Chapter 23

brahmaivedaṃ sarvaṃ jagaditi pratipādanopadeśo nāma sargaḥ |
trayoviṃśaḥ sargaḥ |
rāmaḥ |
kṣīrodakukṣitulyābhiśśītalāmaladīptibhiḥ |
tavoktibhirvicitrābhirgambhīrābhirihābhitaḥ || 1 ||
[Analyze grammar]

kṣaṇamāndhyamivāpnomi kṣaṇaṃ yāmi prakāśatām |
śāntātapabalaḥ prāvṛḍlolābhra iva vāsaraḥ || 2 ||
[Analyze grammar]

anantasyāprameyasya sarvasyaikasya bhāsvataḥ |
anastamitasārasya kalanā kathamāgatā || 3 ||
[Analyze grammar]

vasiṣṭhaḥ |
yathābhūtārthavākyārthāḥ sarvā eva mamoktayaḥ |
nāsamarthavirūpārthāḥ pūrvāparavirodhadāḥ || 4 ||
[Analyze grammar]

jñānadṛṣṭau prasannāyāṃ prabodhe pratatodaye |
yathāvajjñāsyasi svastho madvāgdṛṣṭimimāmalam || 5 ||
[Analyze grammar]

upadeśyopadeśārthaṃ śāstrārthapratipattaye |
śabdārthavākyaracanā bhramāyeyaṃ kṣaṇaṃ tava || 6 ||
[Analyze grammar]

yadādhunā jñāsyasi tatsatyamatyantanirmalam |
vācyavācakaśabdārthabhedaṃ jñāsyasi vai tadā || 7 ||
[Analyze grammar]

bhedakṛdvākprapañco'yamupadeśyeṣu kalpitaḥ |
sa cājñeṣveva na jñeṣu vidyate pāramārthikaḥ || 8 ||
[Analyze grammar]

kalanāmalamīhādi kiñcinnātmani vidyate |
nīrāgaṃ brahma nirdvandvaṃ tadevedaṃ jagatsthitam || 9 ||
[Analyze grammar]

etadvicitrarūpābhiruktibhirbahuśaḥ punaḥ |
vistāreṇaiva vaktavyaṃ siddhāntāvasare'nagha || 10 ||
[Analyze grammar]

vākprapañcaṃ vinā tvetadajñānamatulaṃ tamaḥ |
bhettumanyo'nyamuditaṃ yatnaṃ kartuṃ na śakyate || 11 ||
[Analyze grammar]

avidyayaivottamayā svātmanāśodyamotkayā |
vidyā samprāpyate rāma sarvadoṣātihāriṇī || 12 ||
[Analyze grammar]

śāmyati hyastramastreṇa malena kṣālyate malam |
śamaṃ viṣaṃ viṣeṇaiti ripuṇā hanyate ripuḥ || 13 ||
[Analyze grammar]

īdṛśī bhūtamāyeyaṃ yā svanāśena harṣadā |
na lakṣyate svabhāvo'syāḥ prekṣyamāṇaiva naśyati || 14 ||
[Analyze grammar]

vivekamācchādayati jaganti janayatyalam |
na ca vijñāyate kaiṣā paśyāścaryamidaṃ mahat || 15 ||
[Analyze grammar]

aprekṣyamāṇā sphurati prekṣitā tu vinaśyati |
māyeyamaparijñāyamānarūpaiva valgati || 16 ||
[Analyze grammar]

aho nu khalu citreyaṃ māyā saṃsārabandhanī |
asatyaivātisatyeva prājñānapi hinasti yā || 17 ||
[Analyze grammar]

atyabhinne pade tasmiṃstanvānā bhedamātatam |
saṃsāramāyā vijñātā yenāsau puruṣottamaḥ || 18 ||
[Analyze grammar]

nāstyeṣā paramārthenetyevambhāvanayeddhayā |
jño bhūtvā jñeyasamprāptyā jñāsyasyasyāstvamāśayam || 19 ||
[Analyze grammar]

yāvattu na prabuddhastvaṃ tāvanmadvacasaiva te |
niścayo bhavatūddāmo nāstyavidyeti niścalaḥ || 20 ||
[Analyze grammar]

yadidaṃ dṛśyatāṃ yātaṃ mānasaṃ mananaṃ mahat |
asattaditi yasyāntarniścayo mokṣabhāgasau || 21 ||
[Analyze grammar]

yadidaṃ dṛśyatāṃ prāptaṃ manomātravijṛmbhitam |
sattadbrahmeti yasyāntarniścayaḥ so'pi mokṣabhāk || 22 ||
[Analyze grammar]

calācalā tṛtīyā yā dṛṣṭirābaddhabhāvanā |
sā samagrajagadbhūtakhagabandhanavāgurā || 23 ||
[Analyze grammar]

yaḥ svapnabhramavadbhrāntamasatsadvaikaniścayaḥ |
jagatpaśyatyasaktātmā na sa duḥkhe nimajjati || 24 ||
[Analyze grammar]

yasyemāḥ svasvarūpāsu bhāvanāsvātmabhāvanāḥ |
asvarūpasvarūpasya tasyāvidyaiva vidyate || 25 ||
[Analyze grammar]

vikāritādayo doṣā na kecana mahātmani |
paramātmani vidyante payasīveha pāṃsavaḥ || 26 ||
[Analyze grammar]

bhāvanā śabdaśabdārtharañjaneyaṃ jagadgatā |
vyavahārārthamutpannā vyatiriktā na cātmanaḥ || 27 ||
[Analyze grammar]

anena vyavahāreṇa vinaitāśśāstradṛṣṭayaḥ |
saṃsthitiṃ nādhigacchanti paṭā iva vitantavaḥ || 28 ||
[Analyze grammar]

uhyamāno hyavidyādhvanyātmā nehopalabhyate |
ātmajñānādṛte tacca śāstrārthātsamavāpyate || 29 ||
[Analyze grammar]

avidyāsaritaḥ pāramātmalābhādṛte kila |
rāma nāsādyate taddhi padamakṣayamacyutam || 30 ||
[Analyze grammar]

yataḥ kutaścijjāteyamavidyā bhramadāyinī |
nūnaṃ sthitimupāyātā samācchādya padaṃ sthitā || 31 ||
[Analyze grammar]

kuto jāteyamiti te rāma māstu vicāraṇā |
imāṃ kathamahaṃ hanmītyeṣā te'stu vicāraṇā || 32 ||
[Analyze grammar]

astaṅgatāyāṃ kṣīṇāyāmasyāṃ jñāsyasi rāghava |
yata eṣā yathā caiṣā yathā naṣṭetyakhaṇḍitam || 33 ||
[Analyze grammar]

vastutaḥ khalu nāstyeṣā vibhātyevānavekṣitā |
asato bhrāntibhātasya rūpaṃ jānāti kaḥ kutaḥ || 34 ||
[Analyze grammar]

jāteyaṃ prauḍhimāpannā doṣāyaivātatākṛtiḥ |
balātpraṇāśayitvaināṃ parijñāsyasi vai tataḥ || 35 ||
[Analyze grammar]

api śūrā api prājñāste na santi jagattraye |
avidyayā ye puruṣā na nāma vivaśīkṛtāḥ || 36 ||
[Analyze grammar]

tadasyāṃ rogaśālāyāṃ yatnaṃ kuru cikitsane |
yathaiṣā janmaduḥkhena na bhūyastvāṃ niyokṣyati || 37 ||
[Analyze grammar]

sarvāpadāmekasakhīmajñānatarumañjarīm |
anarthasārthajananīmavidyāmalamuddhara || 38 ||
[Analyze grammar]

bhayaviṣādadurādhivipatpradāṃ hṛdayamohamahāpaṭalākulām |
bhṛśamapāsya kudṛṣṭimimāṃ balādbhava bhavārṇavapāramupāgataḥ || 39 ||
[Analyze grammar]