Chapter 132

bhārgavopākhyāne bhārgavakalevaravarṇanaṃ nāma sargaḥ |
dvātriṃśaduttaraśatatamaḥ sargaḥ |
vasiṣṭhaḥ |
atha varṣasahasreṇa divyena parameśvaraḥ |
bhṛguḥ paramasambodhādvirarāma samādhitaḥ || 1 || nāpaśyadagre tanayaṃ taṃ nayāvanatānanam |
sīmāntaṃ guṇasīmāyāḥ puṇyaṃ mūrtamiva sthitam || 2 ||
[Analyze grammar]

apaśyatkevalaṃ kālaṃ kaṅkālaṃ purato mahat |
dehayuktamivābhāgyaṃ dāridryamiva mūrtimat || 3 ||
[Analyze grammar]

tāpaśuṣkavapuḥ kṛttirandhrasphuritatittiri |
saṃśuṣkāntrodaraguhāchāyāviśrāntadarduram || 4 ||
[Analyze grammar]

netragartakasaṃsuptaprasūnavanakīṭakam |
makṣikāpañjaraprotakośakārakrimivrajam || 5 ||
[Analyze grammar]

prāktanīmupabhogehāmiṣṭāniṣṭaphalapradām |
dhārādhautāntayā tanvā hasacchuṣkāsthimālayā || 6 ||
[Analyze grammar]

śiroghaṭena śubhreṇa sampannenenduvarcasā |
viḍambayacca karpūraplutaliṅgaśiraśśriyam || 7 ||
[Analyze grammar]

ṛjvā saṃśuṣkasitayā svāsthimātrāvaśeṣayā |
grīvayātmānusṛtayā dīrghīkurvadivākṛtim || 8 ||
[Analyze grammar]

mṛṇālikāpāṇḍurayā dhārāvadhutamāṃsayā |
nāsāsthilatayā vaktraṃ kṛtasīmākramaṃ dadhat || 9 ||
[Analyze grammar]

dīrghakandharayā nūnamuttānīkṛtavaktrayā |
prekṣamāṇamiva prāṇānutkrāntānambarodare || 10 ||
[Analyze grammar]

jaṅghorujānudordaṇḍairdviguṇaṃ dīrghatāṃ gataiḥ |
pramimāṇamivāśāntaṃ dīrghādhvaśramabhītitaḥ || 11 ||
[Analyze grammar]

udareṇātinimnena carmaśeṣeṇa śoṣiṇā |
pradarśayadivājñasya hṛdayasyātiśūnyatām || 12 ||
[Analyze grammar]

prekṣya tacchuṣkakaṅkālamālānamiva dantinaḥ |
pūrvāparaparāmarśamakurvanbhṛgurutthitaḥ || 13 ||
[Analyze grammar]

ālokasamakālaṃ hi pratibhātaṃ tato bhṛgoḥ |
ciramutkrāntajīvaḥ kiṃ matputro'yamiti kṣaṇāt || 14 ||
[Analyze grammar]

acintayata evāsya bhaviṣyattābalaṃ tataḥ |
kālaṃ prati babhūvāśu kopaḥ paramadāruṇaḥ || 15 ||
[Analyze grammar]

akāla eva matputro nītaḥ kimiti kopitaḥ |
kālāya śāpamutsraṣṭuṃ bhagavānupacakrame || 16 ||
[Analyze grammar]

athākalitarūpo'sau kālaḥ kavalitaprajaḥ |
ādhibhautikamāsthāya vapurmunimupāyayau || 17 ||
[Analyze grammar]

khaḍgapāśadharaśśrīmān kuṇḍalī kavacānvitaḥ |
ṣaḍbhujaṣṣaṇmukho bahvyā vṛtaḥ kiṅkarasenayā || 18 ||
[Analyze grammar]

yaccharīrasamutthena jvālājālena valgatā |
phullakiṃśukavṛkṣasya babhārādreśśriyaṃ nabhaḥ || 19 ||
[Analyze grammar]

yatkarasthatriśūlāgraniṣṭhyūtairagnimaṇḍalaiḥ |
virejuruditairāśāḥ kānakairiva kuṇḍalaiḥ || 20 ||
[Analyze grammar]

yatpāśaśvasanāyastaśikharā medinībhṛtaḥ |
dolāmiva samārūḍhāśceluḥ petuśca ghūrṇitāḥ || 21 ||
[Analyze grammar]

yatkhaḍgamaṇḍaloddyotaśyāmaṃ bimbaṃ vivasvataḥ |
kalpadagdhajagaddhūmaparyākulamivābabhau || 22 ||
[Analyze grammar]

sa upetya mahābāhuḥ kupitaṃ taṃ mahāmunim |
kalpakṣubdhābdhigambhīraṃ sāntvapūrvamuvāca ha || 23 ||
[Analyze grammar]

vijñātalokasthitayo mune dṛṣṭaparāvarāḥ |
hetunāpi na muhyanti kimu hetum vinottamāḥ || 24 ||
[Analyze grammar]

tvamanantatapā vipro vayaṃ niyatipālakāḥ |
tena sampūjyase pūjya sādho netarayecchayā || 25 ||
[Analyze grammar]

mā tapaḥ kṣapaya kṣubdhaiḥ kalpakālamahānalaiḥ |
yo na dagdho'smi me tasya kiṃ tvaṃ śāpena dhakṣyasi || 26 ||
[Analyze grammar]

saṃsārāvalayo grastā nigīrṇā rudrakoṭayaḥ |
bhuktāni viṣṇuvṛndāni kena śaptā vayaṃ mune || 27 ||
[Analyze grammar]

bhoktāro hi vayaṃ brahmanbhojanaṃ yuṣmadādayaḥ |
svayaṃ niyatireṣā hi nāvayoretadīhitam || 28 ||
[Analyze grammar]

svayamūrdhvaṃ prayātyagniḥ svayaṃ yānti payāṃsyadhaḥ |
bhoktāraṃ bhojanaṃ yāti sṛṣṭiścāpyantakaṃ svayam || 29 ||
[Analyze grammar]

idamitthaṃ mune rūpamasyeha paramātmanaḥ |
svātmani svayamevātmā svata eva vijṛmbhate || 30 ||
[Analyze grammar]

neha kartā na bhoktāsti dṛṣṭyā naṣṭakalaṅkayā |
bahavaśceha kartāro dṛṣṭyānaṣṭakalaṅkayā || 31 ||
[Analyze grammar]

kartṛtākartṛte brahman kevalaṃ parikalpite |
asamyagdarśanenaiva na samyagdarśanena vaḥ || 32 ||
[Analyze grammar]

puṣpāṇi taruṣaṇḍeṣu bhūtāni bhuvaneṣu ca |
svayamāyānti yāntīha kalpyate hetutā vidheḥ || 33 ||
[Analyze grammar]

abbimbitasya candrasya calane kartrakartṛte |
na satye nānṛte yadvattadvatkālasya sṛṣṭiṣu || 34 ||
[Analyze grammar]

mano mithyābhramāl loke kartṛtākartṛtāmayīm |
karoti kalanāṃ rajjvāṃ bhrāntekṣaṇa ivāhitām || 35 ||
[Analyze grammar]

tena mā gā mune kopamāpadāmīdṛśaḥ kramaḥ |
yad yathā tattathaivāstu satyamālokayākulaḥ || 36 ||
[Analyze grammar]

na vayaṃ prabhutārthena nābhimānavaśīkṛtāḥ |
svato hevākavaśataḥ kevalaṃ niyatau sthitāḥ || 37 ||
[Analyze grammar]

prakṛtavyavahārehāṃ niyatāṃ niyatervaśāt |
prājñaḥ samanuvarteta nābhimānamahātamāḥ || 38 ||
[Analyze grammar]

kartavyameva kriyate kevalaṃ kāryakovidaiḥ |
sauṣuptīṃ vṛttimāśritya kayācidapi nāśayā || 39 ||
[Analyze grammar]

kva sā jñānamayī dṛṣṭiḥ kva mahattvaṃ kva dhīratā |
mārge sarvaprasiddhe hi kimandha iva muhyasi || 40 ||
[Analyze grammar]

trikālāmaladarśitvaṃ dhārayannapi cetasi |
avicārya jagadyātrāṃ kiṃ mūrkha iva muhyasi || 41 ||
[Analyze grammar]

svakarmaphalapākotthāmavicārya daśāṃ sute |
kiṃ mūrkha iva sarvajña mudhā māṃ śaptumarhasi || 42 ||
[Analyze grammar]

dehināmiha sarveṣāṃ śarīraṃ dvividhaṃ mune |
kiṃ na jānāsi vā dehamekamanyanmano'bhidham || 43 ||
[Analyze grammar]

tatra deho jaḍo'tyarthaṃ vināśaikaparāyaṇaḥ |
manastūtthānaniyataṃ kadarthātkṣīyate na vā || 44 ||
[Analyze grammar]

catureṇa yathā sādho rathaḥ sārathinohyate |
kurvatā kiñcana svehāṃ deho'yaṃ manasā tathā || 45 ||
[Analyze grammar]

asatsaṅkalpya kriyate saccharīraṃ vināśyate |
kṣaṇena manasā paṅkapuruṣaśśiśunā yathā || 46 ||
[Analyze grammar]

cittameveha puruṣastatkṛtaṃ kṛtamucyate |
tadbaddhaṃ kalanāhetoḥ kalanāstaṃ vimucyate || 47 ||
[Analyze grammar]

ayaṃ deha idaṃ netramidamaṅgamidaṃ śiraḥ |
idaṃ sphāravikāraṃ tanmana evābhidhīyate || 48 ||
[Analyze grammar]

mano hi jīvajjīvākhyaṃ niścāyakatayā tu dhīḥ |
ahaṅkāro'bhimānitvānnānātvaṃ tvidameti hi || 49 ||
[Analyze grammar]

dehavāsanayā cetastvanyāni svāni ceddhayā |
pārthivāni śarīrāṇi santīva paripaśyati || 50 ||
[Analyze grammar]

ālokayati cetsatyaṃ tadasatyamayīṃ manaḥ |
śarīrabhāvanāṃ tyaktvā paramāṃ yāti nirvṛtim || 51 ||
[Analyze grammar]

tanmanastava putrasya samādhau tvayi saṃsthite |
svamanorathamārgeṇa dūrāddūrataraṃ gatam || 52 ||
[Analyze grammar]

idamauśanasaṃ tyaktvā dehaṃ mandarakandare |
prayātaṃ vaibudhaṃ sadma nīḍoḍḍīnaḥ khago yathā || 53 ||
[Analyze grammar]

tatra mandārakuñjeṣu pārijātagṛheṣu ca |
nandanodyānaṣaṇḍeṣu lokapālapureṣu ca || 54 ||
[Analyze grammar]

mune caturyugānyaṣṭau viśvācīṃ devasundarīm |
asevata mahātejāṣṣaṭpadaḥ padminīmiva || 55 ||
[Analyze grammar]

tīvrasaṃvegasampannaḥ svasaṅkalpopakalpite |
atha puṇyakṣaye jāte nīhāra iva śārvare || 56 ||
[Analyze grammar]

pramlānakusumottaṃsaḥ svinnāṅgāvalayālasaḥ |
sa papāta tayā sākaṃ kālapakvaṃ phalaṃ yathā || 57 ||
[Analyze grammar]

vaibudhaṃ tatparityajya nabhasyeva śarīrakam |
bhūtākāśamathāsādya vasudhāyāmajāyata || 58 ||
[Analyze grammar]

āsīddvijo daśārṇeṣu kosaleṣu mahīpatiḥ |
dhīvaro'ṅgamahāṭavyāṃ haṃsastripathagātaṭe || 59 ||
[Analyze grammar]

sūryavaṃśī nṛpaḥ pauṇḍre sauraḥ sālveṣu daiśikaḥ |
kalpaṃ vidyādharaśśrīmāndhīmānatha muneḥ sutaḥ || 60 ||
[Analyze grammar]

madreṣvatha mahīpālastatastāpasabālakaḥ |
vāsudeva iti khyātaḥ samaṅgāyāstaṭe sthitaḥ || 61 ||
[Analyze grammar]

anyāsvapi vicitrāsu vāsanāvaśataḥ svayam |
viṣamāsveṣa putraste cacārānantayoniṣu || 62 ||
[Analyze grammar]

abhūdvindhyavane gopaḥ kirataḥ kekayeṣu ca |
sauvīreṣu ca sāmantastraigartaścaiva daiśikaḥ || 63 ||
[Analyze grammar]

vaṃśagulmaḥ kirāteṣu hariṇaścīrajaṅgale |
sarīsṛpastālatale tamāle vanakukkuṭaḥ || 64 ||
[Analyze grammar]

ayaṃ sa putro bhavato bhūtvā mantravidāṃ varaḥ |
prajajāpa purā vidyāṃ vidyādharapadapradām || 65 ||
[Analyze grammar]

tenāsau bhagavanbrahmanvyomni vidyādharo mahān |
hārakuṇḍalakeyūrī līlānicayalāsakaḥ || 66 ||
[Analyze grammar]

nāyikānalinībhānuḥ puṣpacāpa ivāparaḥ |
vidyādharīṇāṃ dayito gandharvapurabhūṣaṇam || 67 ||
[Analyze grammar]

sa kalpāvadhimāsādya dvādaśādityadhāmani |
jagāma bhasmaśeṣatvaṃ śalabhaḥ pāvake yathā || 68 ||
[Analyze grammar]

jagannirmāṇarahite sphāre nabhasi sā tataḥ |
vāsanā tasya babhrāma nirnīḍā vihagī yathā || 69 ||
[Analyze grammar]

atha kālena sañjāte vicitrārambhakāriṇi |
saṃsārāḍambarārambhe brāhmī rātriviparyaye || 70 ||
[Analyze grammar]

sā manovāsanā tasya vātavyāvalitā satī |
kṛte brāhmaṇatāmetya jātādya vasudhātale || 71 ||
[Analyze grammar]

vāsudevābhidhāno'sau mune viprakumārakaḥ |
jāto matimatāṃ madhye samadhītākhilaśrutiḥ || 72 ||
[Analyze grammar]

kalpaṃ vidyādharo bhūtvā nadyā adya mahāmune |
tapaścarati te putraḥ samaṅgāyāstaṭe sthitaḥ || 73 ||
[Analyze grammar]

vividhaviṣamavāsanānuvṛttyā khadirakarañjakarālakoṭarāsu |
jagati jaraḍhayoniṣu prayāto gahanatarāsu ca kānanasthalīṣu || 74 ||
[Analyze grammar]