Chapter 45

gādhivṛttānte gādhivināśo nāma sargaḥ |
pañcacatvāriṃśaḥ sargaḥ |
vasiṣṭhaḥ |
athāpaśyadasau gādhiḥ svādhipīvarayā dhiyā |
antarjalastha evāntarātmanātmanyanirmale || 1 ||
[Analyze grammar]

hūnamaṇḍalaparyantagrāmopāntanivāsinām |
śvapacānāṃ striyo garbhe sthitamātmānamākulam || 2 ||
[Analyze grammar]

garbhavāsabhayākrāntaṃ pīḍitaṃ pelavāṅgakam |
śvapacīhṛdaye suptaṃ śvaviṣṭhāyāmivāṅkuram || 3 ||
[Analyze grammar]

śanaiḥ pakvatayā kāle prasūtaṃ mecakacchavim |
śvapacyā prāvṛṣevābdaṃ śyāvamāvalitaṃ malaiḥ || 4 ||
[Analyze grammar]

sampannaṃ śvapacāgāre śiśuṃ śvapacavallabham |
itaścetaśca gacchantamutpīḍamiva yāmunam || 5 ||
[Analyze grammar]

dvādaśābdadaśāṃ yātaṃ saṃsthitaṃ ṣoḍaśābdikam |
pīvarāṃsamudārāṅgaṃ payodamiva meduram || 6 ||
[Analyze grammar]

sārameyaparīvāraṃ viharantaṃ vanādvanam |
nighnantaṃ mṛgalakṣāṇi paulindīṃ sthitimāsthitam || 7 ||
[Analyze grammar]

tamālaṃ latayevātha śritaṃ śvapacakāntayā |
stanastabakaśālinyā navapallavahastayā || 8 ||
[Analyze grammar]

śyāmayā kalikājāladaśanāmalamālayā |
navavallabhayā bhūrivilāsavalitāṅgayā || 9 ||
[Analyze grammar]

vilasantaṃ vanānteṣu tayā saha naveṣṭayā |
śyāmalaṃ śyāmayā bhṛṅgaṃ bhṛṅgyeva kusumarddhiṣu || 10 ||
[Analyze grammar]

navaparṇalatāpattravasanaṃ vyasanāntaram |
vindhyakāntāramākāramabhyāgatamivodbhaṭam || 11 ||
[Analyze grammar]

viśrāntaṃ vanakuñjeṣu suptaṃ giridarīṣu ca |
nilīnaṃ pattrakuñjeṣu gulmakeṣu kṛtālayam || 12 ||
[Analyze grammar]

kiṅkirātāvataṃsāḍhyaṃ yūthikāsragvibhūṣitam |
ketakottaṃsasubhagaṃ sahakārasragākulam || 13 ||
[Analyze grammar]

lulitaṃ puṣpaśayyāsu bhrāntamabdhitaṭeṣu ca |
tajjñaṃ kānanakośeṣu bahujñaṃ mṛgamāraṇe || 14 ||
[Analyze grammar]

prāsūta so'tha śaileṣu putrānnijakulāṅkurān |
atyantaviṣamodarkān khadiraḥ kaṇṭakāniva || 15 ||
[Analyze grammar]

kalatravantaṃ sampannaṃ sthitaṃ prakṣīṇayauvanam |
śanairjarjaratāṃ yātaṃ vṛṣṭihīnamiva sthalam || 16 ||
[Analyze grammar]

tato hūnahatagrāmaṃ janmadeśamupetya tam |
saṃsthitaṃ maṭhikāṃ parṇaiḥ kṛtvā dūre munīndravat || 17 ||
[Analyze grammar]

jarājaraḍhatāṃ yātaṃ svadehasamaputrakam |
jīrṇaprāyarasaśvabhratamālatarusannibham || 18 ||
[Analyze grammar]

prauḍhaṃ śvapacagārhasthyaṃ kurvāṇaṃ bahubāndhavam |
karañjakuñjavanavatparāṃ vṛddhimupāgataṃ || 19 ||
[Analyze grammar]

athāpaśyadasau gādhiryāvattasya kalatriṇaḥ |
jaraḍhaśvapaceśasya svātmano bhramakāriṇaḥ || 20 ||
[Analyze grammar]

tatkalatramaśeṣeṇa nītamādṛtamanyunā |
āsārapavanenāśu vanaparṇagaṇo yathā || 21 ||
[Analyze grammar]

pralapatyeka evāsāvaṭavyāṃ duḥkhakarṣitaḥ |
viyūtha iva sāraṅgo vigatāstho'srulocanaḥ || 22 ||
[Analyze grammar]

dināni katicittatra nītvā śokaparītadhīḥ |
jahau svadeśaṃ saṃśuṣkapadmaṃ sara ivāṇḍajaḥ || 23 ||
[Analyze grammar]

vijahāra bahūndeśānanāsthaścintayānvitaḥ |
preryamāṇa ivānyena vātanunna ivāmbudaḥ || 24 ||
[Analyze grammar]

ekadā prāpa kīrāṇāṃ maṇḍale śrīmatīṃ purīm |
khe'nūrurviharañchūnye sadvimānamivāmaraḥ || 25 ||
[Analyze grammar]

nṛtyadratnāṃśukacchannamārgavṛkṣalatāṅganām |
āgulphaṃ kīrṇakusumāṃ nandanāntarasundarīm || 26 ||
[Analyze grammar]

sāmantairlalanābhiśca nāgaraiśca nirantaram |
svargamārgopamaṃ rājamārgamasyāmavāpa saḥ || 27 ||
[Analyze grammar]

maṇiratnakṛtāgāraṃ tatra maṅgalahastinam |
dadarśāmalaśailendramiva sañcāracañcalam || 28 ||
[Analyze grammar]

mṛte rājani rājārthaṃ viharantamitastataḥ |
ratnajñamiva ratnorvyāṃ cintāmaṇididṛkṣayā || 29 ||
[Analyze grammar]

tamasau śvapaco nāgaṃ kautukodārayā dṛśā |
ciramālokayāmāsa spandayuktācalopamam || 30 ||
[Analyze grammar]

ālokayantamādāya taṃ kareṇa sa vāraṇaḥ |
svakaṭe'yojayanmerustaṭe'rkamiva sādaram || 31 ||
[Analyze grammar]

tasmin kaṭagate nedurjayadundubhayo'bhitaḥ |
kalpāmbuda ivākāśamadhirūḍhe mahārṇavāḥ || 32 ||
[Analyze grammar]

pūritāśo babhau rājā jayatīti janasvanaḥ |
udyāne samprabuddhānāṃ vihagānāmivāravaḥ || 33 ||
[Analyze grammar]

udabhūdvandivṛndānāṃ ghanakolāhalastataḥ |
velāvilulitāmbūnāmambudhīnāmiva dhvaniḥ || 34 ||
[Analyze grammar]

taṃ tatrāvārayāmāsurmaṇḍanārthaṃ varāṅganāḥ |
kṣīrodagatamudratnā laharya iva mandaram || 35 ||
[Analyze grammar]

māninyastaṃ guṇaprotairnānāratnairapūrayan |
nānāprabhāprabhāvāḍhyairvelā iva taṭācalam || 36 ||
[Analyze grammar]

tuṣāraśiśirasparśaistāstaṃ hārairabhūṣayan |
śyāmā navanadīpūrairvarṣāśśṛṅgamivonnatam || 37 ||
[Analyze grammar]

vicitravarṇasaugandhyaiḥ puṣpairāvalayan striyaḥ |
vanaṃ madhuśriya iva taṃ lolakarapallavāḥ || 38 ||
[Analyze grammar]

nānāvarṇarasāmodaistāstamāśu vilepanaiḥ |
alepayanprabhājālaistaṭyo'bhramiva dhātujaiḥ || 39 ||
[Analyze grammar]

ratnakāñcanakānto'sāvādade chattramātatam |
sandhyābhratārendunadīvyāptaṃ merurivāmbaram || 40 ||
[Analyze grammar]

bhūṣitaḥ savilāsābhirbālavallībhirāvṛtaḥ |
ratnapuṣpāṃśukākīrṇaḥ kalpavṛkṣa ivābabhau || 41 ||
[Analyze grammar]

tādṛśaṃ tamupājagmuḥ parivārasamanvitāḥ |
sarvāḥ prakṛtayaḥ phullaṃ mārgadrumamivādhvagāḥ || 42 ||
[Analyze grammar]

tā enamāsane saiṃhe prāpyābhiṣiṣicuḥ kramāt |
tasminneva gaje śakramairāvaṇa ivāmarāḥ || 43 ||
[Analyze grammar]

evaṃ sa śvapaco rājyaṃ prāpa kīrapurāntare |
araṇye hariṇaṃ puṣṭamaprāṇamiva vāyasaḥ || 44 ||
[Analyze grammar]

kīrīkaratalāmbhojapramṛṣṭacaraṇāmbujaḥ |
sarvāṅgakuṅkumālepaiḥ sandhyāmbudharaśobhanaḥ || 45 ||
[Analyze grammar]

jajvāla kīranagare nāgarījanavānasau |
siṃhīgaṇayutaḥ siṃho yathā kusumite vane || 46 ||
[Analyze grammar]

harihatamadanāgottāramuktākalāpapravicaritaśarīraśśāntacintāviṣādaḥ |
aramata sa mahadbhistatra bhogaiḥ sarasyāṃ ravikaramadatapto vāripūrairivebhaḥ || 47 ||
[Analyze grammar]

parivisṛtanṛpaujāḥ sarvadiksaṃsthitājñaḥ katipayadivasehāsiddhadeśavyavasthaḥ |
prakṛtibhiralamūḍhāśeṣarājatvabhāraḥ sa gavala iti nāmnā tatra rājā babhūva || 48 ||
[Analyze grammar]