Chapter 33

prahlādopākhyāne vibudhavitarko nāma sargaḥ |
trayastriṃśaḥ sargaḥ |
vasiṣṭhaḥ |
garjantamatisaṃrabdhaṃ suralokamathārihā |
uvāca mādhavo vākyaṃ śikhivṛndamivāmbudaḥ || 1 ||
[Analyze grammar]

bhagavān |
vibudhā mā viṣaṇṇāḥ stha prahlādo bhaktimāniti |
pāścātyaṃ janma tasyedaṃ mokṣārho'sāvarindamaḥ || 2 ||
[Analyze grammar]

ita uttarametena garbhatā danusūnunā |
na kartavyā pradagdhena bījenevāṅkurakriyā || 3 ||
[Analyze grammar]

guṇavānnirguṇo jāta ityanarthakramaṃ viduḥ |
nirguṇo guṇavāñjāta ityāhuḥ siddhidaṃ kramam || 4 ||
[Analyze grammar]

ātmīyāni vicitrāṇi bhuvanānyamarottamāḥ |
prayāta nāsukhāyaiṣā prāhlādī guṇiteha vaḥ || 5 ||
[Analyze grammar]

vasiṣṭhaḥ |
ityuktvā vibudhāṃstatra kṣīrodārṇavavīciṣu |
antardhānaṃ yayau devastaṭatāpiñchagucchavat || 6 ||
[Analyze grammar]

so'pi sampūjitahariḥ suraugho'vrajadambaram |
punarmandaranirdhūtātkaṇajālamivārṇavāt || 7 ||
[Analyze grammar]

prahlādaṃ prati gīrvāṇāstataḥ snigdhatvamāyayuḥ |
mahānto yatra nodvignāstatra viśvāsavanmanaḥ || 8 ||
[Analyze grammar]

pratyahaṃ pūjayāmāsa devadevaṃ janārdanam |
manasā karmaṇā vācā prahlādo bhaktimāniti || 9 ||
[Analyze grammar]

atha pūjāparasyāsya samavardhanta kālataḥ |
vivekānandavairāgyavibhavapramukhā guṇāḥ || 10 ||
[Analyze grammar]

nābhyanandadasau bhogapūgaṃ śuṣkamiva drumam |
na cāramata kāntāsu mṛgo marumahīṣviva || 11 ||
[Analyze grammar]

na reme lokacarcāsu śāstrārthakathanādṛte |
nājāyata ratistasya dṛśye sthala ivābjinī || 12 ||
[Analyze grammar]

na viśaśrāma ceto'sya bhogarogānurañjane |
muktāphalamasaṃśliṣṭaṃ muktāphala ivātale || 13 ||
[Analyze grammar]

tyaktabhogābhikalanaṃ viśrāntimatha nāgatam |
cetaḥ kevalamasyāsīddolāyāmiva yojitam || 14 ||
[Analyze grammar]

prāhlādīṃ tāṃ sthitiṃ kṛṣṇadehaḥ kṣīrodakoṭarāt |
viveda sarvagatayā tayā paramakāntayā || 15 ||
[Analyze grammar]

atha pātālamārgeṇa viṣṇurāhlāditāgragaḥ |
pūjādevagṛhaṃ tasya prahlādasya samāyayau || 16 ||
[Analyze grammar]

vijñāyābhyāgataṃ devaṃ pūjayā dviguṇeddhayā |
daityendraḥ puṇḍarīkākṣamādarātparyapūjayat || 17 ||
[Analyze grammar]

pūjāgṛhagataṃ devaṃ pratyakṣāvasthitaṃ harim |
prahlādaḥ paramaprīto girā tuṣṭāva puṣṭayā || 18 ||
[Analyze grammar]

prahlādaḥ |
tribhuvanabhavanābhirāmakośaṃ sakalakalaṅkaharaṃ paraṃ prakāśam |
aśaraṇaśaraṇaṃ śaraṇyamīśaṃ harimajamīśvaramacyutaṃ prapadye || 19 ||
[Analyze grammar]

kuvalayadalaśailasannikāśaṃ śaradamalāmbarakoṭaropamānam |
bhramaratimirakajjalāñjanābhaṃ sarasijacakragadādharaṃ prapadye || 20 ||
[Analyze grammar]

vicaladalikalāpakomalāṅgaṃ sitadalapaṅkajakuṭmalābhaśaṅkham |
śrutiraṇitaviriñcacañcarīkaṃ svahṛdayapadmajalāśayaṃ prapadye || 21 ||
[Analyze grammar]

sitamaṇigaṇatārakāvakīrṇaṃ smitadhavalānanapīvarendubimbam |
hṛdayamaṇimarīcijālagaṅgaṃ hariśaradambaramātataṃ prapadye || 22 ||
[Analyze grammar]

tribhuvananalinīsitāravindaṃ timirasamānavimohadīpamagryam |
jaḍataramajaḍaṃ cidātmatattvaṃ jagadakhilārtiharaṃ hariṃ prapadye || 23 ||
[Analyze grammar]

navavikasitapadmareṇugauraṃ sphuṭakamalāvapuṣoparūṣitāṅgam |
dinagamasamayāruṇāmbarābhaṃ kanakanibhāmbarasundaraṃ prapadye || 24 ||
[Analyze grammar]

aviratahatasṛṣṭasargalīlaṃ satatamajātamavardhanaṃ viśālam |
yugaśatajaraḍhābhijātadehaṃ tarutalaśāyinamarbhakaṃ prapadye || 25 ||
[Analyze grammar]

ditisutanalinītuṣārapātaṃ suranalinīsatatoditārkabimbam |
kamalajanalinījalāvapūraṃ hṛdi nalinīnilayaṃ vibhuṃ prapadye || 26 ||
[Analyze grammar]

vasiṣṭhaḥ |
iti guṇabahulābhirvāgbhirabhyarcito'sau harirasuravināśaśśrīniṣaṇṇāṃsadeśaḥ |
jalada iva mayūraṃ prītimānprīyamāṇaṃ kuvalayadaladehaḥ pratyuvācāsurendram || 27 ||
[Analyze grammar]