Chapter 15

dāmavyālakaṭopākhyāne sadācāranirūpaṇaṃ nāma sargaḥ |
pañcadaśaḥ sargaḥ |
vasiṣṭhaḥ |
sarvātiśayasāphalyātsarvaṃ sarvatra sarvadā |
sambhavatyeva tasmātsvaṃ śubhodyogaṃ na santyajet || 1 ||
[Analyze grammar]

mitrasvajanabandhūnāṃ nandinānandadāyinā |
sarasīśānamārādhya mṛtyurapyupanirjitaḥ || 2 || sarvotkarṣeṇa vartante devā api vimarditāḥ |
dānavairdānavāryāḍhyairgajaiḥ padmākarā iva || 3 ||
[Analyze grammar]

maruttanṛpateryajñe saṃvartena maharṣiṇā |
brahmaṇevāparaḥ sargo racitaḥ sasurāsuraḥ || 4 ||
[Analyze grammar]

mahātiśayayuktena viśvāmitreṇa vipratā |
bhūyo bhūyaḥ prayuktena duṣprāpā tapasārjitā || 5 ||
[Analyze grammar]

piṣṭātakāmbu duṣprāpaṃ rasāyanamivāśnatā |
durbhagenedṛśenāptaḥ kṣīroda upamanyunā || 6 ||
[Analyze grammar]

trailokyamallāṃstṛṇavannighnanviṣṇvabjajādikān |
yuktyātiśayadārḍhyena kālaśśvetena kālitaḥ || 7 ||
[Analyze grammar]

praṇayena yamaṃ jitvā kṛtvā vacanasaṅgaram |
paralokādupānītaḥ sāvitryā satyavānpatiḥ || 8 ||
[Analyze grammar]

na so'styatiśayo loke yasyāsti na phalaṃ sphuṭam |
bhavitavyaṃ vicāryātaḥ sarvātiśayaśālinā || 9 ||
[Analyze grammar]

ātmajñānamaśeṣāṇāṃ sukhaduḥkhadaśādṛśām |
mūlaṅkaṣakaraṃ tasmādbhāvyaṃ tatrātiśāyinā || 10 ||
[Analyze grammar]

nānayopahatārthinyā dṛśyadṛṣṭyātiduṣṭayā |
duḥkhādṛte nirābādhaṃ sukhaṃ kiñcidavāpyate || 11 ||
[Analyze grammar]

aśamaḥ paramaṃ brahma śamaśca paramaṃ padam |
yadyapyevaṃ tathāpyenaṃ praśamaṃ viddhi śaṅkaram || 12 ||
[Analyze grammar]

abhimānaṃ parityajya śamamāśritya śāśvatam |
vicārya prajñayāryatvaṃ kuryātsajjanasevanam || 13 ||
[Analyze grammar]

na tapāṃsi na tīrthāni na śāstrāṇi jayanti vaḥ |
saṃsārasāgarottāre sajjanāsevanaṃ yathā || 14 ||
[Analyze grammar]

lobhamoharuṣāṃ yasya tanutānudinaṃ bhavet |
yathāśāstraṃ viharataḥ svakarmasu sa sajjanaḥ || 15 ||
[Analyze grammar]

adhyātmaviduṣaḥ saṅgāttasya sā dhīḥ pravartate |
atyantābhāva evāsya yayā dṛśyasya dṛśyate || 16 ||
[Analyze grammar]

dṛśyātyantābhāvatastu paramevāvaśiṣyate |
anyābhāvavaśādāśu jīvastatraiva līyate || 17 ||
[Analyze grammar]

na cotpannaṃ na caivāsīddṛśyaṃ na ca bhaviṣyati |
vartamāne'pi naivāsti paramevāstyaveditam || 18 ||
[Analyze grammar]

etad yuktisahasreṇa darśitaṃ darśyate'pi ca |
sarvairevānubhūtaṃ hi darśayiṣyāmi cādhunā || 19 ||
[Analyze grammar]

yathedamakhilaṃ śāntaṃ trijagatsaṃvidambaram |
idaṃ tattvaṃ tvasattvādi kuto'tra syātkathañcana || 20 ||
[Analyze grammar]

ciccamatkurute cāru cañcalācañcalātmani |
yattayaiva tadevedaṃ jagadityavabudhyate || 21 ||
[Analyze grammar]

trailokyarūpo'nubhavaścidādityāṃśumaṇḍalam |
kva vendvaṃśumatorbhedo nirvikatthana kathyatām || 22 ||
[Analyze grammar]

svabhāvato'syāściddṛṣṭerye unmeṣanimeṣaṇe |
jagadrūpānubhūtestāvetāvastamayodayau || 23 ||
[Analyze grammar]

ahamartho'parijñātaḥ paramārthāmbare malaḥ |
parijñāto'hamarthastu paramārthāmbaraṃ bhavet || 24 ||
[Analyze grammar]

ahambhāvaḥ parijñāto nāhambhāvībhavatyalam |
ekatāmambunevāmbu yāti cinnabhasātmanā || 25 ||
[Analyze grammar]

ahamādi jagaddṛśyaṃ kila nāstyeva vastutaḥ |
avaśyameva tatkasmācchiṣyate'haṃvicāriṇaḥ || 26 ||
[Analyze grammar]

bādhate dhyāmaladhiyāmapiśāce piśācadhīḥ |
śiśūnāṃ nāvadātāntaḥkaraṇānāṃ vicāraṇāt || 27 ||
[Analyze grammar]

cijjyotsnā yāvadevāntarahaṅkāraghanāvṛtā |
vikāsameti no tāvatparamārthakumudvatī || 28 ||
[Analyze grammar]

pramārjite'hamityasminpade sārthe svayaṃ citā |
narakasvargamokṣāditṛṣṇāyāḥ kalpanaiva kā || 29 ||
[Analyze grammar]

hṛdi yāvadahaṅkāravāridaḥ pravijṛmbhate |
tāvadvikāsamāyāti tṛṣṇākuṭajamañjarī || 30 ||
[Analyze grammar]

ākramya cetanādityamahaṅkārāmbude sthite |
jāḍyameva sthitiṃ yāti na prākāśyaṃ kathañcana || 31 ||
[Analyze grammar]

āsanno'yamahaṅkāraḥ svayaṃ mithyā prakalpitaḥ |
duḥkhāyaiva na harṣāya bālasambhramayakṣavat || 32 ||
[Analyze grammar]

mudhaiva kalpito mohamahambhāvaḥ prayacchati |
anantasaṃsārakaraṃ dāmādiṣviva durmatau || 33 ||
[Analyze grammar]

ayaṃ so'hamiti sphāramohādanyatparaṃ tamaḥ |
anarthabhūtaṃ saṃsāre na bhūtaṃ na bhaviṣyati || 34 ||
[Analyze grammar]

yatkiñcididamāyāti sukhaduḥkhamalātavat |
tadahaṅkāracakrasya pravikāsi vijṛmbhitam || 35 ||
[Analyze grammar]

ahaṅkārāṅkuraḥ kaṣṭo hṛdi yenādhiropitaḥ |
sahasraśākhaṃ duśchedaṃ tasya saṃsṛtikānanam || 36 ||
[Analyze grammar]

ahambhāvo'ṅkuro janmavṛkṣāṇāmakṣayātmanām |
mamedamiti vistīrṇāsteṣāṃ śākhāḥ sahasraśaḥ || 37 ||
[Analyze grammar]

kacaṭā vātavisphoṭā bhāntyarthā vāsanodayāḥ |
vidāryadāruravavattaraṅgāravapaṅktivat || 38 ||
[Analyze grammar]

ahambhāvamahānābhiṃ tvamahambhāvavarjitaḥ |
saṃsāracakraṃ vahanādātmanaḥ parirodhaya || 39 ||
[Analyze grammar]

ahambhāvatamo yāvatpumaraṇye vijṛmbhate |
tāvadetā vivalganti cintāmattapiśācikāḥ || 40 ||
[Analyze grammar]

ahaṅkārapiśācena gṛhīto yo narādhamaḥ |
na tantrāṇi na mantrāśca tasyānāthasya śāntaye || 41 ||
[Analyze grammar]

rāmaḥ |
cinmātre darpaṇākāre nirmale svātmani sthite |
bimbatyahaṅkṛtistasmātpuṃsaḥ kevātra vācyatā || 42 ||
[Analyze grammar]

vasiṣṭhaḥ |
ahaṅkāracamatkāro vastudharmo na rāghava |
vāsanākṛta eṣo'rthaḥ pumprayatnena śāmyati || 43 ||
[Analyze grammar]

nāhaṃ na ca mamārthaśrīḥ sukhaduḥkhe kutaḥ sthite |
iti bhāvānusandhānādahaṅkāro na jāyate || 44 ||
[Analyze grammar]

mithyeyamindrajālaśrīḥ kiṃ me snehavirāgayoḥ |
ityantaranusandhānādahaṅkāro na jāyate || 45 ||
[Analyze grammar]

nāhamātmani nāpyasya dṛśyaśriya iti svayam |
śāntena vyavahāreṇa nāhaṅkāraḥ pravardhate || 46 ||
[Analyze grammar]

ahaṃ hi jagadityantarheyādeyadṛśoḥ kṣaye |
samatāyāṃ prasannāyāṃ nāhaṅkāraḥ pravartate || 47 ||
[Analyze grammar]

rāmaḥ |
kimākṛtirahaṅkāraḥ kathaṃ santyajyate prabho |
saśarīro'śarīraśca tyakte tasmin kathaṃ bhavet || 48 ||
[Analyze grammar]

vasiṣṭhaḥ |
trividho rāghavāstīha tvahaṅkāro jagattraye |
dvau śreṣṭhāvitarastyājyaśśṛṇu tvaṃ kathayāmi te || 49 ||
[Analyze grammar]

ahaṃ sarvamidaṃ viśvaṃ paramātmāhamacyutaḥ |
nānyadastīti saṃvid yā paramā sā hyahaṅkṛtiḥ || 50 ||
[Analyze grammar]

mokṣāyaiṣā na bandhāya jīvanmuktasya vidyate |
ahaṅkārābhidhā tvasyāḥ kalpitā na tu vāstavī || 51 ||
[Analyze grammar]

sarvasmādvyatirikto'haṃ vālāgraśatakalpitaḥ |
yadi vā saṃvideṣāsau dvitīyāhaṅkṛtiḥ parā || 52 ||
[Analyze grammar]

mokṣāyaiṣā na bandhāya jīvanmuktasya vidyate |
ahaṅkārābhidhā tvasyāḥ kalpitā na tu vāstavī || 53 ||
[Analyze grammar]

pāṇipādādimātro'yamahamityeva niścayaḥ |
ahaṅkārastṛtīyo'sau laukikastuccha eva saḥ || 54 ||
[Analyze grammar]

varjya eṣa durātmāsau śatrureṣa paraḥ smṛtaḥ |
anenābhihato janturna bhūyaḥ parirohati || 55 ||
[Analyze grammar]

ripuṇānena balinā vividhādhipradāyinā |
kharvīkṛtamatirlokaḥ saṅkaṭeṣveva majjati || 56 ||
[Analyze grammar]

anayā durahaṅkṛtyā bhāvātsantyaktayā ciram |
śiṣṭāhaṅkāravāñjanturbhagavānyāti muktatām || 57 ||
[Analyze grammar]

lokāhaṅkāradoṣasya vapurasmīti rūpiṇaḥ |
na deho'smīti nirṇīyavarjanaṃ mahatāṃ matam || 58 ||
[Analyze grammar]

prathamau dvāvahaṅkārāvaṅgīkṛtyāpyalaukikau |
tṛtīyāhaṅkṛtistyājyā laukikī duḥkhadāyinī || 59 ||
[Analyze grammar]

anayā durahaṅkṛtyā dāmavyālakaṭāḥ kila |
tāṃ daśāṃ samanuprāptā yā kathāsvapi duḥkhadā || 60 ||
[Analyze grammar]

rāmaḥ |
tṛtīyāṃ laukikīmetāṃ tyaktvā cittādahaṅkṛtim |
kimbhāvaḥ puruṣo brahmanprāpnuyādātmane hitam || 61 ||
[Analyze grammar]

vasiṣṭhaḥ |
eṣā tāvatparityājyā tyaktvaitāṃ duḥkhadāyinīm |
yathā yathā pumāṃstiṣṭhetparameti tathā tathā || 62 ||
[Analyze grammar]

ete ahaṅkṛtidaśe pūrvokte bhāvayanyadi |
tiṣṭhatyabhyeti paramaṃ tatpadaṃ puruṣo'naghaḥ || 63 ||
[Analyze grammar]

atha te eva santyajya sarvāhaṅkṛtivivarjitaḥ |
santiṣṭhate tathāpyuccaiḥpadamevādhirohati || 64 ||
[Analyze grammar]

sarvadā sarvayatnena laukikī durahaṅkṛtiḥ |
paramānandabodhāya varjanīyā mahādhiyā || 65 ||
[Analyze grammar]

śarīrasthāmayāpuṇyadurahaṅkāravarjanāt |
anyanna paramaṃ śreya etadeva paraṃ padam || 66 ||
[Analyze grammar]

bhāvādahaṅkṛtiṃ tyaktvā sthūlāmetāṃ hi laukikīm |
tiṣṭhanvyavaharanvāpi na naraḥ prapatatyadhaḥ || 67 ||
[Analyze grammar]

saṃśāntāhaṅkṛterjantorbhogarogā mahāmateḥ |
na svadante sutṛptasya yathā prativiṣārasāḥ || 68 ||
[Analyze grammar]

bhogeṣvasvadamāneṣu puṃsaśśreyaḥ purogatam |
kṣīṇe'ndhakāre kiṃ nāma manaso'nyatpravartate || 69 ||
[Analyze grammar]

ahaṅkārānusandhānavarjanādeva rāghava |
pauruṣaikaprayatnotthāttīryate bhavasāgaraḥ || 70 ||
[Analyze grammar]

nāhaṃ na nāma mama kiñcidapīti matvā sarvaṃ ca me sakalamapyahameva veti |
labdhāspadāṃ manasi saṃvidamevamīḍyāṃ nītvā sthitiṃ paramupaiti padaṃ mahātmā || 71 ||
[Analyze grammar]