Chapter 25

jīvāvataraṇaṃ nāma sargaḥ |
pañcaviṃśaḥ sargaḥ |
vasiṣṭhaḥ |
evaṃ jīvāścito bhāvādbhavabhāvanayā hatāḥ |
brahmaṇo'kalitākārāl lakṣaśo'pi ca koṭiśaḥ || 1 ||
[Analyze grammar]

saṅkhyātītāḥ purā jātā jāyante'dyāpi cābhitaḥ |
utpatiṣyanti caivānye kaṇaughā iva nirjharāt || 2 ||
[Analyze grammar]

svavāsanāvaśāveśādāśāvivaśatāṃ gatāḥ |
daśāsvativicitrāsu svayaṃ nigaḍitāśayāḥ || 3 ||
[Analyze grammar]

anārataṃ pratidiśaṃ pratideśaṃ jale sthale |
jāyante ca mriyante ca budbudā iva vāriṇi || 4 ||
[Analyze grammar]

kecitprathamajanmānaḥ kecijjanmavaśātigāḥ |
keciccāsaṅkhyajanmānaḥ kecijjanmaśatāntarāḥ || 5 ||
[Analyze grammar]

bhaviṣyajjātayaḥ kecitkecidbhūtamahābhavāḥ |
vartamānabhavāḥ kecitkeciccābhavatāṃ gatāḥ || 6 ||
[Analyze grammar]

kecitkalpasahasrāṇi jāyamānāḥ punaḥ punaḥ |
ekāmevāśritā yoniṃ kecid yonyantaraṃ śritāḥ || 7 ||
[Analyze grammar]

kecinmahāduḥkhahatāḥ kecidalpavayassthitāḥ |
kecidatyantamuditāḥ kecidarkā ivoditāḥ || 8 ||
[Analyze grammar]

kecitkinnaragandharvavidyādharamahoragāḥ |
kecidarkendravaruṇatryakṣādho'kṣajapadmajāḥ || 9 ||
[Analyze grammar]

kecitkumbhāṇḍavetālayakṣarakṣaḥpiśācakāḥ |
kecidbrāhmaṇabhūpālavaiśyaśūdragaṇāḥ smṛtāḥ || 10 ||
[Analyze grammar]

kecicchvapacacaṇḍālakirātakhaśapukkasāḥ |
kecittṛṇauṣadhīpattraphalamūlapadaṃ gatāḥ || 11 ||
[Analyze grammar]

kecidvanalatāgulmatṛṇopaladaśoṣitāḥ |
kecitkadambajambīrasālatālatamālakāḥ || 12 ||
[Analyze grammar]

kecidvibhavasambhāramattasāmantabhūmipāḥ |
keciccīrāmbaracchannā munimaunamupāśritāḥ || 13 ||
[Analyze grammar]

kecidbhujagagonāsakrimikīṭapipīlakāḥ |
kecinmṛgendramahiṣamṛgarkṣacamaraiṇakāḥ || 14 ||
[Analyze grammar]

kecitsārasacakrāhvabalākābakakokilāḥ |
kecitkamalakalhārakumudotpalatāṃ gatāḥ || 15 ||
[Analyze grammar]

kecitkarabhamātaṅgapataṅgavṛṣagardabhāḥ |
keciddvirephamaṣakaputtikādaṃśavaṃśajāḥ || 16 ||
[Analyze grammar]

kecidāpadbalākrāntāḥ kecitsampadamāgatāḥ |
kecitsthitāḥ svargapure kecinnarakamāsthitāḥ || 17 ||
[Analyze grammar]

ṛkṣacakragatāḥ kecidvṛkṣarandhragatāḥ pare |
vātarūpe sthitāḥ kecitkecidvyomapade sthitāḥ || 18 ||
[Analyze grammar]

sūryāṃśuṣu sthitāḥ kecitkecidindvaṃśuṣu sthitāḥ |
kecittṛṇalatāgulmarasasvāduṣvavasthitāḥ || 19 ||
[Analyze grammar]

jīvanmuktā bhramantīha kecitkalyāṇabhājanam |
ciramuktāḥ sthitāḥ kecinnūnaṃ pariṇatāḥ pare || 20 ||
[Analyze grammar]

keciccireṇa kālena bhaviṣyanmuktayaśśaṭhāḥ |
keciddviṣanti durbhāvāḥ kevalībhāvamātmanaḥ || 21 ||
[Analyze grammar]

kecijjātā jagatyasmin kecidanyatra saṃsthitāḥ |
kecinneha na cānyatra pare eva pade sthitāḥ || 22 ||
[Analyze grammar]

kecinmahendramalayasahyamandarameravaḥ |
kecitkṣāradadhikṣīraghṛtekṣujalarāśayaḥ || 23 ||
[Analyze grammar]

kecidviśālāḥ kakubhaḥ kecinnadyo mahārayāḥ |
kecitstriyaḥ kāntadṛśaḥ kecicchaṇḍhanapuṃsakāḥ || 24 ||
[Analyze grammar]

kecitprabuddhamatayaḥ kecijjaḍatarāśayāḥ |
kecijjñānopadeṣṭāraḥ kecidāttasamādhayaḥ || 25 ||
[Analyze grammar]

jīvāḥ svavāsanāveśavivaśāśayatāṃ gatāḥ |
etāsvetāsvavasthāsu saṃsthitā baddhabhāvanāḥ || 26 ||
[Analyze grammar]

viharanti jagatkośe nipatantyutpatanti ca |
kandukā iva hastena mṛtyunāvirataṃ hatāḥ || 27 ||
[Analyze grammar]

āśāpāśaśatābaddhā vāsanābhāradhāriṇaḥ |
kāyātkāyamupāyānti vṛkṣādvṛkṣamivāṇḍajāḥ || 28 ||
[Analyze grammar]

anantānantasaṅkalpakalpanotpātamāyayā |
indrajālaṃ vitanvānā jaganmayamidaṃ mahat || 29 ||
[Analyze grammar]

tāvadbhramanti saṃsāre vārīvāvartarāśayaḥ |
yāvanmūḍhā na paśyanti svamātmānamaninditam || 30 ||
[Analyze grammar]

dṛṣṭvātmānamasattyaktvā satyāmāsādya saṃvidam |
kālena padamāgatya jāyante neha te punaḥ || 31 ||
[Analyze grammar]

bhuktvā janmasahasrāṇi jñānena tapasātha vā |
parameṣṭhipadaṃ prāpya kecid yānti paraṃ padam || 32 ||
[Analyze grammar]

kecicchakratvamapyuccaiḥ prāpya tucchatayā dhiyaḥ |
punastiryaktvamāyānti tiryaktvānnaratāmapi || 33 ||
[Analyze grammar]

kecinmahādhiyaḥ santa utpadya brahmaṇaḥ padāt |
tadaiva janmanaikena tatraiva praviśantyalam || 34 ||
[Analyze grammar]

brahmāṇḍeṣvitareṣvanye tenaite jīvarāśayaḥ |
prayānti padmodbhavatāmanye ca haratāmapi || 35 ||
[Analyze grammar]

anye prayānti tiryaktvamanye ca suratāmapi |
anye'pi nāgatāṃ rāma yathaiveha tathaiva hi || 36 ||
[Analyze grammar]

yathedaṃ hi jagatsphāraṃ tathānyāni jaganti hi |
vidyante samatītāni bhaviṣyanti ca bhūriśaḥ || 37 ||
[Analyze grammar]

anyenānyena citreṇa krameṇānyena hetunā |
vicitrāḥ sṛṣṭayasteṣāmāpatanti patanti ca || 38 ||
[Analyze grammar]

kāścidgandharvatāṃ yānti kāścidgacchanti yakṣatām |
kāścitprayānti suratāṃ kāścidāyānti daityatām || 39 ||
[Analyze grammar]

yenaiva vyavahāreṇa brahmāṇḍe'smiñjanāḥ sthitāḥ |
tenaivānyeṣu tiṣṭhanti sanniveśāvilakṣaṇāḥ || 40 ||
[Analyze grammar]

svasvabhāvavaśāveśādanyo'nyaparighaṭṭanaiḥ |
sṛṣṭayaḥ parivartante taraṅgiṇyā ivormayaḥ || 41 ||
[Analyze grammar]

āvirbhāvatirobhāvairunmajjananimajjanaiḥ |
sṛṣṭayaḥ parivartante taraṅgiṇyā ivormayaḥ || 42 ||
[Analyze grammar]

niryāntyavirataṃ tasmātparasmājjīvarāśayaḥ |
anirdeśyātsvasaṃvedyāttatraivāśu sphuranti ca || 43 ||
[Analyze grammar]

dīpādivālokadṛśaḥ sūryādiva marīcayaḥ |
kaṇāstaptāyasa iva sphuliṅgā iva pāvakāt || 44 ||
[Analyze grammar]

kālādivartavaścitrā āmodāḥ kusumādiva |
śīkarā iva pātāmbupūrādabdherivormayaḥ || 45 ||
[Analyze grammar]

utpatyotpatya kālena tyaktvā dehaparamparāḥ |
svaka eva pade yānti vilayaṃ jīvarāśayaḥ || 46 ||
[Analyze grammar]

aviralamiyamātatā sthitoccairbhavati vinaśyati vardhate mudhaiva |
tribhuvanaracanāvimohamāyā paramapade laharīva vārirāśau || 47 ||
[Analyze grammar]