Chapter 82

cittāsattāpratipādanaṃ nāma sargaḥ |
dvyaśītitamaḥ sargaḥ |
vasiṣṭhaḥ |
vicāra evaṃ viduṣā saṃvartena kṛtaḥ purā |
kathito mama vindhyādrau tenaiva viditātmanā || 1 ||
[Analyze grammar]

etāṃ dṛṣṭimavaṣṭabhya vicāraparayā dhiyā |
saṃsārasāgarādasmāttāratamyena santara || 2 ||
[Analyze grammar]

athemāmaparāṃ rāma śṛṇu dṛṣṭiṃ padapradām |
muninā vītahavyena yathā sthitamaśaṅkitam || 3 ||
[Analyze grammar]

vītahavyo mahātejā babhrāmābhrāmbaraḥ purā |
vindhyaśailadarīrdīrghā ravirmerudarīriva || 4 ||
[Analyze grammar]

asmātkriyākramādghorātsaṃsārabhramadāyinaḥ |
ādhivyādhimayākārātkālenodvegamāyayau || 5 ||
[Analyze grammar]

nirvikalpasamādhyaṃśalabhyodārapadecchayā |
sañjahāra jarājīrṇaḥ svāṃ vyāpāraparamparām || 6 ||
[Analyze grammar]

viveśa rambhāracitaṃ nijaṃ parṇoṭajāntaram |
cūtagauraṃ sasaugandhyamalirnīlamivotpalam || 7 ||
[Analyze grammar]

tatrāsane same śuddhe svāstīrṇahariṇājine |
viśaśrāmācale śānte vāntavarṣa ivāmbudaḥ || 8 ||
[Analyze grammar]

baddhapadmāsanaḥ kṛtvā pārṣṇyoradhi karāñjalim |
śṛṅgivacchāntacalanamatiṣṭhaddṛḍhakandharam || 9 ||
[Analyze grammar]

sañjahārālamālokaṃ digvikīrṇaṃ śanaiśśanaiḥ |
viśanmerudarīṃ sāyaṃ bhānurbhāsāmivotkaram || 10 ||
[Analyze grammar]

bāhyānābhyantarāṃścaiva sparśānpariharan kramāt |
idamākalayāmāsa manasā vigatainasā || 11 ||
[Analyze grammar]

aho nu cañcalamidaṃ pratyāhṛtamapi kṣaṇāt |
na manaḥ sthairyamāyāti taraṅgaprauḍhaparṇavat || 12 ||
[Analyze grammar]

cakṣurādibhiruddāmai rūpairāhitasambhramaiḥ |
ajasramutphalatyeva vīṭeva talatāḍitā || 13 ||
[Analyze grammar]

tyajadevāśu gṛhṇāti vṛttīrindriyavardhitāḥ |
yasmānnivāryate tasminpronmatta iva dhāvati || 14 ||
[Analyze grammar]

ghaṭātpaṭamupāyāti paṭācchakaṭamutkaṭam |
cittamartheṣu carati pādapeṣviva markataḥ || 15 ||
[Analyze grammar]

pañcadvārāṇi manasaścakṣurādīnyamūnyalam |
dagdhendriyābhidhānāni tāvadālokayāmyaham || 16 ||
[Analyze grammar]

haṃho hatendriyagaṇāḥ kimeṣoddāmateha vaḥ |
velā vilulitāmbūnāmabdhīnāmiva cañcalā || 17 ||
[Analyze grammar]

mā kurudhvamanarthāya cāpalaṃ cañcalāśayāḥ |
smaratātītavṛttīni duḥkhajālāni bhūriśaḥ || 18 ||
[Analyze grammar]

rūpāṇi manaso yūyaṃ jaḍā eva kilādhamāḥ |
jaḍimnotsukatātyarthaṃ mṛgatṛṣṇeva valgati || 19 ||
[Analyze grammar]

asārātmasvarūpāṇāmanālokavatāṃ sadā |
andhānāmuddhatiryeyaṃ sā hāsāyaiva jāyate || 20 ||
[Analyze grammar]

cidātmā bhagavān sarvaṃ sākṣitvena karotyajaḥ |
hatendriyagaṇā yūyaṃ kiṃ nirarthakamāgatāḥ || 21 ||
[Analyze grammar]

mithyaivaite vivalganti nīrūpā nayanādayaḥ |
alātacakrapratimāḥ sarparajjubhramopamāḥ || 22 ||
[Analyze grammar]

tenātmanā bahujñena nirjñānāścakṣurādayaḥ |
manāgapi na sambaddhā dyupātālatalādrivat || 23 ||
[Analyze grammar]

bhītaḥ pāntha ivāhibhyaḥ pukkasebhya iva dvijaḥ |
dūre tiṣṭhati cinmātramindriyebhyastvanāmayam || 24 ||
[Analyze grammar]

citsattāmātrakeṇāyaṃ saṅkṣobho bhavatāṃ mithaḥ |
tiṣṭhati svairamāditye dinakāryavatāmiva || 25 ||
[Analyze grammar]

citta cāraṇacārvāka caturdikkukṣibhikṣuka |
śveva vyarthamanarthāya medaṃ vihara he jagat || 26 ||
[Analyze grammar]

ahaṃ cidvaditi vyarthamasatyā tava vāsanā |
atyantabhinnayoraikyaṃ nāsti cinmanasośśaṭha || 27 ||
[Analyze grammar]

jīvāmyevāhamityeṣā tavāhaṅkāradundubhiḥ |
mithyaiva jātā duḥkhāya na satyā satyavarjitā || 28 ||
[Analyze grammar]

ahaṅkārādahaṃ so'smītyetāṃ saṃrabdhatāṃ tyaja |
na kiñcidapi mūrkha tvaṃ kiṃ vyarthaṃ taralāyase || 29 ||
[Analyze grammar]

saṃviccittamanādyantaṃ saṃvido'nyanna vidyate |
dehe'smiṃstanmahāmūrkha kiṃ tatsyāccittanāmakam || 30 ||
[Analyze grammar]

viṣaparyavasāneyaṃ rasāyanavadutthitā |
bhoktṛtākartṛtāśaṅkā tava citta mudhaiva hi || 31 ||
[Analyze grammar]

mopahāsapadaṃ gaccha mūrkhendriyagaṇa svayam |
na kartā tvaṃ na bhoktā tvaṃ jaḍo'syanyena bodhyase || 32 ||
[Analyze grammar]

kastvaṃ bhavasi bhogānāṃ ke vā bhogā bhavanti te |
jaḍasyātmaiva te nāsti bandhumitrādi tatkutaḥ || 33 ||
[Analyze grammar]

yajjaḍaṃ taddhi nāstyeva sadevāsattayānvitam |
jñatvakartṛtvabhoktṛtvamantṛtvānāmasambhavāt || 34 ||
[Analyze grammar]

pratyakcetanarūpaṃ cettvaṃ tadātmaiva te vapuḥ |
bhāvābhāvamayī citta sattā te keva duḥkhadā || 35 ||
[Analyze grammar]

ye vā kartṛtvabhoktṛtve mithyaivādhigate tvayā |
mayā te hi pramārjyete śṛṇu yuktyā kathaṃ śaṭha || 36 ||
[Analyze grammar]

svayaṃ tāvadbhavāneṣa jaḍo nāstyatra saṃśayaḥ |
jaḍasya kīdṛkkartṛtvaṃ nṛtyanti hi kathaṃ śilāḥ || 37 ||
[Analyze grammar]

upajīvya ciraṃ tasmācchuddhaṃ tadbhāgamaiśvaram |
jīvasīcchasi haṃsi tvaṃ plavase yāsi valgasi || 38 ||
[Analyze grammar]

kriyate yattu yacchaktyā tattenaiva kṛtaṃ bhavet |
lunāti dātraṃ puṃśaktyā hantaiva procyate pumān || 39 ||
[Analyze grammar]

pīyate yattu yacchaktyā pītaṃ tenaiva tadbhavet |
pātreṇa pīyate pānaṃ pānapastūcyate naraḥ || 40 ||
[Analyze grammar]

prakṛtyaivāsi sujaḍamasakṛjjñena bodhyase |
tenātmaivātmanātmānaṃ cinotīdaṃ hi no bhavet || 41 ||
[Analyze grammar]

anārataṃ bodhayati tvāmātmā parameśvaraḥ |
bodhanīyā budhairmūḍhāḥ kilāvṛttiśatairapi || 42 ||
[Analyze grammar]

ātmasattaiva bodhaikarūpiṇī sphuratīha hi |
tayaiva citta śabdārthānaṅgīkṛtya laghu sthitam || 43 ||
[Analyze grammar]

evaṃ citta tvamajñānādātmaśakterupāgatam |
jñāne tvadyāvagalitaṃ tīvre himamivātape || 44 ||
[Analyze grammar]

tasmānmṛtaṃ tvaṃ mūḍhaṃ tvaṃ nāsi tvaṃ paramārthataḥ |
tadevāhamiti vyarthaṃ māno māstvasukhāya te || 45 ||
[Analyze grammar]

asatyāścittakalanā indrajālalatā iva |
vijñānamātrameveha brāhmamaṅga vijṛmbhate || 46 ||
[Analyze grammar]

narāmarajagadrūpairbrāhmī śaktirudetyalam |
sāmudrī kaṇakallolajālairveleva valgati || 47 ||
[Analyze grammar]

cinmayaṃ cidbhavanmūḍha tattasmātparamātpadāt |
nityamavyatiriktaṃ tvaṃ kimanyatpariśocasi || 48 ||
[Analyze grammar]

sarvagaṃ sarvabhāvasthaṃ sarvarūpaṃ hi tatpadaṃ |
tatprāptau sarvamevāśu prāptaṃ bhavati sarvadā || 49 ||
[Analyze grammar]

na tvamasti na deho'sti brahmāstīha mahatsphurat |
ahaṃ tvamiti niṣṣyandaiḥ sphuratyārtirhi kasya kā || 50 ||
[Analyze grammar]

ātmā cettvaṃ tadātmaiva sarvago'stīha netaraḥ |
ātmano'nyajjaḍaṃ tvaṃ cettattvaṃ nāstyasyavidvapuḥ || 51 ||
[Analyze grammar]

ātmaiva sarvaṃ trijagattadanyattu nakiñcana |
tannakiñcittvamātmānyad yadi tattvaṃ nakiñcana || 52 ||
[Analyze grammar]

ahaṃ tvidamidaṃ tanme iti vyarthaṃ kimīhase |
asadvapuḥ kiṃ sphurati śaśaśṛṅgeṇa ko hataḥ || 53 ||
[Analyze grammar]

tṛtīyā kalpanā nāsti cijjaḍāṃśetarā śaṭha |
chāyāhasanayormadhye tṛtīyevānurañjanā || 54 ||
[Analyze grammar]

satyāvalokanājjāte cittvajāḍyadṛśoḥ kṣaye |
sampadyate yattattvajña svasaṃvedanamātrakam || 55 ||
[Analyze grammar]

tena mūḍha na kartṛ tvaṃ na bhoktṛ tvaṃ na cāpyasi |
tadevāsi paraṃ brahma tyaja maurkhyaṃ bhavātmakam || 56 ||
[Analyze grammar]

kevalaṃ tvajñaviṣayamupadeśārthasiddhaye |
tvayā karaṇabhūtena karotyātmeti kathyate || 57 ||
[Analyze grammar]

asatsvarūpaṃ karaṇaṃ jaḍaṃ niravalambanam |
na spandate na plavate kartṛsambodhanaṃ vinā || 58 ||
[Analyze grammar]

akartuḥ karaṇasyājña śaktiḥ kācinna vidyate |
dātrasya lāvakābhāve kartuṃ kimiva śaktatā || 59 ||
[Analyze grammar]

khaḍgaprahāravicchedakriyāyāṃ puṃsi śaktatā |
na khaḍge sujaḍe kṛttasarvāṅge'pyasti śaktatā || 60 ||
[Analyze grammar]

tasmānnāsi sakhe kartṛ mā vyarthaṃ duḥkhabhāgbhava |
parārthaṃ kleśitā mūrkha prākṛteṣu na śobhate || 61 ||
[Analyze grammar]

īśvaro nedṛśaśśocyo yastvayopakṛto bhavet |
naiva tasya kṛtenārtho nākṛteneha kaścana || 62 ||
[Analyze grammar]

sarvaṃ tūpakaromyenamiti kevalamalpadhīḥ |
kliśyate ca satāṃ tvartho na kaścidupayujyate || 63 ||
[Analyze grammar]

karturbhogeśvarasyaivamatha cedanuvartase |
tadasya kācinneccheha tṛptatvātsarvadaiva hi || 64 ||
[Analyze grammar]

akṛtrimāvabhāsena sarvagena cidātmanā |
ekenaivedamāpūrṇaṃ kalpanaivāsti netarā || 65 ||
[Analyze grammar]

ekānekāvabhāsena samastena tatātmanā |
ātmanyevātmanaivāntaḥ kriyate kiṃ kimiṣyate || 66 ||
[Analyze grammar]

tvādṛśasya tu dṛṣṭyaiva kṣubdhatā jāyate mudhā |
ālokya rājamahiṣīṃ mano madamayīṃ yathā || 67 ||
[Analyze grammar]

ātmanā tava sambandhaścettatkartrasi sundara |
kiṃ tu nāsyāsi sambandhaḥ kusumasyopalo yathā || 68 ||
[Analyze grammar]

dvitīyena samaṃ yaiṣā tattā tadbhāvataikatā |
sā sambandhagatiḥ proktā prāgdvitvādadhunaikatā || 69 ||
[Analyze grammar]

nānāprakāraracanā nānārūpakriyāmukhī |
sukhaduḥkhadaśāhetuḥ sā cānekavidhā smṛtā || 70 ||
[Analyze grammar]

sambandhaḥ samayordṛṣṭastathārdhasamayorapi |
suvilakṣaṇayoścānyastasmin sati jagattraye || 71 ||
[Analyze grammar]

dravyāntaraguṇaṃ dravyāṇyāśrayanti bahūnyalam |
śaśiśaityaṃ yathauṣadhyo yathoṣmāṇaṃ mahāśilāḥ || 72 ||
[Analyze grammar]

itthaṃ yadi tu sambandho bhavataḥ paramātmanā |
astu tatsaṃsṛterbījamanyo'nyaguṇasaṅkaraḥ || 73 ||
[Analyze grammar]

manomanananirmāṇakalātītātmanātmanā |
īdṛśo'sti na sambandhastavendriyagaṇāṇunā || 74 ||
[Analyze grammar]

anyaśca dṛśyate loke sambandhaḥ samayoḥ sphuṭaḥ |
yathā jvalanayoraikye tejasoḥ payasorapi || 75 ||
[Analyze grammar]

manomanananirmāṇakalātītātmanāṇunā |
īdṛśo'pi na sambandhastavendriyagaṇātmanā || 76 ||
[Analyze grammar]

anyaśca caura sambandho dṛṣṭo'rdhasamayorapi |
ekāvayavavaicitryād yathā strīpuṃsayoriha || 77 ||
[Analyze grammar]

kiñcidanyatayā caiva salilakṣīrayoriva |
atha vā vārimadhunormadhunoriva citrayoḥ |
pāṇḍurāruṇayorvāpi tejasoraruṇārkayoḥ || 78 ||
[Analyze grammar]

manomanananirmāṇakalātītātmanātmanā |
īdṛśo'pi na sambandhastavendriyagaṇāṇunā || 79 ||
[Analyze grammar]

anyo'sti caura sambandho yo'tyantāsamayorapi |
yatheha kāṣṭhajatunostathā puruṣadantinoḥ || 80 ||
[Analyze grammar]

tādṛśo'pi na sambandhastavendriyagaṇāṇunā |
manomanananirmāṇakalātītātmanātmanā || 81 ||
[Analyze grammar]

anyo bījāṅkuranyāye pitṛputrakrame tathā |
kāryakāraṇarūpo'pi na sambandhastavātmanā || 82 ||
[Analyze grammar]

anyo'pi kalanāmātrasaṅketaracito bhavet |
tavāhaṃ tvaṃ mametyantarniścayena kila dvayoḥ || 83 ||
[Analyze grammar]

anye ca bahavo lokeṣvādhārādheyatādayaḥ |
sambhavantīha sambandhāḥ suṣṭhu sambandhakāriṇām || 84 ||
[Analyze grammar]

manomanananirmāṇakalātītātmanāṇunā |
tathāpi naiva sambandhastavendriyagaṇātmanā || 85 ||
[Analyze grammar]

ātmanā bhavataḥ ko'yaṃ ghoraḥ saṃsāraduḥkhadaḥ |
sambandhaḥ syādvadāsmābhiryo na dṛṣṭo na dṛśyate || 86 ||
[Analyze grammar]

nāsau susamanirmāṇo na cārdhasamanirmitiḥ |
na vilakṣaṇanirmāṇaḥ sambandhaḥ ka ivedṛśaḥ || 87 ||
[Analyze grammar]

śaśamastakaśṛṅgeṇa rasāyanamayaśśaśī |
kathaṃ saṃśliṣyate sādho nityaṃ sannasatā kila || 88 ||
[Analyze grammar]

nityaṃ sadasatoraikyaṃ kathamakṣagaṇātmanoḥ |
prakāśajaḍayormūrkha sakalaṅkākalaṅkayoḥ || 89 ||
[Analyze grammar]

dvayorvāpyasatorevaṃ saṅgaḥ sambhavatīha kaḥ |
śaśamastakaśṛṅgādriśilāśakalayoriva || 90 ||
[Analyze grammar]

śṛṇvimaṃ niścayaṃ citta satyameva mayocyate |
ātmanā tava sambandhaḥ svapneṣvapi na vidyate || 91 ||
[Analyze grammar]

yadanātmamayaṃ tacca na sambhavati kutracit |
ātmanaḥ sarvarūpatvāttena tvaṃ nāsi cittaka || 92 ||
[Analyze grammar]

citta cetyavimukteyaṃ jagajjālavijṛmbhitaiḥ |
ahaṃ tvamityādimayī brahmasattaiva valgati || 93 ||
[Analyze grammar]

sakalakalpanayā svasamutthayā parivṛto'pyabhitaśca vivarjitaḥ |
tava na saṅgamupaiti śaṭhākṛte hatamanaḥ sakalāmaladṛgvibhuḥ || 94 ||
[Analyze grammar]