Chapter 18

tṛṣṇāvicchedo nāma sargaḥ |
aṣṭādaśaḥ sargaḥ |
vasiṣṭhaḥ |
muktāśayānāṃ mahatāmahatānāṃ kudṛṣṭibhiḥ |
svabhāvo'yaṃ mahābāho līlayā caratāmiha || 1 ||
[Analyze grammar]

viharannapi saṃsāre jīvanmuktamanā muniḥ |
ādimadhyāntavirasā vihasañjāgatīrgatīḥ || 2 ||
[Analyze grammar]

sarvaprakṛtakāryastho madhyasthaḥ sarvavṛttiṣu |
dhyeyaṃ taṃ vāsanātyāgamavalambya vyavasthitaḥ || 3 ||
[Analyze grammar]

sarvatra vigatodvegaḥ sarvārthaparipoṣakaḥ |
vivekodyānatuṣṭātmā prabodhopavane sthitaḥ || 4 ||
[Analyze grammar]

sarvātītapadālambī pūrṇenduśiśirāśayaḥ |
nodvegī na ca tuṣṭātmā saṃsāre nāvasīdati || 5 ||
[Analyze grammar]

sarvaśatruṣu madhyastho dayādākṣiṇyasaṃyutaḥ |
prāptakramakaro'gryāṇāṃ saṃsāre nāvasīdati || 6 ||
[Analyze grammar]

nābhinandati na dveṣṭi na śocati na kāṅkṣati |
maunasthaḥ prakṛtārambhī saṃsāre nāvasīdati || 7 ||
[Analyze grammar]

pṛṣṭaḥ sanprakṛtaṃ vaktā na pṛṣṭaḥ sthāṇuvatsthitaḥ |
īhitānīhitairmuktaḥ saṃsāre nāvasīdati || 8 ||
[Analyze grammar]

sarvasyābhimataṃ vaktā coditaḥ peśaloktimān |
āśayajñaśca bhūtānāṃ saṃsāre nāvasīdati || 9 ||
[Analyze grammar]

yuktāyuktadaśāgrastamāśopahataceṣṭitam |
jānāti lokavṛttāntaṃ karakoṭarabilvavat || 10 ||
[Analyze grammar]

paraṃ padamupārūḍho bhaṅgurāṃ jāgatīṃ sthitim |
antaśśītalayā buddhyā hasanniva nirīkṣate || 11 ||
[Analyze grammar]

jitacittā mahātmāno ye hi dṛṣṭaparāvarāḥ |
svabhāva īdṛśasteṣāṃ kathitastava rāghava || 12 ||
[Analyze grammar]

vaktuṃ vayaṃ tu mūrkhāṇāmajitātmīyacetasām |
bhogakardamamagnānāṃ na vidmo'bhimataṃ matam || 13 ||
[Analyze grammar]

teṣāmabhimatā nāryo hāvabhāvavibhūṣaṇāḥ |
jvālā narakavahnīnāṃ yāstāḥ kanakarociṣaḥ || 14 ||
[Analyze grammar]

anarthagahanāścārthā vyarthārthanakadarthanāḥ |
diśanto duḥkhasaṃrambhasahitā āhitāpadaḥ || 15 ||
[Analyze grammar]

phalabandhīni karmāṇi nānācāramayāni ca |
sukhaduḥkhāvapūrṇāni tāni vaktuṃ na śaknumaḥ || 16 ||
[Analyze grammar]

pūrṇāṃ dṛṣṭimavaṣṭabhya dhyeyatyāgavilāsinīm |
jīvanmuktatayā svastho loke vihara rāghava || 17 ||
[Analyze grammar]

antaḥ santyaktasarvāśo vītarāgo vivāsanaḥ |
bahiḥ sarvasamācāro loke vihara rāghava || 18 ||
[Analyze grammar]

udāraḥ peśalācāraḥ sarvācārānuvṛttimān |
antaḥ sarvaparityāgī loke vihara rāghava || 19 ||
[Analyze grammar]

pravicārya daśāḥ sarvā yadatucchataraṃ padam |
tadeva bhāvenālambya loke vihara rāghava || 20 ||
[Analyze grammar]

antarnairāśyamādāya bahirāśonmukhehitaḥ |
bahistapto'ntarāśīto loke vihara rāghava || 21 ||
[Analyze grammar]

bahiḥ kṛtrimasaṃrambho hṛdi saṃrambhavarjitaḥ |
kartā bahirakartāntarloke vihara rāghava || 22 ||
[Analyze grammar]

jñātavānasi sarveṣāṃ bhāvānāṃ satyamāntaram |
yathecchasi tayā dṛṣṭyā loke vihara rāghava || 23 ||
[Analyze grammar]

kṛtrimollāsaharṣasthaḥ kṛtrimodvegadūṣaṇaḥ |
kṛtrimārambhasaṃrambho loke vihara rāghava || 24 ||
[Analyze grammar]

tyaktāhaṅkṛtirāśvastamatirākāśaśobhanaḥ |
agṛhītakalaṅkāṅko loke vihara rāghava || 25 ||
[Analyze grammar]

āśāpāśaśatonmuktaḥ samaḥ sarvāsu vṛttiṣu |
bahiḥ prakṛtakāryastho loke vihara rāghava || 26 ||
[Analyze grammar]

na bandho'sti na mokṣo'sti dehinaḥ paramārthataḥ |
mithyeyamindrajālaśrīḥ saṃsāraparivartanā || 27 ||
[Analyze grammar]

bhrāntimātramidaṃ mohājjagad rāghava dṛśyate |
janitapratyayaṃ sphāre jalaṃ tīvrātape yathā || 28 ||
[Analyze grammar]

abaddhasyaikarūpasya sarvagasyātmanaḥ katham |
bandhaḥ syāttadabhāve tu mokṣaḥ kasya vidhīyate || 29 ||
[Analyze grammar]

atattvajñānajāteyaṃ sāṃsārī bhrāntirātatā |
tattvajñānātkṣayaṃ yāti rajjvāmiva bhujaṅgadhīḥ || 30 ||
[Analyze grammar]

jñātavānasi tattvaṃ svamanayā sūkṣmayā dhiyā |
jāto'si nirahaṅkāro vyomavattiṣṭha nirmalaḥ || 31 ||
[Analyze grammar]

nāsi cettvaṃ tadakhilāḥ suhṛdbāndhavabhāvanāḥ |
santyajāsatsvabhāvasya kā nāma kila bhāvanā || 32 ||
[Analyze grammar]

asi cettvaṃ tadatyantasattvavānanumīyase |
idamprathamatāṃ prāptaḥ paramādasi kāraṇāt || 33 ||
[Analyze grammar]

bhogabandhujagadbhāvaiḥ karmabhiśca śubhāśūbhaiḥ |
ātmano nāsti sambandhaḥ kimenamanuśocasi || 34 ||
[Analyze grammar]

ātmatattvaikasāro'hamiti jātadhiyo bhavaiḥ |
na te rāmāsti sambandhaḥ kiṃ bibheṣi jagadbhramāt || 35 ||
[Analyze grammar]

ajātasya sato bandhorbandhuduḥkhasukhakramaiḥ |
kaste rāghava sambandho yadetānanuśocasi || 36 ||
[Analyze grammar]

tvaṃ cedbabhūvitha purā tathedānīṃ bhaviṣyasi |
yadyatheha sthito'sīti jñātavānasi niścayam || 37 ||
[Analyze grammar]

tadanantatarānanyānprāgyonigaṇasaṃstutān |
bandhūnatītān subahūn kasmāttvaṃ nānuśocasi || 38 ||
[Analyze grammar]

pūrvamadya tathedānīṃ babhūvitha bhaviṣyasi |
yadi rāma tathāpi tvaṃ sadrūpaḥ kiṃ vimuhyasi || 39 ||
[Analyze grammar]

purā bhūtvādya bhūtvā ca bhūyaścenna bhaviṣyasi |
tathāpi kṣīṇasaṃsāraḥ kimarthamanuśocasi || 40 ||
[Analyze grammar]

tasmānna duḥkhitā yuktā prakṛte jāgate krame |
na caiva muditā yuktā yuktaṃ kāryānuvartanam || 41 ||
[Analyze grammar]

mā gaccha duḥkhitāṃ rāma sukhitāmapi mā vraja |
samatāmehi sarvatra paramātmāsi sarvagaḥ || 42 ||
[Analyze grammar]

anantaḥ svaccharūpastvaṃ khamivātitatāntaraḥ |
nityaśuddhaḥ prakāśastvaṃ jvālāyā iva koṭaram || 43 ||
[Analyze grammar]

jāgatānāṃ padārthānāmadṛśyāṇutanustanuḥ |
hṛtstho'si hāramuktānāmekastanturivātataḥ || 44 ||
[Analyze grammar]

saṃsārasthitireveyaṃ yadbhūtvā bhūyate punaḥ |
ajñenaiva na tu jñena jño'si rāma sthiro bhava || 45 ||
[Analyze grammar]

svarūpamidamasyāstu saṃsṛteḥ santataṃ hi yat |
ajñānātsphāratāmeti jñānavānasi sanmate || 46 ||
[Analyze grammar]

rūpaṃ kimanyadbhavatu bhramamātrādṛte bhrame |
svapnamātrādṛte svapne bhavatyanyo hi kaḥ kramaḥ || 47 ||
[Analyze grammar]

sarvaśakteriyaṃ śaktirbhramamātramayī matā |
rūḍhā saṃsāramāyeti nāsatyā nāpi sanmayī || 48 ||
[Analyze grammar]

kevalaṃ jñānavairūpyādaparyālocanāttathā |
rāma dṛśyata evedamābhānamatibhāsvaram || 49 ||
[Analyze grammar]

na bandhuḥ kasyacitkaścidiha no kaścidapyariḥ |
sadā sarvaṃ ca sarvasya sarvaḥ sarveśvarecchayā || 50 ||
[Analyze grammar]

ālūnaśīrṇamakhilamidamanyo'nyamiśritam |
anārataṃ yāti jagattaraṅgaugha ivāmbhasaḥ || 51 ||
[Analyze grammar]

adha ūrdhvatvamāyāti yātyūrdhvatvamadhastathā |
saṃsārasya calasyāsya cakranemirivābhitaḥ || 52 ||
[Analyze grammar]

svargasthā narakaṃ yānti nārakā yānti viṣṭapam |
yoneryonyantaraṃ yānti dvīpāddvīpāntaraṃ janāḥ || 53 ||
[Analyze grammar]

dhīrāḥ kārpaṇyamāyānti kṛpaṇā yānti dhīratām |
parisphuranti bhūtāni pātotpātaśatabhramaiḥ || 54 ||
[Analyze grammar]

ekarūpaṃ sthiraṃ svasthaṃ svacchaṃ santāpavarjitam |
neha samprāpyate kiñcidagnau himakaṇo yathā || 55 ||
[Analyze grammar]

ye ye rāma mahābhāgā bahavo'bahavo'tha vā |
naṣṭā eveha dṛśyante te te katipayairdinaiḥ || 56 ||
[Analyze grammar]

paratātmīyatānyatvatvattvamattvādibhāvanāḥ |
neha satyā mahābāho dvicandrādidṛśo yathā || 57 ||
[Analyze grammar]

ayaṃ bandhuḥ paraścāyamayaṃ cāhamayaṃ bhavān |
etā mithyādṛśo rāma vigalantu tavādhunā || 58 ||
[Analyze grammar]

krīḍārthaṃ vyavahārastha etābhirhatadṛṣṭibhiḥ |
āmūlamantaśchinnābhirbahirvihara helayā || 59 ||
[Analyze grammar]

saṃsārasaraṇāvasyāṃ tathā vihara suvrata |
na yathaiṣi śramaṃ śrānto vāsanābhāravānyathā || 60 ||
[Analyze grammar]

yathā yathaiṣā kalyāṇī vāsanākṣayakāriṇī |
vicāraṇā tavodeti saṃśāmyasi tathā tathā || 61 ||
[Analyze grammar]

ayaṃ bandhurayaṃ neti gaṇanā laghucetasām |
udāracaritānāṃ tu vigatāvaraṇaiva dhīḥ || 62 ||
[Analyze grammar]

na tadasti na yatrāhaṃ na tadasti na yanmama |
iti nirṇītasārāṇāṃ vigatāvaraṇaiva dhīḥ || 63 ||
[Analyze grammar]

nāstameti na codeti yaścidākāśavanmahān |
sa sarvaṃ paśyati svasthaḥ khastho bhūmitalaṃ yathā || 64 ||
[Analyze grammar]

sarvā eva hi te bhūtajātayo rāma bandhavaḥ |
atyantāsaṃstutā etāstava nāma na kāścana || 65 ||
[Analyze grammar]

vividhajanmaśatāhitasambhrame jagati bandhurabandhuriti kṣaṇam |
bhramadaśaiva vivalgati vastutastribhuvanaṃ cirabandhurabandhvapi || 66 ||
[Analyze grammar]