Chapter 91

siddhilābhavicāropadeśo nāma sargaḥ |
ekanavatitamaḥ sargaḥ |
vasiṣṭhaḥ |
yadā hyastaṅgataprāyaṃ jātaṃ cittaṃ vicārataḥ |
tadāsya vītahavyasya jātā maitryādayo guṇāḥ || 1 ||
[Analyze grammar]

rāmaḥ |
vivekābhyudayāccittasvarūpe'ntarhite mune |
maitryādayo guṇā jātā ityuktaṃ kiṃ tvayā prabho || 2 ||
[Analyze grammar]

brahmannastaṅgate citte kasya maitryādayo guṇāḥ |
kva vā parisphurantīti vada me vadatāṃ vara || 3 ||
[Analyze grammar]

vasiṣṭhaḥ |
dvividhaścittanāśo'sti sarūpo'rūpa eva ca |
jīvanmuktaḥ sarūpaḥ syādarūpo'dehamuktajaḥ || 4 ||
[Analyze grammar]

cittasatteha duḥkhāya cittanāśaḥ sukhāya ca |
cittasattāṃ kṣayaṃ nītvā cittanāśamupārjayet || 5 ||
[Analyze grammar]

tāmasairvāsanājālairvyāptaṃ yajjanmakāraṇam |
vidyamānaṃ mano viddhi tadduḥkhāyaiva kevalam || 6 ||
[Analyze grammar]

prākṛtaṃ guṇasambhāraṃ mameti bahu manyate |
yattu cittamatattvajñaṃ duḥkhi tajjīva ucyate || 7 ||
[Analyze grammar]

vidyamānaṃ mano yāvattāvadduḥkhamanantakam |
manasyastaṅgate jantoḥ saṃsāro'ntamupāgataḥ || 8 ||
[Analyze grammar]

duḥkhi mūḍhamavaṣṭabdhamasmītyeva viniścayam |
vidyamānaṃ mano viddhi duḥkhavṛkṣanavāṅkuram || 9 ||
[Analyze grammar]

rāmaḥ |
naṣṭaṃ kasya mano brahmannaṣṭaṃ vā kīdṛśaṃ bhavet |
kīdṛśaścāsya nāśaḥ syātsyātsattā cāsya kīdṛśī || 10 ||
[Analyze grammar]

vasiṣṭhaḥ |
cetasaḥ kathitā sattā mayā raghukulodvaha |
asya nāśamidānīṃ tvaṃ śṛṇu praśnavidāṃ vara || 11 ||
[Analyze grammar]

sukhaduḥkhadaśā dhīraṃ sāmyānna proddharanti yam |
niśśvāsā iva śailendraṃ cittaṃ tasya mṛtaṃ viduḥ || 12 ||
[Analyze grammar]

ayaṃ so'hamayaṃ nāhamiti cintā narottamam |
kharvīkaroti yaṃ nāntaścittaṃ tasya mṛtaṃ viduḥ || 13 ||
[Analyze grammar]

eṣa sādho manonāśo naṣṭaṃ cedṛṅ mano bhavet |
cittanāśadaśā caiṣā jīvanmuktasya vidyate || 14 ||
[Analyze grammar]

manastāṃ mūḍhatāṃ viddhi yadā naśyati sānagha |
cittanāśābhidhānaṃ hi tadā sattvamudetyalam || 15 ||
[Analyze grammar]

tasya sattvavilāsasya cittanāśasya rāghava |
jīvanmuktasvabhāvasya kaiściccittvābhidhā kṛtā || 16 ||
[Analyze grammar]

maitryādibhirguṇairyuktaṃ bhavatyuttamavāsanam |
bhūyojanmavinirmuktaṃ jīvanmuktaṃ mano'nagha || 17 ||
[Analyze grammar]

vyāptaṃ vāsanayā yatsyādbhūyojananamuktayā |
jīvanmuktamano'saktaṃ rāma tatsattvamucyate || 18 ||
[Analyze grammar]

sampratyevānubhūtatvātsattvāptyā tattvasaṃyutaḥ |
sarūpo'sau manonāśo jīvanmuktasya vidyate || 19 ||
[Analyze grammar]

maitrī dayātha muditā śaśāṅka iva dīptayaḥ |
jīvanmuktamanonāśe sarvathā sarvadā sthitāḥ || 20 ||
[Analyze grammar]

jīvanmuktamanonāśe sattvanāmni himācale |
vasanta iva mañjaryaḥ sphuranti guṇasampadaḥ || 21 ||
[Analyze grammar]

arūpastu manonāśo yo mayokto raghūdvaha |
videhamuktāvevāsau vidyate niṣkalātmakaḥ || 22 ||
[Analyze grammar]

samagrāgryaguṇādhāramapi sattvaṃ pralīyate |
videhamuktau vimale pade paramapāvane || 23 ||
[Analyze grammar]

videhamuktaviṣaye tasmin sattvakṣayātmake |
cittanāśe virūpākhye na kiñcidapi vidyate || 24 ||
[Analyze grammar]

na guṇā nāguṇāstatra na śrīrnāśrīrna lolatā |
na codayo nāstamayo na harṣāmarṣasaṃvidaḥ || 25 ||
[Analyze grammar]

na tejo na tamaḥ kiñcinna sandhyādinarātrayaḥ |
na diśo daśa nākāśaṃ nārtho nānartharūpatā || 26 ||
[Analyze grammar]

na vāsanā na racanā nehānīhe na rañjanā |
na sattā nāpi vāsattā na madhyaṃ vāpi tatpadam || 27 ||
[Analyze grammar]

atamastejasā vyomnā vitārendvarkavārmucā |
tatsamaṃ śaradacchena visandhyenārajastviṣā || 28 ||
[Analyze grammar]

ye hi pāraṃ gatā buddheḥ saṃsārāḍambarasya ca |
teṣāṃ tadāspadaṃ sphāraṃ pavanānāmivāmbaram || 29 ||
[Analyze grammar]

saṃśāntaduḥkhamajaḍātmakamekasuptamānandamantharamapetarajastamo'rkam |
ākāśakośatanavo'tanavo mahāntastasminpade galitacittalavā vasanti || 30 ||
[Analyze grammar]