Chapter 140

manorājyasammīlanaṃ nāma sargaḥ |
catvariṃśaduttaraśatatamaḥ sargaḥ |
vasiṣṭhaḥ |
sarvasaṃsṛtiṣaṇḍeṣu bījarūpakalātmanaḥ |
tanmātrapratibhāsasya pratibhāse na bhinnatā || 1 || pravṛttirvā nivṛttirvā tanmātrāpattipūrvakam |
sarvasya jīvajātasya suṣuptatvādanantaram || 2 ||
[Analyze grammar]

pravṛttibhājo ye jīvāste tanmātrapadaṃ gatāḥ |
tanmātraikatayā sargānmithaḥ paśyanti kalpitān || 3 ||
[Analyze grammar]

tanmātraikyapraṇālena citrāḥ sargajalāśayāḥ |
parasparaṃ sammilanti ghanatāṃ yānti cābhitaḥ || 4 ||
[Analyze grammar]

kecitpṛthaksthitimitāḥ pṛthageva layaṃ gatāḥ |
kecinmithaḥ sammilitā jagatṣaṇḍāḥ sthitāḥ kṛtāḥ || 5 ||
[Analyze grammar]

jagatṣaṇḍasahasrāṇi yatrāsaṅkhyānyaṇāvaṇau |
aparasparalagnāni kānanaṃ brahma nāma tat || 6 ||
[Analyze grammar]

mithaḥ sa melanaṃ naiti ghanatāṃ samupāgataḥ |
yad yad yatra yathā rūḍhaṃ tattatpaśyati netarat || 7 ||
[Analyze grammar]

vartamānamanorājyavaśājjīvaparamparāḥ |
parasparaṃ sammilitāḥ sargāṇāṃ rūḍhibhāvanāḥ || 8 ||
[Analyze grammar]

dehasattā bhṛśaṃ rūḍhā dehābhāvastu vismṛtaḥ |
dehatvaparirūḍhatvāccidvyomnā vismṛtātmanā || 9 ||
[Analyze grammar]

yathā śuddhaprāṇamarutparaprāṇābhivedhanāt |
vetti vedhyamanorājyaṃ tathā sargānnarāśrayī || 10 ||
[Analyze grammar]

sarveṣāṃ jīvarāśīnāmātmāvasthātrayaṃ śritaḥ |
jāgratsvapnasuṣuptākhyamatra deho na kāraṇam || 11 ||
[Analyze grammar]

evamātmani jīvatvamanyāvasthātrayātmani |
tāpāmbhasīva vīcitvamasmin kacati dehatā || 12 ||
[Analyze grammar]

citkalāpadamāsādya suṣuptāntapade sthitam |
buddho nivartate jīvo mūḍhaḥ sarge pravartate || 13 ||
[Analyze grammar]

svabhāvaśuddhirhi yadā tadā maitrī pravartate |
dvayorekatvarūpaiva svasauhārdanidarśanā || 14 ||
[Analyze grammar]

ajñaḥ suṣuptātsambuddho jīvaḥ kaścitsvasargabhāk |
sarvagatvāccitaḥ kaścitparasargeṇa nīyate || 15 ||
[Analyze grammar]

sarge sarge pṛthagrūpaṃ santi sargāntarāṇyapi |
teṣvapyantassthasargaughāḥ kadalīdalapīṭhavat || 16 ||
[Analyze grammar]

sarge sargāntarāpūrapattrapīvaravṛttimān |
svabhāvaśītalo brahmakadalīdalamaṇḍapaḥ || 17 ||
[Analyze grammar]

kadalyāmanyatā nāsti yathā pattraśateṣvapi |
brahmatattve'nyatā nāsti tathā sargaśateṣvapi || 18 ||
[Analyze grammar]

bījātphalaṃ rasādbhūtvā yathā bījaṃ punarbhavet |
tathā brahma mano bhūtvā bodhādbrahma punarbhavet || 19 ||
[Analyze grammar]

rasakāraṇakaṃ bījaṃ phalabhāvena jṛmbhate |
brahmakāraṇako jīvo jagadrūpeṇa jṛmbhate || 20 ||
[Analyze grammar]

rasasya kāraṇaṃ kiṃ syāditi vaktuṃ na yujyate |
svabhāvo nirviśeṣatvātparaṃ vaktuṃ na yujyate || 21 ||
[Analyze grammar]

na cāsattā sarvamaye vaktuṃ kvacana śakyate |
nākāraṇe kāraṇādi pare vāstyādikāraṇe || 22 ||
[Analyze grammar]

bījaṃ jahannijavapuḥ phalībhūtaṃ vilokyate |
brahmājahannijavapuḥ phalaṃ bījaṃ ca saṃsthitam || 23 ||
[Analyze grammar]

bījasyākṛtimatsarvaṃ tenānākṛti tatpadam |
na yujyate samīkartuṃ tasmānnāstyupamā śive || 24 ||
[Analyze grammar]

khameva jāyate khābhānna ca tajjāyate'nyadṛk |
ato na jātaṃ vā jātaṃ viddhi brahmanabho jagat || 25 ||
[Analyze grammar]

dṛśyaṃ paśyan svamātmānaṃ na draṣṭā samprapaśyati |
prapañcākrāntasaṃvitteḥ kasyodeti nijā sthitiḥ || 26 ||
[Analyze grammar]

mṛgatṛṣṇājalabhrāntau satyāṃ keva vidagdhatā |
vidagdhatāyāṃ satyāṃ tu kevāsau mṛgatṛṣṇikā || 27 ||
[Analyze grammar]

ākāśaviśado draṣṭā sarvago'pi na paśyati |
netraṃ nijamivātmānaṃ dṛśībhūtamaho bhramaḥ || 28 ||
[Analyze grammar]

ākāśaviśadaṃ brahma yatnenāpi na labhyate |
dṛśye dṛśyatayādṛṣṭe tvasya lābhaḥ sudūrataḥ || 29 ||
[Analyze grammar]

tvādṛksthūlo'vadhānena vinā yatra na dṛśyate |
tatrātidūrodastaiva draṣṭuḥ sūkṣmasya dṛśyatā || 30 ||
[Analyze grammar]

draṣṭā draṣṭaiva bhavati na tu spṛśati dṛśyatām |
dṛśyaṃ ca dṛśyate tena draṣṭā rāma na dṛśyate || 31 ||
[Analyze grammar]

draṣṭaiva sambhavatyeko na tu dṛśyamihāsti hi |
draṣṭā sarvātmako dṛśyaṃ sthitaścetkeva dṛśyatā || 32 ||
[Analyze grammar]

sarvaśaktimatā rājñā yad yatsampādyate yathā |
tattattathā bhavatyāśu sa evodeti tattayā || 33 ||
[Analyze grammar]

yathā madhurasollāsaṣṣaṇḍo bhavati bhāsuraḥ |
rasatāmajahaccaiva phalapuṣpadalonnataḥ || 34 ||
[Analyze grammar]

cidullāsastathā jīvo bhūtvā bhavati dehakaḥ |
cinmātratāṃ tāmajahadeva darśanadṛṅmayaḥ || 35 ||
[Analyze grammar]

nānāṣaṇḍasahasraughairadvitīyairnijātmanaḥ |
yathodeti raso bhaumaścittathodetyahambhramaiḥ || 36 ||
[Analyze grammar]

cidrasollāsavṛkṣāṇāṃ kacatāmātmanātmani |
dṛśyaśākhāśatāḍhyānāmiha nānto'vagamyate || 37 ||
[Analyze grammar]

ṣaṇḍaḥ pratyekamevāntaryathā rasacamatkṛtim |
svādayatyevameṣā citpṛthakpaśyati saṃsṛtīḥ || 38 ||
[Analyze grammar]

yā yodeti yathā yasyā jīvaśakteḥ svasaṃsṛtiḥ |
tām tāṃ tathaiti sā svāntaścidbhūtabhuvanasthitim || 39 ||
[Analyze grammar]

jīvasaṃsṛtayaḥ kāścitpramilanti parasparam |
svayaṃ vihṛtya saṃsāre śāmyanti cirakālataḥ || 40 ||
[Analyze grammar]

sūkṣmayā parayā dṛṣṭyā svaṃ paśyasyanayā tathā |
jagajjālasahasrāṇi paramāṇvantareṣvapi || 41 ||
[Analyze grammar]

bhittau nabhasi pāṣāṇe jvālāyāmanile jale |
santi saṃsāralakṣyāṇi tile tailamivākhile || 42 ||
[Analyze grammar]

śuddhimeti yadā cetastadā jīvo bhaveccitiḥ |
śuddhā ca sā sarvagatā tena sammelanaṃ mithaḥ || 43 ||
[Analyze grammar]

sarveṣāṃ padmajādīnāṃ svasattābhramapūrakaḥ |
jagaddīrghamahāsvapnaḥ svayamantaḥ samutthitaḥ || 44 ||
[Analyze grammar]

svapnātsvapnāntaraṃ yānti kāścidbhūtaparamparāḥ |
tenopalambhaḥ kuḍyādāvāsāṃ dṛḍhataraḥ sthitaḥ || 45 ||
[Analyze grammar]

yad yatra cidbhāvayati tattatrāśu bhavatyalam |
tayā svapne'pi yaddṛṣṭaṃ tatkāle satyameva tat || 46 ||
[Analyze grammar]

cidaṇorantare santi samastānubhavāṇavaḥ |
yathā bījāntare pattralatāpuṣpaphalāṇavaḥ || 47 ||
[Analyze grammar]

paramāṇuṃ jagadantardhatte citparamāṇukaḥ |
līnamākāśamākāśe dvaitaikyabhramamutsṛja || 48 ||
[Analyze grammar]

deśakālakriyādyākhyaiḥ svairevāṇubhireva cit |
aṇūnanubhavatyantaritarāṇorasambhavāt || 49 ||
[Analyze grammar]

svayaṃ sarvasya kacitaḥ svacchaścidaṇuṣaṇḍakaḥ |
brahmādeḥ kīṭaniṣṭhasya dehadṛṣṭyānubhāvitaḥ || 50 ||
[Analyze grammar]

kacitaṃ kiñcideveha vastutastu na kiñcana |
svayaṃ svatvaṃ svādayante dvaitaṃ citparamāṇavaḥ || 51 ||
[Analyze grammar]

svayaṃ prakacati sphāradehaścidaṇuṣaṇḍakaḥ |
netrādikusumadvāraiḥ saṃvidāmodamudgiran || 52 ||
[Analyze grammar]

sampaśyatītarān kaścidbahīrūpeṇa cidghanān |
sarvagatvādanāśatvāddṛśyabījasya vai citeḥ || 53 ||
[Analyze grammar]

antarevākhilaṃ kaścitpaśyatyavikalaṃ jagat |
tatrātikālaṃ kalanādunmajjati nimajjati || 54 ||
[Analyze grammar]

svapnātsvapnāntaraṃ tatra tathā paśyanpunaḥ punaḥ |
mithyāvaṭeṣu luṭhitaśśileva śikharacyutā || 55 ||
[Analyze grammar]

kecitsammīlitāḥ kecidātmanyeva bhrame sthitāḥ |
magnāḥ svasaṃvidrasataḥ sphuranto dehiṣaṇḍakāḥ || 56 ||
[Analyze grammar]

svayamantaḥ prapaśyanti ye jagajjīvasambhramam |
taiḥ kaiścittattathā dṛśyamasatsvapnavadāśritam || 57 ||
[Analyze grammar]

sarvātmatvātsvabhāvasya taddṛśyaṃ satyamātmani |
sarvago vidyate yatra tatra sarvamudeti hi || 58 ||
[Analyze grammar]

jīvāntaḥ pratibhāsasya sargasya punarantare |
jīvaṣaṇḍa udetyuccaistasyāntaritaro'pi ca || 59 ||
[Analyze grammar]

jīvāntarjāyate jīvastasyāntarapi jīvakaḥ |
sarvatra rambhādalavajjīvabījaṃ prajīvati || 60 ||
[Analyze grammar]

dṛśyabuddhiparāvṛddhi samametadanantakam |
hemnīva kaṭakāditvaṃ parijñaptyaiva naśyati || 61 ||
[Analyze grammar]

vicāro yasya nodeti ko'haṃ kimidamityalam |
tasyādyantāvimukto'sau dīrgho jīvajvarabhramaḥ || 62 ||
[Analyze grammar]

vicāraḥ phalitastasya vijñeyo yasya sanmateḥ |
dinānudinamāyāti tānavaṃ bhogagṛdhnutā || 63 ||
[Analyze grammar]

yathā dehopayuktaṃ hi karotyārogyamauṣadham |
tathendriyajaye nyasto vivekaḥ phalito bhavet || 64 ||
[Analyze grammar]

viveko'sti vacasyeva citre'gniriva bhāsuraḥ |
yasya tena parityaktā duḥkhāyaiva vivekitā || 65 ||
[Analyze grammar]

yathā sparśena pavanaḥ sattāmāyāti no girā |
tathecchātānavenaiva viveko'syeti budhyate || 66 ||
[Analyze grammar]

citrāmṛtaṃ nāmṛtameva viddhi citrānalaṃ nānalameva viddhi |
citre'ṅganā nūnamanaṅganaiva vācā vivekastvaviveka eva || 67 ||
[Analyze grammar]

pūrvaṃ vivekena tanutvameti rāgo'tha vairaṃ ca samūlameva |
paścātparikṣīyata eva yatra sa pāvanastatra vivekitāsti || 68 ||
[Analyze grammar]