Chapter 123

paramārthanirūpaṇaṃ nāma sargaḥ |
trayoviṃśatyuttaraśatatamaḥ sargaḥ |
vasiṣṭhaḥ |
evaṃ tāvadidaṃ viddhi dṛśyaṃ jagaditi sthitam |
ahaṃ cetyādyanākāraṃ bhrāntimātramasanmayam || 1 || akartṛkamanaṅgaṃ ca gagane citramutthitam |
adraṣṭṛkaṃ sānubhavamanidraṃ svapnadarśanam || 2 ||
[Analyze grammar]

bhaviṣyatpuranirmāṇaṃ citrasaṃsthamivoditam |
markaṭānalatāpābhamambvāvartavadāsthitam || 3 ||
[Analyze grammar]

sadrūpamapi niśśūnyaṃ tejaḥ sauramivāmbare |
ratnābhājālamiva khe dṛśyamānamabhittimat || 4 ||
[Analyze grammar]

saṅkalpapuravatprauḍhamanubhūtamasanmayam |
kathārthapratibhānātma na kvacitsthitamasti ca || 5 ||
[Analyze grammar]

nissāramapyatīvāntassāraṃ svapnācalopamam |
bhūtākāśamivākārabhāsuraṃ śūnyamātrakam || 6 ||
[Analyze grammar]

śaradabhramivāgrasthamalakṣyakṣayamākṣayi |
varṇo vyomatalasyeva dṛśyamānamavastukam || 7 ||
[Analyze grammar]

svapnāṅganāratākāramarthaniṣṭhamanarthakam |
citrodyānamivotphullamarasaṃ sarasākṛti || 8 ||
[Analyze grammar]

prakāśamiva nistejaścitrārkānalavatsthitam |
anubhūtaṃ manorājyamivāsatyamavāstavam || 9 ||
[Analyze grammar]

citrapadmākara iva sārasaugandhyavarjitam |
śūnye prakacitaṃ nānāvarṇamākāritātmakam || 10 ||
[Analyze grammar]

paramārthena śuṣyadbhirbhūtapelavapallavaiḥ |
tataṃ jaḍamasārātma kadalīstambhabhāsuram || 11 ||
[Analyze grammar]

sphāritekṣaṇadṛśyāndhakāracakrakavattatam |
atyantamabhavadrūpamapi pratyakṣavatsthitam || 12 ||
[Analyze grammar]

vārbudbuda ivābhogi śūnyamantaḥ sphuradvapuḥ |
rasātmakaṃ satyarasamavicchinnakṣayodayam || 13 ||
[Analyze grammar]

nīhāra iva vistāri gṛhītaṃ sanna kiñcana |
jaḍaṃ śūnyāspadaṃ śūnyaṃ keṣāñcitparamāṇuvat || 14 ||
[Analyze grammar]

kiñcidbhūtamayo'stīti sthitaṃ śūnyamabhūtakam |
gṛhyamāṇamasadrūpaṃ niśātama ivotthitam || 15 ||
[Analyze grammar]

rāmaḥ |
mahākalpakṣaye dṛśyamāste bīja ivāṅkuram |
pare bhūya udetyetattata eveti kiṃ vada || 16 ||
[Analyze grammar]

evambodhāḥ kimajñāḥ syuruta tajjñā iti sphuṭam |
yathāvadbhagavanbrūhi sarvasaṃśayaśāntaye || 17 ||
[Analyze grammar]

vasiṣṭhaḥ |
idaṃ bīje'ṅkura iva dṛśyamāste mahākṣaye |
brūte yaḥ paramajñatvametattasyātiśaiśavāt || 18 ||
[Analyze grammar]

sparśe kiṃ tadasambaddhaṃ kathametadavāstavam |
viparīto bodha eṣa vaktuśśrotuśca maurkhyakṛt || 19 ||
[Analyze grammar]

bījakāle'ṅkura iva jagadāsta itīha yā |
buddhiḥ sāsatpralāpārthā mūḍhā śṛṇu kathaṃ kila || 20 ||
[Analyze grammar]

bījaṃ bhavetsvayaṃ dṛśyaṃ cittādīndriyagocaraḥ |
vaṭadhānādi dhānyādi yuktamatrāṅkurodbhavaḥ || 21 ||
[Analyze grammar]

manaṣṣaṣṭhendriyātītaṃ yaḥ khādatitarāmapi |
bījaṃ tadbhavituṃ śaktaṃ svayambhūrjagataḥ katham || 22 ||
[Analyze grammar]

ākāśādapi sūkṣmasya parasya paramātmanaḥ |
sarvākṣānupalabhyasya kīdṛśī bījatā katham || 23 ||
[Analyze grammar]

satsūkṣmamasadābhāsamasadeva hyataddṛśām |
kīdṛśī bījatā tatra bījābhāve kuto'ṅkuraḥ || 24 ||
[Analyze grammar]

gaganāṅgādapi svacche śūnye tatra pare pade |
kathaṃ santi jaganmerusamudragaganādayaḥ || 25 ||
[Analyze grammar]

nakiñcid yatkathaṃ kiñcittatrāste vastvavastuni |
asti cettatkathaṃ tatra vidyamānaṃ na dṛśyate || 26 ||
[Analyze grammar]

nakiñcidātmanaḥ kiñcitkathameti kuto'tha vā |
śūnyarūpādghaṭākāśājjāto'driḥ kva kutaḥ kadā || 27 ||
[Analyze grammar]

pratipakṣe kathaṃ kiñcidāste chāyātape yathā |
kathamāste tamo bhānau kathamāste hime'nalaḥ || 28 ||
[Analyze grammar]

merurāste kathamaṇau kutaḥ kiñcidanākṛtau |
tadatadrūpayoraikyaṃ kva cchāyātapayoriva || 29 ||
[Analyze grammar]

sākāre vaṭadhānādāvaṅkuro'stīti yuktimat |
anākāre mahākāraṃ jagadastītyayuktimat || 30 ||
[Analyze grammar]

deśāntare yacca narāntare ca buddhyādisarvendriyaśaktyadṛśyam |
nāstyeva tattadvidhabuddhibodhe nakiñcidityeva taducyate ca || 31 ||
[Analyze grammar]

kāryasya tatkāraṇatāṃ prayātaṃ vaktīti yastasya vimūḍhabodhaḥ |
kairnāma tatkāryamudeti tasmātsvaiḥ kāraṇaughaiḥ sahakārirūpaiḥ || 32 ||
[Analyze grammar]

durbuddhibhiḥ kāraṇakāryabhāvaṃ saṅkalpitaṃ dūratare vyudasya |
yadeva tatsatyamanādimadhyaṃ jagattadeva sthitamityavehi || 33 ||
[Analyze grammar]