Chapter 122

cittābhāvapratipādanaṃ nāma sargaḥ |
dvāviṃśatyuttaraśatatamaḥ sargaḥ |
vasiṣṭhaḥ |
prathamaṃ jātamātreṇaiva puṃsā kiñcidvikacitabuddhinaiva satsaṅgamapareṇa bhavitavyam | anavaratapravāhāpatito'yamavidyānadīnivahaśśamaśāstrasajjanasamparkādṛte tarituṃ na śakyate | tena vivekavataḥ puruṣasya heyopādeyavicāra utpadyate | tenāsau śubhecchābhidhānāṃ vivekabhuvamāpatito bhavati | tato vivekavaśato vicāraṇayā samyagjñānenāsamyagvāsanāṃ tyajataḥ saṃsāravāsanāto manastanutāmeti | tena tanumānasīṃ nāma vivekabhūmimavatīrṇo bhavati | yadaiva yoginaḥ samyagjñānodayastadaiva sattvāpattiḥ |
tadvaśādvāsanā tanutāṃ gatā yadā tadaivāsāvasakta ityucyate | karmaphalena na badhyata iti || 1 ||
[Analyze grammar]

atha tāvadasāvasattve bhāvanātānavamabhyasyati | yāvatkurvannapi vyavaharannapi asatyeṣu saṃsāravastuṣu sthito'pi | svātmanyeva kṣīṇamanastvādabhyāsavaśādbāhyaṃ vastu kurvannapi na karoti paśyannapi na paśyati nālambate tameva | tenātidhyāyati | tanuvāsanatvācca kevalamardhasuptaprabuddha iva kartavyaṃ karoti na tu bhāvitamanaskaḥ | tena yogabhūmimabhāvanīmadhirūḍha ityantarlīnacittaḥ katicitsaṃvatsarānabhyasya sarvathaiva kurvannapi bāhyapadārthabhāvanāṃ tyajati | turyātmā bhavati | tato jīvanmukta ityucyate || 2 ||
[Analyze grammar]

nābhinandati samprāptaṃ nāprāptamabhiśocati |
kevalaṃ vigatāśaṅkaḥ samprāptamanuvartate || 3 ||
[Analyze grammar]

tvayāpi rāghava jñātaṃ jñātavyamakhilāntaram |
manye te sarvakāryebhyo vāsanāstanutāṃ gatāḥ || 4 ||
[Analyze grammar]

śarīrātītavṛttistvaṃ śarīrastho'thavā bhava |
mā gāśśokaṃ ca harṣaṃ ca tvamātmā vigatāmayaḥ || 5 ||
[Analyze grammar]

tvayyātmani sthite svacche sarvage satatodite |
kuto duḥkhasukhe rāma kuto maraṇajanmanī || 6 ||
[Analyze grammar]

abandhurapi kasmāttvaṃ bandhuduḥkhāni śocasi |
advitīye sthite hyasminbāndhavāḥ ka ivātmani || 7 ||
[Analyze grammar]

dṛśyate kevalaṃ dehaparamāṇucayaḥ param |
deśakālānyatāpatternātmodeti na līyate || 8 ||
[Analyze grammar]

avināśo'pi kasmāttvaṃ vinaśyāmīti śocasi |
amṛtyuvaśini svacche vināśaḥ ka ivātmani || 9 ||
[Analyze grammar]

ghaṭe kapālatāṃ yāte ghaṭākāśo na naśyati |
yathā tathā śarīre'sminnaṣṭe tvaṃ na vinaśyasi || 10 ||
[Analyze grammar]

mṛgatṛṣṇātaraṅgiṇyāṃ kṣīṇāyāṃ nātapo yathā |
vinaśyati tathā dehe naṣṭe nātmā vinaśyati || 11 ||
[Analyze grammar]

vāñchaivodeti te kasmādbhrāntirantarnirarthikā |
advitīyo dvitīyaṃ tatkiṃ vastvātmābhivāñchatu || 12 ||
[Analyze grammar]

śravyaṃ spṛśyaṃ tathā dṛśyaṃ ramyaṃ ghreyaṃ ca rāghava |
na kiñcidasti jagati vyatiriktaṃ yadātmanaḥ || 13 ||
[Analyze grammar]

sarvaśaktāvimāstasminnātmanyevākhilāḥ sthitāḥ |
śaktayo vitate vyakte ākāśa iva śūnyatāḥ || 14 ||
[Analyze grammar]

cittād rāghava rūḍheyaṃ trilokīlalanodare |
trividhena krameṇeha janatā janitabhramā || 15 ||
[Analyze grammar]

manaḥpraśamane siddhe vāsanākṣayanāmani |
karmakṣayābhidhāne ca māyeyaṃ pravinaśyati || 16 ||
[Analyze grammar]

saṃsārogrāraghaṭṭe'sminyā dṛḍhā yantravāhinī |
rajjustāṃ vāsanāmetāṃ chinddhi rāghava yatnataḥ || 17 ||
[Analyze grammar]

aparijñāyamānaiṣā mahāmohapradāyinī |
parijñātā tvanantākhyasukhadā brahmagāminī || 18 ||
[Analyze grammar]

āgatā brahmaṇo bhuktvā saṃsāramiha līlayā |
punarbrahmaiva saṃsmṛtya brahmaṇyeva vilīyate || 19 ||
[Analyze grammar]

śivād rāghava nīrūpādaprameyānnirāmayāt |
sarvabhūtāni jātāni prākāśyānīva tejasaḥ || 20 ||
[Analyze grammar]

rekhāvṛndaṃ yathā parṇe vīcijālaṃ yathā jale |
kaṭakādi yathā hemni tathauṣṇyādi yathānale || 21 ||
[Analyze grammar]

tadatadbhāvabhūtaṃ hi tathedaṃ bhuvanatrayam |
tasminneva sthitaṃ tajjaṃ tasmādeva tadeva ca || 22 ||
[Analyze grammar]

sa eṣa sarvabhūtānāmātmā brahmeti kathyate |
tasmiñjñāte jagajjñātamajñāte'jñātameva tat || 23 ||
[Analyze grammar]

śāstrasaṃvyavahārārthaṃ tasyāsya vitatākṛteḥ |
cidbrahmātmeti nāmāni kalpitāni kṛtātmabhiḥ || 24 ||
[Analyze grammar]

viṣayendriyasaṃyoge harṣāmarṣavivarjitā |
yaiṣā śuddhānubhūtirhi so'yamātmā cidavyayaḥ || 25 ||
[Analyze grammar]

ākāśātitarācchācchamidaṃ tasmiṃścidātmani |
svābhoga eva hi jagatpṛthagvatpratibimbati || 26 ||
[Analyze grammar]

buddhāstadvyatirekeṇa lobhamohādayo'ritām |
yāntyathāvyatirekeṇa buddhāstasmiṃstadaiva te || 27 ||
[Analyze grammar]

adehasyaiva te nāma nirvikalpacidākṛteḥ |
lajjābhayaviṣādākhyaḥ kuto mohaḥ samutthitaḥ || 28 ||
[Analyze grammar]

adeho dehajairdoṣairlajjādibhirasanmayaiḥ |
kiṃ mūrkha iva durbuddhe vikalpairabhibhūyase || 29 ||
[Analyze grammar]

akhaṇḍacitirūpasya dehe khaṇḍanamāgate |
asamyagdarśino'pyasti na nāśaḥ kimu sanmateḥ || 30 ||
[Analyze grammar]

yadetadarkamārge'pi na viruddhagamāgamam |
cittvaṃ rāma sa vijñeyaḥ puruṣo na śarīrakam || 31 ||
[Analyze grammar]

śarīre satyasati vā pumāneṣa jagattraye |
jño'pyajño'pi sthito rāma naṣṭe dehe na naśyati || 32 ||
[Analyze grammar]

yānīmāni vicitrāṇi duḥkhāni paripaśyasi |
tāni sarvāṇi dehasya nāgrāhyasya cidātmanaḥ || 33 ||
[Analyze grammar]

manomargādatītatvād yāsau śūnyamiva sthitā |
citkathaṃ nāma sā duḥkhaiḥ sukhairvā parigṛhyate || 34 ||
[Analyze grammar]

saṃvidātmā tadasmāttu viśiṣṭāddehapañjarāt |
abhyastāṃ vāsanāṃ yāti ṣaṭpadaḥ khamivāmbujāt || 35 ||
[Analyze grammar]

asaccedātmatattvaṃ tadasmiṃste dehapañjare |
naṣṭe kiṃ nāma naṣṭaṃ syād rāma yenānuśocasi || 36 ||
[Analyze grammar]

satyaṃ bhāvaya tena tvaṃ mā mohamanubhāvaya |
niricchasyātmano necchāḥ kāścidapyanaghākṛteḥ || 37 ||
[Analyze grammar]

sākṣibhūte same svacche nirvikalpe cidātmani |
svayaṃ jaganti dṛśyante sanmaṇāviva raśmayaḥ || 38 ||
[Analyze grammar]

niricchamabhisambandho yathā darpaṇabimbayoḥ |
svabhāvavaśasampannastathā cijjagatorayam || 39 ||
[Analyze grammar]

dvitvaikatve sthite yadvarmakurapratibimbayoḥ |
tathaivehātmajagatorbhedābhedau vyavasthitau || 40 ||
[Analyze grammar]

sūryasannidhimātre tu yathodeti bhuvi kriyā |
citsattāmātrakenedaṃ jaganniṣpadyate tathā || 41 ||
[Analyze grammar]

piṇḍagrahe nivṛtte'syā evaṃ rāma jagatsthiteḥ |
ākāśameṣā sampannā bhavatāmapi cetasi || 42 ||
[Analyze grammar]

sattāmātreṇa dīpasya yathā dīptiḥ svabhāvataḥ |
cittattvasya svabhāvāttu tatheyaṃ jāgatī kriyā || 43 ||
[Analyze grammar]

pūrvaṃ manaḥ samuditaṃ paramātmatattvāttenātataṃ jagadidaṃ svavikalpajālam |
śūnyena śūnyamamalena yathāmbareṇa nīlatvamullasati cārulatābhirāmam || 44 ||
[Analyze grammar]

saṅkalpasaṅkṣayavaśādgalite tu citte saṃsāramohamihikā galitā bhavanti |
svacchaṃ vibhāti śaradīva khamāśritāyāṃ cinmātramekamajamādyamanantamantaḥ || 45 ||
[Analyze grammar]

karmātmakaṃ prathamameva mano'bhyudeti saṅkalpataḥ kamalajaprakṛtiṃ tadetya |
nānāvidhaṃ jagadanantamidaṃ tanoti vetāladehakalanāmiva mugdhabālaḥ || 46 ||
[Analyze grammar]

asanmayaṃ sadiva puropalakṣyate punarbhavatyatha parilīyate punaḥ |
svayaṃ manaściti vitataṃ sphuradvapurmahārṇave jalavalayāvalī yathā || 47 ||
[Analyze grammar]