Chapter 26

bhusuṇḍopākhyāne prāṇavicāro nāma sargaḥ |
ṣaḍviṃśaḥ sargaḥ |
bhusuṇḍaḥ |
jānannapi mune sarvaṃ kiṃ māṃ pṛcchasi līlayā |
yathāpṛṣṭamahaṃ vacmi tatrāpi śṛṇu me vacaḥ || 1 ||
[Analyze grammar]

prāṇo'yamaniśaṃ brahman spandaśaktiḥ sadāgatiḥ |
sabāhyābhyantare dehe prāṇo'yamupari sthitaḥ || 2 ||
[Analyze grammar]

apāno'pyaniśaṃ brahman spandaśaktiḥ sadāgatiḥ |
sabāhyābhyantare dehe tvapāno'yamavāksthitaḥ || 3 ||
[Analyze grammar]

jāgrataḥ svapataścaiva prāṇāyāmo'yamuttamaḥ |
pravartate yastajjñasya taṃ tāvacchreyase śṛṇu || 4 ||
[Analyze grammar]

bāhyonmukhatvaṃ prāṇānāṃ yaddhṛdambhojakoṭarāt |
svairamevāttayatnānāṃ taṃ dhīrā recakaṃ viduḥ || 5 ||
[Analyze grammar]

dvādaśāṅgulaparyantaṃ bāhyamākramatāṃ hṛdaḥ |
prāṇānāmaṅgasaṃsparśo yaḥ sa pūraka ucyate || 6 ||
[Analyze grammar]

bāhyātparāpatatyantarapāne yatnavarjitam |
yo'ṅgaprapūraṇe sparśo vidustamapi pūrakam || 7 ||
[Analyze grammar]

apāne'staṅgate prāṇo yāvannābhyudito hṛdi |
tāvatsā kumbhakāvasthā yogibhiryānubhūyate || 8 ||
[Analyze grammar]

pūrakaḥ kumbhakaścaiva recakaśca dvidhā sthitaḥ |
apānasyodayasthāne dvādaśāntābhidhe bahiḥ || 9 ||
[Analyze grammar]

svabhāvātsarvakālasthāḥ somyā yatnavivarjitāḥ |
ye proktāḥ sphāramatibhistāṃstvaṃ śṛṇu mahāmate || 10 ||
[Analyze grammar]

dvādaśāṅgulaparyantādbāhyādabhyuditaḥ prabho |
apānastasya tatraiva svabhāvātpūrakādayaḥ || 11 ||
[Analyze grammar]

mṛdantarasthāniṣpannaghaṭavad yā sthitirbahiḥ |
vyomni nityamapānasya taṃ viduḥ kumbhakaṃ budhāḥ || 12 ||
[Analyze grammar]

bāhyonmukhatvaṃ vāyoryā nāsikāgrāvadhirgatiḥ |
taṃ bāhyapūrakaṃ tvādyaṃ viduryogavido janāḥ || 13 ||
[Analyze grammar]

nāsāgrādapi nirgatya dvādaśāntāvadhirgatiḥ |
yā vāyostaṃ vidurdhīrā aparaṃ bāhyapūrakam || 14 ||
[Analyze grammar]

atraivāstaṅgate prāṇe yāvannāpāna udgataḥ |
tāvatpūrṇāṃ samāvasthāṃ bahissthaṃ kumbhakaṃ viduḥ || 15 ||
[Analyze grammar]

yattadantarmukhatvaṃ syādapānasyodayaṃ vinā |
taṃ bāhyarecakaṃ vidyāccintyamānaṃ vimuktidam || 16 ||
[Analyze grammar]

dvādaśāntād yadutthāya rūpapīvaratā parā |
apānasya bahistattamaparaṃ recakaṃ viduḥ || 17 ||
[Analyze grammar]

bāhyānābhyantarāṃścaitān kumbhakādīnanāratam |
prāṇāpānasvabhāvān svānbuddhvā bhūyo na jāyate || 18 ||
[Analyze grammar]

aṣṭāvete mahābuddhe rātrindivamanusmṛtāḥ |
svabhāvādeva vāyūnāṃ kathitā muktidā mayā || 19 ||
[Analyze grammar]

gacchatastiṣṭhato vāpi jāgrataḥ svapato'pi vā |
ete na rodhamāyānti prakṛtyā hi calo'nilaḥ || 20 ||
[Analyze grammar]

yatkaroti yadaśnāti buddhyaitān samanusmaran |
kumbhakādīnnaraḥ so'ntastatra kartā na kiñcana || 21 ||
[Analyze grammar]

suvyagramasminvyāpāre bāhyaṃ parijahanmanaḥ |
dinaiḥ katipayaireva padamāpnoti kevalam || 22 ||
[Analyze grammar]

etadabhyasyataḥ puṃso bāhye viṣayavṛttiṣu |
na badhnāti ratiṃ cetaśśvadṛtau brāhmaṇo yathā || 23 ||
[Analyze grammar]

etāṃ dṛṣṭimavaṣṭabhya ye sthitāḥ kṛtabuddhayaḥ |
prāptaṃ prāptavyamakhilaṃ tairakhinnāsta eva hi || 24 ||
[Analyze grammar]

tiṣṭhatā gacchatā nityaṃ jāgratā svapatā tathā |
eṣā cetprekṣyate dṛṣṭistanna bandhanamāpyate || 25 ||
[Analyze grammar]

prāṇāpānānusaraṇātprāpte bodhe nirāmaye |
saṃśāntamadamohena svasthenāntarihoṣyate || 26 ||
[Analyze grammar]

sarvārambhāṃstyajan svasthaḥ kurvaṃścāpi budho janaḥ |
prāṇāpānagatīḥ prāpya susvasthaḥ sukhamedhate || 27 ||
[Analyze grammar]

prāṇasyābhyudayo brahmanpadmayantrāddhṛdi sthitāt |
dvādaśāṅgulaparyante prāṇo'staṃ yātyayaṃ bahiḥ || 28 ||
[Analyze grammar]

apānasyodayo bāhyāddvādaśāntānmahāmune |
astaṅgatirathāmbhojayantre hṛdayasaṃsthite || 29 ||
[Analyze grammar]

prāṇo yatrāstamāyāti dvādaśānte nabhaḥpade |
padāttasmādapāno'yamudeti samanantaram || 30 ||
[Analyze grammar]

bāhyākāśonmukhaḥ prāṇo vahatyagniśikhā yathā |
hṛdākāśonmukho'pāno nimne vahati vārivat || 31 ||
[Analyze grammar]

apānaścandramā dehamāpyāyayati bāhyataḥ |
prāṇaḥ sūryo'gniratha vā pacatyantaridaṃ vapuḥ || 32 ||
[Analyze grammar]

prāṇo hi hṛdayākāśaṃ tāpayitvā pratikṣaṇam |
mukhāgragaganaṃ paścāttāpayatyuttamo raviḥ || 33 ||
[Analyze grammar]

apānendurmukhāgre khaṃ pyāyayitvā hṛdambaram |
paścādāpyāyayatyeṣa nimeṣasamanantaram || 34 ||
[Analyze grammar]

apānaśaśino'ntassthāḥ kalāḥ prāṇavivasvatā |
yatra grastāstadāsādya padaṃ bhūyo na śocyate || 35 ||
[Analyze grammar]

prāṇārkasya kalāntassthā yatrāpānahimāṃśunā |
grastā tatpadamāsādya na bhūyo janmabhāṅ manaḥ || 36 ||
[Analyze grammar]

prāṇa evārkatāṃ yāti sabāhyābhyantare'mbare |
āpyāyanakarīṃ paścācchaśitāmadhigacchati || 37 ||
[Analyze grammar]

prāṇa evendutāṃ tyaktvā śarīrāpyāyakāriṇīm |
kṣaṇādāyāti sūryatvaṃ saṃśoṣaṇakaraṃ param || 38 ||
[Analyze grammar]

arkatāṃ samparityajya na yāvaccandratāṃ gataḥ |
prāṇastāvadvicāryāntardeśakālau na śocyate || 39 ||
[Analyze grammar]

hṛdi candrārkayorjñātvā nityamastamayodayam |
ātmano nijamādhāraṃ na bhūyo jāyate manaḥ || 40 ||
[Analyze grammar]

sodayāstamayaṃ senduṃ saraśmiṃ sasamāgamam |
hṛdaye bhāskaraṃ devaṃ yaḥ paśyati sa paśyati || 41 ||
[Analyze grammar]

nākṣīṇaṃ na parikṣīṇaṃ bahissthaṃ siddhaye tamaḥ |
hārdaṃ tu kṣapayeddhvāntaṃ yatkṣaye siddhiruttamā || 42 ||
[Analyze grammar]

bāhye tamasi saṅkṣīṇe lokālokaḥ prajāyate |
hārde tu tamasi kṣīṇe svāloko jāyate paraḥ || 43 ||
[Analyze grammar]

hārdāndhakārakṣayadaṃ parijñātaṃ vimuktidam |
sodayāstamayaṃ yatnātprāṇārkamavalokayet || 44 ||
[Analyze grammar]

apānenduḥ prayātyastaṃ yatra hṛtpadmakoṭare |
padāttasmādudetyantaḥ prāṇārko bahirunmukhaḥ || 45 ||
[Analyze grammar]

apāne'staṅgate prāṇaḥ samudeti hṛdambujāt |
chāyāyāṃ galitāṅgāyāṃ tatraivāśu yathātapaḥ || 46 ||
[Analyze grammar]

prāṇe tvastaṅgate bāhyādapānaḥ prodayetkṣaṇāt |
ātape parito naṣṭe chāyevāśu pade navā || 47 ||
[Analyze grammar]

prāṇajanmāvanau naṣṭamapānaṃ viddhi sanmate |
apānajanmabhūmau ca prāṇaṃ naṣṭamavaihi hi || 48 ||
[Analyze grammar]

astaṅgatavati prāṇe tvapāne'bhyudayonmukhe |
bahiḥkumbhakamālambya ciraṃ bhūyo na śocyate || 49 ||
[Analyze grammar]

apāne'staṅgate prāṇe kiñcidabhyudayonmukhe |
antaḥkumbhakamālambya ciraṃ bhūyo na śocyate || 50 ||
[Analyze grammar]

prāṇarecakamūlasthamapānāpūrakoṭigam |
svasthaṃ kumbhakamabhyasya na bhūyaḥ paritapyate || 51 ||
[Analyze grammar]

apānarecakādhāraṃ prāṇapūrāntasaṃsthitam |
svasaṃsthaṃ kumbhakaṃ dṛṣṭvā na bhūyaḥ paritapyate || 52 ||
[Analyze grammar]

prāṇāpānāv ubhāvantaryatraitau vilayaṃ gatau |
tadālambya padaṃ śāntamātmanā nānutapyate || 53 ||
[Analyze grammar]

prāṇabhakṣyonmukhāpānaṃ deśaṃ kālaṃ ca niṣkalam |
vicārya bahirantarvā na bhūyaḥ pariśocyate || 54 ||
[Analyze grammar]

apānabhakṣaṇaparaṃ prāṇaṃ hṛdi tathā bahiḥ |
deśaṃ kālaṃ ca samprekṣya na bhūyo jāyate manaḥ || 55 ||
[Analyze grammar]

yatra prāṇo hyapānena prāṇenāpāna eva ca |
nigīrṇo bahirantaśca deśau kālau ca paśya tau || 56 ||
[Analyze grammar]

kṣaṇamastaṅgataprāṇamapānodayavarjitam |
ayatnasiddhaṃ bāhyasthaṃ kumbhakaṃ tatpadaṃ viduḥ || 57 ||
[Analyze grammar]

kṣaṇamastaṅgatāpānaḥ prāṇodayavivarjitaḥ |
ayatnasiddho hyantassthaḥ kumbhakaḥ paramaṃ padam || 58 ||
[Analyze grammar]

etattadātmano rūpaṃ śuddhaiṣā sā paraiva cit |
etatsadasadābhāsametatprāpya na śocyate || 59 ||
[Analyze grammar]

puṣpasyāntarivāmodaṃ prāṇasyāntaravasthitam |
na ca prāṇaṃ na cāpānaṃ cidātmānamupāsmahe || 60 ||
[Analyze grammar]

prāṇakṣayapadāntasthamapānakṣayakoṭigam |
apānaprāṇayormadhyaṃ cidātmānamupāsmahe || 61 ||
[Analyze grammar]

prāṇasya prāṇanaṃ proccaiḥ paraṃ jīvasya jīvitam |
dehasya dhāraṇaṃ dhuryaṃ cidātmānamupāsmahe || 62 ||
[Analyze grammar]

yasmin sarvaṃ yataḥ sarvaṃ yaḥ sarvaṃ sarvataśca yaḥ |
yaśca sarvamayo nityaṃ cidātmānamupāsmahe || 63 ||
[Analyze grammar]

ālokālokanaṃ puṇyaṃ sarvapāvanapāvanam |
bhāvābhāvanamanyūnaṃ cidātmanamupāsmahe || 64 ||
[Analyze grammar]

parasparopasaṅghaṭṭe hṛdaye marutoḥ sthitam |
bahirantastathākāśe cidātmanamupāsmahe || 65 ||
[Analyze grammar]

apāno'staṅgato yatra prāṇo nābhyuditaḥ kṣaṇam |
kalākalaṅkarahitaṃ taccittattvamupāsmahe || 66 ||
[Analyze grammar]

nāpāno'bhyudito yatra prāṇaścāstamupāgataḥ |
nāsāgragaganāvartaṃ taccittattvamupāsmahe || 67 ||
[Analyze grammar]

prāṇāpānodbhavasthāne bāhyābhyantarasaṃsthite |
ye dve yogipadādhāraṃ taccittattvamupāsmahe || 68 ||
[Analyze grammar]

prāṇāpānarathārūḍhamaprāṇāpānamātatam |
yacchaktirūpaṃ śaktīnāṃ taccittattvamupāsmahe || 69 ||
[Analyze grammar]

hṛtprāṇakumbhakaṃ devaṃ bahiścāpānakumbhakam |
pūrakāṃśavimṛṣṭaṃ yattaccittattvamupāsmahe || 70 ||
[Analyze grammar]

prāṇāpānaparāmarśasattārūpāvabodhakam |
yatprāpyaṃ prāṇamananāttaccittattvamupāsmahe || 71 ||
[Analyze grammar]

yatprāṇapavanaspando yatspandānandakāraṇam |
kāraṇaṃ kāraṇānāṃ yattaccittattvamupāsmahe || 72 ||
[Analyze grammar]

yadakhilakalanākalaṅkahīnaṃ parivalitaṃ ca sadā kalāgaṇena |
anubhavavibhavaṃ padaṃ tadagryaṃ sakalasurāvanataṃ paraṃ prapadye || 73 ||
[Analyze grammar]