Chapter 23

cirajīvivṛttāntakathanaṃ nāma sargaḥ |
trayoviṃśaḥ sargaḥ |
bhusuṇḍaḥ |
tato jagati jāteṣu bhagavanyuṣmadādiṣu |
bharadvājapulastyātrināradendramarīciṣu || 1 ||
[Analyze grammar]

pulahoddālakādyeṣu kratubhṛgvaṅgirassu ca |
sanatkumārabhṛṅgīśaskandebhavadanādiṣu || 2 ||
[Analyze grammar]

gaurīsarasvatīlakṣmīgāyatryādyāsu bhūriṣu |
merumandarakailāsahimavaddardurādiṣu || 3 ||
[Analyze grammar]

hayagrīvahiraṇyākṣakālanemibalādiṣu |
hiraṇyakaśipukrāthabaḍiprahlādakādiṣu || 4 ||
[Analyze grammar]

niminyaṅkupṛthuprothavainyanābhāgakeliṣu |
nalamāndhātṛsagaradilīpanahuṣādiṣu || 5 ||
[Analyze grammar]

ātreyavyāsavālmīkivatsavātsyāyanādiṣu |
upamanyumanīmaṅkibhagīrathaśukādiṣu || 6 ||
[Analyze grammar]

alpakātītakāleṣu kiñciddūreṣu keṣucit |
tathādyatanasargeṣu smaraṇe gaṇanaiva kā || 7 ||
[Analyze grammar]

mune te brahmaputrasya janmāṣṭamamidaṃ kila |
saṃsmarāmyaṣṭame sarge tvasmiṃstvaṃ mama saṅgataḥ || 8 ||
[Analyze grammar]

kadācijjāyase vyomnaḥ kadācijjāyase jalāt |
kadācijjāyase śailātkadācijjāyase'nalāt || 9 ||
[Analyze grammar]

yādṛśo yādṛśācāro yādṛksaṃsthānadiggaṇaḥ |
sargo'yaṃ tādṛśāneva trīn sargān saṃsmarāmyaham || 10 ||
[Analyze grammar]

ekarūpākhilācārasanniveśanarāmarān |
samakālākhilasthairyāndaśa sargān smarāmyaham || 11 ||
[Analyze grammar]

antardhānaṃ gatā devā vārapañcakamuddhṛtāḥ |
mune pañcasu sargeṣu kūrmā iva payonidheḥ || 12 ||
[Analyze grammar]

mandarākarṣaṇāvegaparyākulasurāsuram |
smarāmi dvādaśaṃ cedamamṛtāmbhodhimanthanam || 13 ||
[Analyze grammar]

sarvauṣadhirasopetāṃ baliṃ grāhastaṭādiva |
vāratrayaṃ hiraṇyākṣo nītavānvasudhāmadhaḥ || 14 ||
[Analyze grammar]

reṇukātmajatāṃ gatvā ṣaṣṭhaṃ vāramimaṃ hariḥ |
bahusargāntareṇāpi cakāra kṣatriyakṣayam || 15 ||
[Analyze grammar]

śataṃ kaliyugānāṃ ca harerbuddhadaśāśatam |
śākyarājatayaivāptaṃ smarāmi munināyaka || 16 ||
[Analyze grammar]

triṃśattripuravikṣobhāndvau dakṣādhvarasaṅkṣayau |
daśa śukravighātāṃśca candramauleḥ smarāmyaham || 17 ||
[Analyze grammar]

bāṇārthamaṣṭau saṅgrāmājjvarapramathanāyakān |
vikṣobhitasurānīkān smarāmi hariśarvayoḥ || 18 ||
[Analyze grammar]

yugaṃ prati dhiyāṃ puṃsāmūnādhikatayā mune |
kriyāṅgapāṭhavaicitryayuktānvedān smarāmyaham || 19 ||
[Analyze grammar]

ekāgrāṇi samagrāṇi bahupāṭhāni me'nagha |
purāṇāni pravartante vivṛtāni yugaṃ prati || 20 ||
[Analyze grammar]

punastāneva tānevamanyānapi yuge yuge |
devarṣivipraracitānitihāsān smarāmyaham || 21 ||
[Analyze grammar]

itihāsaṃ mahāścaryamanyaṃ rāmāyaṇābhidham |
granthalakṣapramāṇaṃ sajjñānaśāstraṃ smarāmyaham || 22 ||
[Analyze grammar]

rāmavadvyavahartavyaṃ na rāvaṇavilāsavat |
iti yatra dhiyā jñānaṃ haste phalamivārpitam || 23 ||
[Analyze grammar]

kṛtaṃ vālmīkinā caitadadhunā ca kariṣyati |
adya tvaprakaṭaṃ loke sthitaṃ jñāsyati kālataḥ || 24 ||
[Analyze grammar]

vālmīkināmnā jīvena tenaivānyena cākṣatam |
etattaddvādaśaṃ vāraṃ kriyate vismṛtiṃ gatam || 25 ||
[Analyze grammar]

dvitīyametasya samaṃ bhārataṃ nāma nāmataḥ |
smarāmi prāktanavyāsakṛtaṃ jagati vismṛtam || 26 ||
[Analyze grammar]

vyāsābhidhena jīvena tathaivānyena cākṣatam |
etattu saptamaṃ vāraṃ kriyate vismṛtiṃ gatam || 27 ||
[Analyze grammar]

ākhyānakāni śāstrāṇi vivṛtāni yugaṃ prati |
vicitrasanniveśāni saṃsmarāmi munīśvara || 28 ||
[Analyze grammar]

punastānyeva tānyeva tathānyāni yuge yuge |
sādho padārthajālāni prapaśyāmi smarāmi ca || 29 ||
[Analyze grammar]

rākṣasakṣataye viṣṇormahīmavatariṣyataḥ |
adhunaikādaśaṃ janma rāmanāmno bhaviṣyati || 30 ||
[Analyze grammar]

vasudevagṛhe viṣṇorbhuvo bhāranivṛttaye |
adhunā ṣoḍaśaṃ janma bhaviṣyati munīśvara || 31 ||
[Analyze grammar]

nārasiṃhena vapuṣā hiraṇyakaśipuṃ hariḥ |
jaghāna vāratritayaṃ mṛgendra iva vāraṇam || 32 ||
[Analyze grammar]

jagattrayībhrāntiriyaṃ na kadācinna vidyate |
vidyate na kadācicca jalabudbudavatsthitā || 33 ||
[Analyze grammar]

dṛśyabhrāntiraniṣṭheyamantassthā saṃvidātmani |
jāyate līyate cāśu lolā vīcirivāmbhasi || 34 ||
[Analyze grammar]

samaikasanniveśāni bahūni viṣamāṇi ca |
tathārdhasamarūpāṇi trijaganti smarāmyaham || 35 ||
[Analyze grammar]

tānyeva tādṛkkarmāṇi tathānyācaraṇāni ca |
tatkarmāṇi tathānyāni bhūtānīha smarāmyaham || 36 ||
[Analyze grammar]

pratimanvantaraṃ brahmanviparyaste jagatkrame |
sanniveśe'nyathā jāte prayāte saṃstute jane || 37 ||
[Analyze grammar]

mamānyāni ca mitrāṇi te'nya eva ca bandhavaḥ |
anya eva navā bhṛtyā anya eva samāśrayāḥ || 38 ||
[Analyze grammar]

kadācidahamekānte vindhyamūlalatāśrayaḥ |
kadācinmeruśṛṅgāgrakalpavṛkṣalatāśrayaḥ || 39 ||
[Analyze grammar]

kadācitsahyanilayaḥ kadāciddardurālayaḥ |
kadāciddhimavadvāsī kadācinmalayāśrayaḥ || 40 ||
[Analyze grammar]

kadācitprāktanenaiva sanniveśena bhūdharam |
vanaṃ vṛkṣaṃ ca śākhāṃ ca prāpya nīḍaṃ karomyaham || 41 ||
[Analyze grammar]

adyānanteṣu yāteṣu yugeṣu munināyaka |
prāktanenaiva jāto'yaṃ sanniveśena pādapaḥ || 42 ||
[Analyze grammar]

tāte jīvati yaivābhūcchobhāsya sutarostayā |
kṛtaprāksanniveśo'yamahaṃ sthitimupāgataḥ || 43 ||
[Analyze grammar]

nehābhūduttarā pūrvaṃ kakuṃ nāyaṃ ca bhūdharaḥ |
diguttarābhūdanyaiva pūrvaṃ merumahīdharā || 44 ||
[Analyze grammar]

ekaikadehasaṃsthānanītabrahmaniśāgamaḥ |
dhyānānte khastha evaitatsargamālokya vedmyaham || 45 ||
[Analyze grammar]

arkāderṛkṣasañcārānmervādeḥ sthānakāddiśām |
saṃsthānamanyathā tasmin sthite yānti diśo'nyathā || 46 ||
[Analyze grammar]

na sannāsajjaganmanye bhramo'yaṃ kevalaṃ dhiyaḥ |
ātmaspandacamatkāravibhavo'yaṃ vijṛmbhate || 47 ||
[Analyze grammar]

putraḥ pitṛtvamāyāto mitrāṇi tvaritāṃ tathā |
strītvaṃ ca śataśo yātānpuṃsaścaiva smarāmyaham || 48 ||
[Analyze grammar]

kalau kṛtayugācārān kṛte kaliyugasthitīḥ |
tretāyāṃ dvāpare caiva saṃsmarāmi munīśvara || 49 ||
[Analyze grammar]

adṛṣṭavedavedārthān svasaṅketavihāriṇaḥ |
sargānnirargalācārān kvacitkāṃścitsmarāmyaham || 50 ||
[Analyze grammar]

dhyātari brahmaṇi brahman sasurāsuramānuṣam |
caturyugasahasre dve jagacchūnyaṃ smarāmyaham || 51 ||
[Analyze grammar]

vicitrasaṃsthānaviśeṣadeśānvicitrakāryākulabhūtakośān |
vicitravinyāsavilāsaveṣān smarāmyahaṃ brahmadineṣvaśeṣān || 52 ||
[Analyze grammar]