Chapter 39

kartṛtvavicārayogopadeśo nāma sargaḥ |
navatriṃśaḥ sargaḥ |
rāmaḥ |
satyametattvayā brahmanyaduktaṃ sūktisundaram |
akartaiva hi kartātmā bhoktābhoktaiva bhūtabhṛt || 1 ||
[Analyze grammar]

sarveśvaraḥ sarvamayaścinmātramamalaṃ padam |
svānubhūtivapurdevaḥ sarvabhūtāntarasthitaḥ || 2 ||
[Analyze grammar]

hṛdayaṅgamatāṃ yātamidānīṃ brahma me prabho |
tvaduktibhiryathā śītaṃ dhārābhirbhūbhṛtaḥ payaḥ || 3 ||
[Analyze grammar]

audāsīnyādanicchatvānna bhuṅkte na karoti ca |
samagrālokakāritvādbhuṅkte devaḥ karoti ca || 4 ||
[Analyze grammar]

kiṃ tvayaṃ bhagavan sphāraḥ saṃśayo me hṛdi sthitaḥ |
chinddhi taṃ tvaṃ girā brahmandīdhityenduryathā tamaḥ || 5 ||
[Analyze grammar]

idaṃ sattadidaṃ cāsadayaṃ so'hamayaṃ bhavān |
ayameko dvitīyo'yamityādikalanāmalam || 6 ||
[Analyze grammar]

ekasminvitate śānte nīhāra iva bhāskare |
idamprathamamevācche kathamātmani saṃsthitam || 7 ||
[Analyze grammar]

vasiṣṭhaḥ |
siddhāntakāla evāsya satpraśnasyottarasthitim |
kathayiṣyāmi te rāma jñāsyasyenāṃ tadaiva ca || 8 ||
[Analyze grammar]

mokṣopāyasya siddhāntasamayaṃ prāpya rāghava |
śrotuṃ praśnottarāṇyetānyalaṃ yogyo bhaviṣyasi || 9 ||
[Analyze grammar]

kāntāgeyagirāṃ rāma bhājanaṃ taruṇo yathā |
praśnānāmuttamoktīnāṃ prāptadṛgbhājanaṃ tathā || 10 ||
[Analyze grammar]

vyarthā bhavati bāleṣu yathā rāgamayī kathā |
nirarthakālpabodheṣu tathodārodayā kathā || 11 ||
[Analyze grammar]

kasmiṃścideva samaye kiñcitpuṃso virājate |
phalamābhāti vṛkṣasya śaradyeva na mādhave || 12 ||
[Analyze grammar]

upadeśagiro vṛddhe rañjanā nirmale paṭe |
lagantyudāravijñānakathāścādhigatātmani || 13 ||
[Analyze grammar]

praśnasyāsyottaraṃ pūrvaṃ leśataḥ kathitaṃ mayā |
na vistareṇa tenaitanna jñātaṃ bhavatā sphuṭam || 14 ||
[Analyze grammar]

yadi tvamātmanātmānamadhigacchasi tatsvayam |
etatpraśnottaraṃ sādho jānāsyatra na saṃśayaḥ || 15 ||
[Analyze grammar]

mayā siddhāntakāle tu prāptabodhe tvayi sthite |
vaktavyo vistareṇaiṣa sādho praśnottarakramaḥ || 16 ||
[Analyze grammar]

jānātyātmānamātmaiva kṛta ātmātmanaiva hi |
ātmaiva samprasannaḥ sannātmānaṃ pratipadyate || 17 ||
[Analyze grammar]

mayaitatkathitaṃ rāma kartrakartṛvicāraṇam |
vāsanāmayanāśāya tajjño nirvāsano bhavet || 18 ||
[Analyze grammar]

bandho hi vāsanābandho mokṣaḥ syādvāsanākṣayaḥ |
vāsanāstvaṃ parityajya mokṣārthitvamapi tyaja || 19 ||
[Analyze grammar]

tāmasīrvāsanāḥ pūrvaṃ tyaktvā viṣayavāsitāḥ |
maitryādibhāvanānāmnīrgṛhāṇāmalavāsanāḥ || 20 ||
[Analyze grammar]

tā apyantaḥ parityajya tābhirvyavaharanbahiḥ |
antaśśāntasamasteho bhava cinmātravāsanaḥ || 21 ||
[Analyze grammar]

tāmapyatha parityajya manobuddhisamanvitām |
śeṣe sthirasamādhāno yena tyajasi taṃ tyaja || 22 ||
[Analyze grammar]

cinmanaḥkalanākālaprakāśatimirādikam |
vāsanāṃ vāsitāraṃ ca prāṇaspandanapūrvakam || 23 ||
[Analyze grammar]

samūlamakhilaṃ tyaktvā vyomasomyaḥ praśāntadhīḥ |
yastvaṃ bhavasi sadbuddhe sa bhavāśvavilambitaḥ || 24 ||
[Analyze grammar]

hṛdayātsamparityajya sarvameva mahāmatiḥ |
yastiṣṭhati gatavyagraṃ sa muktaḥ parameśvaraḥ || 25 ||
[Analyze grammar]

samādhimatha karmāṇi mā karotu karotu vā |
hṛdayenāstasarvārtho mukta evottamāśayaḥ || 26 ||
[Analyze grammar]

naiṣkarmyeṇa na tasyārtho na tasyārtho'sti karmabhiḥ |
na samādhānajapyābhyāṃ yasya nirvāsanaṃ manaḥ || 27 ||
[Analyze grammar]

vicāritamalaṃ śāstraṃ ciramudgrāhitaṃ mithaḥ |
santyaktavāsanānmaunādṛte nāstyuttamaṃ padam || 28 ||
[Analyze grammar]

dṛṣṭaṃ draṣṭavyamakhilaṃ bhrāntvābhrāntā diśo daśa |
janāḥ katipayā eva yathāvastvavalokinaḥ || 29 ||
[Analyze grammar]

yad yadālokyate kiñcid yatra yatra ca gamyate |
īpsitānīpsitādanyanna tatra yatate janaḥ || 30 ||
[Analyze grammar]

ye kecana samārambhā ye janasya kriyākramāḥ |
te sarve dehamātrārthamātmārthaṃ tu na kiñcana || 31 ||
[Analyze grammar]

pātāle brahmaloke ca svarge'tha vasudhātale |
santaḥ katipayā eva dṛśyante dṛṣṭadṛṣṭayaḥ || 32 ||
[Analyze grammar]

idaṃ heyamupādeyamidamityasadutthitau |
niścayau galitau yasya jñasyāsāvatidurlabhaḥ || 33 ||
[Analyze grammar]

karotu bhuvane rājyaṃ viśatvanalamambu vā |
nātmalābhādṛte janturviśrāntimadhigacchati || 34 ||
[Analyze grammar]

ye mahāmatayaḥ santi śūrāḥ svendriyaśatruṣu |
janmajvaravināśāya ta upāsyā mahādhiyaḥ || 35 ||
[Analyze grammar]

sarvatra pañcabhūtāni ṣaṣṭhaṃ kiñcinna vidyate |
pātāle bhūtale vyomni ratimeti kva dhīradhīḥ || 36 ||
[Analyze grammar]

yuktyā santarato jñasya saṃsāro goṣpadākṛtiḥ |
dūrasantyaktayuktestu mahāmattārṇavopamaḥ || 37 ||
[Analyze grammar]

kadambagolakasvacchaṃ brahmāṇḍaṃ sphāracetasaḥ |
kiṃ prayacchati kiṃ bhuṅkte prāpte'smin sakale'pi saḥ || 38 ||
[Analyze grammar]

etadarthamabuddhīnāṃ yanmahāsamarakriyāḥ |
tanmanye rāma bhikṣārthaṃ dvandvalakṣakṣayāvaham || 39 ||
[Analyze grammar]

kalpamātreṇa kālena sahasā pelavodare |
asminnapi ca yo nāśaḥ sa vīrudhi mahāśaniḥ || 40 ||
[Analyze grammar]

ātmano'ṃśasya sarvāderyattṛṇādapi nottamam |
tasmiñjagattraye prāptaṃ kiṃ tadātmavato bhavet || 41 ||
[Analyze grammar]

itaśśailaśatairvyāptastatheto jalarāśibhiḥ |
kiyānasyā bhuvo deho yenodāraṃ prapūrayet || 42 ||
[Analyze grammar]

na tadasti jagatyasmin sapātālaharālaye |
yannāmātmavato jñasya kiñcitkāryakaraṃ bhavet || 43 ||
[Analyze grammar]

ekatāmanuyātasya vyomavadvitatasya ca |
svasthasyātmavato jñasya sthitasyātmanyacetasi || 44 ||
[Analyze grammar]

śarīrajālanīhāradhūsarā śūnyakoṭarā |
śāntasañcārasubhagā trilokī vipulāṭavī || 45 ||
[Analyze grammar]

sphārabrahmāmalāmbhodhiphenāḥ sarve kulācalāḥ |
cidādityamahātejomṛgatṛṣṇā jagacchriyaḥ || 46 ||
[Analyze grammar]

ātmatattvamahāmbhodhivīcayaḥ sargarājayaḥ |
anuttamapadāmbhodavṛṣṭayaśśāstradṛṣṭayaḥ || 47 ||
[Analyze grammar]

candrārkatapanālokā ghaṭakāṣṭhādisannibhāḥ |
prakāśanīyāściddīpatviṣo bhūtagaṇāstathā || 48 ||
[Analyze grammar]

ciramantarhitātmānaḥ saṃsāravanacāriṇaḥ |
kāmabhogolapagrāsā mṛgā narasurāsurāḥ || 49 ||
[Analyze grammar]

asthikhaṇḍārgalā mūrdhapidhānāḥ snāyuśṛṅkhalāḥ |
jagaddehā jagajjīvaratnamāṃsasamudgakāḥ || 50 ||
[Analyze grammar]

vanabālamṛgīmugdhāḥ parasañcāritāḥ sthitau |
bālabuddhivinodāya yoṣitaścarmaputrikāḥ || 51 ||
[Analyze grammar]

evaṃvidhodāramanā manāgapi mahāmatiḥ |
na jñaścalati bhogaughairmukhavātairivācalaḥ || 52 ||
[Analyze grammar]

tasmin kila pade rāma jñastiṣṭhati mahonnatau |
yasmāccandrārkadeśo'pi naḥ pātālamiva sthitaḥ || 53 ||
[Analyze grammar]

imāṃl lokānanālokāñjātālokāḥ suvedinaḥ |
sarīsṛpānvayamiva paśyantyūḍhānbhavārṇave || 54 ||
[Analyze grammar]

na kecana jagadbhāvāstattvajñaṃ rañjayantyamī |
nāgaraṃ nāgarīkāntaṃ kugrāmalaṭabhā iva || 55 ||
[Analyze grammar]

na kecana jagadbhāvāstattvajñaṃ rañjayantyamī |
apyabhyāśagatāḥ sphārahṛdayaṃ khamivāmbudāḥ || 56 ||
[Analyze grammar]

na kecana jagadbhāvāstattvajñaṃ rañjayantyamī |
markaṭya iva nṛtyantyo gaurīlāsyārthinaṃ haram || 57 ||
[Analyze grammar]

na kecana jagadbhāvāstattvajñaṃ rañjayantyamī |
prāktanapratibimbaśrī ratnaṃ kumbhagataṃ yathā || 58 ||
[Analyze grammar]

cakrārpitopamamasanmayamambubhaṅgatvaṅgattaraṅgakṛtabimbamivāvalokya |
lokaṃ tadīhitasukheṣu ratiṃ na yāti tajjñaḥ kuśevalalaveṣviva rājahaṃsaḥ || 59 ||
[Analyze grammar]