Chapter 75

nairāśyopadeśo nāma sargaḥ |
pañcasaptatitamaḥ sargaḥ |
vasiṣṭhaḥ |
janakaḥ saṃsthito rājye vyavahāraparo'pi san |
vigatajvara evāntaranākulamatiḥ sadā || 1 ||
[Analyze grammar]

pitāmaho dilīpaste sarvārambhaparo'pyalam |
vītarāgatayaivāntarbubhuje medinīṃ ciram || 2 ||
[Analyze grammar]

jīvanmuktākṛtirnityamajo rājyamapālayat || 3 ||
[Analyze grammar]

vicitrabalayuddheṣu vyavahāreṣu bhūriṣu |
māndhātā suciraṃ tiṣṭhaṃstyaktavānna paraṃ padam || 4 ||
[Analyze grammar]

baḍiḥ pātālapīṭhasthaḥ kurvan svāṃ divasasthitim |
sadātyāgī sadāsakto jīvanmuktapade sthitaḥ || 5 ||
[Analyze grammar]

namucirdānavādhīśo devadvandvaparaḥ sadā |
nānācāravihāreṣu kvacinnāntaratapyata || 6 ||
[Analyze grammar]

vāsavājau tanutyāgī vṛtro vitatamānasaḥ |
antaśśītamanā mānī cakāra surasaṅgaram || 7 ||
[Analyze grammar]

kurvandānavakāryāṇi pātālatalapālakaḥ |
anapāyaṃ nirākrośaṃ prahlādo hlādamāgataḥ || 8 ||
[Analyze grammar]

śambaraikaparo'pyantaśśambaraikatayoditaḥ |
saṃsāraśambaraṃ rāma śambarastyaktavānidam || 9 ||
[Analyze grammar]

asaktabuddhirhariṇā kurvandānavasaṅgaram |
parāṃ saṃvidamāsādya musalastyaktavāṃstanum || 10 ||
[Analyze grammar]

sarvāmaramukhaṃ vahniḥ kriyājālaparo'pyati |
yajñalakṣmīṃ ciraṃ bhoktuṃ mukta eveha tiṣṭhati || 11 ||
[Analyze grammar]

pīyamānaḥ suraiḥ sarvaiḥ somaḥ samarasāśayaḥ |
kvacideti na saṃsaṅgamākrānto'pyambaraṃ yathā || 12 ||
[Analyze grammar]

bṛhaspatirdevagururdārārthaṃ candrayodhyapi |
ācarandivi citrehāmukta eva vyavasthitaḥ || 13 ||
[Analyze grammar]

śukro'mbarataloddyotī labdhasarvārthapālakaḥ |
nirvikāramatiḥ kālaṃ nayatyasuradaiśikaḥ || 14 ||
[Analyze grammar]

jagadbhūtagaṇāṅgāni ciraṃ sañcārayannapi |
sarvadā sarvasañcārī mukta eva samīraṇaḥ || 15 ||
[Analyze grammar]

lokājavañjavībhāve prodvegārho'pyakhinnadhīḥ |
brahmā samamanā rāma kṣapayatyāyurāyatam || 16 ||
[Analyze grammar]

jarāmaraṇayuddhādidvandvapañjaralīlayā |
caratīha ciraṃ kālaṃ mukto'pi bhagavān hariḥ || 17 ||
[Analyze grammar]

muktenāpi trinetreṇa saundaryatarumañjarī |
dehārdhe dhāryate gaurī kāmukeneva kāmukī || 18 ||
[Analyze grammar]

muktayāpi gale baddho gauryā gaurastrilocanaḥ |
suśuddha iva muktānāṃ gaṇaśśaśikalāmalaḥ || 19 ||
[Analyze grammar]

guho gahanadhīrvīrastārakādiraṇakramam |
mukto'pi kṛtavān sarvajñānaratnaikasāgaraḥ || 20 ||
[Analyze grammar]

bhṛṅgīśo raktamāṃsaṃ svaṃ svamātre pravitīrṇavān |
muktayaiva dhiyā rāma dhīrayā dhyānadhautayā || 21 ||
[Analyze grammar]

munirmuktasvabhāvo'pi jagajjaṅgalakhaṇḍakam |
nārado vijahāremaṃ līlayā kāryaśīlayā || 22 ||
[Analyze grammar]

jīvanmuktamanā mānī viśvāmitraḥ svayaṃ prabhuḥ |
vedoktāṃ makhanirmāṇakriyāṃ samadhitiṣṭhati || 23 ||
[Analyze grammar]

dhārayatyavaniṃ śeṣaḥ karotyarko dināvalīm |
yamo yamatvaṃ kurute jīvanmuktatayaiva hi || 24 ||
[Analyze grammar]

anye'pyasmiṃstribhuvane yakṣāmaranarāsurāḥ |
śataśo muktatāṃ yātāḥ santastiṣṭhanti saṃsṛtau || 25 ||
[Analyze grammar]

saṃsthitā vyavahāreṣu vividhācāradhāriṣu |
antarāśītalāḥ kecitkecinmūḍhāśśilāsamāḥ || 26 ||
[Analyze grammar]

paramaṃ bodhamāsādya kecitkānanamāgatāḥ |
yathā bhṛgubharadvājaviśvāmitrasahādayaḥ || 27 ||
[Analyze grammar]

kecit rājyeṣu tiṣṭhanti cchattracāmaramālitāḥ |
yathā janakaśaryātimāndhātṛmagadhādayaḥ || 28 ||
[Analyze grammar]

kecidvyomani tiṣṭhanti dhiṣṇyacakrāntarasthitāḥ |
yathā bṛhaspatyuśanaścandrasūryamunīśvarāḥ || 29 ||
[Analyze grammar]

kecitsurapadaṃ yātā vimānāvalimāsthitāḥ |
yathāgnivāyuvaruṇayamatumburunāradāḥ || 30 ||
[Analyze grammar]

kecitpātālakuhare jīvanmuktā vyavasthitāḥ |
yathā baḍisuhotrāndhaprahlādahlādapūrvakāḥ || 31 ||
[Analyze grammar]

tiryagyoniṣvapi sadā vartante kṛtabuddhayaḥ |
devayoniṣvapi prājña vartante mūrkhabuddhayaḥ || 32 ||
[Analyze grammar]

sarvaṃ sarveṇa sarvatra sarvathā sarvadaiva hi |
sambhavatyeva sarvātmanyātmanātmasvarūpiṇi || 33 ||
[Analyze grammar]

vidhervicitrā niyatiranantārambhamantharā |
sanniveśāṃśavaicitryātsarvaṃ sarvatra dṛśyate || 34 ||
[Analyze grammar]

vidhirdaivaṃ vibhurdhātā sarveśaśśiva īśvaraḥ |
iti nāmabhirātmāntaḥ pratyakcetana ucyate || 35 ||
[Analyze grammar]

astyavastuni vastvantaḥ kāñcanaṃ sikatāsviva |
asti vastunyavastvantarmalaṃ hemakaṇeṣviva || 36 ||
[Analyze grammar]

ayukte yuktatā yuktyā prekṣyamāṇā pradṛśyate |
pāpasya hi bhayāl loko dharme rāma pravartate || 37 ||
[Analyze grammar]

asatye satyatā sādho śāśvatī parilakṣyate |
śūnyena dhyānayogena śāśvataṃ padamāpyate || 38 ||
[Analyze grammar]

yannāsti tadudetyāśu deśakālavilāsataḥ |
śaśakāśśṛṅgavanto hi dṛśyante śambarasthitau || 39 ||
[Analyze grammar]

ye vajrasārāḥ sudṛḍhā dṛśyante te kṣayaṃ gatāḥ |
kalpasyānte yathendvarkadharābdhivibudhādrayaḥ || 40 ||
[Analyze grammar]

iti paśyanmahābāho bhāvābhāvabhavakramam |
harṣāmarṣaviṣādehāḥ santyajya samatāṃ vraja || 41 ||
[Analyze grammar]

asatsadavabhātīha sadasaccāpi dṛśyate |
āsthānāsthe parityajya tenāśu samatāṃ vraja || 42 ||
[Analyze grammar]

muktau rāghava loke'sminna prāptiḥ sambhavatyalam |
apravṛttyā vivekasya magnā hi janakoṭayaḥ || 43 ||
[Analyze grammar]

muktau rāghava loke'sminprāptirasti sadaiva hi |
pravṛttyā hi vivekasya muktāśca janakoṭayaḥ || 44 ||
[Analyze grammar]

pravivekāvivekābhyāṃ sulabhālabhyatāṃ gatā |
muktirmanaḥkṣayaprāptyā vivekaṃ tena dīpaya || 45 ||
[Analyze grammar]

ātmāvalokane yatnaḥ kartavyo bhūtimicchatā |
sarvaduḥkhaśiraścheda ātmālokena jāyate || 46 ||
[Analyze grammar]

nīrāgā nirupāsaṅgā jīvanmuktā mahādhiyaḥ |
sambhavantīha bahavaḥ suhotrajanakā iva || 47 ||
[Analyze grammar]

tasmāttvamapi vai rāma vivekoditadhīradhīḥ |
jīvanmukto vihara bhoḥ samaloṣṭāśmakāñcanaḥ || 48 ||
[Analyze grammar]

dvividhā muktatā loke vidyate dehadhāriṇām |
sadehaikā videhānyā vibhāgo'yaṃ tayośśṛṇu || 49 ||
[Analyze grammar]

asaṃsaṅgātpadārthānāṃ manaśśāntirhi muktatā |
satyasatyapi dehe sā sambhavatyanaghākṛte || 50 ||
[Analyze grammar]

snehasaṅkṣayamevāṅga viduḥ kaivalyamuttamāḥ |
tatsambhavati dehasya bhāve cābhāva eva ca || 51 ||
[Analyze grammar]

yo jīvati gatasnehaṃ sa jīvanmukta ucyate |
sasnehajīvito baddho mukta eva tṛtīyakaḥ || 52 ||
[Analyze grammar]

yatno yatnena kartavyo mokṣārthaṃ yuktipūrvakam |
yatnayuktivihīnasya goṣpadaṃ dustaraṃ bhavet || 53 ||
[Analyze grammar]

na tvanadhyavasāyasya duḥkhāya vipulātmane |
ātmā paravaśaḥ kāryo mohamāśritya kevalam || 54 ||
[Analyze grammar]

sumahaddhairyamālambya manasā vyavasāyinā |
vicārayātmanātmānamātmanaścirasiddhaye || 55 ||
[Analyze grammar]

vitatādhyavasāyasya jagadbhavati goṣpadam |
vihatādhyavasāyasya goṣpadaṃ vai jagadbhavet || 56 ||
[Analyze grammar]

yadupagataḥ sugataḥ paraṃ pradhānaṃ yadupagato dhruvatāṃ nṛpaśca kaścit |
yadupagatāḥ padamuttamaṃ mahāntaḥ prayatanakarmatarormahāphalaṃ tat || 57 ||
[Analyze grammar]