Chapter 32

prahlādanirvāṇe nārāyaṇīkaraṇaṃ nāma sargaḥ |
dvātriṃśaḥ sargaḥ |
vasiṣṭhaḥ |
prahlāda iti sañcintya kṛtvā nārāyaṇīṃ tanum |
punaḥ sañcintayāmāsa pūjārthamasuradviṣaḥ || 1 ||
[Analyze grammar]

vapuṣo vaiṣṇavādasmānmarunmūrtiḥ parāparaḥ |
ayaṃ prāṇapravāheṇa bahirviṣṇuḥ sthito'paraḥ || 2 ||
[Analyze grammar]

vainateyasamārūḍhaḥ sphuṭaśakticatuṣṭayaḥ |
śaṅkhacakragadāpāṇiśśyāmalāṅgaścaturbhujaḥ || 3 ||
[Analyze grammar]

candrārkanayanaśśrīmān kāntanandakanandanaḥ |
padmapāṇirviśālākṣaśśārṅgadhanvā mahādyutiḥ || 4 ||
[Analyze grammar]

tadenaṃ pūjayāmyāśu parivārasamanvitam |
saparyayā manomayyā sarvasambhāraramyayā || 5 ||
[Analyze grammar]

tata enaṃ mahādevaṃ pūjayiṣyāmyahaṃ punaḥ |
pūjayā bāhyasambhogamahatyā bahuratnayā || 6 ||
[Analyze grammar]

prahlāda iti sañcintya sambhārabharabhāriṇā |
manasā pūjayāmāsa mādhavaṃ kamalādhavam || 7 ||
[Analyze grammar]

ratnārghapātrapaṭalaiścandanādivilepanaiḥ |
dhūpairdīpairvicitraiśca nānāvibhavabhūṣaṇaiḥ || 8 ||
[Analyze grammar]

mandāramālāvalanairhemābjapaṭalotkaraiḥ |
kalpavṛkṣalatāgucchai ratnastabakamaṇḍalaiḥ || 9 ||
[Analyze grammar]

pallavairdevavṛkṣāṇāṃ nānākusumadāmabhiḥ |
kiṅkirātairbukaiḥ kundaiścaṇpakairasitotpalaiḥ || 10 ||
[Analyze grammar]

kalhāraiḥ kumudaiḥ kāśaiḥ kharjūraiścūtakiṃśukaiḥ |
aśokairmadanairbilvaiḥ karṇikāraiḥ kirātakaiḥ || 11 ||
[Analyze grammar]

kadambaiḥ kukurairnīpaiḥ sindhuvāraiḥ sayūthikaiḥ |
pāribhadrairguggulubhirvidulaiḥ kuyyakotkaraiḥ || 12 ||
[Analyze grammar]

priyaṅgupaṭalaiḥ pāṭaiḥ pāṭalairdhātupāṭalaiḥ |
āmrairāmrātakairbhavyairharītakavibhītakaiḥ || 13 ||
[Analyze grammar]

sālatālatamālānāṃ latākusumapallavaiḥ |
komalaiḥ kalikājālaiḥ sahakāraiḥ sakuṅkumaiḥ || 14 ||
[Analyze grammar]

ketakaiḥ saptaparṇaiśca tatherāmañjarīgaṇaiḥ |
vicitrapālīvatajairnānāṭaṅkatarūdbhavaiḥ || 15 ||
[Analyze grammar]

manoharārukodbhūtairmālatīmādhavīgaṇaiḥ |
navaśephālikājālaiḥ suvarṇasumanoharaiḥ || 16 ||
[Analyze grammar]

bhakṣyairbhojyaistathā pānairlehyaiḥ peyaiśca picchilaiḥ |
rasaiḥ phalaiḥ pallavaiśca vividhāsvādajātibhiḥ || 17 ||
[Analyze grammar]

aṃśukaiśśayanairyānairmahārhairhemaviṣṭaraiḥ |
geyairnṛttairvādanaiśca mahārhalalanāgaṇaiḥ || 18 ||
[Analyze grammar]

udyānopavanābhogasamagravibhavārpaṇaiḥ |
sarvasaundaryasammānaiḥ svayamātmārpaṇairapi || 19 ||
[Analyze grammar]

hariṃ paramayā bhaktyā jagadvibhavabhavyayā |
manasā pūjayāmāsa prahlādo'ntaḥpure patim || 20 ||
[Analyze grammar]

atha devagṛhe tasminbāhyārthaiḥ paripūrṇayā |
pūjayā pūjayāmāsa dānaveśo janārdanam || 21 ||
[Analyze grammar]

bahirdṛśyena tenaiva krameṇa parameśvaram |
punaḥ punaḥ pūjayitvā tuṣṭimāndānavo'bhavat || 22 ||
[Analyze grammar]

tatastataḥ prabhṛtyeva prahlādaḥ parameśvaram |
tathaiva pratyahaṃ bhaktyā pūjayāmāsa pūrṇayā || 23 ||
[Analyze grammar]

atha tasminpure daityāstataḥ prabhṛti vaiṣṇavāḥ |
sarva evābhavanbhavyā rājā hyācārakāraṇam || 24 ||
[Analyze grammar]

jagāma vārttā gaganaṃ devalokamatho harim |
viṣṇordveṣaṃ parityajya bhaktā daityāḥ sthitā iti || 25 ||
[Analyze grammar]

devā vismayamājagmuśśakrādyāḥ samarudgaṇāḥ |
gṛhītā vaiṣṇavī bhaktirdaityaiḥ kimiti rāghava || 26 ||
[Analyze grammar]

kṣīrode bhogibhogasthaṃ vibudhā vismayākulāḥ |
jagmurambaramutsṛjya harimāhavaśālinaṃ || 27 ||
[Analyze grammar]

tatraitaṃ daityavṛttāntaṃ kathayāmāsurasya te |
papracchuścainamāsīnamapūrvāścaryavismayāt || 28 ||
[Analyze grammar]

devāḥ |
kimetadbhagavandaityā viruddhā ye sadaiva te |
te hi tvanmayatāṃ yātā māyeyamiti bhāvyate || 29 ||
[Analyze grammar]

kva kilātyantadurvṛttā dānavā dalitādrayaḥ |
kva pāścātyamahājanmalabhyā bhaktirjanārdane || 30 ||
[Analyze grammar]

prākṛto guṇavāñjāta ityeṣā bhagavan kathā |
akālapuṣpamāleva sukhāyodvejanāya ca || 31 ||
[Analyze grammar]

nopapannaṃ hi yad yatra tatra tanna virājate |
madhye kācakalāpasya mahāmūlyo maṇiryathā || 32 ||
[Analyze grammar]

yo yo yādṛgguṇo jantuḥ sa tāmevaiti saṃsthitim |
sadṛśeṣvapyajeṣu śvā na manye ramate kvacit || 33 ||
[Analyze grammar]

na tathā duḥkhayantyaṅge majjantyo vajrasūcayaḥ |
vaisādṛśyena sambaddhā yathaitā vastudṛṣṭayaḥ || 34 ||
[Analyze grammar]

yad yatra kramasamprāptamupapannamaninditam |
tadeva rājate tatra jale'mbhojaṃ na tu sthale || 35 ||
[Analyze grammar]

kvādhamaḥ prākṛtārambho hīnakarmaratiḥ sadā |
varāko dānavastucchajātirbhaktiḥ kva vaiṣṇavī || 36 ||
[Analyze grammar]

kamalinī paruṣoṣarabhūgatā sukhayatīha yathā na durāśrayā |
danusuto'pi hi mādhavabhaktimāniti kathā na tatheśa sukhāya naḥ || 37 ||
[Analyze grammar]