Chapter 39

prahlādopākhyāne parameśvaravitarko nāma sargaḥ |
ekonacatvāriṃśaḥ sargaḥ |
vasiṣṭhaḥ |
iti sañcintya sarvātmā kṣīrodād rāma tatpuram |
cacāla parivāreṇa saha sābhra ivācalaḥ || 1 ||
[Analyze grammar]

kṣīrodatalarandhreṇa tenaiva stambhitāmbhasā |
prahlādanagaraṃ prāpa śakralokamivāparam || 2 ||
[Analyze grammar]

hemamandirakośasthaṃ dadarśātrāsuraṃ hariḥ |
atha śailaguhālīnaṃ samādhisthamivābjajam || 3 ||
[Analyze grammar]

tatra te tejasā daityā vaiṣṇavenāvadhūnitāḥ |
dūraṃ yayurdineśāṃśuvitrastā iva kauśikāḥ || 4 ||
[Analyze grammar]

dvitraiḥ sahāsurairmukhyaiḥ parivārayuto hariḥ |
praviveśāsuragṛhaṃ tārāvāniva khaṃ śaśī || 5 ||
[Analyze grammar]

vainateyāsanastho'sau lakṣmīvidhutacāmaraḥ |
svāyudhādiparīvāro devarṣiparivanditaḥ || 6 ||
[Analyze grammar]

mahātman samprabudhyasvetyevaṃ viṣṇurudāharan |
pāñcajanyaṃ pradadhvāna dhvanayan kakubhāṃ gaṇam || 7 ||
[Analyze grammar]

mahatā tena śabdena vaiṣṇavaprāṇajanmanā |
tulyakālaṃ parikṣubdhakalpābhrārṇavaraṃhasā || 8 ||
[Analyze grammar]

āsurī janatā bhūmau papātāgatasambhramā |
mattanīlābhranādena rājahaṃsāvalī yathā || 9 ||
[Analyze grammar]

jahṛṣe janitānandā vaiṣṇavī vītasambhramā |
janatā jaladadhvānaphulleva kuṭajāvalī || 10 ||
[Analyze grammar]

babhūva samprabuddhātmā dānaveśaśśanaiśśanaiḥ |
meghāravalasatpuṣpaḥ kadamba iva kānane || 11 ||
[Analyze grammar]

brahmarandhrakṛtotthānā prāṇaśaktirathāsuram |
śanairākramayāmāsa gaṅgā sarvamivārṇavam || 12 ||
[Analyze grammar]

kṣaṇādākramayāmāsa prāṇaśrīḥ sarvato'suram |
udayānantaraṃ saurī prabheva bhuvanāntaram || 13 ||
[Analyze grammar]

prāṇeṣu randhranavake pravṛtteṣvatha tasya cit |
cetyonmukhī babhūvāntaḥ prāṇadarpaṇabimbitā || 14 ||
[Analyze grammar]

cetanīyonmukhe cittve cinmanastāmupāyayau |
dvitvaṃ makurasaṅkrāntā mukhaśrīriva rāghava || 15 ||
[Analyze grammar]

kiñcidaṅkurite citte netre vikasanonmukhe |
śanairbabhūvatustasya prātarnīle yathotpale || 16 ||
[Analyze grammar]

prāṇāpānaparāmṛṣṭanāḍīvivarasaṃvidaḥ |
vātārtasyeva padmasya spando'sya samajāyata || 17 ||
[Analyze grammar]

nimeṣāntaramātreṇa manaḥ pīvaratāṃ yayau |
tasminprāṇavaśātpūrṇe taraṅga iva vāriṇi || 18 ||
[Analyze grammar]

athāsau vikasannetramanaḥprāṇavapurbabhau |
ardhodita ivāditye saraḥ sphuritapaṅkajam || 19 ||
[Analyze grammar]

tasminnavasare yāvadbudhyasvetyavadatprabhuḥ |
prabuddhastāvadeṣo'bhūdbarhī ghanaravādiva || 20 ||
[Analyze grammar]

praphultanayanaṃ jātamananaṃ pīvarasmṛtim |
uvācainaṃ trilokeśaḥ purā nābhyabjajaṃ yathā || 21 ||
[Analyze grammar]

sādho smara mahālakṣmīmātmīyāṃ smara cākṛtim |
akāṇḍa eva kiṃ dehavirāmaḥ kriyate tvayā || 22 ||
[Analyze grammar]

heyopādeyasaṅkalpavihīnasya śarīragaiḥ |
bhāvābhāvaistavārthaḥ kastiṣṭhottiṣṭhasva samprati || 23 ||
[Analyze grammar]

sthātavyamiha dehena kalpaṃ yāvadanena te |
vayaṃ hi niyatiṃ vidmo yathābhūtāmanindita || 24 ||
[Analyze grammar]

jīvanmuktena bhavatā rājya eveha tiṣṭhatā |
kṣapaṇīyā gatodvegamākalpāntamiyaṃ tanuḥ || 25 ||
[Analyze grammar]

tanau kalpāntaśīrṇāyāṃ sve mahimni tvayānagha |
vastavyaṃ sphuṭite kumbhe kumbhākāśena khe yathā || 26 ||
[Analyze grammar]

kalpāntasthāyinī śuddhā dṛṣṭalokaparāvarā |
iyaṃ tava tanurjātā jīvanmuktivilāsinī || 27 ||
[Analyze grammar]

noditā dvādaśādityā na vilīnās śiloccayāḥ |
na jagajjvalitaṃ sādho tanuṃ tyajasi kiṃ mudhā || 28 ||
[Analyze grammar]

vāyurvahati nonmattastrilokībhasmadhūsaraḥ |
lolāmarakapālāṅkastanuṃ tyajasi kiṃ mudhā || 29 ||
[Analyze grammar]

aśoka iva mañjaryaḥ puṣkarāvartavidyutaḥ |
na sphuranti jagatkośe tanuṃ tyajasi kiṃ mudhā || 30 ||
[Analyze grammar]

dhārāsāraraṇacchailāḥ prajvalajjvalanojjvalāḥ |
kakubho na viśīryante tanuṃ tyajasi kiṃ mudhā || 31 ||
[Analyze grammar]

na brahmaviṣṇurudrākhyatrayaśeṣamidaṃ jagat |
sthitaṃ jaraḍhajīmūtaṃ tanuṃ tyajasi kiṃ mudhā || 32 ||
[Analyze grammar]

sphuṭadadrīndraṭāṅkārakarālārāvavanti khe |
kalpābhrāṇi na garjanti tanuṃ tyajasi kiṃ mudhā || 33 ||
[Analyze grammar]

ahaṃ bhūtāvakīrṇāsu sālokāsu khagadhvajaḥ |
viharāmi daśāśāsu mā dehamavadhīraya || 34 ||
[Analyze grammar]

ime vayamime śailā bhūtānīmānyayaṃ bhavān |
idaṃ jagadidaṃ vyoma mā dehamavadhīraya || 35 ||
[Analyze grammar]

pīvarājñānayogena yasya paryākulaṃ manaḥ |
duḥkhāni vinikṛntanti maraṇaṃ tasya rājate || 36 ||
[Analyze grammar]

kṛśo'tiduḥkhī mūḍho'hametāścānyāśca bhāvanāḥ |
matiṃ yasyāvalumpanti maraṇaṃ tasya rājate || 37 ||
[Analyze grammar]

āśāpāśanibaddho'ntaritaścetaśca nīyate |
yo vilolamanovṛttyā maraṇaṃ tasya rājate || 38 ||
[Analyze grammar]

yasya tṛṣṇāḥ prabhañjanti hṛdayaṃ hṛtabhāvanāḥ |
kugehamiva gargaṭyo maraṇaṃ tasya rājate || 39 ||
[Analyze grammar]

cittavṛttilatā yasya tālottālamanovane |
phalitā sukhaduḥkhābhyāṃ maraṇaṃ tasya rājate || 40 ||
[Analyze grammar]

romarājilatājālaṃ yasyemaṃ dehadurdrumam |
anarthaugho haratyuccairmaraṇaṃ tasya rājate || 41 ||
[Analyze grammar]

yasya svadehavipinamādhivyādhidavāgnayaḥ |
dahanti lolāṅgalataṃ maraṇaṃ tasya rājate || 42 ||
[Analyze grammar]

kāmakopātmako yasya sphuratyajagarastanau |
antaśśuṣkadrumasyeva maraṇaṃ tasya rājate || 43 ||
[Analyze grammar]

yo'yaṃ dehaparityāgastal loke maraṇaṃ smṛtam |
na satā nāsatā tena kāraṇaṃ vedyavedinām || 44 ||
[Analyze grammar]

yasya notkrāmati matiḥ svātmatattvāvalokanāt |
yathārthadarśino jñasya jīvitaṃ tasya śobhate || 45 ||
[Analyze grammar]

yasya nāhaṅkṛto bhāvo buddhiryasya na lipyate |
yaḥ samaḥ sarvabhāveṣu jīvitaṃ tasya śobhate || 46 ||
[Analyze grammar]

yo'ntaśśītalayā buddhyā rāgadveṣavimuktayā |
sākṣivatpaśyatīdaṃ hi jīvitaṃ tasya śobhate || 47 ||
[Analyze grammar]

yena samyakparijñāya heyopādeyamujjhatā |
cittasyānte'rpitaṃ cittaṃ jīvitaṃ tasya śobhate || 48 ||
[Analyze grammar]

avastusadṛśe vastunyastasaṅkalpanāmale |
yenālīnaṃ kṛtaṃ ceto jīvitaṃ tasya śobhate || 49 ||
[Analyze grammar]

satyāṃ dṛṣṭimavaṣṭabhya līlayeyaṃ jagatkriyā |
kriyate'vāsanaṃ yena jīvitaṃ tasya śobhate || 50 ||
[Analyze grammar]

nāntastuṣyati nodvegameti yo viharannapi |
heyopādeyasamprāptau jīvitaṃ tasya śobhate || 51 ||
[Analyze grammar]

śuddhapakṣaśca śuddhaśca haṃsaughaḥ saraso yathā |
yasmādguṇaugho niryāti jīvitaṃ tasya śobhate || 52 ||
[Analyze grammar]

yasmiñchrutipathaṃ yāte dṛṣṭe smṛtimupāgate |
ānandaṃ yānti bhūtāni jīvitaṃ tasya śobhate || 53 ||
[Analyze grammar]

yasyodayena hṛdayeṣu janāmbujāni jīvālimanti sakalāni vikāsavanti |
tasyāvabhāti cirajīvitamakṣayendorāpūrṇateva danujeśvara netarasya || 54 ||
[Analyze grammar]