Chapter 29

yathābhūtārthāvabodhavyavahārayogopadeśo nāma sargaḥ |
ekonatriṃśaḥ sargaḥ |
rāmaḥ |
bhagavan sarvadharmajña vedavedāntapāraga |
āśvasta iva tiṣṭhāmi śuddhābhirbhavaduktibhiḥ || 1 ||
[Analyze grammar]

udārāṇi viraktāni peśalānyucitāni ca |
śrotuṃ tṛptiṃ na gacchāmi vacāṃsi vadatastava || 2 ||
[Analyze grammar]

jātyā rājasasāttvikyāḥ kathanāvasarāntare |
utpattirbhavatā proktā bhagavanpadmajanmanaḥ || 3 ||
[Analyze grammar]

atrāyaṃ mama sandeho mahātman hṛdi vartate |
sarvasaṃśayavicchedakārinnāśu taducyatām || 4 ||
[Analyze grammar]

kvacidabjātkvacidvyomnaḥ kvacidaṇḍātkvacijjalāt |
citrotpattiḥ kathaṃ proktā śāstre kamalajanmanaḥ || 5 ||
[Analyze grammar]

vasiṣṭhaḥ |
bahūni brahmalakṣyāṇi śaṅkarendraśatāni ca |
nārāyaṇasahasrāṇi samatītāni rāghava || 6 ||
[Analyze grammar]

adyānyeṣu vicitreṣu brahmāṇḍeṣu ca bhūriṣu |
nānācāravihārāṇi viharanti sahasraśaḥ || 7 ||
[Analyze grammar]

tulyakālamananteṣu kālāntarabhaveṣu ca |
jagatsu prodbhaviṣyanti bahūnyanyāni bhūriśaḥ || 8 ||
[Analyze grammar]

teṣāmabjodbhavādīnāṃ teṣvaṇḍeṣu divaukasām |
utpattayo mahābāho vicitrāḥ kathitā divi || 9 ||
[Analyze grammar]

kadācitsṛṣṭayaśśārvyaḥ kadācitpadmajodbhavāḥ |
kadācidapi vaiṣṇavyaḥ kadācinmuninirmitāḥ || 10 ||
[Analyze grammar]

kadācidabjajo brahmā kadācitsalilodbhavaḥ |
aṇḍodbhavaḥ kadācicca kadācijjāyate'mbarāt || 11 ||
[Analyze grammar]

kasmiṃścidaṇḍe tryakṣo'rkaḥ kasmiṃścidapi vāsavaḥ |
kasmiṃścitpuṇḍarīkākṣaḥ kasmiṃścittryakṣa eva hi || 12 ||
[Analyze grammar]

kasyāñcidbhūrabhūtsṛṣṭau nīrandhratarusaṅkaṭā |
kasyāñcinnaranīrandhrā kasyāñcidbhūdharāvṛtā || 13 ||
[Analyze grammar]

bhūrabhūnmṛṇmayī kācitkācidāsīddṛṣanmayī |
āsīddhemamayī kācitkācinmāṃsamayī tathā || 14 ||
[Analyze grammar]

ihaiva kānicittāni jagantyanyānyathānyathā |
anyo'nyaikaikalokāni nirvedhāṃsyapi kānicit || 15 ||
[Analyze grammar]

anantāni jagantyasminbrahmatattvamahāmbare |
ambhodhivīcivrajavannimajjantyudbhavanti ca || 16 ||
[Analyze grammar]

yathā taraṅgā jaladhau mṛgatṛṣṇā marau yathā |
kusumāni yathā cūte tathā viśvaśriyaḥ pare || 17 ||
[Analyze grammar]

bhānorgaṇayituṃ śakyā raśmiṣu trasareṇavaḥ |
ālolavapuṣo brahmatattve na jagatāṃ gaṇāḥ || 18 ||
[Analyze grammar]

yathā maṣakajālāni varṣāsvikṣuvanāliṣu |
utpatyotpatya naśyanti tathemā lokasṛṣṭayaḥ || 19 ||
[Analyze grammar]

na ca vijñāyate kasmātkālātprabhṛti cāgatāḥ |
nityāgamāpāyaparā etāḥ sargaparamparāḥ || 20 ||
[Analyze grammar]

anādimatyo'virataṃ prasphuranti taraṅgavat |
pūrvātpūrvaṃ kilābhūvaṃstataḥ pūrvataraṃ tathā || 21 ||
[Analyze grammar]

bhūtvā bhūtvā pralīyante surāsuranarādikāḥ |
sarittaraṅgabhaṅgyaitāḥ samastā bhūtajātayaḥ || 22 ||
[Analyze grammar]

yathedamaṇḍaṃ vairiñcaṃ tathā brahmāṇḍapaṅktayaḥ |
sahasraśaḥ parikṣīṇā nālikā vatsareṣviva || 23 ||
[Analyze grammar]

anyāḥ samprati vidyante vartamānaśarīrakāḥ |
pāre brahmapurasyāsya vitate brahmaṇaḥ pade || 24 ||
[Analyze grammar]

brahmaṇyanyā bhaviṣyanti bahvyo brahmapuraśriyaḥ |
purastācca vinaṅkṣyanti bhūtvā bhūtvā yathā giraḥ || 25 ||
[Analyze grammar]

brahmaṇyanyā bhaviṣyantyaḥ sthitāḥ sargaparamparāḥ |
ghaṭā iva mṛdo rāśāvaṅkure pallavā iva || 26 ||
[Analyze grammar]

yāvatsamudraṃ jaladhau yathā jalarayormayaḥ |
yāvadbrahma cidākāśe tathā tribhuvanaśriyaḥ || 27 ||
[Analyze grammar]

sphārākāravikārāḍhyāḥ prekṣyamāṇā na kiñcana |
unmajjantyo nimajjantyo na satyā nāpyasacchriyaḥ || 28 ||
[Analyze grammar]

jaḍā rasānvitāstanvyastāśśevālalatā iva |
taraṅgasamadharmiṇyo dṛṣṭanaṣṭaśarīrikāḥ || 29 ||
[Analyze grammar]

sarvāsāṃ sṛṣṭikoṭīnāṃ citrācāraviceṣṭitāḥ |
citrākāravikārāśca citrarūpāśca sṛṣṭayaḥ || 30 ||
[Analyze grammar]

vyatiriktā na sarveśātsamagrāḥ sṛṣṭidṛṣṭayaḥ |
tattvajñaviṣayā rāma salilādiva vṛṣṭayaḥ || 31 ||
[Analyze grammar]

āyānti sṛṣṭayo devājjaladādiva vṛṣṭayaḥ |
tasmādevākhilā jātā ālokādiva dṛṣṭayaḥ || 32 ||
[Analyze grammar]

vyatiriktā na sarveśātsamastāḥ sṛṣṭidṛṣṭayaḥ |
vyatiriktā ivābhānti svāṣṭhīlāśśalmaleriva || 33 ||
[Analyze grammar]

iha sṛṣṭiṣu puṣṭāsu nikṛṣṭāsu ca rāghava |
paramānnabhaso jātatanmātramalamālitam || 34 ||
[Analyze grammar]

kadācitprathamaṃ vyoma pratiṣṭhāmupagacchati |
tataḥ prajāyate brahmā vyomajo'sau prajāpatiḥ || 35 ||
[Analyze grammar]

kadācitprathamaṃ vāyuḥ pratiṣṭhāmupagacchati |
tataḥ prajāyate brahmā vāyujo'sau prajāpatiḥ || 36 ||
[Analyze grammar]

kadācitprathamaṃ vāri sphāratāmadhigacchati |
tataḥ prajāyate brahmā jalajo'sau prajāpatiḥ || 37 ||
[Analyze grammar]

kadācitprathamaṃ pṛthvī sphāratāmadhigacchati |
tataḥ prajāyate brahmā pārthivo'sau prajāpatiḥ || 38 ||
[Analyze grammar]

iti catvāri sampīḍya pañcamaṃ vardhate yadā |
tadā tajjatayaiveśaḥ kurute jāgatīṃ kriyām || 39 ||
[Analyze grammar]

kadācidapsu vāyau vā susphāre vāpi tejasi |
svayaṃ sampadyate kaścitpumānprakṛtibhāvataḥ || 40 ||
[Analyze grammar]

tasyātha puṃso vadanātkadācijjāyate padāt |
kadācidaṃsātpṛṣṭhādvā kadācil locanātkarāt || 41 ||
[Analyze grammar]

kadācitpuruṣasyāsya nābheḥ padmaḥ prajāyate |
tasmin sañcarate brahmā padmajo'sau prakīrtitaḥ || 42 ||
[Analyze grammar]

māyeyaṃ svapnavadbhrāntirmithyāracitacakrikā |
manorājyarucirlolā salilāvṛttisundarī || 43 ||
[Analyze grammar]

kimivāsyāṃ vada jñaptau kathaṃ sambhavatīha no |
na cedbālamanorājyamidaṃ paryanuyujyate || 44 ||
[Analyze grammar]

kadācidambare śuddhe manastattvānurañjanāt |
sauvarṇaṃ brahmagarbhaṃ ca svayamaṇḍaṃ pravartate || 45 ||
[Analyze grammar]

kadācideṣa puruṣo vīryaṃ sṛjati vāriṇi |
tasmātprajāyate padmaṃ brahmāṇḍamatha vā mahat || 46 ||
[Analyze grammar]

tasmātprajāyate brahmā kadācidbhāskaro hyasau |
kadācidvaruṇo brahmā kadācidvāyurabjajaḥ || 47 ||
[Analyze grammar]

evamantarvihīnāsu vicitrāsviha sṛṣṭiṣu |
vicitrotpattayo rāma brahmaṇo vividhā gatāḥ || 48 ||
[Analyze grammar]

nidarśanārthaṃ sṛṣṭestu mayaikasya prajāpateḥ |
bhavate kathitotpattirasyevānyasya vānagha || 49 ||
[Analyze grammar]

manovijṛmbhaṇamayaṃ saṃsāra iti sanmate |
sambodhanāya bhavataḥ sṛṣṭikrama udāhṛtaḥ || 50 ||
[Analyze grammar]

tāḥ sāttvikīprabhṛtayo jātayastvitthamāgatāḥ |
iti te kathanāyaiṣa sṛṣṭikrama udāhṛtaḥ || 51 ||
[Analyze grammar]

punaḥ sṛṣṭiḥ punarnāśaḥ punarduḥkhaṃ punaḥ sukham |
punarajñāḥ punastajjñā bandhamokṣadṛśau punaḥ || 52 ||
[Analyze grammar]

punaḥ punaḥ sṛṣṭikarāḥ pītasnehadaśābhṛtaḥ |
dīpā iva kṛtālokāḥ praśāmyantyudbhavanti ca || 53 ||
[Analyze grammar]

dehotpattau vināśe ca dīpānāṃ brahmaṇāmapi |
kālenādhikatāṃ tyaktvā nāśe bhedo na kaścana || 54 ||
[Analyze grammar]

punaḥ kṛtaṃ punastretā punaśca dvāparaḥ kaliḥ |
punarāvartate sarvaṃ cakrāvartehayā jagat || 55 ||
[Analyze grammar]

punarmanvantarārambhāḥ punaḥ kalpaparamparāḥ |
punaḥ punaḥ kāryadaśāḥ prātaḥ prātaraharyathā || 56 ||
[Analyze grammar]

lokālokakalākālakalanākalitāntaram |
punaḥ punaridaṃ sarvaṃ na kiñcana punaḥ punaḥ || 57 ||
[Analyze grammar]

anāhate pratapte'yaḥpiṇḍe'nalakaṇā iva |
ime bhāvāḥ sthitā nityaṃ cidākāśe svabhāvataḥ || 58 ||
[Analyze grammar]

kadācidanabhivyaktaṃ kadācidvyaktimāgatam |
idamasti pare tattve sarvaṃ vṛkṣa ivārtavam || 59 ||
[Analyze grammar]

citspanda eva sarvātmā sarvadaivedṛśākṛtiḥ |
yadasmājjāyate sargo dvīndutvamiva locanāt || 60 ||
[Analyze grammar]

citaḥ sarvāḥ samāyānti santatāḥ sṛṣṭidṛṣṭayaḥ |
tatsthā evāpyatatsthābhāścandrādiva marīcayaḥ || 61 ||
[Analyze grammar]

na kadācana saṃsāraḥ kilāyaṃ nāma sarvadā |
sarvaśaktāvasaṃsāraśaktitā vidyate yataḥ || 62 ||
[Analyze grammar]

na caivedaṃ kadācittu sādho jagadanīdṛśam |
sarvaśaktau hi saṃsāraśaktitā vidyate yataḥ || 63 ||
[Analyze grammar]

mahākalpāvadhiṃ kālamasaṃsāritayeddhayā |
na bhaviṣyati saṃsāra idānīmiti yujyate || 64 ||
[Analyze grammar]

jñadṛṣṭyā sarvamevedaṃ brahmaiveti mahāmate |
nāsti saṃsāra ityetadupapadyata eva naḥ || 65 ||
[Analyze grammar]

ajñadṛṣṭyā tvavicchinnasaṃsāritvādanāratam |
nityā saṃsāramāyeyamityasyaivopapadyate || 66 ||
[Analyze grammar]

punaḥ punaśca bhāvitvānna kadācidanīdṛśam |
jagadityetadapyuktaṃ na mṛṣā raghunandana || 67 ||
[Analyze grammar]

anārataṃ patadbhūtā diśo dṛṣṭvā vinaśvarīḥ |
vināśīdaṃ jagatsarvamiti kiṃ nopapadyate || 68 ||
[Analyze grammar]

sarvadoditacandrārkā diśo dṛṣṭvā sthirācalāḥ |
avināśi jagatsarvamityapyavitathopamam || 69 ||
[Analyze grammar]

na tadasti na yattasminnekasminvitatātmani |
saṅkalpakalanājālamanākhye nopapadyate || 70 ||
[Analyze grammar]

punaḥ punaridaṃ sarvaṃ punarmaraṇajanmanī |
punaḥ sukhaṃ punarduḥkhaṃ punaḥ karaṇakarmaṇī || 71 ||
[Analyze grammar]

punarāśāḥ punarvyoma punaḥ sāmbudhayo'drayaḥ |
abhyudeti punaḥ sṛṣṭiśśaśvadarkaprabhā yathā || 72 ||
[Analyze grammar]

punardaityāḥ punardevāḥ punarlokāntarakramaḥ |
punaḥ svargāpavargehā punarindraḥ punaśśaśī || 73 ||
[Analyze grammar]

punarnārāyaṇo devaḥ punarmanusutādayaḥ |
punarāśāścalaccārucandrārkavaruṇānilāḥ || 74 ||
[Analyze grammar]

sumerukarṇikā kāntaṛkṣakesaraśālinī |
phullasphītodarodeti rodasīnalinī punaḥ || 75 ||
[Analyze grammar]

vyomakānanamākramya valgatyaṃśunakhotkaraiḥ |
tamaḥkarighaṭā bhettuṃ punarbhāskarakesarī || 76 ||
[Analyze grammar]

punarinduścalaccūtamañjarīsundaraiḥ karaiḥ |
karotyamṛtamāhlādaṃ digvadhūmukhamaṇḍanam || 77 ||
[Analyze grammar]

punaḥ svargataroḥ puṇyakṣayavātasamīritāḥ |
patantīha vinunnāṅgāḥ puṇyakṛtphalapālayaḥ || 78 ||
[Analyze grammar]

punaḥ kāryakriyāpakṣaiḥ saṃsārārambhanāmakam |
kiñcitpaṭapaṭaṃ kṛtvā yāti kālakapiñjalaḥ || 79 ||
[Analyze grammar]

punarindrālike yāte rājyamāsvādya kesaram |
āyātyaparadevendraṣaṭpadaḥ svargapaṅkajam || 80 ||
[Analyze grammar]

punaḥ kālaṃ kṛtāpūtaṃ kaluṣīkurute kaliḥ |
sacakriṇamivāmbhodhiṃ pravṛddho'vakarānilaḥ || 81 ||
[Analyze grammar]

punaḥ kālakulālena kṛtabhūtaśarāvakam |
cakramāvartate vegādajasraṃ kālanāmakam || 82 ||
[Analyze grammar]

punarnīrasatāmeti jagaddhvastaśubhasthiti |
abhyāśībhūtakalpāntaṃ saṃśuṣkamiva kānanam || 83 ||
[Analyze grammar]

punararkagaṇāṃśvagnidagdhānantakalevaram |
sarvabhūtāsthisampūrṇaṃ jagadeti śmaśānatām || 84 ||
[Analyze grammar]

punaḥ kulācalākārapuṣkarāvartavarṣaṇaiḥ |
nṛtyadbhasmabṛhatphenāṃ yātyekārṇavatāṃ jagat || 85 ||
[Analyze grammar]

punaḥ saṃśāntavāyvambu riktaṃ sakalavastubhiḥ |
tadapūrvamivākāśaṃ jagadāyāti śūnyatām || 86 ||
[Analyze grammar]

punaḥ katipayā bhuktvā samāḥ samarasāśayaḥ |
jīvitaṃ jīrṇayā tanvā brahmādhyātmani līyate || 87 ||
[Analyze grammar]

punaranyena kālena tathaiva jagatāṃ gaṇam |
manastanoti vai śūnye gandharvo nagaraṃ yathā || 88 ||
[Analyze grammar]

punaḥ sargasamārambhaḥ punaḥ pralayasambhavaḥ |
sarvaṃ punaridaṃ rāma cakravatparivartate || 89 ||
[Analyze grammar]

kimetasminmahāmāyāḍambare dīrghaśambare |
rāma satyamasatyaṃ vā nirṇīya yadihocyate || 90 ||
[Analyze grammar]

dāśūrākhyāyikeveyaṃ rāma saṃsāracakrikā |
kalpanāracitākārā vastuśūnyā tu vastutaḥ || 91 ||
[Analyze grammar]

aviralamidamātataṃ vikalpairasaduditākṛtibhirdvicandrakalpaiḥ |
viracitamasatā tu yanna sattajjagadiha tena vimūḍhatā kimutthā || 92 ||
[Analyze grammar]