Chapter 86

vītahavyamanojagadvarṇanaṃ nāma sargaḥ |
ṣaḍaśītitamaḥ sargaḥ |
rāmaḥ |
atha kiṃ vītahavyasya sthitaṃ tasminvanodare |
kathamuddhṛtavāndehaṃ sa sampannaśca kiṃ katham || 1 ||
[Analyze grammar]

vasiṣṭhaḥ |
anantaramanantātma vītahavyābhidhaṃ manaḥ |
svamevātmacamatkāramitthaṃ tamavabuddhavān || 2 ||
[Analyze grammar]

sarvasyāsya gaṇasyābhūtprāgjātismaraṇe svayam |
icchā kadācitsakalaprāgjanmālokanaṃ prati || 3 ||
[Analyze grammar]

aśeṣān sa dadarśātha naṣṭānnaṣṭān svadehakān |
anaṣṭānāṃ tato madhyāttaṃ dharākoṭarasthitam || 4 ||
[Analyze grammar]

yadṛcchayaiva proddhartuṃ dehaṃ tasyābhavanmatiḥ |
śarīraṃ vītahavyākhyaṃ dharākoṭarapīḍitam || 5 ||
[Analyze grammar]

prāvṛḍoghopanītaṃ svapṛṣṭhasthaṃ paṅkamaṇḍalam |
tṛṇajālāvakīrṇatvaṃ dehapṛṣṭhamṛdastathā || 6 ||
[Analyze grammar]

etaddṛṣṭvā mahātejā dharāvivarayantritaḥ |
bhūyo'pi cintayāmāsa dhiyā paramabodhayā || 7 ||
[Analyze grammar]

sarvasampiṇḍitāṅgatvātkāyo me prāṇavāyubhiḥ |
mūkaścalitumākrāntaśśaknoti na manāgapi || 8 ||
[Analyze grammar]

tadgatvā praviśāmyāśu dehametaṃ vivasvataḥ |
tadīyaḥ piṅgalo dehamuddhariṣyati me tataḥ || 9 ||
[Analyze grammar]

atha vā kiṃ mamaitena śāmyāmyahamavighnataḥ |
nirvāmi svaṃ padaṃ yāmi ko'rtho me dehalīlayā || 10 ||
[Analyze grammar]

iti sañcintya manasā vītahavyo mahāmate |
tūṣṇīṃ sthitvā kṣaṇaṃ bhūyaścintayāmāsa bhūtale || 11 ||
[Analyze grammar]

upādeyo hi dehasya na me tyāgo na saṃśrayaḥ |
yādṛśo dehasantyāgastādṛśo dehasaṃśrayaḥ || 12 ||
[Analyze grammar]

tad yāvadasti deho'yaṃ na yāvadaṇutāṃ gataḥ |
tāvadenamupāruhya kiñcitpravicarāmyaham || 13 ||
[Analyze grammar]

piṅgalena śarīraṃ svamuddhartuṃ tāpanaṃ vapuḥ |
praviśāmi nabhassaṃsthaṃ makuraṃ pratibimbavat || 14 ||
[Analyze grammar]

ityasau munirādityaṃ viveśānilarūpadhṛt |
puryaṣṭakavapurbhūtvā śastrapiṇḍamivānalaḥ || 15 ||
[Analyze grammar]

bhagavān ravirapyenaṃ hṛdgataṃ munināyakam |
dṛṣṭvā so'cintayatkāryapaurvāparyamudāradhīḥ || 16 ||
[Analyze grammar]

vindhyakandarabhūdeśamagraṃ munikalevaram |
tṛṇopalaparicchannaṃ dadarśa gatasaṃvidam || 17 ||
[Analyze grammar]

ṛṣeścikīrṣitaṃ jñātvā bhānurgaganamadhyagaḥ |
dharāto munimuddhartumādideśāgragaṃ gaṇam || 18 ||
[Analyze grammar]

vītahavyamuneḥ saṃvitsā puryaṣṭakarūpiṇī |
raviṃ vātamayī pūjyaṃ praṇanāmāśu cetasā || 19 ||
[Analyze grammar]

bhānunāthābhyanujñāto mānapūrvakamagragam |
viveśa piṅgalākāraṃ vindhyakandaragāminam || 20 ||
[Analyze grammar]

piṅgalo'sau nabhastyaktvā kuñjakuñjarasundaram |
prāpa vindhyavanaṃ prāvṛṇmattābhrāmbarabhāsuram || 21 ||
[Analyze grammar]

uddadhāra dharākośānnakhaniṣkṛṣṭabhūdharaḥ |
kalevaraṃ muneḥ paṅkānmṛṇālamiva sārasaḥ || 22 ||
[Analyze grammar]

maunaṃ puryaṣṭakamatha svaṃ viveśa kalevaram |
nabhastalapariśrānto vihaṅgama ivālayam || 23 ||
[Analyze grammar]

praṇamyāśu mitho mūrtī vītahavyanabhaścarau |
babhūvatuḥ svakāryaikatatparau tejasāṃ nidhī || 24 ||
[Analyze grammar]

jagāma piṅgalo vyoma muniśca vimalaṃ saraḥ |
tārakākārakumudaṃ sūryāṃśukacadākṛti || 25 ||
[Analyze grammar]

vītahavyo mamajjāśu sarasyutphullapaṅkaje |
paṅkapalvalalīlānte vane kalabhako yathā || 26 ||
[Analyze grammar]

tatra snātvā japaṃ kṛtvā pūjayitvā divākaram |
tapobhūṣitayā tanvā pūrvavatpunarābabhau || 27 ||
[Analyze grammar]

maitryā tayā samatayā parayā ca śāntyā satprajñayā muditayā kṛpayā śriyā ca |
yukto muniḥ sakalasaṅgavimuktacetā vindhye sarittaṭagato dinameva reme || 28 ||
[Analyze grammar]