Chapter 31

dāśūropākhyāne dāśūravarapradānaṃ nāma sargaḥ |
ekatriṃśaḥ sargaḥ |
vasiṣṭhaḥ |
atha kānanamadhyasthaṃ cumbitāmbudamaṇḍalam |
madhyāhnakhinnasūryāśvasevitaskandhamaṇḍapam || 1 ||
[Analyze grammar]

mimānamiva dikkukṣīrdīrghairviṭapabāhubhiḥ |
ālokayantaṃ kakubho vikāsikusumekṣaṇaiḥ || 2 ||
[Analyze grammar]

vātāvalulitānalpabhramadbhramarakuntalam |
pramārjayantamāśānāṃ mukhaṃ pallavapāṇibhiḥ || 3 ||
[Analyze grammar]

kacchairurugulucchācchamañjarīpuñjapiñjaraiḥ |
āsyairiva satāmbūlairhasantamalimālitaiḥ || 4 ||
[Analyze grammar]

latāvilāsanollāsipuṣpakesaradhūlibhiḥ |
ābaddhamaṇḍalābhogaṃ pūrṇendumiva dīptibhiḥ || 5 ||
[Analyze grammar]

saṅkaṭaṃ viṭapāvalyā kuñjakūjaccakorayā |
gāyatkinnarayā siddhavīthyeva jagaduccayā || 6 ||
[Analyze grammar]

latāpīṭhopaviṣṭānāmadholambaiḥ kalāpinām |
kalāpaiśśobhitaṃ vyoma sendracāpairivāmbudaiḥ || 7 ||
[Analyze grammar]

magnonmagnaiḥ pratiskandhaṃ cāmarairbhāsitaṃ sitaiḥ |
cakorānugataiḥ pūrṇaiḥ saṃvatsaramivendubhiḥ || 8 ||
[Analyze grammar]

kapiñjalakalālāpaiḥ kalakokilakūjitaiḥ |
jīvajīvavirāvaiśca pragāyantamivorjitaiḥ || 9 ||
[Analyze grammar]

kādambakakadambaiśca kulāyakṛtakelibhiḥ |
svargakoṭaraviśrāntaiḥ siddhairjagadivāvṛtam || 10 ||
[Analyze grammar]

pravālāruṇahastābhiralinetrābhirāśritam |
apsarobhiriva svargaṃ mañjarībhiritastataḥ || 11 ||
[Analyze grammar]

sendracāpaṃ vilolena kusumotkarareṇunā |
mañjarīpiñjaraṃ śyāmaṃ vidyutvantamivāmbudam || 12 ||
[Analyze grammar]

sahasrabhujaśākhāḍhyaṃ pūritākāśakoṭaram |
viśvarūpamivonnṛttaṃ candrārkakṛtakuṇḍalam || 13 ||
[Analyze grammar]

tale niṣaṇṇanāgendraṃ vyomni tārāgaṇākulam |
latāpuṣpamayaṃ madhye bhūmaṇḍalamivāparam || 14 ||
[Analyze grammar]

pitāmahamivāśeṣaśailakānanaśākhinām |
phalapallavapuṣpāṇāṃ kośamekamivāvanau || 15 ||
[Analyze grammar]

dadhānaṃ kalikājālaṃ sthagitaṃ puṣpadhūlibhiḥ |
kaccheṣvarkakaracchannatārājālamivāmbaram || 16 ||
[Analyze grammar]

vilolavihagaiḥ skandhaiḥ kulāyakulasaṅkulaiḥ |
valitaṃ bhūtalaṃ lolalokairjanapadairiva || 17 ||
[Analyze grammar]

mañjarīsupatākāḍhyaṃ latāmaṇḍapamaṇḍitam |
puṣpamakkoladhavalaṃ puṣpaprakarapūritam || 18 ||
[Analyze grammar]

kūjaccakoracamaraśukakokilaśārikam |
ghanastabakasañchannakuharāgragavākṣakam || 19 ||
[Analyze grammar]

sañcaratpakṣijanataṃ madamantharakoṭaram |
sarvāsāṃ vanadevīnāmantaḥpuramivottamam || 20 ||
[Analyze grammar]

bruḍadbhṛṅgataraṅgaughaiḥ puṣpakesararāśibhiḥ |
rājamānaṃ patantībhiḥ saridbhiriva parvatam || 21 ||
[Analyze grammar]

bhramadbhiḥ puṣpapattraughairmandavātavilāsibhiḥ |
vardhamānairvṛtaskandhaṃ śubhrābhrairiva bhūdharam || 22 ||
[Analyze grammar]

mātaṅgaghaṭaghṛṣṭena jānustambhena pīṭhinā |
ābhoginā baddhapadaṃ taṭeneva mahācalam || 23 ||
[Analyze grammar]

vicitravarṇapakṣāṇāṃ skandhakoṭaracāriṇām |
vṛtaṃ khagānāṃ vṛndena bhūtānāmiva śṛṅgiṇam || 24 ||
[Analyze grammar]

stabakāṅgulijālena lolenābhinayakriyām |
diśantamiva vallīnāṃ pranṛttānāṃ vanānilaiḥ || 25 ||
[Analyze grammar]

kaścideva nirāśo me nārthī cāpaiti tuṣṭitaḥ |
nṛtyantamiva puṣpāḍhyairlatāvalayavalganaiḥ || 26 ||
[Analyze grammar]

latākāntaikakāntatvācchṛṅgārarasanirbharam |
kākalyeva pragāyantaṃ mattālijananissvanaiḥ || 27 ||
[Analyze grammar]

ārādunmuktakusumaṃ siddhānāṃ vyomacāriṇām |
svāgatānīva kurvāṇaṃ kokilālikulāravaiḥ || 28 ||
[Analyze grammar]

phalapuṣpalatollāsamaunnatyaṃ ca mahīruhām |
vihasantamivācchābhiḥ puṣpakuṭmaladīptibhiḥ || 29 ||
[Analyze grammar]

pārijātamivājetumūrdhvagaiḥ skandhamaṇḍalaiḥ |
vyomāntarabhidhāvantamalamuddhurakandharam || 30 ||
[Analyze grammar]

madhyabhāgasphuradbhṛṅgaiḥ stabakairghanapakṣmabhiḥ |
sahasrākṣatvamatulairjetumaindramivodyatam || 31 ||
[Analyze grammar]

kacatkusumagucchācchaphaṇāmaṇigaṇāvṛtam |
pātālādutthitaṃ śeṣamiva vyomadidṛkṣayā || 32 ||
[Analyze grammar]

rajasoddhūlitākāraṃ dvitīyamiva śaṅkaram |
chāyayā phalaśālinyā samastamuniśaṅkaram || 33 ||
[Analyze grammar]

nibiḍadalanibaddhabhittibhāgaiḥ kusumalatānavamaṇḍapairupetam |
puramiva gagane kadambavṛkṣaṃ khagakulanāgarasaṅkaṭaṃ dadarśa || 34 ||
[Analyze grammar]