Chapter 20

upadeśakaraṇaṃ nāma sargaḥ |
viṃśaḥ sargaḥ |
vasiṣṭhaḥ |
evaṃ sthite tajjñānāṃ yadetatkartṛtvaṃ dṛśyate yāgādiṣu vadhādiṣu vā tadasat | na tu mūrkhāṇāṃ || 1 ||
[Analyze grammar]

yataḥ kartṛtvaṃ nāma kimucyate | yo hyantarāsthayā manovṛtterniścaya upādeyatāpratyayo vāsanābhidhānastatkartṛtvaśabdenocyate || 2 ||
[Analyze grammar]

ceṣṭāvaśāttādṛkphalabhoktṛtvaṃ kartṛtvāt | vāsanānurūpaṃ spandate puruṣaḥ spandānurūpaṃ phalamanubhavati | phalabhoktṛtvaṃ nāma kartṛteti siddhāntaḥ || 3 ||
[Analyze grammar]

tathā ca |
kurvato'kurvato vāpi svarge vā narake'pi vā |
yādṛgvāsanametatsyānmanastadanubhūyate || 4 ||
[Analyze grammar]

tasmādajñātatattvānāṃ puṃsāṃ kurvatāmakurvatāṃ ca kartṛtā | na tu jñātatattvānāmavāsanatvāt || 5 ||
[Analyze grammar]

jñātatattvo hi śithilībhūtavāsanaḥ kurvannapi phalaṃ nānusandadhāti | avayavaspandamātraṃ kevalaṃ karotyasaktabuddhiḥ | samprāptamapi phalamātmaivedaṃ sarvamiti nānubhavati | kena vyatiriktaṃ kimanubhūyate iti | tena tattvajñaḥ kurvannapi na kiñcidapi karoti || 6 ||
[Analyze grammar]

ajñastvavayavaspandanamakurvannapi sukhaduḥkhamohātmakaṃ sarvameva karmaphalamanubhavati | akurvannapi karoti magnamanāḥ || 7 ||
[Analyze grammar]

mano yatkaroti tatkṛtaṃ bhavati | yanna karoti tanna kṛtaṃ bhavati | ato mana eva kartṛ na dehaḥ | cittādevāyaṃ saṃsāra āgataḥ | cittamaya eva cittamātra eva sthita iti || 8 ||
[Analyze grammar]

jñaviṣayaṃ tu sarvamupaśāntam | abhūtvā naiveti | jña evehāstīti | ātmavatāṃ hi tanmanaḥ paramamupaśamamāgataṃ mṛgatṛṣṇājalamiva varṣati jalade | himakaṇa iva caṇḍātape vilīnaṃ | turyadaśāmupagataṃ sthitam || 9 ||
[Analyze grammar]

nānando na nirānando na calaṃ nācalaṃ sthiram |
na sannāsanna caiteṣāṃ madhyaṃ jñamananaṃ viduḥ || 10 ||
[Analyze grammar]

na vāsanāmaye spandarase gaja iva palvale majjati tajjñaḥ | mūrkhasya mano bhogabhūmimeva paśyati na sattattvam || 11 ||
[Analyze grammar]

tathā cāyamatrāparo dṛṣṭāntaḥ | akurvannapi śvabhrapatanaṃ puruṣaśśayyāsanagato'pi śvabhrapatanavāsanāvāsite cetasi śvabhrapatanaduḥkhamanubhavati | aparastu kurvannapi śvabhrapatanaṃ paramamupaśamamupagatavati manasi śayyāsanasukhamanubhavati | evamekaśayyāsanagatayorekaśśvabhrapatanasyākartā kartā sampannaḥ | dvitīyaśśvabhrapatanasya kartāpyakartā sampannaścittavaśāt | tasmād yaccittastanmayo bhavati puruṣa iti siddhāntaḥ || 12 ||
[Analyze grammar]

tena tava karturakarturvā nityamasaṃsaktaṃ bhavatu cetaḥ | na tadastvātmatattvavyatiriktaṃ yatra saṃsaktirbhāvyate | yatkiñcididaṃ jagadgataṃ tatsarvaṃ śuddhacittattvāvabhāsamevāvaihi || 13 ||
[Analyze grammar]

evambhāvasya jñātajñeyasya puṃso nāyamātmā sukhaduḥkhānāṃ gamya iti niścaye jāte | nātmano vyatiriktā ādhārādheyadṛṣṭayo vidyante iti niścaye jāte | nātmano vyatiriktā draṣṭṛdarśanadṛśyadṛśo dṛśyante iti niścaye jāte | nātmano vyatiriktamīhitamanīhitaṃ vāstīti niścaye jāte | nāhaṃ deha iti niścaye jāte | sarvapadārthayvatirikto vālāgrasahasrabhāgabhāgo'hamiti niścaye jāte | yatkiñcididaṃ tatsarvamahameveti niścaye jāte | sarvatattvāvabhāsakaḥ sarvagaścijjyotirevāhamiti niścaye jāte | nāhaṃ sukhaduḥkhānāṃ gamya iti niścaye jāte | vigatajvaratayā cittavṛtterlīlayaiva tiṣṭhato vyavahāreṣu jñasya saṅkaṭeṣvasaṅkaṭeṣu muditaiva kevalaṃ jyotsneva bhuvanabhāgamalaṅkaroti na cintā || 14 ||
[Analyze grammar]

tena jñaḥ kurvannapyakartā sampannaḥ | manaso'lepakatvāt | nāsau pāṇipādādivikṣepasya yatnakṛtasyāpi karmaṇaḥ phalamanubhavati || 15 ||
[Analyze grammar]

etanmanaḥ sarvakarmaṇāṃ sarvehitānāṃ sarvabhāvānāṃ sarvalokānāṃ sarvagatīnāṃ bījaṃ | tasminparihṛte sarvakarmāṇi parihṛtāni bhavanti | sarvaduḥkhāni kṣīyante | sarvānandāḥ samupayānti || 16 ||
[Analyze grammar]

mānasenāpi karmaṇā yatnakṛtenāpi jño nākramyate na vivaśīkriyate na rañjanāmupaityavyatiriktatvāt || 17 ||
[Analyze grammar]

yathā bālo manasā nagarasya nirmāṇaṃ nirmathanaṃ ca kurvannagare nirmāṇaṃ manaskṛtamakṛtameva līlayānubhavati nopādeyatayā | sukhamakṛtrimamidamiti paśyati | nagaranirmathanaṃ ca manaskṛtamakṛtamiva paśyanduḥkhamapi līlayānubhavannapi na duḥkhamiti paśyati | evamasau paramārthajñaḥ kurvannapi na lipyate eveti || 18 ||
[Analyze grammar]

sarvabhāveṣūpādeyatāyāṃ kṣīyamāṇāyāṃ jagati kiṃ kāraṇaṃ duḥkhasya | na copādeyaṃ kiñcidapi sambhavati yadavināśi vyatiriktaṃ vātmanaḥ | tasmādayamātmā kartāpyakartā bhoktāpyabhoktā tattvataḥ || 19 ||
[Analyze grammar]

yadetatkartṛtvaṃ bhoktṛtvaṃ cāsyādhyāropyate | avaśyakaṃ tadasamyagdarśanamohāt na vastuta iti | yathābhūtavastuvicāraṇātkartṛtvabhoktṛtve na staḥ | indriyendriyārthadveṣābhilāṣādikā dṛṣṭayastaddṛṣṭīnāṃ dṛśyante nātaddṛṣṭīnām || 20 ||
[Analyze grammar]

na mokṣo'sti na saṃsārastvasaktamanasāmiha |
saṃsaktamanasāṃ tvantaḥ sarvamasti yathāsthitam || 21 ||
[Analyze grammar]

jñasya kevalamātmatattvamevollasati | na dvitvaikatvādisiddhe dvitvaikatve karoti | sattvāsattve ca na dve karoti | śaktijālādabhinnāṃ sarvaśaktitāṃ ca darśayati | tasmāt || 22 ||
[Analyze grammar]

na bandho'sti na mokṣo'sti na badhyo'sti na bandhanaḥ |
aprabodhādidaṃ duḥkhaṃ prabodhātpravilīyate || 23 ||
[Analyze grammar]

saṅkalpitā jagati bandhamatirmudhaiva saṅkalpitā jagati mokṣamatirmudhaiva |
santyajya sarvamanahaṅkṛtirātmaniṣṭho dhīro dhiyā vyavaharanbhuvi rāma tiṣṭha || 24 ||
[Analyze grammar]