Chapter 33

harasamāgamo nāma sargaḥ |
trayastriṃśaḥ sargaḥ |
vasiṣṭhaḥ |
ityuktavantamatrāsau gaurī bhagavatī giram |
māmuvāca jaganmātā māteva tanayaṃ priyam || 1 ||
[Analyze grammar]

devī |
bhagavanbhavatā brūhi bhūrisaubhāgyabhāginī |
pativratānāṃ prathamā kva kṛtārundhatī priyā || 2 ||
[Analyze grammar]

uttiṣṭhānaya tāmasmādāśramānmacchramāpahāt |
tayā saha kathāścitrāḥ karomyekavayasyayā || 3 ||
[Analyze grammar]

ityukte tatra pārvatyā mayā sā gṛhiṇī svayam |
gatvoddeśaṃ tamevāśu samānītā samāśayā || 4 ||
[Analyze grammar]

arundhatyā samaṃ kṛtvā lalanācāramakṣatam |
svakāryaikaparā gaurī babhūva parinirvṛtā || 5 ||
[Analyze grammar]

ahamasmin kṣaṇe buddhyā rāma cintitavānidam |
avyagro matprasannaśca labdho'yaṃ bhagavānmayā || 6 ||
[Analyze grammar]

kamenaṃ parameśānaṃ sarvajñānamahārṇavam |
paripṛcchāmi sandehamindubhūṣitaśekharam || 7 ||
[Analyze grammar]

iti sañcintya sa gururidaṃ pṛṣṭo mayānagha |
śṛṇu vakṣyāmi te sarvaṃ yaduktaṃ candramaulinā || 8 ||
[Analyze grammar]

bhagavanbhūtabhavyeśa sarvakāraṇakāraṇa |
bhavatprasādenedaṃ me dhārṣṭyamabhyāgataṃ sphuṭam || 9 ||
[Analyze grammar]

pṛcchāmi tvā mahādeva yadahaṃ tattvamāśu me |
brūhi prasannayā buddhyā tyaktodvegamanāmaya || 10 ||
[Analyze grammar]

sarvapāpakṣayakaraṃ sarvakalyāṇavardhanam |
devārcanavidhānaṃ me satyaṃ brūhi maheśvara || 11 ||
[Analyze grammar]

īśvaraḥ |
śṛṇu brahmanvaramidaṃ devārcanamanuttamam |
vadāmi mucyase yena kṛtena sakṛdeva hi || 12 ||
[Analyze grammar]

kaccit vetsi mahādevo devaḥ kaḥ syāditi dvija |
na devaḥ puṇḍarīkākṣo na ca devastrilocanaḥ || 13 ||
[Analyze grammar]

na devaḥ kamalodbhūto na devastridaśeśvaraḥ |
na devaḥ pavano nārko nānalo na niśākaraḥ || 14 ||
[Analyze grammar]

na brāhmaṇo nāvanipo nāhaṃ na tvaṃ dvijottama |
na devo deharūpo'sti na devaścitrarūpadhṛt || 15 ||
[Analyze grammar]

na devaḥ kalanārūpī nāpi devo bhavenmatiḥ |
akṛtrimamanādyantaṃ vedanaṃ deva ucyate || 16 ||
[Analyze grammar]

ākārādiparicchinnamiti vastuni tatkutaḥ |
akṛtrimamanādyantaṃ vedanaṃ cicchivaṃ viduḥ || 17 ||
[Analyze grammar]

tadeva devaśabdena kathyate tatprapūjayet |
tadevāsti yataḥ sarvaṃ sattāsattātmarūpadhṛt || 18 ||
[Analyze grammar]

ajñātaśivatattvānāmākārādyarcanaṃ kṛtam |
yojanādhvanyaśaktasya krośādhvā parikalpyate || 19 ||
[Analyze grammar]

iyattādiparicchinnaṃ rudrādeḥ prāpyate phalam |
akṛtrimamanādyantaṃ phalamānanda ātmanaḥ || 20 ||
[Analyze grammar]

akṛtrimaphalaṃ tyaktvā yaḥ kṛtrimaphalaṃ vrajet |
sa tyaktamandāravanaḥ kārañjaṃ yāti kānanam || 21 ||
[Analyze grammar]

bodhaḥ sāmyaṃ śama iti puṣpāṇyagryāṇi tatra vai |
śivaṃ cinmātramakalamātmānamamalaṃ viduḥ || 22 ||
[Analyze grammar]

śamabodhādibhiḥ puṣpairdeva ātmā yadarcyate |
tattaddevārcanaṃ viddhi nākārārcanamarcanam || 23 ||
[Analyze grammar]

ātmasaṃvittirūpaṃ tu tyaktvā devārcanaṃ janāḥ |
kṛtrimārcāsu ye saktāściraṃ kleśaṃ bhajanti te || 24 ||
[Analyze grammar]

jñātajñeyā hi ye santo bālakrīḍopamaṃ na te |
ātmadhyānādṛte brahman kurvate devapūjanam || 25 ||
[Analyze grammar]

ātmaiva devo bhagavāñchivaḥ paramakāraṇam |
jñānārcanenāvirataṃ pūjanīyaḥ sa sarvadā || 26 ||
[Analyze grammar]

tvametaccetanākāśamātmānaṃ jīvamavyayam |
svabhāvaṃ viddhi na tvanyatpūjyapūjātmapūjanam || 27 ||
[Analyze grammar]

cetanākāśamātrātma yathā jagadidaṃ prabho |
yathā ca cetanasyaiva jīvāditvaṃ taducyatām || 28 ||
[Analyze grammar]

cidvyomaiva kilāstīha pārāvāravivarjitam |
sarvatrāsambhavaccetyaṃ yatkalpānteṣu śiṣyate || 29 ||
[Analyze grammar]

tad yatsvayaṃ prakacati tasya svakacanasya tu |
svayaṃ saṃviditaṃ nāma tenedaṃ jagadityalam || 30 ||
[Analyze grammar]

ityevaṃ svapnapuravajjagadbhāti cidātmakam |
evaṃ cidvyomamātrātma jagadacchaṃ na bhittimat || 31 ||
[Analyze grammar]

atyantāsambhavaccetyadṛṣṭi cidvyomamātrakam |
cittvātkacati sargādau yattajjagaditi smṛtam || 32 ||
[Analyze grammar]

tasmātsvapnapurākāraṃ yadidaṃ bhāsate jagat |
tatra cidvyomamātrātmanyanyatā nāma kā kutaḥ || 33 ||
[Analyze grammar]

cinmātrameva girayaścinmātraṃ jagadambaram |
cinmātramātmā jīvaśca cinmātraṃ bhūtasantatiḥ || 34 ||
[Analyze grammar]

cidvyomamātrāditaratsargādau sargavedane |
bhinnaṃ svapnapure cāṅga kiṃ sambhavati kathyatām || 35 ||
[Analyze grammar]

ākāśaṃ paramākāśaṃ brahmākāśaṃ jagaccitiḥ |
iti paryāyanāmāni tarupādapavṛkṣavat || 36 ||
[Analyze grammar]

etacca svapnasaṅkalpamāyādiṣvanubhūyate |
tadā kila cidākāśameva bhāti jagattayā || 37 ||
[Analyze grammar]

yathaitatsaṃvidākāśaṃ svapne bhāti jagadvapuḥ |
tathedaṃ jāgradākhye'pi svapne bhāti tadeva naḥ || 38 ||
[Analyze grammar]

yathā svapnapure citkhaṃ varjayitvetaratkvacit |
na kiñcitsambhavatyaṅga jagatyevamihāditaḥ || 39 ||
[Analyze grammar]

yato na sambhavatyanyaccedaṃ kiñcittato'khilam |
cittvaṃ sacetyamapyetadacetyaṃ sajjagatsthitam || 40 ||
[Analyze grammar]

yathā cidvyomamātrātma svapne ghaṭapaṭādikam |
sargādāveva sargo'yaṃ tathā cidvyomamātrakam || 41 ||
[Analyze grammar]

śuddhasaṃvittimātratvādṛte'nyatsvapnapattane |
yathā na vidyate kiñcittathāsminbhuvanatraye || 42 ||
[Analyze grammar]

yāḥ kāścana dṛśo ye ye bhāvābhāvāḥ kilāgamāḥ |
sadeśakālacittāstatsarvaṃ cidvyomamātrakam || 43 ||
[Analyze grammar]

sa eṣa devaḥ kathito yaḥ paraḥ paramārthataḥ |
yastvaṃ yo'hamaśeṣaṃ vā jagadeva ca yo'khilam || 44 ||
[Analyze grammar]

sarvasya bhūtajātasya jagato'nyasya te mama |
deho hi cetanākāśaṃ paramātmaiva netarat || 45 ||
[Analyze grammar]

saṅkalpane svapnapure śarīraṃ cidvyomato'nyanna yathāsti kiñcit |
tatheha sarge prathamaikasargānmune prabhṛtyasti na rūpamanyat || 46 ||
[Analyze grammar]