Chapter 72

saṃsāryupadeśo nāma sargaḥ |
dvisaptatitamaḥ sargaḥ |
vasiṣṭhaḥ |
dehe jāte na jāto'si dehe naṣṭe na naśyasi |
tvamātmā niṣkalaṅkātmā dehastava na kaścana || 1 ||
[Analyze grammar]

yaḥ kuṇḍabadaranyāyo yā ghaṭākāśasaṃsthitiḥ |
tatraikasmin kṣate kṣīṇe dve iti vyarthakalpanā || 2 ||
[Analyze grammar]

vināśini vinaṣṭe'smindehe svāṃ sthitimāgate |
vinaśyāmīti yaḥ khedī taṃ dhigastvandhacetanam || 3 ||
[Analyze grammar]

yādṛśo raśmirathayoḥ snehodvegavivarjitaḥ |
sambandhastādṛśo dehacittendriyasukhaiścitaḥ || 4 ||
[Analyze grammar]

gatetaretarāpekṣaḥ saraḥpaṅkopalāmbhasām |
yathā rāghava sambandhastathā dehendriyātmanām || 5 ||
[Analyze grammar]

yādṛśo'bdhidharādyānāṃ niricchāparidevanaḥ |
saṃyogo viprayogaśca tādṛśo dehadehinām || 6 ||
[Analyze grammar]

yathā kalpitavetālavikārabhayabhītayaḥ |
mithyaiva kalpitā ete tathā snehasukhādayaḥ || 7 ||
[Analyze grammar]

bhūtapañcakasampiṇḍād racitā janatāḥ pṛthak |
ekasmādeva viṭapādvicitrā iva putrikāḥ || 8 ||
[Analyze grammar]

kāṣṭhetaratkāṣṭhanare kiñcidanyanna vidyate |
bhūtapiṇḍetaraddehe kiñcidanyanna vidyate || 9 ||
[Analyze grammar]

bhūtapañcakavikṣobhanāśotpādeṣu he janāḥ |
harṣāmarṣaviṣādānāṃ kiṃ bhavanto vaśaṃ gatāḥ || 10 ||
[Analyze grammar]

ko nāmātiśayaḥ puṃsāṃ strīnāmnyaparanāmni vā |
kevale bhūtasaṅghāte prodbhūte'rjunavātavat || 11 ||
[Analyze grammar]

sanniveśāṃśavaicitryamajñānāmeva tuṣṭaye |
tajjñānāṃ tu yathābhūtabhūtapañcakadarśanam || 12 ||
[Analyze grammar]

mithaśśilāputrikayoryathaikopalasaṃsthayoḥ |
śliṣṭayorapi no rāgastathā cittaśarīrayoḥ || 13 ||
[Analyze grammar]

mṛtpuṃsāṃ yādṛśo'nyo'nyamāśayaḥ saṅgame bhavet |
buddhīndriyātmamanasāṃ saṅgame tādṛśo'stu te || 14 ||
[Analyze grammar]

nānyo'nyasnehasambandhabhājanaṃ śailaputrikāḥ |
dehendriyātmaprāṇāśca kasyātra paridevanā || 15 ||
[Analyze grammar]

itaścetaśca yātāni yathā saṃśleṣayatyalam |
taraṅgastṛṇajālāni tathā bhūtāni bhūtakṛt || 16 ||
[Analyze grammar]

saṃyujyante viyujyante tṛṇānyabdhijale yathā |
muktāntaḥkalanaṃ dehabhūtānyātmani vai tathā || 17 ||
[Analyze grammar]

ātmā cittatayā dehabhūtānyāśleṣayan sthitaḥ |
tṛṇānyāvartavṛttyāntaḥkalanonmuktamambviva || 18 ||
[Analyze grammar]

prabodhāccittatāṃ tyaktvā vrajatyātmātmatāṃ svayam |
svaspandavaśato vāri tyaktvāvartamivācchatām || 19 ||
[Analyze grammar]

tato viviktaṃ bhūtaughaṃ dehasañjñaṃ prapaśyati |
vātaskandhagato janturvasudhāmaṇḍalaṃ yathā || 20 ||
[Analyze grammar]

pṛthagbhūtagaṇaṃ tyaktvā dehātīto bhavatyajaḥ |
paraṃ prakāśamāyāti sūryakānta ivāhani || 21 ||
[Analyze grammar]

jānātyathātmanātmānaṃ mānameyāmayojjhitam |
muktaḥ kṣīvatayevāntaḥ svāṃ saṃvidamanusmaran || 22 ||
[Analyze grammar]

ātmaikaḥ spandate citkhe vastujālairivoditaḥ |
taraṅgakaṇakallolairanantāmbvambudhāviva || 23 ||
[Analyze grammar]

evamprāyamahābodhā vītarāgā gatainasaḥ |
jīvanmuktāścarantīha mahāsattvapadaṃ gatāḥ || 24 ||
[Analyze grammar]

yathā kacanti vividhairmaṇiratnairmahormayaḥ |
nirastavāsanaṃ citrairvyavahārairnarottamāḥ || 25 ||
[Analyze grammar]

na kūlakāṣairjaladhirna rajobhirnabhastalam |
na mlāyati nijairlokavyavahārairihātmavān || 26 ||
[Analyze grammar]

gatairabhyāgataiḥ svacchairmalinaiścapalairjaḍaiḥ |
na rāgo nāmbudherdveṣo bhogaiścādhigatātmanaḥ || 27 ||
[Analyze grammar]

yanmanomananaṃ kiñcitsamagre jagati sthitam |
taccetyonmukhacittattvavilāsollasanaṃ viduḥ || 28 ||
[Analyze grammar]

yadahaṃ yacca bhūtādi kālatritayabhāvi yat |
dṛśyadarśanasambandhavistārastadvijṛmbhate || 29 ||
[Analyze grammar]

yaddṛśyaṃ tadasatsadvā dṛṣṭimekāmupāśritam |
anyattvalepakaṃ tasmāddharṣaśokadaśe kutaḥ || 30 ||
[Analyze grammar]

asatyamevāsatyaṃ hi satyaṃ satyaṃ sadaiva hi |
satyāsatyamasadviddhi tadarthaṃ kiṃ vimuhyasi || 31 ||
[Analyze grammar]

asamyagdarśanaṃ tyaktvā samyakpaśya sulocana |
na kvacinmuhyati prauḍhaḥ samyagdarśanavāniha || 32 ||
[Analyze grammar]

dṛśyadarśanasambandhe yatsukhaṃ pāramārthikam |
anubhūtimayaṃ tasmātparaṃ brahmeti kathyate || 33 ||
[Analyze grammar]

dṛśyadarśanasambandhasukhasaṃvidanuttamā |
dadātyajñāya saṃsāraṃ jñāya mokṣaṃ sukhodayā || 34 ||
[Analyze grammar]

dṛśyadarśanasambandhasukhamātmavapurviduḥ |
taddṛśyāvalitaṃ baddhaṃ tanmuktaṃ muktamucyate || 35 ||
[Analyze grammar]

dṛśyadarśanasambandhasukhasaṃvidanāmayā |
kṣayātiśayamuktā cettanmuktiḥ socyate budhaiḥ || 36 ||
[Analyze grammar]

dṛśyadarśanasambandhe yānubhūtiḥ svagocarā |
dṛśyadarśananirmuktā tāmālambya bhavābhavaḥ || 37 ||
[Analyze grammar]

sauṣuptī dṛṣṭireṣā hi yātyevaṃ samprakāśatām |
evaṃ ca yāti turyatvamevaṃ muktiriti smṛtā || 38 ||
[Analyze grammar]

dṛśyadarśanamuktāyāṃ yuktāyāṃ parayā dhiyā |
dṛśyadarśanasambandhasaṃvidyasyāṃ tu rāghava || 39 ||
[Analyze grammar]

nātmā sthūlo na caivāṇurna pratyakṣo na cetanaḥ |
nācetano na ca jaḍo na caivāsanna sanmayaḥ || 40 ||
[Analyze grammar]

nāhaṃ nānyo na caivaiko nāneko nāpyanekavān |
nābhyāśastho na dūrastho naivāsti na ca nāsti ca || 41 ||
[Analyze grammar]

nāprāpyo nāpi ca prāpyo na cāsarvo na sarvagaḥ |
na padārtho nāpadārtho nāpañcātmā na pañca ca || 42 ||
[Analyze grammar]

yadidaṃ dṛśyatāṃ prāptaṃ manaṣṣaṣṭhendriyāspadam |
tadatītaṃ padaṃ yatsyāttanna kiñcidivehitam || 43 ||
[Analyze grammar]

yathābhūtamidaṃ samyagjñasya sampaśyato jagat |
sarvamātmamayaṃ vidvannāstyanātmamayaṃ kvacit || 44 ||
[Analyze grammar]

kāṭhinyadravaṇaspandasvāvakāśāvalokane |
ātmaiva sarvaṃ sarveṣu bhūvāryanilakhāgniṣu || 45 ||
[Analyze grammar]

sattaivāsti na vastūnāṃ yayā nāma vinā citā |
vyatiriktaṃ tato'stīti viddhi pronmattajalpitam || 46 ||
[Analyze grammar]

eko jaganti sakalāni samastakālakalpakramāntaragatāni gatāgatāni |
ātmaiva netarakalākalanāsti kāciditthammatirbhava bhavātigato mahātman || 47 ||
[Analyze grammar]