Chapter 13

dāmavyālakaṭajanmāntaravarṇanaṃ nāma sargaḥ |
trayodaśaḥ sargaḥ |
vasiṣṭhaḥ |
ataḥ prabodhāya tava vacmi rāma mahāmate |
dāmavyālakaṭanyāyo mā te'stviti na līlayā || 1 || avivekānusandhānāccittamāpadamīdṛśīm |
anantataraduḥkhāya parigṛhṇāti līlayā || 2 ||
[Analyze grammar]

kva kilāmaravidhvaṃsiśambarānīkanāthatā |
kva tāpataptajambālajalajarjaramīnatā || 3 ||
[Analyze grammar]

kva dhairyamamarānīkavidrāvaṇakaraṃ mahat |
kva kirātamahīpālakṣudrakiṅkararūpatā || 4 ||
[Analyze grammar]

kva nāma nirahaṅkāracitsattvodāradhīratā |
kva mithyāvāsanāveśādahaṅkārakukalpanā || 5 ||
[Analyze grammar]

śākhāpratānagahanā saṃsāraviṣamañjarī |
ahaṅkārāṅkurādeva samudetīyamātatā || 6 ||
[Analyze grammar]

ahaṅkāramato rāma mārjayāntaḥ prayatnataḥ |
ahaṃ na kaścideveti mārjayitvā sukhī bhava || 7 ||
[Analyze grammar]

ahaṅkārāmbudacchannaṃ paramārthendumaṇḍalam |
rasāyanamayaṃ śītamadṛśyatvamupāgatam || 8 ||
[Analyze grammar]

ahaṅkārapiśācāttā dāmavyālakaṭāstrayaḥ |
gatāḥ sattāmasanto'pi māyāmāhātmyadānavāḥ || 9 ||
[Analyze grammar]

kaśmīreṣu mahāpadmasarasītīrapalvale |
adya matsyāḥ sthitā rāma śevālalavalālasāḥ || 10 ||
[Analyze grammar]

rāmaḥ |
nāsato vidyate bhāvo nābhāvo vidyate sataḥ |
te hyasantaḥ kathaṃ santaḥ sampannā iti me vada || 11 ||
[Analyze grammar]

vasiṣṭhaḥ |
evametanmahābāho nāsadbhavati hi kvacit |
kadācitkiñcidapyetadbṛhadbhavati vā tanu || 12 ||
[Analyze grammar]

kimasatsatsthitaṃ brūhi kiṃ tatsadvāpyasatsthitam |
nidarśanenānenaiva kariṣye tvadvibodhanam || 13 ||
[Analyze grammar]

rāmaḥ |
santa eva sthitāḥ santo brahmanvayamime kila |
dāmādayastvasanto'pi vakṣi santaḥ sthitā iti || 14 ||
[Analyze grammar]

vasiṣṭhaḥ |
yathā dāmādayo rāma sthitā māyāmayā iha |
asatyā eva satyābhā mṛgatṛṣṇāmbupūravat || 15 ||
[Analyze grammar]

tathaiveme vayamapi sasurāsuradānavāḥ |
asatyā eva valgāmo yāma āyāma eva ca || 16 ||
[Analyze grammar]

alīkameva tvadbhāvo madbhāvo'līka eva ca |
anubhūto'pyasadrūpaḥ svapne svamaraṇaṃ yathā || 17 ||
[Analyze grammar]

mṛto bandhuryathā svapne'pyanubhūto'pyasanmayaḥ |
mṛto'yamiti ca jñaptirbhavedevamidaṃ jagat || 18 ||
[Analyze grammar]

eṣā hi mūḍhaviṣayā uktireva na rājate |
abhyāsena vinodeti nānubhūterapahnavaḥ || 19 ||
[Analyze grammar]

niścayo'ntaḥ prarūḍho yaḥ sa yatnābhyasanaṃ vinā |
nāśamāyāti loke'sminna kadācana kasyacit || 20 ||
[Analyze grammar]

idaṃ jagadasadbrahma satyamityeva vakti yaḥ |
tamunmattamivonmattā vimūḍhā vihasantyalam || 21 ||
[Analyze grammar]

akṣīvakṣīvayoraikyaṃ kva kilehājñatajjñayoḥ |
andhaprakāśayorbodhe syācchāyātapayoriva || 22 ||
[Analyze grammar]

yatnenāpyanubhūte'rthe satye kartumapahnavam |
tajjño'jñaśca na śaknoti śava ākramaṇaṃ yathā || 23 ||
[Analyze grammar]

brahma sarvaṃ jagaditi vaktuṃ tajjñasya yujyate |
yato'vidyānanubhave sa tadevānubhūtavān || 24 ||
[Analyze grammar]

prabuddhaviṣaye hyeṣā rāma vākpravirājate |
buddhasyāsmīti rūpeṇa kila nāstyeva kiñcana || 25 ||
[Analyze grammar]

brahmaivedaṃ paraṃ śāntamityevānubhavan sudhīḥ |
apahnavaḥ svānubhūteḥ kartuṃ tasya kva yujyate || 26 ||
[Analyze grammar]

parasmādvyatirekeṇa nāhamātmani kiñcana |
hemanīvormikāditvaṃ na mayyasti vasiṣṭhatā || 27 ||
[Analyze grammar]

bhūtatvavyatirekeṇa mūḍho nātmani kiñcana |
ūrmyādibuddhau hemeva nājñe'sti paramārthatā || 28 ||
[Analyze grammar]

mithyāhantāmayo mūḍhaḥ satyaikātmamayaḥ sudhīḥ |
yujyate na kvacinnāma svabhāvāpahnavo'nayoḥ || 29 ||
[Analyze grammar]

yo yanmayastasya tasminyujyate'pahnavaḥ katham |
puruṣasya ghaṭo'smīti vākyamunmattataiva hi || 30 ||
[Analyze grammar]

tasmānneme vayaṃ satyā na ca dāmādayaḥ kvacit |
asatyāste vayaṃ ceme nāsti naḥ khalu sambhavaḥ || 31 ||
[Analyze grammar]

satyasaṃvedanaṃ śuddhaṃ bodhākāśaṃ nirañjanam |
satyaṃ sarvagataṃ śāntamastyanastamitodayam || 32 ||
[Analyze grammar]

sarvaṃ sattacca niśśūnyaṃ nakiñcidiva saṃsthitam |
tatra vyomni vibhāntīmā nijā bhāso'ṅga dṛṣṭayaḥ || 33 ||
[Analyze grammar]

yathā taimirikākṣasya sahajā eva dṛṣṭayaḥ |
keśoṇḍukādivadbhānti tathemāstatra sṛṣṭayaḥ || 34 ||
[Analyze grammar]

sa ātmānaṃ yathā vetti tathānubhavati kṣaṇāt |
cidākāśastato'satyamapi satyaṃ tadīkṣaṇāt || 35 ||
[Analyze grammar]

na satyamapi nāsatyamiha tasmājjagattraye |
yad yathā vetti cid rūpaṃ tattathodetyasaṃśayam || 36 ||
[Analyze grammar]

yathā dāmādayastadvadeveme'bhyuditā vayam |
satyāsatyāḥ kimatrāṅga tānpratyapi vikalpanā || 37 ||
[Analyze grammar]

asyānantasya cidvyomnaḥ sarvagasya nirākṛteḥ |
cidudeti yathā yāntastathā sā tatra bhātyalam || 38 ||
[Analyze grammar]

yatra dāmādirūpeṇa saṃvitprakacate svayam |
tathāsau tatra sampannā tathākārānubhūtitaḥ || 39 ||
[Analyze grammar]

svasvapnapratibhāsasya jagadityabhidhā kṛtā |
cidvyomno vyomavapuṣastāpasyeva mṛgāmbutā || 40 ||
[Analyze grammar]

yatra prabuddhaṃ cidvyoma tatra dṛśyābhidhā kṛtā |
yatra suptaṃ tu tenaiva tatra mokṣābhidhā kṛtā || 41 ||
[Analyze grammar]

na ca tatkvacidāsuptaṃ na prabuddhaṃ kadācana |
cidvyoma kevalaṃ dṛśyaṃ jagadityavagamyatām || 42 ||
[Analyze grammar]

nirvāṇameva sargaśrīḥ sargaśrīreva nirvṛtiḥ |
nānayośśabdayorarthabhedaḥ paryāyayoriva || 43 ||
[Analyze grammar]

paramārthe jagaditi rūpaṃ vetti svayaṃ svakam |
yathā taimirikaṃ cakṣuḥ keśoṇḍukamivekṣitam || 44 ||
[Analyze grammar]

na tatkeśoṇḍukaṃ kiñcitsā hi dṛṣṭistathā sthitā |
nedaṃ dṛśyamidaṃ kiñciditthaṃ cidvyoma saṃsthitam || 45 ||
[Analyze grammar]

sarvatra sarvamidamasti yathānubhūtaṃ no kiñcana kvacidihāsti ca nānubhūtam |
śāntaṃ sadekamidamātatamitthamāste santyaktaśaṅkamapabhedamatastvamāssva || 46 ||
[Analyze grammar]

śilodarākāraghanaṃ praśāntaṃ mahācito rūpamidaṃ khamaccham |
naivāsti nāstīti dṛśau kvacitsto yaccāsti tatsādhu tadeva bhāti || 47 ||
[Analyze grammar]