Chapter 67

anityatāpratipādanaṃ nāma sargaḥ |
saptaṣaṣṭitamaḥ sargaḥ |
vasiṣṭhaḥ |
evaṃ tau kuśalapraśnaṃ kṛtavantau parasparam |
kālenāsādya vimalaṃ jñānaṃ mokṣaṃ tato gatau || 1 ||
[Analyze grammar]

ato vacmi mahābāho yathā jñānetarā gatiḥ |
nāsti saṃsārataraṇe pāśabaddhasya cetasaḥ || 2 ||
[Analyze grammar]

idaṃ bhavyamaterduḥkhamanantamapi pelavam |
kukhagasyātaro'mbhodhiḥ sarpārergoṣpadāyate || 3 ||
[Analyze grammar]

dehātītā mahātmānaścinmātre svātmani sthitāḥ |
dūraddehaṃ hasanti svaṃ prekṣyārko janatāmiva || 4 ||
[Analyze grammar]

dehe duḥkhini saṅkṣubdhe kā naḥ kṣatirupasthitā |
rathe vidhurite bhagne sāratheḥ keva khaṇḍanā || 5 ||
[Analyze grammar]

manasi kṣubdhatāṃ yāte cittvasyāṅga kimāgatam |
taraṅge rajasā mlāne vaiparītyaṃ kimambudheḥ || 6 ||
[Analyze grammar]

ke bhavantyayasāṃ haṃsāḥ payasāmupalāśca ke |
kāśśilāḥ kila dārūṇāṃ ke bhogāḥ paramātmanaḥ || 7 ||
[Analyze grammar]

sambandhaḥ ka ivāgrāśāśailāparasamudrayoḥ |
antare dūrasambādhe kaśca cittattvabandhayoḥ || 8 ||
[Analyze grammar]

apyutsaṅgohyamānāni kāṣṭhāni saridambhasām |
kāni nāma bhavantīha śarīrāṇi tathātmanaḥ || 9 ||
[Analyze grammar]

saṅghaṭṭātkāṣṭhapayasāṃ yathottuṅgāḥ kaṇādayaḥ |
dehātmanoḥ samāyogāttathaitāścittavṛttayaḥ || 10 ||
[Analyze grammar]

sambandhāddārupayasāṃ pratibimbāni dārutaḥ |
yathā payasi lakṣyante śarīrāṇi tathātmani || 11 ||
[Analyze grammar]

yathā darpaṇavāryādau pratibimbāni vastutaḥ |
nāsatyāni na satyāni śarīrāṇi tathātmani || 12 ||
[Analyze grammar]

dāruvāryupalāsphoṭe duḥkhitā na yathā kvacit |
saṃyukteṣu viyukteṣu na tathā pañcasu kṣatiḥ || 13 ||
[Analyze grammar]

dārusaṃvellitāttoyātkampaśabdādayo yathā |
prajāyante tathaivāsmāddehāccitparibodhitāt || 14 ||
[Analyze grammar]

na buddhajaḍayoretāḥ saṃvidaściccharīrayoḥ |
etā hyajñānamātrasya tasminnaṣṭe tadeva tāḥ || 15 ||
[Analyze grammar]

yathā na kasyaciddāruvāriśleṣe'nubhūtayaḥ |
tathā na kasyaciddehadehisaṅge'nubhūtayaḥ || 16 ||
[Analyze grammar]

ajñasyāyaṃ yathā dṛṣṭaḥ saṃsāraḥ satyatāṃ gataḥ |
tajjñasyāyaṃ tathā naṣṭaḥ saṃsāro'satyatāṃ gataḥ || 17 ||
[Analyze grammar]

antassaṅgavihīnāste yathā snehā dṛṣattale |
tathāsaktamanovṛttau bāhyābhogānubhūtayaḥ || 18 ||
[Analyze grammar]

antassaṅgena rahito yadvatsalilakāṣṭhayoḥ |
sambandhastadvadevāntarasaṅgo dehadehinoḥ || 19 ||
[Analyze grammar]

antassaṅgena rahitaḥ sambandho jalakāṣṭhayoḥ |
jñadehadehinoścaiva pratibimbāmbhasostathā || 20 ||
[Analyze grammar]

sthitā sarvatra saṃvittiśśuddhā saṃvedyavarjitā |
dvitvopalāñchitā tvanyā dussaṃvittirna vidyate || 21 ||
[Analyze grammar]

aduḥkhameti duḥkhatvamantassaṃvedanātsphuṭam |
sthāṇurbhavati vetālo vetālatvena bhāvitaḥ || 22 ||
[Analyze grammar]

asambandho hi sambandho bhavatyantarviniścayāt |
svapnāṅganāsuratavatsthāṇuvetālabhaṅgavat || 23 ||
[Analyze grammar]

asatprāyo hi sambandho yathā salilakāṣṭhayoḥ |
tathaiva mithyā sambandhaśśarīraparamātmanoḥ || 24 ||
[Analyze grammar]

antassaṅgaṃ vinā nāmbu kāṣṭhāghātaiḥ pramuhyate |
ātmāntassaṅgarahito dehaduḥkhairna dahyate || 25 ||
[Analyze grammar]

dehabhāvanayaivātmā dehaduḥkhavaśe sthitaḥ |
tattyāgena tato mukto bhavatīti vidurbudhāḥ || 26 ||
[Analyze grammar]

antassaṅgavihīnatvādduḥkhavantyaṅga no yathā |
pattrāmbūpaladārūṇi śliṣṭānyapi parasparam || 27 ||
[Analyze grammar]

antassaṅgena rahitā yānti nirduḥkhatāṃ parām |
śliṣṭā api tathaivātmā dehendriyamanāṃsyalam || 28 ||
[Analyze grammar]

antassaṅgo hi saṃsāre sarveṣāṃ nāma dehinām |
jarāmaraṇamohānāṃ tarūṇāṃ bījakāraṇam || 29 ||
[Analyze grammar]

antassaṃsaṅgavāñjanturmagnaḥ saṃsārasāgare |
antassaṃsaṅgamuktastu tīrṇaḥ saṃsārasāgarāt || 30 ||
[Analyze grammar]

antassaṃsaṅgavaccittaṃ śataśākhamihocyate |
antassaṃsaṅgarahitaṃ vilīnaṃ cittamucyate || 31 ||
[Analyze grammar]

bhagnasphaṭikavadviddhi manaḥ saktamapāvanam |
abhagnasphaṭikābhāsamasaktaṃ viddhi vai manaḥ || 32 ||
[Analyze grammar]

asaktaṃ nirmalaṃ cittaṃ muktaṃ saṃsāryapi sphuṭam |
saktaṃ tu dīrghatapasā yuktamapyatibandhavat || 33 ||
[Analyze grammar]

antassaktaṃ mano baddhaṃ muktaṃ saktivivarjitam |
antassaṃsaktirevaikaṃ kāraṇaṃ bandhamokṣayoḥ || 34 ||
[Analyze grammar]

antassaṃsaktimuktasya kurvato'pi na kartṛtā |
sukhaduḥkhavati svapne sambhramonmukhatā yathā || 35 ||
[Analyze grammar]

citte kartari kartṛtvamadehasyāpi vidyate |
svapnādāviva vikṣubdhasukhaduḥkhadaśāmayam || 36 ||
[Analyze grammar]

akartari manasyantarakartṛtvaṃ sphuṭaṃ bhavet |
śūnyacitto hi puruṣaḥ kurvannapi na cetati || 37 ||
[Analyze grammar]

cetasā kṛtamāpnoṣi cetasā na kṛtaṃ na tu |
na kvacitkāraṇaṃ deho na cittamapi kartṛ vai || 38 ||
[Analyze grammar]

asaṃsaktamakartreva kurvadeva mano viduḥ |
na karmaphalabhoktṛtvamasaktaṃ pratipadyate || 39 ||
[Analyze grammar]

brahmahatyāśvamedhābhyāmasaṃsakto na lipyate |
dūrasthakāntāsaṃsaktamanāḥ kāryairivāgragaiḥ || 40 ||
[Analyze grammar]

antassaṃsaktinirmukto jīvo madhuravṛttimān |
bahiḥ kurvannakurvanvā kartā bhoktā na hi kvacit || 41 ||
[Analyze grammar]

antassaṃsaktimuktaṃ yanmanaḥ syāttadakartṛkam |
tadviyuktaṃ praśāntaṃ tattad yuktaṃ tadalepakam || 42 ||
[Analyze grammar]

tatsyātsarvapadārthānāṃ śliṣṭānāṃ niścitaṃ bahiḥ |
sarvaduḥkhakarīṃ krūrāmantassaktiṃ vivarjayet || 43 ||
[Analyze grammar]

virahitamalamantassaṅgadoṣeṇa cetaśśamamupagatamādyaṃ vyomavannirmalābham |
sakalakalanamuktenātmanaikatvameti sthiramalinibhamambho vāriṇīvālinīle || 44 ||
[Analyze grammar]