Chapter 68

antassaṅgavicāro nāma sargaḥ |
aṣṭaṣaṣṭitamaḥ sargaḥ |
rāmaḥ |
kīdṛśo bhagavan saṅgaḥ kaśca bandhāya vai nṛṇām |
kaśca mokṣāya kathitaḥ kathaṃ caiṣa cikitsyate || 1 ||
[Analyze grammar]

vasiṣṭhaḥ |
dehadehivibhāgaikaparityāge na bhāvanā |
dehamātre tu viśvāsaḥ saṅgo bandhārha ucyate || 2 ||
[Analyze grammar]

anantasyātmatattvasya saparyantaviniścaye |
yatsukhārthitvamantaḥ sa saṅgo bandhārha ucyate || 3 ||
[Analyze grammar]

sarvamātmedamakhilaṃ kiṃ vāñchāmi tyajāmi kim |
ityasaṅgasthitiṃ viddhi jīvanmuktatanusthitām || 4 ||
[Analyze grammar]

nāhamasmi na cānyo'sti mā bhavantu bhavantu vā |
sukhānyasakta ityantaḥ kathyate muktibhāṅ naraḥ || 5 ||
[Analyze grammar]

nābhinandati naiṣkarmyaṃ na karmaprakṛtehitaḥ |
susamo yaḥ phalatyāgī so'saṃsakta iti smṛtaḥ || 6 ||
[Analyze grammar]

ātmatattvaikaniṣṭhasya harṣāmarṣavaśaṃ manaḥ |
yasya nāyātyasakto'sau jīvanmuktaśca kathyate || 7 ||
[Analyze grammar]

sarvakarmaphalādīnāṃ manasaiva na karmaṇā |
nipuṇaṃ yaḥ parityāgaḥ so'saṃsaṅga iti smṛtaḥ || 8 ||
[Analyze grammar]

asaṃsaṅgena sakalāśceṣṭā nānāvijṛmbhitāḥ |
cikitsitā bhavantyaṅga śreyaḥ sampādayanti ca || 9 ||
[Analyze grammar]

saṃsaktivaśataḥ sarve vitatā duḥkharāśayaḥ |
prayānti śataśākhatvaṃ śvabhrakaṇṭakavṛkṣavat || 10 ||
[Analyze grammar]

rajjukṛṣṭaghanaghrāṇo yadgantryāḥ pathi gardabhaḥ |
bhāraṃ vahati bhītātmā tatsaṃsaktivijṛmbhitam || 11 ||
[Analyze grammar]

śītavātātapakleśamekadeśaniṣaṇṇayā |
tarurvahati yattanvā tatsaṃsaṅgavijṛmbhitam || 12 ||
[Analyze grammar]

dharāvivaranirmagno yatkīṭaḥ pīḍitāṅgakaḥ |
kṣiṇoti vikalaḥ kālaṃ tatsaṃsaṅgavijṛmbhitam || 13 ||
[Analyze grammar]

dūrvāṅkuratṛṇāhāraḥ kirātaśarapīḍayā |
jahāti yanmṛgo dehaṃ tatsaṃsaṅgavijṛmbhitam || 14 ||
[Analyze grammar]

vīruttṛṇadaśāṃ yātā lūyante yatpunaḥ punaḥ |
nānāvigatasañcārāstatsaṃsaktivijṛmbhitam || 15 ||
[Analyze grammar]

rasātalarasāyogāttṛṇagulmalatādayaḥ |
janayanti yadākāraṃ tatsaṃsaktivijṛmbhitam || 16 ||
[Analyze grammar]

utpatyotpatya līyante taraṅgiṇi taraṅgavat |
bhūtāni yadanantāni tatsaṃsaktivijṛmbhitam || 17 ||
[Analyze grammar]

śāntaivānantasaṅkāśā padārthaśatasaṅkulā |
yatsaṃsāranadī mattā tatsaṃsaktivijṛmbhitam || 18 ||
[Analyze grammar]

saktirhi dvividhā proktā vandhyā vandyā ca rāghava |
vandhyā sarvatra mūḍhānāṃ vandyā tattvavidāṃ nijā || 19 ||
[Analyze grammar]

ātmatattvāvabodhena hīnā dehādivastujā |
bhūyassaṃsāradā saktirdṛḍhā vandhyeti kathyate || 20 ||
[Analyze grammar]

ātmatattvāvabodhena satyabhūtā vivekajā |
vandyā hi kathyate saktirbhūyassaṃsāravarjitā || 21 ||
[Analyze grammar]

śaṅkhacakragadāhasto deho vividhayehayā |
vandyasaṃsaktivaśataḥ paripāti jagattrayam || 22 ||
[Analyze grammar]

anārataṃ nirālambe vyomavartmani pānthatām |
vandyasaṃsaktivaśataḥ karoti raviranvaham || 23 ||
[Analyze grammar]

mahākalpasamādhānadhīrakalpitakalpanam |
vandyasaṃsaktivaśato brāhmaṃ sphurati vai vapuḥ || 24 ||
[Analyze grammar]

līlayā lalanālānanilīnaṃ bhūtibhūṣitam |
vandyasaṃsaktivaśataśśarīraṃ śāṅkaraṃ sthitam || 25 ||
[Analyze grammar]

vijñātagatayaḥ siddhā lokapālāstathetare |
vandyasaṃsaktivaśatastiṣṭhanti jagatāṃ gaṇe || 26 ||
[Analyze grammar]

dhatte śarīrayantraughamanyeyaṃ bhūtasantatiḥ |
vandhyasaṃsaktivaśato jarāmṛtivivartitam || 27 ||
[Analyze grammar]

manaḥ patati bhogeṣu gṛdhro māṃsalaveṣviva |
vandhyasaktivaśādeva vyarthayā rasyaśaṅkayā || 28 ||
[Analyze grammar]

saṃsaktivaśato vāti vāyurbhuvanakoṭare |
pañcabhūtāni tiṣṭhanti vahatīyaṃ jagatsthitiḥ || 29 ||
[Analyze grammar]

divi devā bhuvi narāḥ pātāle bhogino'surāḥ |
brahmāṇḍodumbaraphale sphuranmaṣakavatsthitāḥ || 30 ||
[Analyze grammar]

jāyante ca mriyante ca nipatantyutpatanti ca |
bhūtānyavirataṃ bhūyo nirjharāmbukaṇā iva || 31 ||
[Analyze grammar]

parasparanigīrṇāṅgī janatā jāḍyajarjarā |
sambhrāntā prabhramatyaṅga śīrṇaṃ parṇamivāmbare || 32 ||
[Analyze grammar]

nakṣatracakraṃ gagane kṣamāmaṣakasantatam |
sphuratyāvartavṛttyaiva pātālagajalaughavat || 33 ||
[Analyze grammar]

pātotpātadaśājīrṇaṃ kālabālakakandukam |
adyāpi na jahātīndurjaḍimnā malinaṃ vapuḥ || 34 ||
[Analyze grammar]

nānāyugaparāvartaduḥkhālokanakarkaśam |
na lunāti manaṣṣaṇḍaṃ divi gīrvāṇamaṇḍalam || 35 ||
[Analyze grammar]

vāsanāmātravaśataḥ pare vyomani kenacit |
idamāracitaṃ citraṃ vicitraṃ paśya rāghava || 36 ||
[Analyze grammar]

manassaṅgaikaraṅgeṇa śūnye vyomni jaganmayam |
yadidaṃ racitaṃ citraṃ na tatsatyaṃ kadācana || 37 ||
[Analyze grammar]

saṃsaktamanasāmasmin saṃsāre vyavahāriṇām |
atti tṛṣṇā śarīrāṇi tṛṇānyagniśikhā yathā || 38 ||
[Analyze grammar]

parisaktamaterdehān sikatāḥ patyurambhasām |
kaśśaktaḥ parisaṅkhyātuṃ paramāṇugaṇaṃ tathā || 39 ||
[Analyze grammar]

muktālatāyā gaṅgāyā merorāpādamastakam |
taraṅgamuktā gaṇyante na dehāḥ saktacetasaḥ || 40 ||
[Analyze grammar]

saṃsaktacittamāyānti sarvā duḥkhaparamparāḥ |
jaḍakallolavalitā mahānadya ivāmbudhim || 41 ||
[Analyze grammar]

saṃsaktamanasāmetā ramyāntaḥpurapaṅktayaḥ |
racitā rauravāvīcikālasūtrādināmikāḥ || 42 ||
[Analyze grammar]

saktacittaṃ janaṃ duḥkhaśuṣkamindhanasañcayam |
jvalatāṃ narakāgnīnāṃ viddhi tena jvalanti te || 43 ||
[Analyze grammar]

duḥkhajālamidaṃ rāma yatkiñcijjagatīgatam |
saṃsaktamanasāmarthe tatsarvaṃ parikalpitam || 44 ||
[Analyze grammar]

manassaṃsaṅgadharmiṇyā bhārabhūtaśarīrayā |
kṣayodayadaśārthinyā sarvaṃ tatamavidyayā || 45 ||
[Analyze grammar]

asaṃsaṅgena bhogānāṃ sarvā rāma vibhūtayaḥ |
paraṃ vistāramāyānti prāvṛṣīva mahāpagāḥ || 46 ||
[Analyze grammar]

antassaṃsaṅgamaṅgānāmaṅgāraṃ viddhi rāghava |
anantassaṅgamaṅgānāṃ viddhi rāma rasāyanam || 47 ||
[Analyze grammar]

saṃsaṅgenāntarasthena dahyate prakṛtiḥ svayam |
svaphalotthenaiḍakākṣī pāvakena yathauṣadhiḥ || 48 ||
[Analyze grammar]

sarvatrāsaktamāśaktamanantamiva saṃsthitam |
asaṅkalpaṃ sadābhāsaṃ sukhāyaiva mano bhavet || 49 ||
[Analyze grammar]

vidyādṛśi prodayamāgatena kṣayaṃ tvavidyāviṣayaṃ gatena |
sarvatra saṃsaktivivarjitena svacetasā tiṣṭhati yaḥ sa muktaḥ || 50 ||
[Analyze grammar]