Chapter 37

dāśūropākhyāne saṅkalpacikitsā nāma sargaḥ |
saptatriṃśaḥ sargaḥ |
vasiṣṭhaḥ |
ityākarṇya tadā tatra rātrāvālapanaṃ tayoḥ |
ahaṃ raghukulākāśaśaśāṅka raghunandana || 1 ||
[Analyze grammar]

patitaḥ khātkadambāgre pattrapuṣpalatākule |
tūṣṇīṃ nirvṛṣṭimūkātmā śṛṅgāgra iva toyadaḥ || 2 ||
[Analyze grammar]

apaśyaṃ tatra dāśūraṃ śūraṃ indriyanigrahe |
pareṇa tapasā yuktaṃ tejaseva hutāśanam || 3 ||
[Analyze grammar]

tejobhirdehaniṣkrāntaiḥ kāñcanīkṛtabhūruhaiḥ |
tāpayantaṃ pradeśaṃ taṃ bhuvanaṃ bhāskaraṃ yathā || 4 ||
[Analyze grammar]

māmathālokya samprāptaṃ dāśūro'rghyasaparyayā |
vitīrṇaviṣṭaraṃ pattre parayā paryapūjayat || 5 ||
[Analyze grammar]

tataḥ kurvan kathāstena saha dāśūrabhāsvatā |
tāstattanayasambaddhāḥ saṃsārottāraṇakṣamāḥ || 6 ||
[Analyze grammar]

dṛṣṭavāṃstamahaṃ vṛkṣaṃ korakotkaṭakoṭaram |
smiteneva sphuṭaradaṃ śvasanasphuritacchadam || 7 ||
[Analyze grammar]

dāśūrasyecchayā sarvairapatadbhirmṛgadvijaiḥ |
sevyamānaṃ vanamiva latāmaṇḍapamaṇḍitam || 8 ||
[Analyze grammar]

latākoṭitaṭabhrāntaiścamarairindusundaraiḥ |
śubhrābhrakhaṇḍanikaraiśśarannabha ivāvṛtam || 9 ||
[Analyze grammar]

prāleyakaṇapaddhatyā muktāvalyābhyalaṅkṛtam |
sarvāvayavamevācchapuṣpapūraiḥ prapūritam || 10 ||
[Analyze grammar]

svareṇucandanālepaiḥ samālabdhamakhaṇḍitam |
svacchadābhogavipularaktāmbarapariṣkṛtam || 11 ||
[Analyze grammar]

vivāhāyeva veṣeṇa puṣpabhārādihāriṇā |
latāṅganānuṣaktena nāgareṇa kṛtodyamam || 12 ||
[Analyze grammar]

sunibaddhajaṭākāralatāmaṇḍalamaṇḍitam |
mañjarībhiḥ patākābhiryuktaṃ puramivotsave || 13 ||
[Analyze grammar]

mṛgakaṇḍūyanadhvastapuṣpadhūlividhūsaram |
protsāritopāntavanaṃ vṛkṣamallamivotthitam || 14 ||
[Analyze grammar]

barhibhiḥ kusumodvāntaparāgaparipāṭalaiḥ |
nikṣepakṣiptasandhyābhrabālasālamivācalaiḥ || 15 ||
[Analyze grammar]

pravālāruṇahastena śītalacchāyaśāyinā |
madhunā ghūrṇamānena prāleyotpulakatviṣā || 16 ||
[Analyze grammar]

nīrandhrapuṣpapūreṇa ghūrṇitena vanānilaiḥ |
nidrālukuṭmaladṛśā stabakastanadhāriṇā || 17 ||
[Analyze grammar]

puṣpajālarajaḥpuñjakuṅkumāruṇavāsasā |
latāvitānanilayavātāyananiṣaṅgiṇā || 18 ||
[Analyze grammar]

navapuṣpalatādolālīlayālasalāsinā |
āpādamastakaprāntaṃ sasamastalatālayam || 19 ||
[Analyze grammar]

vṛndena vanadevīnāṃ kokilālāpaśālinā |
sandigdhamañjarījālamalinetreṇa hāsinā || 20 ||
[Analyze grammar]

avaśyāyopaśamitaratikhedairmadālasaiḥ |
puṣpadhūlisamārabdhairālabdhairnibiḍaṃ mithaḥ || 21 ||
[Analyze grammar]

puṣpāntarāntaḥpuragaiḥ kimapi praṇayocitam |
dhvanadbhirabhitaḥ svacchaṃ mattāliyugalairvṛtam || 22 ||
[Analyze grammar]

kānanopāntanagarīghuṅghumākarṇanecchayā |
kṣaṇamutkarṇamāśāntacārucarvaṇaṭāṅkṛtaiḥ || 23 ||
[Analyze grammar]

kṣaṇaṃ dalāśriviśrāntamugdhamugdhaśirastayā |
paśyadbhirindvaṃśukacajjalāmarṇavamekhalām || 24 ||
[Analyze grammar]

vanasthalīnāṃ tanayairnayairmūrtimivāsthitaiḥ |
suptaiḥ pattrapuṭeṣvantarmṛgaiśśāralatāntaram || 25 ||
[Analyze grammar]

nīḍaśvasatsuviśvastasuptasārbhakapakṣiṇam |
pākacyutaphalopāntavṛttalambikamaṇḍalam || 26 ||
[Analyze grammar]

sandigdhamūkabhramaraṃ guccheṣvabjākṣasūtrakaiḥ |
śyāmalīkṛtaparyantaṃ nīlaiḥ pallavamaṇḍalaiḥ || 27 ||
[Analyze grammar]

sugandhitāśeṣavanaṃ puṣpameghīkṛtāmbudam |
dhūlīkadambaśabalaṃ phalārthivalitaṃ tale || 28 ||
[Analyze grammar]

bahunātra kimuktena na kiñcidapi vidyate |
pattraṃ tatra taroryatra noṣyate vā na bhujyate || 29 ||
[Analyze grammar]

pattre pattre mṛgāḥ suptā viśrāntāḥ sughane ghane |
kacche kacche khagā līnāstasya bhūruhabhūpateḥ || 30 ||
[Analyze grammar]

evaṃguṇaviśiṣṭaṃ taṃ mamālokayatastarum |
mahotsavena sadṛśī sā babhūva tamasvatī || 31 ||
[Analyze grammar]

tataḥ kathābhiranyābhiḥ sa tasya tanayo mayā |
vijñānālokaramyābhirnīto bodhaṃ paraṃ punaḥ || 32 ||
[Analyze grammar]

āvayostatra citrābhiḥ kathābhiritaretaram |
śarvarī sā vyatīyāya muhūrta iva kāntayoḥ || 33 ||
[Analyze grammar]

prātaḥ pratanutāṃ yāte dyugharmajalajālake |
khakānanāṅkurodgāre tārakānikare śanaiḥ || 34 ||
[Analyze grammar]

ākadambanabhobhāgamanuyātaṃ sutānvitam |
ahaṃ visarjya dāśūraṃ harācalanadīṃ gataḥ || 35 ||
[Analyze grammar]

tatrābhimatamāsādya snānametya nabhastalam |
praviśya khaṃ munīnāṃ ca madhyaṃ svasthamavasthitaḥ || 36 ||
[Analyze grammar]

dāśūrākhyāyikaiṣā te kathitā raghunandana |
jagataḥ pratibimbābhā satyākārāpyasanmayī || 37 ||
[Analyze grammar]

dāśūrākhyāyikaiveyamityetatkathitaṃ mayā |
tubhyaṃ rāghava ghorāghajagadrūpanirūpaṇe || 38 ||
[Analyze grammar]

tasmādavāstavīṃ tyaktvā vāstavīmapi rañjanām |
dāśūrasiddhāntadhiyā sadodāro bhavātmavān || 39 ||
[Analyze grammar]

anena gacchāmarasundaratvaṃ kadambadāśūrakathārathena |
āsādayiṣyasyacirātpuraṃ tadbhaviṣyasīśo bhuvaneṣu yena || 40 ||
[Analyze grammar]