaṣṭakaṃ viddhi sarvakāryaikakāraṇam |
tadeva bhedaiḥ kathitamanyaiḥ svāśayakalpitaiḥ || 55 ||
[Analyze grammar]

yasmādudeti phalamākuladṛśyajālaṃ tattanna vastvitaradityanubhūtamuccaiḥ |
tasmānmano viparivarti hi dehadṛṣṭyā sarvaṃ tu tatparamavastviti viddhi tattvam || 56 ||
[Analyze grammar]