Chapter 25

bhusuṇḍopākhyāne samādhānasaṅkalpaikanirākaraṇaṃ nāma sargaḥ |
pañcaviṃśaḥ sargaḥ |
bhusuṇḍaḥ |
ekaiva kevalaṃ dṛṣṭiranapāyā gatabhramā |
vidyate sarvavicchreṣṭha sarvaśreṣṭhā samunnatā || 1 ||
[Analyze grammar]

ātmacintā samastānāṃ duḥkhānāmantakāriṇī |
cirasambhṛtasantaptasaṃsāraśramahāriṇī |
niṣkalaṅkamanomārgavipulāṅganacāriṇī || 2 ||
[Analyze grammar]

tayā samastaduḥkhānāṃ sattānarthavilāsinām |
jyotsnayevāndhakārāṇāmalamantaḥ prajāyate || 3 ||
[Analyze grammar]

sā svātmacintā bhagavan sarvasaṅkalpavarjitā |
yuṣmadādiṣu suprāpā duṣprāpaivāsmadādiṣu || 4 ||
[Analyze grammar]

samastakalanātītaṃ parāṃ koṭimupāśritam |
padamāsādayantvetatkathaṃ sāmānyabuddhayaḥ || 5 ||
[Analyze grammar]

ātmacintāvilāsinyastvasyāḥ sakhyo mahāmate |
kiñcitsāmyamupāyātā vidyante śaśiśītalāḥ || 6 ||
[Analyze grammar]

ātmacintāsamānānāṃ vividhānāṃ munīśvara |
ātmacintāvayasyānāṃ madhyādekatamā mayā || 7 ||
[Analyze grammar]

sarvaduḥkhakṣayakarī sarvasaubhāgyavardhinī |
kāraṇaṃ jīvitasyeyaṃ prāṇacintā samāśritā || 8 ||
[Analyze grammar]

vasiṣṭhaḥ |
ityuktavantaṃ vihagaṃ bhusuṇḍaṃ punarapyaham |
jānannapīdamavyagraḥ pṛṣṭavān krīḍayā punaḥ || 9 ||
[Analyze grammar]

sarvasaṃśayavicchedinnatyantacirajīvita |
yathārthaṃ brūhi me sādho prāṇacintā kimucyate || 10 ||
[Analyze grammar]

bhusuṇḍaḥ |
sarvavedāntavettāsi sarvasaṃśayanāśakaḥ |
māmetatparihāsārthaṃ mune pṛcchasi vāyasam || 11 ||
[Analyze grammar]

atha vā bhavatāmeva bhavadbhyaḥ pariśikṣitam |
punaḥ pratyuccarāmīdaṃ kā me kṣatirupasthitā || 12 ||
[Analyze grammar]

bhusuṇḍajīvitakaraṃ bhusuṇḍasyātmalābhadam |
śṛṇu prāṇasamādhānaṃ kathyamānamidaṃ mayā || 13 ||
[Analyze grammar]

paśyedaṃ bhagavaṃstāvaddehagehaṃ manoramam |
tripradhānamahāsthūṇaṃ navadvārasamāvṛtam || 14 ||
[Analyze grammar]

puryaṣṭakakalatreṇa tanmātrasvajanena ca |
ahaṅkāragṛhasthena sarvataḥ paripālitam || 15 ||
[Analyze grammar]

antassuṣirasatkarṇaśaṣkulīcandraśālikam |
śiroruhācchādanavadvipulākṣagavākṣakam || 16 ||
[Analyze grammar]

āsyapradhānasaddvāraṃ bhujapārśvopamandiraṃ |
dantāliketakasragbhirbhūṣitadvārakoṭaraṃ || 17 ||
[Analyze grammar]

anārataraṭadrūparasanādvārapālakam |
aṅgulīlokavalitapādālindakṛtasthiti || 18 ||
[Analyze grammar]

raktamāṃsarasādigdhasnāyusantativeṣṭitam |
sthūlāsthikāṣṭhasadbandhaṃ sukuḍyaṃ supramārjitam || 19 ||
[Analyze grammar]

īdṛśasyāsya dehasya gehasya munināyaka |
suṣire komale madhye pārśukābhittimālite || 20 ||
[Analyze grammar]

padmayugmamayaṃ yantramasthimāṃsamayaṃ mṛdu |
ūrdhvādhonālamanyo'nyamilatkośaṃ lasaddalam || 21 ||
[Analyze grammar]

satataspandarūpeṇa sakalākāśacāriṇā |
tasya yantrasya pattrāṇi mṛdūnyāttāni vāyunā || 22 ||
[Analyze grammar]

lasatsu teṣu pattreṣu sa marutparivardhate |
vātāhatalatāpattrajāle bahirivābhitaḥ || 23 ||
[Analyze grammar]

vṛddhiṃ gato'sau pavanaḥ kṛtvātmānamanekadhā |
ūrdhvādho dikṣu cānyāsu dehe'sminprasaratyatha || 24 ||
[Analyze grammar]

prāṇāpānasamānādyaistataḥ sa hṛdayānilaḥ |
saṅketaiḥ procyate tajjñairvicitrācāraceṣṭitaḥ || 25 ||
[Analyze grammar]

hṛtpadmayantrakuharātsamastāḥ prāṇaśaktayaḥ |
ūrdhvādhaḥ prasṛtā dehe candrabimbādivāṃśavaḥ || 26 ||
[Analyze grammar]

yāntyāyānti vivalganti haranti viharanti ca |
utpatanti patantyāśu tā etāḥ prāṇaśaktayaḥ || 27 ||
[Analyze grammar]

sa eṣa hṛtpadmagataḥ prāṇa ityucyate budhaiḥ |
asya kācinmune śaktiḥ praspandayati locane || 28 ||
[Analyze grammar]

kācitsparśamupādatte kācidvahati nāsayā |
kācidannaṃ jarayati kācidvakti vacāṃsi ca || 29 ||
[Analyze grammar]

bahunātra kimuktena sarvameva śarīrake |
karoti bhagavānvāyuryantrehāmiva yāntrikaḥ || 30 ||
[Analyze grammar]

tatrordhvādho dvisaṅketau prasṛtāvanilau mune |
prāṇāpānāviti khyātau prakaṭau tau varānilau || 31 ||
[Analyze grammar]

tayoranusarannityaṃ mune gatimahaṃ sthitaḥ |
śītoṣṇavapuṣornityaṃ nityamambarapānthayoḥ || 32 ||
[Analyze grammar]

kalevaramahāyantre vāhayośśramahīnayoḥ |
hṛdākāśārkaśaśinoragnīṣomasvarūpayoḥ || 33 ||
[Analyze grammar]

śarīrapurapālasya manaso rathacakrayoḥ |
ahaṅkāreśvarasyāsya praśasteṣṭaturaṅgayoḥ || 34 ||
[Analyze grammar]

tayormamānusarataḥ prāṇāpānābhidhānayoḥ |
gatiṃ śarīramarutorāśarīramaruddhayoḥ || 35 ||
[Analyze grammar]

jāgratsvapnasuṣupteṣu sadaiva samarūpayoḥ |
suṣuptasaṃsthitasyeva brahman gacchanti vāsarāḥ || 36 ||
[Analyze grammar]

sahasradhā nikṛttāṅgādbisatantulavādapi |
durlakṣyā vidyamānā ca gatiḥ sūkṣmatarā tayoḥ || 37 ||
[Analyze grammar]

aviratagatayorgatiṃ viditvā hṛdi marutoranusṛtya coditāṃ tām |
na punariha hi jāyate mahātmanmuditamanāḥ puruṣaḥ praṇaṣṭapāśaḥ || 38 ||
[Analyze grammar]