Chapter 24

avidyākathanaṃ nāma sargaḥ |
caturviṃśaḥ sargaḥ |
vasiṣṭhaḥ |
kupitasyāsato'pyasya prekṣāmātravināśinaḥ |
avidyāvitatavyādherauṣadhaṃ śṛṇu rāghava || 1 ||
[Analyze grammar]

yāṃ tāṃ kathayituṃ jātiṃ rāma rājasasāttvikīm |
manovīryavicārārthaṃ prastuto'smīti tāṃ śṛṇu || 2 ||
[Analyze grammar]

yattadastyamṛtaṃ brahma sarvavyāpi nirāmayam |
cidābhāsamanantākhyamanādi vigatabhramam || 3 ||
[Analyze grammar]

citspandavapuṣastasya spandaḥ kasmāccideva hi |
pradeśādghanatāmeti somyābdheścalanādiva || 4 ||
[Analyze grammar]

antarabdherjalaṃ yadvatspandātstambhavadīhate |
sarvaśakti tathaikatra gacchati spandaśaktitām || 5 ||
[Analyze grammar]

ātmanyevātmanā vyomni yathā sarati mārutaḥ |
tathehātmātmaśaktyaiva svātmanyevaiti lolatām || 6 ||
[Analyze grammar]

svaśikhāspandaśaktyaiva dīpaḥ somyo yathoccatām |
eti tadvadasāvātmā tatsve vapuṣi valgati || 7 ||
[Analyze grammar]

jalāntare'mbudheryadval lasadvāri kvaciccalam |
sarvaśaktivapuṣyeva tathā spando vilāsavān || 8 ||
[Analyze grammar]

yathollasati bhācakrairdravatkāñcanasāgaraḥ |
tathātmani parispandaiḥ sphuratyacchaiścidarṇavaḥ || 9 ||
[Analyze grammar]

lakṣyate mauktikaspando yathā vyomni dṛśā dṛśaḥ |
tathodeti lasadrūpā svaśaktirbrahmaṇaścitaḥ || 10 ||
[Analyze grammar]

kiñcitkṣubhitarūpā sā cicchaktiścinmahārṇave |
tanmayyeva sphuratyacchā tatraivormirivārṇave || 11 ||
[Analyze grammar]

ātmano'vyatiriktaiva vyatirikteva tiṣṭhati |
ālokaśrīrivālokakoṭare ghanatāṃ gatā || 12 ||
[Analyze grammar]

kṣaṇaṃ sphurantī sā devī sarvaśaktitayā tayā |
cinoti svāṃ svayaṃ śaktiṃ kalendośśītatāmiva || 13 ||
[Analyze grammar]

uditaiṣā prakāśākhyā cicchaktiḥ paramātmanaḥ |
deśakālakriyāśaktīrvayasyāḥ samprakarṣati || 14 ||
[Analyze grammar]

aviditvā svabhāvaṃ svaṃ vyāpyānantapadaṃ sthitā |
rūpaṃ parimitevāsau bhāvayatyavibhāvitā || 15 ||
[Analyze grammar]

yadaiva bhāvitaṃ rūpaṃ tayā paramakāntayā |
tadaivaināmanugatā nāmasaṅkhyādikā dṛśaḥ || 16 ||
[Analyze grammar]

cidathaitadavasthaiva vyatiriktā sthitātmanaḥ |
anantā tadgataivāśu laharīva mahārṇavāt || 17 ||
[Analyze grammar]

yathā kaṭakakeyūrairbhedo hemno vilakṣaṇaḥ |
tathātmanaścitā rūpaṃ bhāvayantyā svamāṃśikam || 18 ||
[Analyze grammar]

yathā dīpena dīpānāṃ jātānāmātmanā tathā |
deśakālakalāmātrabhedaḥ svo bhāvitaścitā || 19 ||
[Analyze grammar]

deśakālaparispandaśaktisandīpitātha cit |
saṅkalpamanudhāvantī prayāti kalanāpadam || 20 ||
[Analyze grammar]

vikalpakalpitākāraṃ deśakālakriyāspadam |
cito rūpaṃ mahābāho kṣetrajña iti kathyate || 21 ||
[Analyze grammar]

kṣetraṃ śarīramityāhustadasau vettyakhaṇḍitam |
sabāhyābhyantaraṃ tena kṣetrajña iti kathyate || 22 ||
[Analyze grammar]

vāsanāḥ kalpayan so'pi yātyahaṅkāratāṃ punaḥ |
ahaṅkāro vinirṇītā kālikī buddhirucyate || 23 ||
[Analyze grammar]

buddhiḥ saṅkalpakalitā prayātā mananāspadam |
mano ghanavikalpaṃ tu gacchatīndriyatāṃ śanaiḥ || 24 ||
[Analyze grammar]

pāṇipādamayaṃ dehamindriyāṇi vidurbudhāḥ |
deho'sau jāyate loke mriyate'pi ca jīvati || 25 ||
[Analyze grammar]

evaṃ jīvo hi saṅkalpo vāsanārajjuveṣṭitaḥ |
duḥkhajālaparītātmā kramādāyāti cittatām || 26 ||
[Analyze grammar]

krameṇa pākavaśataḥ phalameti yathānyatām |
avasthayaiva nākṛtyā jīvo malavaśāttathā || 27 ||
[Analyze grammar]

jīvo'haṅkāratāṃ prāptastvahaṅkāraśca buddhitām |
saṅkalpajālavalitā manastāṃ buddhirāgatā || 28 ||
[Analyze grammar]

mano hi saṅkalpamayaṃ saṃsthāgrahaṇatatparam |
pratiyogivyavacchinnaṃ prāptamanyairapīhitaiḥ || 29 ||
[Analyze grammar]

icchādyāśśaktayo mattāṃ gāvo vṛṣamivonmadam |
anudhāvanti doṣāya saritaḥ sāgaraṃ yathā || 30 ||
[Analyze grammar]

itiśaktimayaṃ ceto ghanāhaṅkāratāṃ gatam |
kośakārakrimikavadicchayā yāti bandhanam || 31 ||
[Analyze grammar]

svasaṅkalpānusandhānātpāśairāvalayadvapuḥ |
kaṣṭamasmi svayaṃ baddhamityārtyā paritapyate || 32 ||
[Analyze grammar]

baddhamasmīti kalayadvidyātattvaṃ jahacchanaiḥ |
avidyāṃ janayatyantarjagajjaṅgalarākṣasīm || 33 ||
[Analyze grammar]

svasaṅkalpitatanmātrajālābhyantaravarti ca |
parāṃ vivaśatāmeti śṛṅkhalābaddhasiṃhavat || 34 ||
[Analyze grammar]

vicitrakāryakartṛtvamāharadvāsanāvaśāt |
svecchāmātrānuracitā daśāścānupatannavāḥ || 35 ||
[Analyze grammar]

kvacinmanaḥ kvacidbuddhiḥ kvacijjñānaṃ kvacitkriyā |
kvacidetadahaṅkāraḥ kvacitpuryaṣṭakaṃ smṛtam || 36 ||
[Analyze grammar]

kvacitprakṛtirityuktaṃ kvacinmāyeti kalpitam |
kvacinmana iti proktaṃ kvacitkarmeti saṃsthitam || 37 ||
[Analyze grammar]

kvacidbandha iti khyātaṃ kvaciccittamiti sphuṭam |
proktaṃ kvacidavidyeti kvacidiccheti saṅgatam || 38 ||
[Analyze grammar]

tadetadābaddhamiha cittaṃ rāghava duḥkhitam |
tṛṣṇāśokasamāviṣṭaṃ rogāyatanamāturam || 39 ||
[Analyze grammar]

jarāmaraṇamohārtaṃ bhavabhāvanayā hatam |
īhitānīhitairgrastamavidyārāgarañjitam || 40 ||
[Analyze grammar]

icchāsaṅkucitākāraṃ karmavṛkṣanavāṅkuram |
suvismṛtotpattipadaṃ kalpitānarthakalpanam || 41 ||
[Analyze grammar]

kośakāravadābaddhaṃ kośakārapadaṃ gatam |
tanmātravṛndāvayavamanantanarakātapam || 42 ||
[Analyze grammar]

adṛśyamapi śailendrasamabhārabharāvaham |
jarāmaraṇaśākhāḍhyaṃ saṃsāraviṣadurdrumam || 43 ||
[Analyze grammar]

imaṃ saṃsāramakhilamāśāpāśavidhāyakam |
dadhadantaḥ phalairhīnaṃ vaṭadhānā vaṭaṃ yathā || 44 ||
[Analyze grammar]

cintānalaśikhādagdhaṃ kopājagaracarvitam |
kāmābdhikallolahataṃ vismṛtātmapitāmaham || 45 ||
[Analyze grammar]

mṛgaṃ yūthādiva bhraṣṭaṃ śokopahatacetanam |
pataṅgakamivojjvāle dagdhaṃ viṣayapāvake || 46 ||
[Analyze grammar]

chinnamūlamivāmbhojaṃ paramāṃ mlānimāgatam |
chinnāśamātmanaḥ sthānādvideśāsaṅgadussthitam || 47 ||
[Analyze grammar]

viṣayāhiṣu madhyasthaṃ mitrarūpeṣu śatruṣu |
daśākhadāsvanantāsu luṭhitaṃ saṅkaṭāsvati || 48 ||
[Analyze grammar]

duḥkhe nipatitaṃ ghore vihagaṃ vāgure yathā |
ābaddhāsthaṃ jagajjāle śūnye gandharvapattane || 49 ||
[Analyze grammar]

uhyamānamanarthābdhau mano viṣayavidrutam |
uddharāmarasaṅkāśa mātaṅgamiva kardamāt || 50 ||
[Analyze grammar]

balīvardavadāmagnaṃ mano mananapalvale |
ālūnaśīrṇāvayavaṃ balād rāma samuddhara || 51 ||
[Analyze grammar]

śubhāśubhaprasaraparāhatākṛtau jvalajjarāmaraṇaviṣādamūrchite |
dayeha na svamanasi yasya jāyate narākṛtiḥ sa jagati rāma rākṣasaḥ || 52 ||
[Analyze grammar]