Chapter 80

samyagjñānalakṣaṇaṃ nāma sargaḥ |
aśītitamaḥ sargaḥ |
vasiṣṭhaḥ |
idamantaḥ kalayato bhogānprati vivekinaḥ |
purassthitānapi sadā spṛhaivāṅga na jāyate || 1 ||
[Analyze grammar]

cakṣurālokanāyaiva jīvastu sukhaduḥkhayoḥ |
bhārāyaiva balīvardo bhoktā dravyasya nāyakaḥ || 2 ||
[Analyze grammar]

nayane rūpanirmagne kṣobhaḥ ka iva dehinaḥ |
gardabhe palvalonmagne kaiva senāpateḥ kṣatiḥ || 3 ||
[Analyze grammar]

rūpakardamametanmānaya nāsvādayādhama |
naśyatyetannimeṣeṇa bhavantamapi hiṃsati || 4 ||
[Analyze grammar]

yenaiva sakhyaṃ kriyate ya evābhyanugamyate |
tadīyaiḥ karmabhiḥ kṣipraṃ prājñaśśūro'pi badhyate || 5 ||
[Analyze grammar]

utpannadhvaṃsi sampātamātrahṛdyamasanmayam |
rūpamāśraya mā netra vināśāyāvināśine || 6 ||
[Analyze grammar]

sākṣivattvaṃ sthitaṃ netra rūpaṃ ātmani tiṣṭhati |
ālokaḥ kālavaśatastvamekaḥ kiṃ pratapyase || 7 ||
[Analyze grammar]

salilaspandavaddṛṣṭiḥ piñchikevāmbarotthitā |
svajātibandhātsphurati tava citta kimāgatam || 8 ||
[Analyze grammar]

svalpāmbhasīva śaphare citte sphuraṇadharmiṇi |
svayaṃ sphuratyahaṅkāra tvamayaṃ protthitaḥ kutaḥ || 9 ||
[Analyze grammar]

ālokarūpayornityaṃ jaḍayoḥ sphuratormithaḥ |
ādhārādheyayościtta vyarthamākulatā tava || 10 ||
[Analyze grammar]

rūpālokamanaskārāḥ parasparamasaṅginaḥ |
saṃsaktā iva lakṣyante vadanādarśabimbavat || 11 ||
[Analyze grammar]

ajñānajantunā hyete śliṣṭā jātā nirantarāḥ |
ajñāne jñānagalite pṛthaktiṣṭhantyasanmayāḥ || 12 ||
[Analyze grammar]

manaḥkalanayā hyete susambaddhāḥ parasparam |
rūpālokamanaskārā dārūṇi jatunā yathā || 13 ||
[Analyze grammar]

svamanomanane tantau mano'bhyāsena yatnataḥ |
vicārācchedamāyāte chinnaivājñānabhāvanā || 14 ||
[Analyze grammar]

ajñānasaṅkṣayātkṣīṇe manasyete punarmithaḥ |
rūpālokamanaskārāḥ saṅghaṭante na kecana || 15 ||
[Analyze grammar]

sarveṣāṃ cittamevāntarindriyāṇāṃ prabodhakam |
tadeva tasmāducchedyaṃ piśāca iva mandirāt || 16 ||
[Analyze grammar]

citta valgasi mithyaiva dṛṣṭo'nto bhavato mayā |
ādyanteṣu sutucchastvaṃ vartamāne'pi na hyasi || 17 ||
[Analyze grammar]

mudhā pañcabhirākāraiḥ kimantaḥ parivalgasi |
yastvāṃ tvāmiti jānāti tasyaitatparivalgyate || 18 ||
[Analyze grammar]

tvadvalganaṃ me kumano na manāgapi tuṣṭaye |
māyānaraspanda iva vyarthaṃ vṛttiṣu dahyase || 19 ||
[Analyze grammar]

tiṣṭha vā gaccha vā citta nāsi me śaṭha jīvasi |
prakṛtyāsi mṛtaṃ nityaṃ vicārātsumṛtaṃ sthitam || 20 ||
[Analyze grammar]

nistattvaṃ tvaṃ jaḍaṃ bhrātaśśaṭha nityamṛtākṛte |
mūḍha eva tvayājñena vañcyate na vicāravān || 21 ||
[Analyze grammar]

vayamājñātavantastvāṃ maurkhyeṇānusṛtaṃ bhavet |
mṛtamasmākamadyāsi dīpānāṃ timiraṃ yathā || 22 ||
[Analyze grammar]

śaṭhena bhavatā dīrghaṃ kālaṃ dehagṛhaṃ mama |
uparuddhamabhūtpūrvaṃ sādhusaṃsargavarjitam || 23 ||
[Analyze grammar]

jaḍe pretasamākāre gate tvayi manaśśaṭhe |
sarvasajjanasaṃsevyaṃ idaṃ dehagṛhaṃ sthitam || 24 ||
[Analyze grammar]

pūrvamevāsi nāsyeva sampratyapi jaḍaṃ śaṭham |
na bhaviṣyasi cedānīṃ kiṃ vetāla na lajjase || 25 ||
[Analyze grammar]

saha tṛṣṇāpiśācībhiḥ saha kopādiguhyakaiḥ |
nirgaccha cittavetāla śarīrasadanānmama || 26 ||
[Analyze grammar]

diṣṭyā vivekamantreṇa nirgato dehamandirāt |
pramattacittavetālaḥ kuvṛkaḥ kandarādiva || 27 ||
[Analyze grammar]

aho nu citraṃ sumahajjaḍena kṣaṇabhaṅginā |
manaśśaṭhena sarvo'yaṃ nīto vivaśatāṃ janaḥ || 28 ||
[Analyze grammar]

kaste parākramaḥ kiṃ te balaṃ kaste samāśrayaḥ |
yadi valgasi māmeva janatāṃ bādhase tathā || 29 ||
[Analyze grammar]

śaṭhātmaivāsi na mayā dīnacittaka māryase |
mṛtamityavabuddhaṃ tvamadya kevalamajña he || 30 ||
[Analyze grammar]

etāvantamahaṃ kālaṃ tvāṃ jñātvā jīvadāsthitam |
kliṣṭaḥ prabhūtabhaṅgāsu ciraṃ saṃsṛtirātriṣu || 31 ||
[Analyze grammar]

cittaṃ mṛtaṃ hi nāstīha tvityadyāvagataṃ mayā |
tena tvadāśāṃ santyajya tiṣṭhāmyātmani kevalaḥ || 32 ||
[Analyze grammar]

diṣṭyā cittaṃ mṛtamiti jñātamadya mayā svayam |
na śaṭhena samaṃ nītaṃ samagraṃ jīvitaṃ nijam || 33 ||
[Analyze grammar]

utsārya dehasadanānmanaśśaṭhamahaṃ kṣaṇāt |
ayaṃ svasthaḥ sthito'smyantarvetālaparivarjitaḥ || 34 ||
[Analyze grammar]

cittavetālalabdhena ciraṃ kālaṃ mayoddhatāḥ |
kṛtā vikārā vividhāḥ svayaṃ kṛtvā hasāmi yān || 35 ||
[Analyze grammar]

cirānnipatito diṣṭyā vicārāsivarāṅkitaḥ |
hṛdgehāccittavetālastālottālasamunnatiḥ || 36 ||
[Analyze grammar]

praśāntacittavetāle pavitrāṃ padavīṃ gate |
diṣṭyā śarīranagare sukhaṃ tiṣṭhāmi kevalaḥ || 37 ||
[Analyze grammar]

mṛtaṃ mano mṛtāścintā mṛto'haṅkārarākṣasaḥ |
vicāramantreṇa samaḥ svasthastiṣṭhāmi kevalaḥ || 38 ||
[Analyze grammar]

kiṃ mano me mamāśāḥ kāḥ ko me'haṅkārako bhavet |
diṣṭyā vyarthaṃ kalatraṃ me naṣṭametadaśeṣataḥ || 39 ||
[Analyze grammar]

ekasmai kṛtakṛtyāya nityāya vimalātmane |
nirvikalpacidākhyāya mahyameva namo namaḥ || 40 ||
[Analyze grammar]

na mamāśā na karmāṇi na saṃsāro na kartṛtā |
na bhoktṛtā na deho me mahyameva namo namaḥ || 41 ||
[Analyze grammar]

nāhamātmā na cākāśo na caivāyamahaṃ svayam |
mama nāsti vyavacchedo mahyameva namo namaḥ || 42 ||
[Analyze grammar]

nīrūpāya nirākhyāya prakāśāyāmalātmane |
svayamātmaikasaṃsthāya mahyameva namo namaḥ || 43 ||
[Analyze grammar]

nirvikārāya nityāya niraṃśāya nirātmane |
sarvasmai sarvakāryāya mahyameva namo namaḥ || 44 ||
[Analyze grammar]

samāṃ sarvagatāṃ sūkṣmāṃ jagadekaprakāśinīm |
sattāmupāgato'smyantarmahyameva namo namaḥ || 45 ||
[Analyze grammar]

sādridyūrvīnadīśāṅgaṃ nāhamevāhameva vā |
jagatsarvapadārthāḍhyaṃ mahyameva namo namaḥ || 46 ||
[Analyze grammar]

vyapagatamananaṃ śamābhirāmaṃ prakaṭitaviśvamaviśvamapyanantam |
svayamajamajaraṃ guṇādatītaṃ vapurahamacyutamaiśvaraṃ namāmi || 47 ||
[Analyze grammar]