Chapter 20

pāvanabodhanaṃ nāma sargaḥ |
viṃśaḥ sargaḥ |
puṇyaḥ |
kaḥ pitā kiṃ ca vā mitraṃ kā mātā ke ca bandhavaḥ |
svabuddhyaivāvadhūyante vātyayā janapāṃsavaḥ || 1 ||
[Analyze grammar]

bandhumitrasutasnehadveṣamohadaśāmayaḥ |
svasañjñāmātrakeṇaiva prapañco'yaṃ vitanyate || 2 ||
[Analyze grammar]

bandhutve bhāvito bandhuḥ paratve bhāvitaḥ paraḥ |
viṣāmṛtadaśevaiṣā sthitirbhāvanibandhanī || 3 ||
[Analyze grammar]

ekatve vartamānasya sarvagasya kilātmanaḥ |
ayaṃ bandhuḥ paraścāyamityasatkalanā kutaḥ || 4 ||
[Analyze grammar]

raktamāṃsāsthisaṅghātāddehādevāsthipañjarāt |
ko'haṃ syāmiti cittena svayaṃ putra vicāraya || 5 ||
[Analyze grammar]

dṛṣṭyā tu pāramārthikyā na kaścittvaṃ na cāpyaham |
mithyājñānamidaṃ puṇyaḥ pāvanaśceti valgati || 6 ||
[Analyze grammar]

kaste pitā kaśca suhṛtkā mātā kaśca vā paraḥ |
khasyānantavilāsasya kimasvaṃ kiṃ svamucyatām || 7 ||
[Analyze grammar]

asi cettvaṃ tadanyeṣu yāteṣu bahujanmasu |
ye bandhavo ye vibhavāḥ kiṃ tānapi na śocasi || 8 ||
[Analyze grammar]

babhūvuste supuṣpāsu sthalīṣu mṛgayoniṣu |
bahavo bandhavo dhanyāstān kathaṃ nānuśocasi || 9 ||
[Analyze grammar]

babhūvuste sapadmāsu taṭīṣvambudhiyoṣitām |
haṃsasya bandhavo haṃsāstān kathaṃ nānuśocasi || 10 ||
[Analyze grammar]

babhūvuste lasatpattrāścitrāsu vanarājiṣu |
bahavo bandhavo vṛkṣāstān kathaṃ nānuśocasi || 11 ||
[Analyze grammar]

babhūvuste mahābhreṣu śikhareṣu mahībhṛtām |
bahavo bandhavaḥ siṃhāstān kathaṃ nānuśocasi || 12 ||
[Analyze grammar]

babhūvuste sravantīṣu sarassvambhojinīṣu ca |
bahavo bandhavo matsyāḥ kiṃ tānapi na śocasi || 13 ||
[Analyze grammar]

babhūvitha daśārṇeṣu kapilo vanavānaraḥ |
rājaputrastukhāreṣu puṇḍreṣu vanavāyasaḥ || 14 ||
[Analyze grammar]

hehayeṣu ca mātaṅgastrigarteṣu ca gardabhaḥ |
sālveṣu saramāputraḥ patatrī śavaradrume || 15 ||
[Analyze grammar]

vindhyādrau pippalo bhūtvā ghuṇo bhūtvā mahāvaṭe |
mandare markaṭo bhūtvā viprājjāto'si kandare || 16 ||
[Analyze grammar]

kosaleṣu dvijo bhūtvā bhūtvā vaṅgeṣu tittiriḥ |
aśvo bhūtvā tukhāreṣu jātastvaṃ brāhmaṇādvane || 17 ||
[Analyze grammar]

yaḥ kīṭastālakandāntardaṃśako ya udumbare |
yaḥ prājiko vindhyavane sa tvaṃ putra mamānujaḥ || 18 ||
[Analyze grammar]

himavatkandarābhūrjatarutvagrandhrakoṭare |
pipīlako yaṣṣaṇ māsān so'yaṃ tvamanujo mama || 19 ||
[Analyze grammar]

suhmasīmāntakugrāmagomaye yaśca vṛścikaḥ |
sārdhaṃ saṃvatsaraṃ sādho so'yaṃ tvamanujo mama || 20 ||
[Analyze grammar]

pulindīstanapīṭheṣu nilīnaṃ yena kānane |
ṣaṭpadeneva padmeṣu so'yaṃ tvamanujo mama || 21 ||
[Analyze grammar]

etāsvanyāsu cānyāsu bahvīṣu janayoniṣu |
jāto'si jambudvīpe'sminpurā śatasahasraśaḥ || 22 ||
[Analyze grammar]

itthaṃ tavātmanaścaiva prāktanaṃ vāsanākramam |
paśyāmi sūkṣmayā buddhyā samyagdarśanaśuddhayā || 23 ||
[Analyze grammar]

mamāpi bahvyo bahudhā yonayo mohamantharāḥ |
samatītāḥ smarāmyadya tā jñānoditayā dṛśā || 24 ||
[Analyze grammar]

trigarteṣu śuko bhūtvā haṃso bhūtvā sarittaṭe |
pakkaṇe vāyaso bhūtvā jāto'hamiha kānane || 25 ||
[Analyze grammar]

bhuktvā pulindatāṃ vindhye kṛtvā vaṅgeṣu vṛkṣatām |
uṣṭratvamativāhyādrau jāto'hamiha kānane || 26 ||
[Analyze grammar]

yaścātako himagirau yo rājā puṇḍramaṇḍale |
vyāghro yaḥ sahyakuñjeṣu sa eveha tavāgrajaḥ || 27 ||
[Analyze grammar]

yo gṛdhro daśavarṣāṇi yo mṛgo māsapañcakam |
yaḥ samānāṃ śataṃ siṃhaḥ sa eveha tavāgrajaḥ || 28 ||
[Analyze grammar]

andhragrāmacakoreṇa tukhāranṛpavājinā |
śrīśailācāryaputreṇa mayedaṃ tava kathyate || 29 ||
[Analyze grammar]

sarve vividhasaṃrambhā vividhācāraceṣṭitāḥ |
vilāsā janmanāṃ bhrātaḥ smaryante prāktanā mayā || 30 ||
[Analyze grammar]

evaṃ sthite jagajjātāvāvayośśataśo gatāḥ |
pitaro mātaraścaiva bhrātaraḥ suhṛdastathā || 31 ||
[Analyze grammar]

kāṃstān samanuśocāvo na śocāvaśca kānapi |
bandhūn kiṃ vāpi śocāva īdṛśyeva jagatsthitiḥ || 32 ||
[Analyze grammar]

anantāḥ pitaro yānti yāntyanantāśca mātaraḥ |
iha saṃsāriṇāṃ puṃsāṃ vanapādapaparṇavat || 33 ||
[Analyze grammar]

kiṃ pramāṇamataḥ putra duḥkhasyātra sukhasya vā |
tasmātsarvaṃ parityajya tiṣṭhāvaḥ svasthatāṃ gatau || 34 ||
[Analyze grammar]

prapañcabhāvanāṃ tyaktvā manasyahamiti sthitām |
tāṃ gatiṃ gaccha bhadraṃ te yāṃ yānti gatikovidāḥ || 35 ||
[Analyze grammar]

ihājavañjavībhāvaṃ patanotpatanātmakam |
nānuśocanti sudhiyaścikitsante ca kevalam || 36 ||
[Analyze grammar]

bhāvābhāvavinirmuktaṃ jarāmaraṇavarjitam |
saṃsmarātmānamavyagro mā vimūḍhamanā bhava || 37 ||
[Analyze grammar]

na te duḥkhaṃ na te janma na te mātā na te pitā |
ātmaivāsi na sadbuddhe tvamanyaḥ kaścideva hi || 38 ||
[Analyze grammar]

asyāṃ saṃsārayātrāyāṃ nānābhinayadāyinaḥ |
ajñā eva naṭāḥ sādho rasabhāvasamanvitāḥ || 39 ||
[Analyze grammar]

madhyasthadṛṣṭayaḥ svasthā yathāprāptārthadarśinaḥ |
tajjñāstu prekṣakā eva sākṣidharme vyavasthitāḥ || 40 ||
[Analyze grammar]

kartāro'pi na kartāro yathā dīpā niśāgame |
ālokakarmaṇāmevaṃ tajjñā lokasthitāviha || 41 ||
[Analyze grammar]

pratibimbairna dūṣyante svātmabimbagatairapi |
yathā darpaṇaratnādyāstathā kāryairmahādhiyaḥ || 42 ||
[Analyze grammar]

sarvaiṣaṇāmayakalaṅkavivarjitena svacchātmabhāvakalitena hṛdabjamadhye |
putrātmanātmani mahāmaṇināmunaiva santyajya sambhramamalaṃ paritoṣamehi || 43 ||
[Analyze grammar]